৩. ততিযৱগ্গো

১. মাতুগামসুত্তং

১৭০. সাৱত্থিযং ৱিহৰতি…পে… ‘‘দাৰুণো, ভিক্খৱে, লাভসক্কাৰসিলোকো…পে… ন তস্স, ভিক্খৱে, মাতুগামো একো একস্স চিত্তং পৰিযাদায তিট্ঠতি যস্স লাভসক্কাৰসিলোকো চিত্তং পৰিযাদায তিট্ঠতি. এৱং দাৰুণো খো, ভিক্খৱে, লাভসক্কাৰসিলোকো …পে… এৱঞ্হি ৱো, ভিক্খৱে, সিক্খিতব্ব’’ন্তি. পঠমং.

২. কল্যাণীসুত্তং

১৭১. সাৱত্থিযং ৱিহৰতি…পে… ‘‘দাৰুণো, ভিক্খৱে, লাভসক্কাৰসিলোকো…পে… ন তস্স, ভিক্খৱে, জনপদকল্যাণী একা একস্স চিত্তং পৰিযাদায তিট্ঠতি যস্স লাভসক্কাৰসিলোকো চিত্তং পৰিযাদায তিট্ঠতি. এৱং দাৰুণো খো, ভিক্খৱে, লাভসক্কাৰসিলোকো…পে… এৱঞ্হি ৱো, ভিক্খৱে, সিক্খিতব্ব’’ন্তি. দুতিযং.

৩. একপুত্তকসুত্তং

১৭২. সাৱত্থিযং ৱিহৰতি…পে… ‘‘দাৰুণো, ভিক্খৱে, লাভসক্কাৰসিলোকো…পে… সদ্ধা, ভিক্খৱে, উপাসিকা একপুত্তকং পিযং মনাপং এৱং সম্মা আযাচমানা আযাচেয্য – ‘তাদিসো, তাত, ভৱাহি যাদিসো চিত্তো চ গহপতি হত্থকো চ আড়ৱকো’তি. এসা, ভিক্খৱে, তুলা এতং পমাণং মম সাৱকানং উপাসকানং, যদিদং চিত্তো চ গহপতি হত্থকো চ আড়ৱকো. সচে খো ত্ৱং, তাত, অগাৰস্মা অনগাৰিযং পব্বজসি; তাদিসো, তাত, ভৱাহি যাদিসা সাৰিপুত্তমোগ্গল্লানাতি. এসা, ভিক্খৱে, তুলা এতং পমাণং মম সাৱকানং ভিক্খূনং, যদিদং সাৰিপুত্তমোগ্গলানা. মা চ খো ত্ৱং, তাত, সেখং অপ্পত্তমানসং লাভসক্কাৰসিলোকো অনুপাপুণাতূতি. তঞ্চে, ভিক্খৱে, ভিক্খুং সেখং অপ্পত্তমানসং লাভসক্কাৰসিলোকো অনুপাপুণাতি, সো তস্স হোতি অন্তৰাযায. এৱং দাৰুণো খো, ভিক্খৱে, লাভসক্কাৰসিলোকো…পে… এৱঞ্হি ৱো, ভিক্খৱে, সিক্খিতব্ব’’ন্তি. ততিযং.

৪. একধীতুসুত্তং

১৭৩. সাৱত্থিযং ৱিহৰতি…পে… ‘‘দাৰুণো, ভিক্খৱে, লাভসক্কাৰসিলোকো…পে… সদ্ধা ভিক্খৱে উপাসিকা একং ধীতৰং পিযং মনাপং এৱং সম্মা আযাচমানা আযাচেয্য – ‘তাদিসা, অয্যে, ভৱাহি যাদিসা খুজ্জুত্তৰা চ উপাসিকা ৱেড়ুকণ্ডকিযা [ৱেড়ুকণ্ডকী (সী. ছক্কঙ্গুত্তৰেপি)] চ নন্দমাতা’তি. এসা, ভিক্খৱে, তুলা এতং পমাণং মম সাৱিকানং উপাসিকানং, যদিদং খুজ্জুত্তৰা চ উপাসিকা ৱেড়ুকণ্ডকিযা চ নন্দমাতা. সচে খো ত্ৱং, অয্যে, অগাৰস্মা অনগাৰিযং পব্বজসি; তাদিসা, অয্যে, ভৱাহি যাদিসা খেমা চ ভিক্খুনী উপ্পলৱণ্ণা চাতি. এসা, ভিক্খৱে, তুলা এতং পমাণং মম সাৱিকানং ভিক্খুনীনং, যদিদং খেমা চ ভিক্খুনী উপ্পলৱণ্ণা চ. মা চ খো ত্ৱং, অয্যে, সেখং অপ্পত্তমানসং লাভসক্কাৰসিলোকো অনুপাপুণাতূতি. তং চে, ভিক্খৱে, ভিক্খুনিং সেখং অপ্পত্তমানসং লাভসক্কাৰসিলোকো অনুপাপুণাতি, সো তস্সা হোতি অন্তৰাযায. এৱং দাৰুণো খো, ভিক্খৱে, লাভসক্কাৰসিলোকো…পে… এৱঞ্হি ৱো, ভিক্খৱে, সিক্খিতব্ব’’ন্তি. চতুত্থং.

