১০. থেৰনামকসুত্তং

২৪৪. একং সমযং ভগৱা ৰাজগহে ৱিহৰতি ৱেড়ুৱনে কলন্দকনিৱাপে. তেন খো পন সমযেন অঞ্ঞতৰো ভিক্খু থেৰনামকো একৱিহাৰী চেৱ হোতি একৱিহাৰস্স চ ৱণ্ণৱাদী. সো একো গামং পিণ্ডায পৱিসতি একো পটিক্কমতি একো ৰহো নিসীদতি একো চঙ্কমং অধিট্ঠাতি. অথ খো সম্বহুলা ভিক্খূ যেন ভগৱা তেনুপসঙ্কমিংসু; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদিংসু. একমন্তং নিসিন্না খো তে ভিক্খূ ভগৱন্তং এতদৱোচুং – ‘‘ইধ, ভন্তে, অঞ্ঞতৰো ভিক্খু থেৰনামকো একৱিহাৰী একৱিহাৰস্স চ ৱণ্ণৱাদী’’তি.

অথ খো ভগৱা অঞ্ঞতৰং ভিক্খুং আমন্তেসি – ‘‘এহি ত্ৱং, ভিক্খু, মম ৱচনেন থেৰং ভিক্খুং আমন্তেহি – ‘সত্থা তং, আৱুসো থেৰ, আমন্তেতী’’’তি. ‘‘এৱং, ভন্তে’’তি খো সো ভিক্খু ভগৱতো পটিস্সুত্ৱা যেনাযস্মা থেৰো তেনুপসঙ্কমি; উপসঙ্কমিত্ৱা আযস্মন্তং থেৰং এতদৱোচ – ‘‘সত্থা তং, আৱুসো থেৰ, আমন্তেতী’’তি. ‘‘এৱমাৱুসো’’তি খো আযস্মা থেৰো তস্স ভিক্খুনো পটিস্সুত্ৱা যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নং খো আযস্মন্তং থেৰং ভগৱা এতদৱোচ – ‘‘সচ্চং কিৰ ত্ৱং, থেৰ, একৱিহাৰী একৱিহাৰস্স চ ৱণ্ণৱাদী’’তি? ‘‘এৱং, ভন্তে’’. ‘‘যথা কথং পন ত্ৱং, থেৰ, একৱিহাৰী একৱিহাৰস্স চ ৱণ্ণৱাদী’’তি? ‘‘ইধাহং, ভন্তে, একো গামং পিণ্ডায পৱিসামি একো পটিক্কমামি একো ৰহো নিসীদামি একো চঙ্কমং অধিট্ঠামি. এৱং খ্ৱাহং, ভন্তে, একৱিহাৰী একৱিহাৰস্স চ ৱণ্ণৱাদী’’তি.

‘‘অত্থেসো, থেৰ, একৱিহাৰো নেসো নত্থীতি ৱদামি. অপি চ, থেৰ, যথা একৱিহাৰো ৱিত্থাৰেন পৰিপুণ্ণো হোতি তং সুণাহি, সাধুকং মনসি কৰোহি; ভাসিস্সামী’’তি. ‘‘এৱং, ভন্তে’’তি খো…পে…. ‘‘কথঞ্চ, থেৰ, একৱিহাৰো ৱিত্থাৰেন পৰিপুণ্ণো হোতি. ইধ, থেৰ, যং অতীতং তং পহীনং, যং অনাগতং তং পটিনিস্সট্ঠং, পচ্চুপ্পন্নেসু চ অত্তভাৱপটিলাভেসু ছন্দৰাগো সুপ্পটিৱিনীতো. এৱং খো, থেৰ, একৱিহাৰো ৱিত্থাৰেন পৰিপুণ্ণো হোতী’’তি.

ইদমৱোচ ভগৱা. ইদং ৱত্ৱান সুগতো অথাপৰং এতদৱোচ সত্থা –

‘‘সব্বাভিভুং সব্বৱিদুং সুমেধং,

সব্বেসু ধম্মেসু অনূপলিত্তং;

সব্বঞ্জহং তণ্হাক্খযে ৱিমুত্তং,

তমহং নৰং একৱিহাৰীতি ব্ৰূমী’’তি. দসমং;