৯. ৱনসংযুত্তং

১. ৱিৱেকসুত্তং

২২১. এৱং মে সুতং – একং সমযং অঞ্ঞতৰো ভিক্খু কোসলেসু ৱিহৰতি অঞ্ঞতৰস্মিং ৱনসণ্ডে. তেন খো পন সমযেন সো ভিক্খু দিৱাৱিহাৰগতো পাপকে অকুসলে ৱিতক্কে ৱিতক্কেতি গেহনিস্সিতে. অথ খো যা তস্মিং ৱনসণ্ডে অধিৱত্থা দেৱতা তস্স ভিক্খুনো অনুকম্পিকা অত্থকামা তং ভিক্খুং সংৱেজেতুকামা যেন সো ভিক্খু তেনুপসঙ্কমি; উপসঙ্কমিত্ৱা তং ভিক্খুং গাথাহি অজ্ঝভাসি –

‘‘ৱিৱেককামোসি ৱনং পৱিট্ঠো,

অথ তে মনো নিচ্ছৰতী বহিদ্ধা;

জনো জনস্মিং ৱিনযস্সু ছন্দং,

ততো সুখী হোহিসি ৱীতৰাগো.

‘‘অৰতিং পজহাসি সতো, ভৱাসি সতং তং সাৰযামসে;

পাতালৰজো হি দুত্তৰো, মা তং কামৰজো অৱাহৰি.

‘‘সকুণো যথা পংসুকুন্থিতো [পংসুকুণ্ঠিতো (ক.), পংসুকুণ্ডিতো (সী. স্যা. কং. পী.)], ৱিধুনং পাতযতি সিতং ৰজং;

এৱং ভিক্খু পধানৱা সতিমা, ৱিধুনং পাতযতি সিতং ৰজ’’ন্তি.

অথ খো সো ভিক্খু তায দেৱতায সংৱেজিতো সংৱেগমাপাদীতি.

২. উপট্ঠানসুত্তং

২২২. একং সমযং অঞ্ঞতৰো ভিক্খু কোসলেসু ৱিহৰতি অঞ্ঞতৰস্মিং ৱনসণ্ডে. তেন খো পন সমযেন সো ভিক্খু দিৱাৱিহাৰগতো সুপতি. অথ খো যা তস্মিং ৱনসণ্ডে অধিৱত্থা দেৱতা তস্স ভিক্খুনো অনুকম্পিকা অত্থকামা তং ভিক্খুং সংৱেজেতুকামা যেন সো ভিক্খু তেনুপসঙ্কমি; উপসঙ্কমিত্ৱা তং ভিক্খুং গাথাহি অজ্ঝভাসি –

‘‘উট্ঠেহি ভিক্খু কিং সেসি, কো অত্থো সুপিতেন [সুপিনেন (সী.)] তে;

আতুৰস্স হি কা নিদ্দা, সল্লৱিদ্ধস্স ৰুপ্পতো.

‘‘যায সদ্ধায পব্বজিতো [যায সদ্ধাপব্বজিতো (সী. স্যা. কং.)], অগাৰস্মানগাৰিযং;

তমেৱ সদ্ধং ব্ৰূহেহি, মা নিদ্দায ৱসং গমী’’তি.

‘‘অনিচ্চা অদ্ধুৱা কামা, যেসু মন্দোৱ মুচ্ছিতো;

বদ্ধেসু [খন্ধেসু (সী.)] মুত্তং অসিতং, কস্মা পব্বজিতং তপে.

‘‘ছন্দৰাগস্স ৱিনযা, অৱিজ্জাসমতিক্কমা;

তং ঞাণং পৰমোদানং [পৰিযোদাতং (সী. পী.), পৰমোদাতং (স্যা. কং.), পৰমৱোদানং (সী. অট্ঠ.)], কস্মা পব্বজিতং তপে.

‘‘ছেত্ৱা [ভেত্ৱা (সী. স্যা. কং. পী.)] অৱিজ্জং ৱিজ্জায, আসৱানং পৰিক্খযা;

অসোকং অনুপাযাসং, কস্মা পব্বজিতং তপে.

‘‘আৰদ্ধৱীৰিযং পহিতত্তং, নিচ্চং দড়্হপৰক্কমং;

নিব্বানং অভিকঙ্খন্তং, কস্মা পব্বজিতং তপে’’তি.

