৪. চতুত্থৱগ্গো

১. ভিন্দিসুত্তং

১৮০. সাৱত্থিযং ৱিহৰতি…পে… ‘‘দাৰুণো, ভিক্খৱে, লাভসক্কাৰসিলোকো. লাভসক্কাৰসিলোকেন অভিভূতো পৰিযাদিণ্ণচিত্তো, ভিক্খৱে, দেৱদত্তো সঙ্ঘং ভিন্দি. এৱং দাৰুণো খো, ভিক্খৱে, লাভসক্কাৰসিলোকো…পে… সিক্খিতব্ব’’ন্তি. পঠমং.

২. কুসলমূলসুত্তং

১৮১. সাৱত্থিযং ৱিহৰতি…পে… ‘‘দাৰুণো, ভিক্খৱে, লাভসক্কাৰসিলোকো. লাভসক্কাৰসিলোকেন অভিভূতস্স পৰিযাদিণ্ণচিত্তস্স, ভিক্খৱে, দেৱদত্তস্স কুসলমূলং সমুচ্ছেদমগমা. এৱং দাৰুণো খো, ভিক্খৱে, লাভসক্কাৰসিলোকো…পে… সিক্খিতব্ব’’ন্তি. দুতিযং.

৩. কুসলধম্মসুত্তং

১৮২. সাৱত্থিযং ৱিহৰতি…পে… ‘‘দাৰুণো, ভিক্খৱে, লাভসক্কাৰসিলোকো. লাভসক্কাৰসিলোকেন অভিভূতস্স পৰিযাদিণ্ণচিত্তস্স, ভিক্খৱে, দেৱদত্তস্স কুসলো ধম্মো সমুচ্ছেদমগমা. এৱং দাৰুণো খো, ভিক্খৱে, লাভসক্কাৰসিলোকো…পে… সিক্খিতব্ব’’ন্তি. ততিযং.

৪. সুক্কধম্মসুত্তং

১৮৩. সাৱত্থিযং ৱিহৰতি…পে… ‘‘দাৰুণো, ভিক্খৱে, লাভসক্কাৰসিলোকো. লাভসক্কাৰসিলোকেন অভিভূতস্স পৰিযাদিণ্ণচিত্তস্স, ভিক্খৱে, দেৱদত্তস্স সুক্কো ধম্মো সমুচ্ছেদমগমা. এৱং দাৰুণো খো, ভিক্খৱে, লাভসক্কাৰসিলোকো…পে… সিক্খিতব্ব’’ন্তি. চতুত্থং.

৫. অচিৰপক্কন্তসুত্তং

১৮৪. একং সমযং ভগৱা ৰাজগহে ৱিহৰতি গিজ্ঝকূটে পব্বতে অচিৰপক্কন্তে দেৱদত্তে. তত্ৰ খো ভগৱা দেৱদত্তং আৰব্ভ ভিক্খূ আমন্তেসি – ‘‘অত্তৱধায, ভিক্খৱে, দেৱদত্তস্স লাভসক্কাৰসিলোকো উদপাদি, পৰাভৱায দেৱদত্তস্স লাভসক্কাৰসিলোকো উদপাদি’’.

‘‘সেয্যথাপি, ভিক্খৱে, কদলী অত্তৱধায ফলং দেতি, পৰাভৱায ফলং দেতি; এৱমেৱ খো, ভিক্খৱে, অত্তৱধায দেৱদত্তস্স লাভসক্কাৰসিলোকো উদপাদি, পৰাভৱায দেৱদত্তস্স লাভসক্কাৰসিলোকো উদপাদি.

‘‘সেয্যথাপি, ভিক্খৱে, ৱেড়ু অত্তৱধায ফলং দেতি, পৰাভৱায ফলং দেতি; এৱমেৱ খো, ভিক্খৱে, অত্তৱধায দেৱদত্তস্স লাভসক্কাৰসিলোকো উদপাদি, পৰাভৱায দেৱদত্তস্স লাভসক্কাৰসিলোকো উদপাদি.

