১০. ৱেপুল্লপব্বতসুত্তং

১৪৩. একং সমযং ভগৱা ৰাজগহে ৱিহৰতি গিজ্ঝকূটে পব্বতে. তত্ৰ খো ভগৱা ভিক্খূ আমন্তেসি – ‘‘ভিক্খৱো’’তি. ‘‘ভদন্তে’’তি তে ভিক্খূ ভগৱতো পচ্চস্সোসুং. ভগৱা এতদৱোচ –

‘‘অনমতগ্গোযং, ভিক্খৱে, সংসাৰো. পুব্বা কোটি ন পঞ্ঞাযতি অৱিজ্জানীৱৰণানং সত্তানং তণ্হাসংযোজনানং সন্ধাৱতং সংসৰতং. ভূতপুব্বং, ভিক্খৱে, ইমস্স ৱেপুল্লস্স পব্বতস্স ‘পাচীনৱংসো’ত্ৱেৱ সমঞ্ঞা উদপাদি. তেন খো পন, ভিক্খৱে, সমযেন মনুস্সানং ‘তিৱৰা’ত্ৱেৱ সমঞ্ঞা উদপাদি. তিৱৰানং, ভিক্খৱে, মনুস্সানং চত্তাৰীস ৱস্সসহস্সানি আযুপ্পমাণং অহোসি. তিৱৰা, ভিক্খৱে, মনুস্সা পাচীনৱংসং পব্বতং চতূহেন আৰোহন্তি, চতূহেন ওৰোহন্তি. তেন খো পন, ভিক্খৱে, সমযেন ককুসন্ধো ভগৱা অৰহং সম্মাসম্বুদ্ধো লোকে উপ্পন্নো হোতি. ককুসন্ধস্স, ভিক্খৱে, ভগৱতো অৰহতো সম্মাসম্বুদ্ধস্স ৱিধুৰসঞ্জীৱং নাম সাৱকযুগং অহোসি অগ্গং ভদ্দযুগং. পস্সথ, ভিক্খৱে, সা চেৱিমস্স পব্বতস্স সমঞ্ঞা অন্তৰহিতা, তে চ মনুস্সা কালঙ্কতা, সো চ ভগৱা পৰিনিব্বুতো. এৱং অনিচ্চা, ভিক্খৱে, সঙ্খাৰা; এৱং অদ্ধুৱা, ভিক্খৱে, সঙ্খাৰা; এৱং অনস্সাসিকা, ভিক্খৱে, সঙ্খাৰা. যাৱঞ্চিদং, ভিক্খৱে, অলমেৱ সব্বসঙ্খাৰেসু নিব্বিন্দিতুং, অলং ৱিৰজ্জিতুং, অলং ৱিমুচ্চিতুং.

‘‘ভূতপুব্বং, ভিক্খৱে, ইমস্স ৱেপুল্লস্স পব্বতস্স ‘ৱঙ্ককো’ত্ৱেৱ সমঞ্ঞা উদপাদি. তেন খো পন, ভিক্খৱে, সমযেন মনুস্সানং ‘ৰোহিতস্সা’ত্ৱেৱ সমঞ্ঞা উদপাদি. ৰোহিতস্সানং, ভিক্খৱে, মনুস্সানং তিংসৱস্সসহস্সানি আযুপ্পমাণং অহোসি. ৰোহিতস্সা, ভিক্খৱে, মনুস্সা ৱঙ্ককং পব্বতং তীহেন আৰোহন্তি, তীহেন ওৰোহন্তি. তেন খো পন, ভিক্খৱে, সমযেন কোণাগমনো ভগৱা অৰহং সম্মাসম্বুদ্ধো লোকে উপ্পন্নো হোতি. কোণাগমনস্স, ভিক্খৱে, ভগৱতো অৰহতো সম্মাসম্বুদ্ধস্স ভিয্যোসুত্তৰং নাম সাৱকযুগং অহোসি অগ্গং ভদ্দযুগং. পস্সথ, ভিক্খৱে, সা চেৱিমস্স পব্বতস্স সমঞ্ঞা অন্তৰহিতা, তে চ মনুস্সা কালঙ্কতা, সো চ ভগৱা পৰিনিব্বুতো. এৱং অনিচ্চা, ভিক্খৱে, সঙ্খাৰা…পে… অলং ৱিমুচ্চিতুং.

