৫. পব্বতসুত্তং

১২৮. সাৱত্থিযং ৱিহৰতি…পে… আৰামে. অথ খো অঞ্ঞতৰো ভিক্খু যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো সো ভিক্খু ভগৱন্তং এতদৱোচ – ‘‘কীৱদীঘো নু খো, ভন্তে, কপ্পো’’তি? ‘‘দীঘো খো, ভিক্খু, কপ্পো. সো ন সুকৰো সঙ্খাতুং এত্তকানি ৱস্সানি ইতি ৱা, এত্তকানি ৱস্সসতানি ইতি ৱা, এত্তকানি ৱস্সসহস্সানি ইতি ৱা, এত্তকানি ৱস্সসতসহস্সানি ইতি ৱা’’তি.

‘‘সক্কা পন, ভন্তে, উপমং কাতু’’ন্তি? ‘‘সক্কা, ভিক্খূ’’তি ভগৱা অৱোচ. ‘‘সেয্যথাপি, ভিক্খু, মহাসেলো পব্বতো যোজনং আযামেন যোজনং ৱিত্থাৰেন যোজনং উব্বেধেন অচ্ছিন্নো অসুসিৰো একগ্ঘনো. তমেনং পুৰিসো ৱস্সসতস্স ৱস্সসতস্স অচ্চযেন কাসিকেন ৱত্থেন সকিং সকিং পৰিমজ্জেয্য. খিপ্পতৰং খো সো, ভিক্খু, মহাসেলো পব্বতো ইমিনা উপক্কমেন পৰিক্খযং পৰিযাদানং গচ্ছেয্য, ন ত্ৱেৱ কপ্পো. এৱং দীঘো, ভিক্খু, কপ্পো. এৱং দীঘানং খো, ভিক্খু, কপ্পানং নেকো কপ্পো সংসিতো, নেকং কপ্পসতং সংসিতং, নেকং কপ্পসহস্সং সংসিতং, নেকং কপ্পসতসহস্সং সংসিতং. তং কিস্স হেতু? অনমতগ্গোযং, ভিক্খু, সংসাৰো. পুব্বা কোটি…পে… যাৱঞ্চিদং, ভিক্খু, অলমেৱ সব্বসঙ্খাৰেসু নিব্বিন্দিতুং, অলং ৱিৰজ্জিতুং, অলং ৱিমুচ্চিতু’’ন্তি. পঞ্চমং.