‘‘সেয্যথাপি, ভিক্খৱে, নড়ো অত্তৱধায ফলং দেতি, পৰাভৱায ফলং দেতি; এৱমেৱ খো, ভিক্খৱে, অত্তৱধায দেৱদত্তস্স লাভসক্কাৰসিলোকো উদপাদি, পৰাভৱায দেৱদত্তস্স লাভসক্কাৰসিলোকো উদপাদি.

‘‘সেয্যথাপি, ভিক্খৱে, অস্সতৰী অত্তৱধায গব্ভং গণ্হাতি, পৰাভৱায গব্ভং গণ্হাতি; এৱমেৱ খো, ভিক্খৱে, অত্তৱধায দেৱদত্তস্স লাভসক্কাৰসিলোকো উদপাদি, পৰাভৱায দেৱদত্তস্স লাভসক্কাৰসিলোকো উদপাদি. এৱং দাৰুণো খো, ভিক্খৱে, লাভসক্কাৰসিলোকো. এৱঞ্হি ৱো, ভিক্খৱে, সিক্খিতব্ব’’ন্তি.

ইদমৱোচ ভগৱা. ইদং ৱত্ৱান সুগতো অথাপৰং এতদৱোচ সত্থা –

‘‘ফলং ৱে কদলিং হন্তি, ফলং ৱেড়ুং ফলং নড়ং;

সক্কাৰো কাপুৰিসং হন্তি, গব্ভো অস্সতৰিং যথাতি’’. পঞ্চমং;

৬. পঞ্চৰথসতসুত্তং

১৮৫. ৰাজগহে ৱিহৰতি ৱেড়ুৱনে কলন্দকনিৱাপে. তেন খো পন সমযেন দেৱদত্তস্স অজাতসত্তুকুমাৰো পঞ্চহি ৰথসতেহি সাযং পাতং উপট্ঠানং গচ্ছতি, পঞ্চ চ থালিপাকসতানি ভত্তাভিহাৰো অভিহৰীযতি. অথ খো সম্বহুলা ভিক্খূ যেন ভগৱা তেনুপসঙ্কমিংসু; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদিংসু. একমন্তং নিসিন্না খো তে ভিক্খূ ভগৱন্তং এতদৱোচুং – ‘‘দেৱদত্তস্স, ভন্তে, অজাতসত্তুকুমাৰো পঞ্চহি ৰথসতেহি সাযং পাতং উপট্ঠানং গচ্ছতি, পঞ্চ চ থালিপাকসতানি ভত্তাভিহাৰো অভিহৰীযতী’’তি. ‘‘মা, ভিক্খৱে, দেৱদত্তস্স লাভসক্কাৰসিলোকং পিহযিত্থ. যাৱকীৱঞ্চ, ভিক্খৱে, দেৱদত্তস্স অজাতসত্তুকুমাৰো পঞ্চহি ৰথসতেহি সাযং পাতং উপট্ঠানং গমিস্সতি, পঞ্চ চ থালিপাকসতানি ভত্তাভিহাৰো আহৰীযিস্সতি, হানিযেৱ, ভিক্খৱে, দেৱদত্তস্স পাটিকঙ্খা কুসলেসু ধম্মেসু, নো ৱুদ্ধি’’.

‘‘সেয্যথাপি, ভিক্খৱে, চণ্ডস্স কুক্কুৰস্স নাসায পিত্তং ভিন্দেয্যুং, এৱঞ্হি সো, ভিক্খৱে, কুক্কুৰো ভিয্যোসোমত্তায চণ্ডতৰো অস্স; এৱমেৱ, ভিক্খৱে, যাৱকীৱঞ্চ দেৱদত্তস্স অজাতসত্তুকুমাৰো পঞ্চহি ৰথসতেহি সাযং পাতং উপট্ঠানং গমিস্সতি, পঞ্চ চ থালিপাকসতানি ভত্তাভিহাৰো আহৰীযিস্সতি, হানিযেৱ, ভিক্খৱে, দেৱদত্তস্স পাটিকঙ্খা কুসলেসু ধম্মেসু, নো ৱুদ্ধি. এৱং দাৰুণো খো, ভিক্খৱে, লাভসক্কাৰসিলোকো…পে… এৱঞ্হি ৱো, ভিক্খৱে, সিক্খিতব্ব’’ন্তি. ছট্ঠং.

