৮. গঙ্গাসুত্তং

১৩১. ৰাজগহে ৱিহৰতি ৱেড়ুৱনে. অথ খো অঞ্ঞতৰো ব্ৰাহ্মণো যেন ভগৱা তেনুপসঙ্কমি; উপসঙ্কমিত্ৱা ভগৱতা সদ্ধিং সম্মোদি. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদি. একমন্তং নিসিন্নো খো সো ব্ৰাহ্মণো ভগৱন্তং এতদৱোচ – ‘‘কীৱবহুকা নু খো, ভো গোতম, কপ্পা অব্ভতীতা অতিক্কন্তা’’তি? ‘‘বহুকা খো, ব্ৰাহ্মণ, কপ্পা অব্ভতীতা অতিক্কন্তা. তে ন সুকৰা সঙ্খাতুং – ‘এত্তকা কপ্পা ইতি ৱা, এত্তকানি কপ্পসতানি ইতি ৱা, এত্তকানি কপ্পসহস্সানি ইতি ৱা, এত্তকানি কপ্পসতসহস্সানি ইতি ৱা’’’তি.

‘‘সক্কা পন, ভো গোতম, উপমং কাতু’’ন্তি? ‘‘সক্কা, ব্ৰাহ্মণা’’তি ভগৱা অৱোচ. ‘‘সেয্যথাপি, ব্ৰাহ্মণ, যতো চাযং গঙ্গা নদী পভৱতি যত্থ চ মহাসমুদ্দং অপ্পেতি, যা এতস্মিং অন্তৰে ৱালিকা সা ন সুকৰা সঙ্খাতুং – ‘এত্তকা ৱালিকা ইতি ৱা, এত্তকানি ৱালিকসতানি ইতি ৱা, এত্তকানি ৱালিকসহস্সানি ইতি ৱা, এত্তকানি ৱালিকসতসহস্সানি ইতি ৱা’তি. ততো বহুতৰা খো, ব্ৰাহ্মণ, কপ্পা অব্ভতীতা অতিক্কন্তা. তে ন সুকৰা সঙ্খাতুং – ‘এত্তকা কপ্পা ইতি ৱা, এত্তকানি কপ্পসতানি ইতি ৱা, এত্তকানি কপ্পসহস্সানি ইতি ৱা, এত্তকানি কপ্পসতসহস্সানি ইতি ৱা’তি. তং কিস্স হেতু? অনমতগ্গোযং, ব্ৰাহ্মণ, সংসাৰো. পুব্বা কোটি ন পঞ্ঞাযতি অৱিজ্জানীৱৰণানং সত্তানং তণ্হাসংযোজনানং সন্ধাৱতং সংসৰতং. এৱং দীঘৰত্তং খো, ব্ৰাহ্মণ, দুক্খং পচ্চনুভূতং তিব্বং পচ্চনুভূতং ব্যসনং পচ্চনুভূতং, কটসী ৱড্ঢিতা. যাৱঞ্চিদং, ব্ৰাহ্মণ, অলমেৱ সব্বসঙ্খাৰেসু নিব্বিন্দিতুং, অলং ৱিৰজ্জিতুং, অলং ৱিমুচ্চিতু’’ন্তি.

এৱং ৱুত্তে, সো ব্ৰাহ্মণো ভগৱন্তং এতদৱোচ – ‘‘অভিক্কন্তং, ভো গোতম, অভিক্কন্তং, ভো গোতম…পে… উপাসকং মং ভৱং গোতমো ধাৰেতু অজ্জতগ্গে পাণুপেতং সৰণং গত’’ন্তি. অট্ঠমং.