৩. কস্সপগোত্তসুত্তং

২২৩. একং সমযং আযস্মা কস্সপগোত্তো কোসলেসু ৱিহৰতি অঞ্ঞতৰস্মিং ৱনসণ্ডে. তেন খো পন সমযেন আযস্মা কস্সপগোত্তো দিৱাৱিহাৰগতো অঞ্ঞতৰং ছেতং ওৱদতি. অথ খো যা তস্মিং ৱনসণ্ডে অধিৱত্থা দেৱতা আযস্মন্তং কস্সপগোত্তং সংৱেজেতুকামা যেনাযস্মা কস্সপগোত্তো তেনুপসঙ্কমি; উপসঙ্কমিত্ৱা আযস্মন্তং কস্সপগোত্তং গাথাহি অজ্ঝভাসি –

‘‘গিৰিদুগ্গচৰং ছেতং, অপ্পপঞ্ঞং অচেতসং;

অকালে ওৱদং ভিক্খু, মন্দোৱ পটিভাতি মং.

‘‘সুণাতি ন ৱিজানাতি, আলোকেতি ন পস্সতি;

ধম্মস্মিং ভঞ্ঞমানস্মিং, অত্থং বালো ন বুজ্ঝতি.

‘‘সচেপি দস পজ্জোতে, ধাৰযিস্সসি কস্সপ;

নেৱ দক্খতি ৰূপানি, চক্খু হিস্স ন ৱিজ্জতী’’তি.

অথ খো আযস্মা কস্সপগোত্তো তায দেৱতায সংৱেজিতো সংৱেগমাপাদীতি.

৪. সম্বহুলসুত্তং

২২৪. একং সমযং সম্বহুলা ভিক্খূ কোসলেসু ৱিহৰন্তি অঞ্ঞতৰস্মিং ৱনসণ্ডে. অথ খো তে ভিক্খূ ৱস্সংৱুট্ঠা [ৱস্সংৱুত্থা (সী. স্যা. কং. পী.)] তেমাসচ্চযেন চাৰিকং পক্কমিংসু. অথ খো যা তস্মিং ৱনসণ্ডে অধিৱত্থা দেৱতা তে ভিক্খূ অপস্সন্তী পৰিদেৱমানা তাযং ৱেলাযং ইমং গাথং অভাসি –

‘‘অৰতি ৱিয মেজ্জ খাযতি,

বহুকে দিস্ৱান ৱিৱিত্তে আসনে;

তে চিত্তকথা বহুস্সুতা,

কোমে গোতমসাৱকা গতা’’তি.

এৱং ৱুত্তে, অঞ্ঞতৰা দেৱতা তং দেৱতং গাথায পচ্চভাসি –

‘‘মাগধং গতা কোসলং গতা, একচ্চিযা পন ৱজ্জিভূমিযা;

মগা ৱিয অসঙ্গচাৰিনো, অনিকেতা ৱিহৰন্তি ভিক্খৱো’’তি.

৫. আনন্দসুত্তং

২২৫. একং সমযং আযস্মা আনন্দো কোসলেসু ৱিহৰতি অঞ্ঞতৰস্মিং ৱনসণ্ডে. তেন খো পন সমযেন আযস্মা আনন্দো অতিৱেলং গিহিসঞ্ঞত্তিবহুলো ৱিহৰতি. অথ খো যা তস্মিং ৱনসণ্ডে অধিৱত্থা দেৱতা আযস্মতো আনন্দস্স অনুকম্পিকা অত্থকামা আযস্মন্তং আনন্দং সংৱেজেতুকামা যেনাযস্মা আনন্দো তেনুপসঙ্কমি; উপসঙ্কমিত্ৱা আযস্মন্তং আনন্দং গাথায অজ্ঝভাসি –

‘‘ৰুক্খমূলগহনং পসক্কিয, নিব্বানং হদযস্মিং ওপিয;

ঝা গোতম মা পমাদো [মা চ পমাদো (সী. পী.)], কিং তে বিড়িবিড়িকা কৰিস্সতী’’তি.

অথ খো আযস্মা আনন্দো তায দেৱতায সংৱেজিতো সংৱেগমাপাদীতি.

৬. অনুৰুদ্ধসুত্তং

২২৬. একং সমযং আযস্মা অনুৰুদ্ধো কোসলেসু ৱিহৰতি অঞ্ঞতৰস্মিং ৱনসণ্ডে. অথ খো অঞ্ঞতৰা তাৱতিংসকাযিকা দেৱতা জালিনী নাম আযস্মতো অনুৰুদ্ধস্স পুৰাণদুতিযিকা যেনাযস্মা অনুৰুদ্ধো তেনুপসঙ্কমি; উপসঙ্কমিত্ৱা আযস্মন্তং অনুৰুদ্ধং গাথায অজ্ঝভাসি –

‘‘তত্থ চিত্তং পণিধেহি, যত্থ তে ৱুসিতং পুৰে;

তাৱতিংসেসু দেৱেসু, সব্বকামসমিদ্ধিসু;

পুৰক্খতো পৰিৱুতো, দেৱকঞ্ঞাহি সোভসী’’তি.

