৯. ৱিঞ্ঞাণসুত্তং

৫৯. সাৱত্থিযং ৱিহৰতি…পে… ‘‘সংযোজনিযেসু, ভিক্খৱে, ধম্মেসু অস্সাদানুপস্সিনো ৱিহৰতো ৱিঞ্ঞাণস্স অৱক্কন্তি হোতি. ৱিঞ্ঞাণপচ্চযা নামৰূপং…পে… এৱমেতস্স কেৱলস্স দুক্খক্খন্ধস্স সমুদযো হোতি’’.

‘‘সেয্যথাপি, ভিক্খৱে, মহাৰুক্খো. তস্স যানি চেৱ মূলানি …পে… এৱমেৱ খো, ভিক্খৱে, সংযোজনিযেসু ধম্মেসু অস্সাদানুপস্সিনো ৱিহৰতো ৱিঞ্ঞাণস্স অৱক্কন্তি হোতি…পে….

‘‘সংযোজনিযেসু, ভিক্খৱে, ধম্মেসু আদীনৱানুপস্সিনো ৱিহৰতো ৱিঞ্ঞাণস্স অৱক্কন্তি ন হোতি. ৱিঞ্ঞাণনিৰোধা নামৰূপনিৰোধো…পে… এৱমেতস্স কেৱলস্স দুক্খক্খন্ধস্স নিৰোধো হোতি.

‘‘সেয্যথাপি, ভিক্খৱে, মহাৰুক্খো. অথ পুৰিসো আগচ্ছেয্য কুদ্দালপিটকং আদায…পে… আযতিং অনুপ্পাদধম্মো. এৱমেৱ খো, ভিক্খৱে, সংযোজনিযেসু ধম্মেসু আদীনৱানুপস্সিনো ৱিহৰতো ৱিঞ্ঞাণস্স অৱক্কন্তি ন হোতি. ৱিঞ্ঞাণস্স নিৰোধা নামৰূপনিৰোধো…পে… এৱমেতস্স কেৱলস্স দুক্খক্খন্ধস্স নিৰোধো হোতী’’তি. নৱমং.