৩. গিঞ্জকাৱসথসুত্তং

৯৭. একং সমযং ভগৱা ঞাতিকে ৱিহৰতি গিঞ্জকাৱসথে. তত্ৰ খো ভগৱা ভিক্খূ আমন্তেসি – ‘‘ভিক্খৱো’’তি. ‘‘ভদন্তে’’তি তে ভিক্খূ ভগৱতো পচ্চস্সোসুং. ভগৱা এতদৱোচ –

‘‘ধাতুং, ভিক্খৱে, পটিচ্চ উপ্পজ্জতি সঞ্ঞা, উপ্পজ্জতি দিট্ঠি, উপ্পজ্জতি ৱিতক্কো’’তি. এৱং ৱুত্তে, আযস্মা কচ্চানো [সদ্ধো কচ্চানো (ক.)] ভগৱন্তং এতদৱোচ – ‘‘যাযং, ভন্তে, দিট্ঠি – ‘অসম্মাসম্বুদ্ধেসু সম্মাসম্বুদ্ধা’তি, অযং নু খো, ভন্তে, দিট্ঠি কিং পটিচ্চ পঞ্ঞাযতী’’তি?

‘‘মহতি খো এসা, কচ্চান, ধাতু যদিদং অৱিজ্জাধাতু. হীনং, কচ্চান, ধাতুং পটিচ্চ উপ্পজ্জতি হীনা সঞ্ঞা, হীনা দিট্ঠি, হীনো ৱিতক্কো, হীনা চেতনা, হীনা পত্থনা, হীনো পণিধি, হীনো পুগ্গলো, হীনা ৱাচা; হীনং আচিক্খতি দেসেতি পঞ্ঞপেতি পট্ঠপেতি ৱিৱৰতি ৱিভজতি উত্তানীকৰোতি; হীনা তস্স উপপত্তীতি ৱদামি.

‘‘মজ্ঝিমং, কচ্চান, ধাতুং পটিচ্চ উপ্পজ্জতি মজ্ঝিমা সঞ্ঞা, মজ্ঝিমা দিট্ঠি, মজ্ঝিমো ৱিতক্কো, মজ্ঝিমা চেতনা, মজ্ঝিমা পত্থনা, মজ্ঝিমো পণিধি, মজ্ঝিমো পুগ্গলো, মজ্ঝিমা ৱাচা; মজ্ঝিমং আচিক্খতি দেসেতি পঞ্ঞপেতি পট্ঠপেতি ৱিৱৰতি ৱিভজতি উত্তানীকৰোতি; মজ্ঝিমা তস্স উপপত্তীতি ৱদামি.

‘‘পণীতং, কচ্চান, ধাতুং পটিচ্চ উপ্পজ্জতি পণীতা সঞ্ঞা, পণীতা দিট্ঠি, পণীতো ৱিতক্কো, পণীতা চেতনা, পণীতা পত্থনা, পণীতো পণিধি, পণীতো পুগ্গলো, পণীতা ৱাচা; পণীতং আচিক্খতি দেসেতি পঞ্ঞপেতি পট্ঠপেতি ৱিৱৰতি ৱিভজতি উত্তানীকৰোতি; পণীতা তস্স উপপত্তীতি ৱদামী’’তি. ততিযং.