৭. মাতুসুত্তং

১৮৬. সাৱত্থিযং ৱিহৰতি…পে… ‘‘দাৰুণো, ভিক্খৱে, লাভসক্কাৰসিলোকো কটুকো ফৰুসো অন্তৰাযিকো অনুত্তৰস্স যোগক্খেমস্স অধিগমায. ইধাহং, ভিক্খৱে, একচ্চং পুগ্গলং এৱং চেতসা চেতো পৰিচ্চ পজানামি – ‘ন চাযমাযস্মা মাতুপি হেতু সম্পজানমুসা ভাসেয্যা’তি. তমেনং পস্সামি অপৰেন সমযেন লাভসক্কাৰসিলোকেন অভিভূতং পৰিযাদিণ্ণচিত্তং সম্পজানমুসা ভাসন্তং. এৱং দাৰুণো খো, ভিক্খৱে, লাভসক্কাৰসিলোকো কটুকো ফৰুসো অন্তৰাযিকো অনুত্তৰস্স যোগক্খেমস্স অধিগমায. তস্মাতিহ, ভিক্খৱে, এৱং সিক্খিতব্বং – ‘উপ্পন্নং লাভসক্কাৰসিলোকং পজহিস্সাম. ন চ নো উপ্পন্নো লাভসক্কাৰসিলোকো চিত্তং পৰিযাদায ঠস্সতী’তি. এৱঞ্হি ৱো, ভিক্খৱে, সিক্খিতব্ব’’ন্তি. সত্তমং.

৮-১৩. পিতুসুত্তাদিছক্কং

১৮৭. সাৱত্থিযং ৱিহৰতি…পে… ‘‘দাৰুণো, ভিক্খৱে, লাভসক্কাৰসিলোকো কটুকো ফৰুসো অন্তৰাযিকো অনুত্তৰস্স যোগক্খেমস্স অধিগমায. ইধাহং, ভিক্খৱে, একচ্চং পুগ্গলং এৱং চেতসা চেতো পৰিচ্চ পজানামি – ‘ন চাযমাযস্মা পিতুপি হেতু…পে… ভাতুপি হেতু… ভগিনিযাপি হেতু… পুত্তস্সপি হেতু… ধীতুযাপি হেতু… পজাপতিযাপি হেতু সম্পজানমুসা ভাসেয্যা’তি. তমেনং পস্সামি অপৰেন সমযেন লাভসক্কাৰসিলোকেন অভিভূতং পৰিযাদিণ্ণচিত্তং সম্পজানমুসা ভাসন্তং. এৱং দাৰুণো খো, ভিক্খৱে, লাভসক্কাৰসিলোকো কটুকো ফৰুসো অন্তৰাযিকো অনুত্তৰস্স যোগক্খেমস্স অধিগমায. তস্মাতিহ, ভিক্খৱে, এৱং সিক্খিতব্বং – ‘উপ্পন্নং লাভসক্কাৰসিলোকং পজহিস্সাম, ন চ নো উপ্পন্নো লাভসক্কাৰসিলোকো চিত্তং পৰিযাদায ঠস্সতী’তি. এৱঞ্হি ৱো, ভিক্খৱে, সিক্খিতব্ব’’ন্তি. তেৰসমং.

চতুত্থো ৱগ্গো.

তস্সুদ্দানং –

ভিন্দি মূলং দুৱে ধম্মা, পক্কন্তং ৰথ মাতৰি;

পিতা ভাতা চ ভগিনী, পুত্তো ধীতা পজাপতীতি.

লাভসক্কাৰসংযুত্তং সমত্তং.