২. সনিদানসুত্তং

৯৬. সাৱত্থিযং ৱিহৰতি…পে… ‘‘সনিদানং, ভিক্খৱে, উপ্পজ্জতি কামৱিতক্কো, নো অনিদানং; সনিদানং উপ্পজ্জতি ব্যাপাদৱিতক্কো, নো অনিদানং; সনিদানং উপ্পজ্জতি ৱিহিংসাৱিতক্কো, নো অনিদানং’’.

‘‘কথঞ্চ, ভিক্খৱে, সনিদানং উপ্পজ্জতি কামৱিতক্কো, নো অনিদানং; সনিদানং উপ্পজ্জতি ব্যাপাদৱিতক্কো, নো অনিদানং; সনিদানং উপ্পজ্জতি ৱিহিংসাৱিতক্কো, নো অনিদানং? কামধাতুং, ভিক্খৱে, পটিচ্চ উপ্পজ্জতি কামসঞ্ঞা, কামসঞ্ঞং পটিচ্চ উপ্পজ্জতি কামসঙ্কপ্পো, কামসঙ্কপ্পং পটিচ্চ উপ্পজ্জতি কামচ্ছন্দো, কামচ্ছন্দং পটিচ্চ উপ্পজ্জতি কামপৰিড়াহো, কামপৰিড়াহং পটিচ্চ উপ্পজ্জতি কামপৰিযেসনা. কামপৰিযেসনং, ভিক্খৱে, পৰিযেসমানো অস্সুতৱা পুথুজ্জনো তীহি ঠানেহি মিচ্ছা পটিপজ্জতি – কাযেন, ৱাচায, মনসা.

‘‘ব্যাপাদধাতুং, ভিক্খৱে, পটিচ্চ উপ্পজ্জতি ব্যাপাদসঞ্ঞা, ব্যাপাদসঞ্ঞং পটিচ্চ উপ্পজ্জতি ব্যাপাদসঙ্কপ্পো…পে… ব্যাপাদচ্ছন্দো… ব্যাপাদপৰিড়াহো… ব্যাপাদপৰিযেসনা… ব্যাপাদপৰিযেসনং, ভিক্খৱে, পৰিযেসমানো অস্সুতৱা পুথুজ্জনো তীহি ঠানেহি মিচ্ছা পটিপজ্জতি – কাযেন, ৱাচায, মনসা.

‘‘ৱিহিংসাধাতুং, ভিক্খৱে, পটিচ্চ উপ্পজ্জতি ৱিহিংসাসঞ্ঞা; ৱিহিংসাসঞ্ঞং পটিচ্চ উপ্পজ্জতি ৱিহিংসাসঙ্কপ্পো…পে… ৱিহিংসাছন্দো… ৱিহিংসাপৰিড়াহো… ৱিহিংসাপৰিযেসনা… ৱিহিংসাপৰিযেসনং, ভিক্খৱে, পৰিযেসমানো অস্সুতৱা পুথুজ্জনো তীহি ঠানেহি মিচ্ছা পটিপজ্জতি – কাযেন, ৱাচায, মনসা.

‘‘সেয্যথাপি, ভিক্খৱে, পুৰিসো আদিত্তং তিণুক্কং সুক্খে তিণদাযে নিক্খিপেয্য; নো চে হত্থেহি চ পাদেহি চ খিপ্পমেৱ নিব্বাপেয্য. এৱঞ্হি, ভিক্খৱে, যে তিণকট্ঠনিস্সিতা পাণা তে অনযব্যসনং আপজ্জেয্যুং. এৱমেৱ খো, ভিক্খৱে, যো হি কোচি সমণো ৱা ব্ৰাহ্মণো ৱা উপ্পন্নং ৱিসমগতং সঞ্ঞং ন খিপ্পমেৱ পজহতি ৱিনোদেতি ব্যন্তীকৰোতি অনভাৱং গমেতি, সো দিট্ঠে চেৱ ধম্মে দুক্খং ৱিহৰতি সৱিঘাতং সউপাযাসং সপৰিড়াহং; কাযস্স চ ভেদা পৰং মৰণা দুগ্গতি পাটিকঙ্খা.

