১৩. সদ্ধম্মপ্পতিৰূপকসুত্তং

১৫৬. এৱং মে সুতং – একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. অথ খো আযস্মা মহাকস্সপো যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো আযস্মা মহাকস্সপো ভগৱন্তং এতদৱোচ – ‘‘কো নু খো, ভন্তে, হেতু কো পচ্চযো, যেন পুব্বে অপ্পতৰানি চেৱ সিক্খাপদানি অহেসুং বহুতৰা চ ভিক্খূ অঞ্ঞায সণ্ঠহিংসু? কো পন, ভন্তে, হেতু কো পচ্চযো, যেনেতৰহি বহুতৰানি চেৱ সিক্খাপদানি অপ্পতৰা চ ভিক্খূ অঞ্ঞায সণ্ঠহন্তী’’তি? ‘‘এৱঞ্চেতং, কস্সপ, হোতি সত্তেসু হাযমানেসু সদ্ধম্মে অন্তৰধাযমানে, বহুতৰানি চেৱ সিক্খাপদানি হোন্তি অপ্পতৰা চ ভিক্খূ অঞ্ঞায সণ্ঠহন্তি. ন তাৱ, কস্সপ, সদ্ধম্মস্স অন্তৰধানং হোতি যাৱ ন সদ্ধম্মপ্পতিৰূপকং লোকে উপ্পজ্জতি. যতো চ খো, কস্সপ, সদ্ধম্মপ্পতিৰূপকং লোকে উপ্পজ্জতি, অথ সদ্ধম্মস্স অন্তৰধানং হোতি’’.

‘‘সেয্যথাপি, কস্সপ, ন তাৱ জাতৰূপস্স অন্তৰধানং হোতি যাৱ ন জাতৰূপপ্পতিৰূপকং লোকে উপ্পজ্জতি. যতো চ খো, কস্সপ, জাতৰূপপ্পতিৰূপকং লোকে উপ্পজ্জতি, অথ জাতৰূপস্স অন্তৰধানং হোতি. এৱমেৱ খো, কস্সপ, ন তাৱ সদ্ধম্মস্স অন্তৰধানং হোতি যাৱ ন সদ্ধম্মপ্পতিৰূপকং লোকে উপ্পজ্জতি. যতো চ খো, কস্সপ, সদ্ধম্মপ্পতিৰূপকং লোকে উপ্পজ্জতি, অথ সদ্ধম্মস্স অন্তৰধানং হোতি.

‘‘ন খো, কস্সপ, পথৱীধাতু সদ্ধম্মং অন্তৰধাপেতি, ন আপোধাতু সদ্ধম্মং অন্তৰধাপেতি, ন তেজোধাতু সদ্ধম্মং অন্তৰধাপেতি, ন ৱাযোধাতু সদ্ধম্মং অন্তৰধাপেতি; অথ খো ইধেৱ তে উপ্পজ্জন্তি মোঘপুৰিসা যে ইমং সদ্ধম্মং অন্তৰধাপেন্তি. সেয্যথাপি, কস্সপ, নাৱা আদিকেনেৱ ওপিলৱতি; ন খো, কস্সপ, এৱং সদ্ধম্মস্স অন্তৰধানং হোতি.

‘‘পঞ্চ খোমে, কস্সপ, ওক্কমনিযা ধম্মা সদ্ধম্মস্স সম্মোসায অন্তৰধানায সংৱত্তন্তি. কতমে পঞ্চ? ইধ, কস্সপ, ভিক্খূ ভিক্খুনিযো উপাসকা উপাসিকাযো সত্থৰি অগাৰৱা ৱিহৰন্তি অপ্পতিস্সা, ধম্মে অগাৰৱা ৱিহৰন্তি অপ্পতিস্সা, সঙ্ঘে অগাৰৱা ৱিহৰন্তি অপ্পতিস্সা, সিক্খায অগাৰৱা ৱিহৰন্তি অপ্পতিস্সা, সমাধিস্মিং অগাৰৱা ৱিহৰন্তি অপ্পতিস্সা – ইমে খো, কস্সপ, পঞ্চ ওক্কমনিযা ধম্মা সদ্ধম্মস্স সম্মোসায অন্তৰধানায সংৱত্তন্তি.

‘‘পঞ্চ খোমে, কস্সপ, ধম্মা সদ্ধম্মস্স ঠিতিযা অসম্মোসায অনন্তৰধানায সংৱত্তন্তি. কতমে পঞ্চ? ইধ, কস্সপ, ভিক্খূ ভিক্খুনিযো উপাসকা উপাসিকাযো সত্থৰি সগাৰৱা ৱিহৰন্তি সপ্পতিস্সা, ধম্মে সগাৰৱা ৱিহৰন্তি সপ্পতিস্সা, সঙ্ঘে সগাৰৱা ৱিহৰন্তি সপ্পতিস্সা, সিক্খায সগাৰৱা ৱিহৰন্তি সপ্পতিস্সা, সমাধিস্মিং সগাৰৱা ৱিহৰন্তি সপ্পতিস্সা – ইমে খো, কস্সপ, পঞ্চ ধম্মা সদ্ধম্মস্স ঠিতিযা অসম্মোসায অনন্তৰধানায সংৱত্তন্তী’’তি. তেৰসমং.

কস্সপসংযুত্তং সমত্তং.