‘‘দুগ্গতা দেৱকঞ্ঞাযো, সক্কাযস্মিং পতিট্ঠিতা;

তে চাপি দুগ্গতা সত্তা, দেৱকঞ্ঞাহি পত্থিতা’’তি.

‘‘ন তে সুখং পজানন্তি, যে ন পস্সন্তি নন্দনং;

আৱাসং নৰদেৱানং, তিদসানং যসস্সিন’’ন্তি.

‘‘ন ত্ৱং বালে ৱিজানাসি, যথা অৰহতং ৱচো;

অনিচ্চা সব্বসঙ্খাৰা, উপ্পাদৱযধম্মিনো;

উপ্পজ্জিত্ৱা নিৰুজ্ঝন্তি, তেসং ৱূপসমো সুখো.

‘‘নত্থি দানি পুনাৱাসো, দেৱকাযস্মি জালিনি;

ৱিক্খীণো জাতিসংসাৰো, নত্থি দানি পুনব্ভৱো’’তি.

৭. নাগদত্তসুত্তং

২২৭. একং সমযং আযস্মা নাগদত্তো কোসলেসু ৱিহৰতি অঞ্ঞতৰস্মিং ৱনসণ্ডে. তেন খো পন সমযেন আযস্মা নাগদত্তো অতিকালেন গামং পৱিসতি, অতিদিৱা পটিক্কমতি. অথ খো যা তস্মিং ৱনসণ্ডে অধিৱত্থা দেৱতা আযস্মতো নাগদত্তস্স অনুকম্পিকা অত্থকামা আযস্মন্তং নাগদত্তং সংৱেজেতুকামা যেনাযস্মা নাগদত্তো তেনুপসঙ্কমি; উপসঙ্কমিত্ৱা আযস্মন্তং নাগদত্তং গাথাহি অজ্ঝভাসি –

‘‘কালে পৱিস নাগদত্ত, দিৱা চ আগন্ত্ৱা অতিৱেলচাৰী;

সংসট্ঠো গহট্ঠেহি, সমানসুখদুক্খো.

‘‘ভাযামি নাগদত্তং সুপ্পগব্ভং, কুলেসু ৱিনিবদ্ধং;

মা হেৱ মচ্চুৰঞ্ঞো বলৱতো, অন্তকস্স ৱসং উপেসী’’তি [ৱসমেয্যাতি (সী. পী.), ৱসমেসীতি (স্যা. কং.)].

অথ খো আযস্মা নাগদত্তো তায দেৱতায সংৱেজিতো সংৱেগমাপাদীতি.

৮. কুলঘৰণীসুত্তং

২২৮. একং সমযং অঞ্ঞতৰো ভিক্খু কোসলেসু ৱিহৰতি অঞ্ঞতৰস্মিং ৱনসণ্ডে. তেন খো পন সমযেন সো ভিক্খু অঞ্ঞতৰস্মিং কুলে অতিৱেলং অজ্ঝোগাড়্হপ্পত্তো ৱিহৰতি. অথ খো যা তস্মিং ৱনসণ্ডে অধিৱত্থা দেৱতা তস্স ভিক্খুনো অনুকম্পিকা অত্থকামা তং ভিক্খুং সংৱেজেতুকামা যা তস্মিং কুলে কুলঘৰণী, তস্সা ৱণ্ণং অভিনিম্মিনিত্ৱা যেন সো ভিক্খু তেনুপসঙ্কমি; উপসঙ্কমিত্ৱা তং ভিক্খুং গাথায অজ্ঝভাসি –

‘‘নদীতীৰেসু সণ্ঠানে, সভাসু ৰথিযাসু চ;

জনা সঙ্গম্ম মন্তেন্তি, মঞ্চ তঞ্চ [ত্ৱঞ্চ (ক.)] কিমন্তৰ’’ন্তি.

‘‘বহূহি সদ্দা পচ্চূহা, খমিতব্বা তপস্সিনা;

ন তেন মঙ্কু হোতব্বং, ন হি তেন কিলিস্সতি.

‘‘যো চ সদ্দপৰিত্তাসী, ৱনে ৱাতমিগো যথা;

লহুচিত্তোতি তং আহু, নাস্স সম্পজ্জতে ৱত’’ন্তি.

