৪. দুতিযসংযোজনসুত্তং

৫৪. সাৱত্থিযং ৱিহৰতি …পে… ‘‘সেয্যথাপি, ভিক্খৱে, তেলঞ্চ পটিচ্চ ৱট্টিঞ্চ পটিচ্চ তেলপ্পদীপো ঝাযেয্য. তত্ৰ পুৰিসো কালেন কালং তেলং আসিঞ্চেয্য ৱট্টিং উপসংহৰেয্য. এৱঞ্হি সো, ভিক্খৱে, তেলপ্পদীপো তদাহাৰো তদুপাদানো চিৰং দীঘমদ্ধানং জলেয্য. এৱমেৱ খো, ভিক্খৱে, সংযোজনিযেসু ধম্মেসু অস্সাদানুপস্সিনো ৱিহৰতো তণ্হা পৱড্ঢতি. তণ্হাপচ্চযা উপাদানং…পে… এৱমেতস্স কেৱলস্স দুক্খক্খন্ধস্স সমুদযো হোতি’’.

‘‘সেয্যথাপি, ভিক্খৱে, তেলঞ্চ পটিচ্চ ৱট্টিঞ্চ পটিচ্চ তেলপ্পদীপো ঝাযেয্য. তত্ৰ পুৰিসো ন কালেন কালং তেলং আসিঞ্চেয্য ন ৱট্টিং উপসংহৰেয্য. এৱঞ্হি সো, ভিক্খৱে, তেলপ্পদীপো পুৰিমস্স চ উপাদানস্স পৰিযাদানা অঞ্ঞস্স চ অনুপহাৰা অনাহাৰো নিব্বাযেয্য. এৱমেৱ খো, ভিক্খৱে, সংযোজনিযেসু ধম্মেসু আদীনৱানুপস্সিনো ৱিহৰতো তণ্হা নিৰুজ্ঝতি. তণ্হানিৰোধা উপাদাননিৰোধো…পে… এৱমেতস্স কেৱলস্স দুক্খক্খন্ধস্স নিৰোধো হোতী’’তি. চতুত্থং.