৫. সমণব্ৰাহ্মণসুত্তং

১৭৪. সাৱত্থিযং ৱিহৰতি…পে… ‘‘যে হি কেচি, ভিক্খৱে, সমণা ৱা ব্ৰাহ্মণা ৱা লাভসক্কাৰসিলোকস্স অস্সাদঞ্চ আদীনৱঞ্চ নিস্সৰণঞ্চ যথাভূতং নপ্পজানন্তি, ন মে তে, ভিক্খৱে, সমণা ৱা ব্ৰাহ্মণা ৱা সমণেসু ৱা সমণসম্মতা ব্ৰাহ্মণেসু ৱা ব্ৰাহ্মণসম্মতা, ন চ পন তে আযস্মন্তা সামঞ্ঞত্থং ৱা ব্ৰহ্মঞ্ঞত্থং ৱা দিট্ঠেৱ ধম্মে সযং অভিঞ্ঞা সচ্ছিকত্ৱা উপসম্পজ্জ ৱিহৰন্তি. যে চ খো কেচি, ভিক্খৱে, সমণা ৱা ব্ৰাহ্মণা ৱা লাভসক্কাৰসিলোকস্স অস্সাদঞ্চ আদীনৱঞ্চ নিস্সৰণঞ্চ যথাভূতং পজানন্তি, তে চ খো মে, ভিক্খৱে, সমণা ৱা ব্ৰাহ্মণা ৱা সমণেসু চেৱ সমণসম্মতা ব্ৰাহ্মণেসু চ ব্ৰাহ্মণসম্মতা, তে চ পনাযস্মন্তো সামঞ্ঞত্থঞ্চ ব্ৰহ্মঞ্ঞত্থঞ্চ দিট্ঠেৱ ধম্মে সযং অভিঞ্ঞা সচ্ছিকত্ৱা উপসম্পজ্জ ৱিহৰন্তী’’তি. পঞ্চমং.

৬. দুতিযসমণব্ৰাহ্মণসুত্তং

১৭৫. সাৱত্থিযং ৱিহৰতি…পে… ‘‘যে হি কেচি, ভিক্খৱে, সমণা ৱা ব্ৰাহ্মণা ৱা লাভসক্কাৰসিলোকস্স সমুদযঞ্চ অত্থঙ্গমঞ্চ অস্সাদঞ্চ আদীনৱঞ্চ নিস্সৰণঞ্চ যথাভূতং নপ্পজানন্তি…পে… পজানন্তি…পে… সযং অভিঞ্ঞা সচ্ছিকত্ৱা উপসম্পজ্জ ৱিহৰন্তী’’তি. ছট্ঠং.

৭. ততিযসমণব্ৰাহ্মণসুত্তং

১৭৬. সাৱত্থিযং ৱিহৰতি…পে… ‘‘যে হি কেচি, ভিক্খৱে, সমণা ৱা ব্ৰাহ্মণা ৱা লাভসক্কাৰসিলোকং যথাভূতং নপ্পজানন্তি, লাভসক্কাৰসিলোকসমুদযং নপ্পজানন্তি, লাভসক্কাৰসিলোকনিৰোধং নপ্পজানন্তি, লাভসক্কাৰসিলোকনিৰোধগামিনিং পটিপদং নপ্পজানন্তি …পে… পজানন্তি…পে… সযং অভিঞ্ঞা সচ্ছিকত্ৱা উপসম্পজ্জ ৱিহৰন্তী’’তি. সত্তমং.

৮. ছৱিসুত্তং

১৭৭. সাৱত্থিযং ৱিহৰতি…পে… ‘‘দাৰুণো, ভিক্খৱে, লাভসক্কাৰসিলোকো. লাভসক্কাৰসিলোকো, ভিক্খৱে, ছৱিং ছিন্দতি, ছৱিং ছেত্ৱা চম্মং ছিন্দতি, চম্মং ছেত্ৱা মংসং ছিন্দতি, মংসং ছেত্ৱা ন্হাৰুং ছিন্দতি, ন্হাৰুং ছেত্ৱা অট্ঠিং ছিন্দতি, অট্ঠিং ছেত্ৱা অট্ঠিমিঞ্জং আহচ্চ তিট্ঠতি. এৱং দাৰুণো খো, ভিক্খৱে, লাভসক্কাৰসিলোকো…পে… এৱঞ্হি ৱো ভিক্খৱে, সিক্খিতব্ব’’ন্তি. অট্ঠমং.