‘‘ভূতপুব্বং, ভিক্খৱে, ইমস্স ৱেপুল্লস্স পব্বতস্স ‘সুপস্সো’ত্ৱেৱ [সুফস্সোত্ৱেৱ (সী.)] সমঞ্ঞা উদপাদি. তেন খো পন, ভিক্খৱে, সমযেন মনুস্সানং ‘সুপ্পিযা’ত্ৱেৱ [অপ্পিযাত্ৱেৱ (সী.)] সমঞ্ঞা উদপাদি. সুপ্পিযানং, ভিক্খৱে, মনুস্সানং ৱীসতিৱস্সসহস্সানি আযুপ্পমাণং অহোসি. সুপ্পিযা, ভিক্খৱে, মনুস্সা সুপস্সং পব্বতং দ্ৱীহেন আৰোহন্তি, দ্ৱীহেন ওৰোহন্তি. তেন খো পন, ভিক্খৱে, সমযেন কস্সপো ভগৱা অৰহং সম্মাসম্বুদ্ধো লোকে উপ্পন্নো হোতি. কস্সপস্স, ভিক্খৱে, ভগৱতো অৰহতো সম্মাসম্বুদ্ধস্স তিস্সভাৰদ্ৱাজং নাম সাৱকযুগং অহোসি অগ্গং ভদ্দযুগং. পস্সথ, ভিক্খৱে, সা চেৱিমস্স পব্বতস্স সমঞ্ঞা অন্তৰহিতা, তে চ মনুস্সা কালঙ্কতা, সো চ ভগৱা পৰিনিব্বুতো. এৱং অনিচ্চা, ভিক্খৱে, সঙ্খাৰা; এৱং অদ্ধুৱা, ভিক্খৱে, সঙ্খাৰা…পে… অলং ৱিমুচ্চিতুং.

‘‘এতৰহি খো পন, ভিক্খৱে, ইমস্স ৱেপুল্লস্স পব্বতস্স ‘ৱেপুল্লো’ত্ৱেৱ সমঞ্ঞা উদপাদি. এতৰহি খো পন, ভিক্খৱে, ইমেসং মনুস্সানং ‘মাগধকা’ত্ৱেৱ সমঞ্ঞা উদপাদি. মাগধকানং, ভিক্খৱে, মনুস্সানং অপ্পকং আযুপ্পমাণং পৰিত্তং লহুকং [লহুসং (সী.)]; যো চিৰং জীৱতি সো ৱস্সসতং অপ্পং ৱা ভিয্যো. মাগধকা, ভিক্খৱে, মনুস্সা ৱেপুল্লং পব্বতং মুহুত্তেন আৰোহন্তি মুহুত্তেন ওৰোহন্তি. এতৰহি খো পনাহং, ভিক্খৱে, অৰহং সম্মাসম্বুদ্ধো লোকে উপ্পন্নো. ময্হং খো পন, ভিক্খৱে, সাৰিপুত্তমোগ্গল্লানং নাম সাৱকযুগং অগ্গং ভদ্দযুগং. ভৱিস্সতি, ভিক্খৱে, সো সমযো যা অযঞ্চেৱিমস্স পব্বতস্স সমঞ্ঞা অন্তৰধাযিস্সতি, ইমে চ মনুস্সা কালং কৰিস্সন্তি, অহঞ্চ পৰিনিব্বাযিস্সামি. এৱং অনিচ্চা, ভিক্খৱে, সঙ্খাৰা; এৱং অদ্ধুৱা, ভিক্খৱে, সঙ্খাৰা; এৱং অনস্সাসিকা, ভিক্খৱে, সঙ্খাৰা. যাৱঞ্চিদং, ভিক্খৱে, অলমেৱ সব্বসঙ্খাৰেসু নিব্বিন্দিতুং, অলং ৱিৰজ্জিতুং, অলং ৱিমুচ্চিতু’’ন্তি.

ইদমৱোচ ভগৱা. ইদং ৱত্ৱান সুগতো অথাপৰং এতদৱোচ সত্থা –

‘‘পাচীনৱংসো তিৱৰানং, ৰোহিতস্সান ৱঙ্ককো;

সুপ্পিযানং সুপস্সোতি, মাগধানঞ্চ ৱেপুল্লো.

‘‘অনিচ্চা ৱত সঙ্খাৰা, উপ্পাদৱযধম্মিনো;

উপ্পজ্জিত্ৱা নিৰুজ্ঝন্তি, তেসং ৱূপসমো সুখো’’তি. দসমং;

দুতিযো ৱগ্গো.

তস্সুদ্দানং –

দুগ্গতং সুখিতঞ্চেৱ, তিংস মাতাপিতেন চ;

ভাতা ভগিনী পুত্তো চ, ধীতা ৱেপুল্লপব্বতং.

অনমতগ্গসংযুত্তং সমত্তং.