৫. মীড়্হকসুত্তং

১৬১. সাৱত্থিযং ৱিহৰতি…পে… ‘‘দাৰুণো, ভিক্খৱে, লাভসক্কাৰসিলোকো…পে… অধিগমায. সেয্যথাপি, ভিক্খৱে, মীড়্হকা গূথাদী গূথপূৰা পুণ্ণা গূথস্স. পুৰতো চস্স মহাগূথপুঞ্জো. সা তেন অঞ্ঞা মীড়্হকা অতিমঞ্ঞেয্য – ‘অহম্হি গূথাদী গূথপূৰা পুণ্ণা গূথস্স, পুৰতো চ ম্যাযং মহাগূথপুঞ্জো’তি. এৱমেৱ খো, ভিক্খৱে, ইধেকচ্চো ভিক্খু লাভসক্কাৰসিলোকেন অভিভূতো পৰিযাদিণ্ণচিত্তো পুব্বণ্হসমযং নিৱাসেত্ৱা পত্তচীৱৰমাদায গামং ৱা নিগমং ৱা পিণ্ডায পৱিসতি. সো তত্থ ভুত্তাৱী চ হোতি যাৱদত্থো, নিমন্তিতো চ স্ৱাতনায, পিণ্ডপাতো চস্স পূৰো. সো আৰামং গন্ত্ৱা ভিক্খুগণস্স মজ্ঝে ৱিকত্থতি – ‘ভুত্তাৱী চম্হি যাৱদত্থো, নিমন্তিতো চম্হি স্ৱাতনায, পিণ্ডপাতো চ ম্যাযং পূৰো, লাভী চম্হি চীৱৰ-পিণ্ডপাত-সেনাসন-গিলানপ্পচ্চয-ভেসজ্জপৰিক্খাৰানং, ইমে পনঞ্ঞে ভিক্খূ অপ্পপুঞ্ঞা অপ্পেসক্খা ন লাভিনো চীৱৰ-পিণ্ডপাতসেনাসন-গিলানপ্পচ্চয-ভেসজ্জ-পৰিক্খাৰান’ন্তি. সো তেন লাভসক্কাৰসিলোকেন অভিভূতো পৰিযাদিণ্ণচিত্তো অঞ্ঞে পেসলে ভিক্খূ অতিমঞ্ঞতি. তঞ্হি তস্স, ভিক্খৱে, মোঘপুৰিসস্স হোতি দীঘৰত্তং অহিতায দুক্খায. এৱং দাৰুণো খো, ভিক্খৱে, লাভসক্কাৰসিলোকো…পে… এৱঞ্হি ৱো ভিক্খৱে, সিক্খিতব্ব’’ন্তি. পঞ্চমং.