৯. ৰজ্জুসুত্তং

১৭৮. সাৱত্থিযং ৱিহৰতি…পে… ‘‘দাৰুণো, ভিক্খৱে, লাভসক্কাৰসিলোকো. লাভসক্কাৰসিলোকো, ভিক্খৱে, ছৱিং ছিন্দতি, ছৱিং ছেত্ৱা চম্মং ছিন্দতি, চম্মং ছেত্ৱা মংসং ছিন্দতি, মংসং ছেত্ৱা ন্হাৰুং ছিন্দতি, ন্হাৰুং ছেত্ৱা অট্ঠিং ছিন্দতি, অট্ঠিং ছেত্ৱা অট্ঠিমিঞ্জং আহচ্চ তিট্ঠতি’’.

‘‘সেয্যথাপি, ভিক্খৱে, বলৱা পুৰিসো দড়্হায ৱাড়ৰজ্জুযা জঙ্ঘং ৱেঠেত্ৱা ঘংসেয্য. সা ছৱিং ছিন্দেয্য, ছৱিং ছেত্ৱা চম্মং ছিন্দেয্য, চম্মং ছেত্ৱা মংসং ছিন্দেয্য, মংসং ছেত্ৱা ন্হাৰুং ছিন্দেয্য, ন্হাৰুং ছেত্ৱা অট্ঠিং ছিন্দেয্য, অট্ঠিং ছেত্ৱা অট্ঠিমিঞ্জং আহচ্চ তিট্ঠেয্য. এৱমেৱ খো, ভিক্খৱে, লাভসক্কাৰসিলোকো ছৱিং ছিন্দতি, ছৱিং ছেত্ৱা চম্মং ছিন্দতি, চম্মং ছেত্ৱা মংসং ছিন্দতি, মংসং ছেত্ৱা ন্হাৰুং ছিন্দতি, ন্হাৰুং ছেত্ৱা অট্ঠিং ছিন্দতি, অট্ঠিং ছেত্ৱা অট্ঠিংমিঞ্জং আহচ্চ তিট্ঠতি. এৱং দাৰুণো খো, ভিক্খৱে, লাভসক্কাৰসিলোকো…পে… এৱঞ্হি ৱো, ভিক্খৱে, সিক্খিতব্ব’’ন্তি. নৱমং.

১০. ভিক্খুসুত্তং

১৭৯. সাৱত্থিযং ৱিহৰতি…পে… ‘‘যোপি সো, ভিক্খৱে, ভিক্খু অৰহং খীণাসৱো তস্সপাহং লাভসক্কাৰসিলোকো অন্তৰাযায ৱদামী’’তি. এৱং ৱুত্তে, আযস্মা আনন্দো ভগৱন্তং এতদৱোচ – ‘‘কিস্স পন, ভন্তে, খীণাসৱস্স ভিক্খুনো লাভসক্কাৰসিলোকো অন্তৰাযাযা’’তি? ‘‘যা হিস্স সা, আনন্দ, অকুপ্পা চেতোৱিমুত্তি নাহং তস্সা লাভসক্কাৰসিলোকং অন্তৰাযায ৱদামি. যে চ খ্ৱস্স, আনন্দ, অপ্পমত্তস্স আতাপিনো পহিতত্তস্স ৱিহৰতো দিট্ঠধম্মসুখৱিহাৰা অধিগতা তেসাহমস্স লাভসক্কাৰসিলোকং অন্তৰাযায ৱদামি. এৱং দাৰুণো খো, আনন্দ, লাভসক্কাৰসিলোকো কটুকো ফৰুসো অন্তৰাযিকো অনুত্তৰস্স যোগক্খেমস্স অধিগমায. তস্মাতিহানন্দ, এৱং সিক্খিতব্বং – ‘উপ্পন্নং লাভসক্কাৰসিলোকং পজহিস্সাম, ন চ নো উপ্পন্নো লাভসক্কাৰসিলোকো চিত্তং পৰিযাদায ঠস্সতী’তি. এৱঞ্হি ৱো, আনন্দ, সিক্খিতব্ব’’ন্তি. দসমং.

ততিযো ৱগ্গো.

তস্সুদ্দানং –

মাতুগামো চ কল্যাণী, পুত্তো চ একধীতু চ;

সমণব্ৰাহ্মণা তীণি, ছৱি ৰজ্জু চ ভিক্খুনাতি.