‘‘সনিদানং, ভিক্খৱে, উপ্পজ্জতি নেক্খম্মৱিতক্কো, নো অনিদানং; সনিদানং উপ্পজ্জতি অব্যাপাদৱিতক্কো, নো অনিদানং; সনিদানং উপ্পজ্জতি অৱিহিংসাৱিতক্কো, নো অনিদানং.

‘‘কথঞ্চ, ভিক্খৱে, সনিদানং উপ্পজ্জতি নেক্খম্মৱিতক্কো, নো অনিদানং; সনিদানং উপ্পজ্জতি অব্যাপাদৱিতক্কো, নো অনিদানং; সনিদানং উপ্পজ্জতি অৱিহিংসাৱিতক্কো, নো অনিদানং? নেক্খম্মধাতুং, ভিক্খৱে, পটিচ্চ উপ্পজ্জতি নেক্খম্মসঞ্ঞা, নেক্খম্মসঞ্ঞং পটিচ্চ উপ্পজ্জতি নেক্খম্মসঙ্কপ্পো, নেক্খম্মসঙ্কপ্পং পটিচ্চ উপ্পজ্জতি নেক্খম্মচ্ছন্দো, নেক্খম্মচ্ছন্দং পটিচ্চ উপ্পজ্জতি নেক্খম্মপৰিড়াহো, নেক্খম্মপৰিড়াহং পটিচ্চ উপ্পজ্জতি নেক্খম্মপৰিযেসনা; নেক্খম্মপৰিযেসনং, ভিক্খৱে, পৰিযেসমানো সুতৱা অৰিযসাৱকো তীহি ঠানেহি সম্মা পটিপজ্জতি – কাযেন, ৱাচায, মনসা.

‘‘অব্যাপাদধাতুং, ভিক্খৱে, পটিচ্চ উপ্পজ্জতি অব্যাপাদসঞ্ঞা, অব্যাপাদসঞ্ঞং পটিচ্চ উপ্পজ্জতি অব্যাপাদসঙ্কপ্পো…পে… অব্যাপাদচ্ছন্দো… অব্যাপাদপৰিড়াহো… অব্যাপাদপৰিযেসনা, অব্যাপাদপৰিযেসনং, ভিক্খৱে, পৰিযেসমানো সুতৱা অৰিযসাৱকো তীহি ঠানেহি সম্মা পটিপজ্জতি – কাযেন, ৱাচায, মনসা.

‘‘অৱিহিংসাধাতুং, ভিক্খৱে, পটিচ্চ উপ্পজ্জতি অৱিহিংসাসঞ্ঞা, অৱিহিংসাসঞ্ঞং পটিচ্চ উপ্পজ্জতি অৱিহিংসাসঙ্কপ্পো, অৱিহিংসাসঙ্কপ্পং পটিচ্চ উপ্পজ্জতি অৱিহিংসাছন্দো, অৱিহিংসাছন্দং পটিচ্চ উপ্পজ্জতি অৱিহিংসাপৰিড়াহো, অৱিহিংসাপৰিড়াহং পটিচ্চ উপ্পজ্জতি অৱিহিংসাপৰিযেসনা; অৱিহিংসাপৰিযেসনং, ভিক্খৱে, পৰিযেসমানো সুতৱা অৰিযসাৱকো তীহি ঠানেহি সম্মা পটিপজ্জতি – কাযেন, ৱাচায, মনসা.

‘‘সেয্যথাপি, ভিক্খৱে, পুৰিসো আদিত্তং তিণুক্কং সুক্খে তিণদাযে নিক্খিপেয্য; তমেনং হত্থেহি চ পাদেহি চ খিপ্পমেৱ নিব্বাপেয্য. এৱঞ্হি, ভিক্খৱে, যে তিণকট্ঠনিস্সিতা পাণা তে ন অনযব্যসনং আপজ্জেয্যুং. এৱমেৱ খো, ভিক্খৱে, যো হি কোচি সমণো ৱা ব্ৰাহ্মণো ৱা উপ্পন্নং ৱিসমগতং সঞ্ঞং খিপ্পমেৱ পজহতি ৱিনোদেতি ব্যন্তীকৰোতি অনভাৱং গমেতি, সো দিট্ঠে চেৱ ধম্মে সুখং ৱিহৰতি অৱিঘাতং অনুপাযাসং অপৰিড়াহং; কাযস্স চ ভেদা পৰং মৰণা সুগতি পাটিকঙ্খা’’তি. দুতিযং.