৭. সাৱকসুত্তং

১৩০. সাৱত্থিযং ৱিহৰতি. অথ খো সম্বহুলা ভিক্খূ যেন ভগৱা…পে… একমন্তং নিসিন্না খো তে ভিক্খূ ভগৱন্তং এতদৱোচুং – ‘‘কীৱবহুকা নু খো, ভন্তে, কপ্পা অব্ভতীতা অতিক্কন্তা’’তি? ‘‘বহুকা খো, ভিক্খৱে, কপ্পা অব্ভতীতা অতিক্কন্তা. তে ন সুকৰা সঙ্খাতুং – ‘এত্তকা কপ্পা ইতি ৱা, এত্তকানি কপ্পসতানি ইতি ৱা, এত্তকানি কপ্পসহস্সানি ইতি ৱা, এত্তকানি কপ্পসতসহস্সানি ইতি ৱা’’’তি.

‘‘সক্কা পন, ভন্তে, উপমং কাতু’’ন্তি? ‘‘সক্কা, ভিক্খৱে’’তি ভগৱা অৱোচ. ‘‘ইধস্সু, ভিক্খৱে, চত্তাৰো সাৱকা ৱস্সসতাযুকা ৱস্সসতজীৱিনো. তে দিৱসে দিৱসে কপ্পসতসহস্সং কপ্পসতসহস্সং অনুস্সৰেয্যুং. অননুস্সৰিতাৱ ভিক্খৱে, তেহি কপ্পা অস্সু, অথ খো তে চত্তাৰো সাৱকা ৱস্সসতাযুকা ৱস্সসতজীৱিনো ৱস্সসতস্স অচ্চযেন কালং কৰেয্যুং. এৱং বহুকা খো, ভিক্খৱে, কপ্পা অব্ভতীতা অতিক্কন্তা. তে ন সুকৰা সঙ্খাতুং – ‘এত্তকা কপ্পা ইতি ৱা, এত্তকানি কপ্পসতানি ইতি ৱা, এত্তকানি কপ্পসহস্সানি ইতি ৱা, এত্তকানি কপ্পসতসহস্সানি ইতি ৱা’তি. তং কিস্স হেতু? অনমতগ্গোযং, ভিক্খৱে, সংসাৰো…পে… অলং ৱিমুচ্চিতু’’ন্তি. সত্তমং.