৯. ৱজ্জিপুত্তসুত্তং

২২৯. একং সমযং অঞ্ঞতৰো ৱজ্জিপুত্তকো ভিক্খু ৱেসালিযং ৱিহৰতি অঞ্ঞতৰস্মিং ৱনসণ্ডে. তেন খো পন সমযেন ৱেসালিযং ৱজ্জিপুত্তকো সব্বৰত্তিচাৰো হোতি. অথ খো সো ভিক্খু ৱেসালিযা তূৰিয-তাড়িত-ৱাদিত-নিগ্ঘোসসদ্দং সুত্ৱা পৰিদেৱমানো তাযং ৱেলাযং ইমং গাথং অভাসি –

‘‘এককা মযং অৰঞ্ঞে ৱিহৰাম,

অপৱিদ্ধংৱ [অপৱিট্ঠংৱ (স্যা. কং.)] ৱনস্মিং দাৰুকং;

এতাদিসিকায ৰত্তিযা,

কো সু নামম্হেহি [নাম অম্হেহি (সী. পী.)] পাপিযো’’তি.

অথ খো যা তস্মিং ৱনসণ্ডে অধিৱত্থা দেৱতা তস্স ভিক্খুনো অনুকম্পিকা অত্থকামা তং ভিক্খুং সংৱেজেতুকামা যেন সো ভিক্খু তেনুপসঙ্কমি; উপসঙ্কমিত্ৱা তং ভিক্খুং গাথায অজ্ঝভাসি –

‘‘এককোৱ ত্ৱং অৰঞ্ঞে ৱিহৰসি, অপৱিদ্ধংৱ ৱনস্মিং দাৰুকং;

তস্স তে বহুকা পিহযন্তি, নেৰযিকা ৱিয সগ্গগামিন’’ন্তি.

অথ খো সো ভিক্খু তায দেৱতায সংৱেজিতো সংৱেগমাপাদীতি.

১০. সজ্ঝাযসুত্তং

২৩০. একং সমযং অঞ্ঞতৰো ভিক্খু কোসলেসু ৱিহৰতি অঞ্ঞতৰস্মিং ৱনসণ্ডে. তেন খো পন সমযেন সো ভিক্খু যং সুদং পুব্বে অতিৱেলং সজ্ঝাযবহুলো ৱিহৰতি সো অপৰেন সমযেন অপ্পোস্সুক্কো তুণ্হীভূতো সঙ্কসাযতি. অথ খো যা তস্মিং ৱনসণ্ডে অধিৱত্থা দেৱতা তস্স ভিক্খুনো ধম্মং অসুণন্তী যেন সো ভিক্খু তেনুপসঙ্কমি; উপসঙ্কমিত্ৱা তং ভিক্খুং গাথায অজ্ঝভাসি –

‘‘কস্মা তুৱং ধম্মপদানি ভিক্খু, নাধীযসি ভিক্খূহি সংৱসন্তো;

সুত্ৱান ধম্মং লভতিপ্পসাদং, দিট্ঠেৱ ধম্মে লভতিপ্পসংস’’ন্তি.

‘‘অহু পুৰে ধম্মপদেসু ছন্দো, যাৱ ৱিৰাগেন সমাগমিম্হ;

যতো ৱিৰাগেন সমাগমিম্হ, যং কিঞ্চি দিট্ঠংৱ সুতং মুতং ৱা;

অঞ্ঞায নিক্খেপনমাহু সন্তো’’তি.

১১. অকুসলৱিতক্কসুত্তং

২৩১. একং সমযং অঞ্ঞতৰো ভিক্খু কোসলেসু ৱিহৰতি অঞ্ঞতৰস্মিং ৱনসণ্ডে. তেন খো পন সমযেন সো ভিক্খু দিৱাৱিহাৰগতো পাপকে অকুসলে ৱিতক্কে ৱিতক্কেতি, সেয্যথিদং – কামৱিতক্কং, ব্যাপাদৱিতক্কং, ৱিহিংসাৱিতক্কং. অথ খো যা তস্মিং ৱনসণ্ডে অধিৱত্থা দেৱতা তস্স ভিক্খুনো অনুকম্পিকা অত্থকামা তং ভিক্খুং সংৱেজেতুকামা যেন সো ভিক্খু তেনুপসঙ্কমি; উপসঙ্কমিত্ৱা তং ভিক্খুং গাথাহি অজ্ঝভাসি –

‘‘অযোনিসো মনসিকাৰা, সো ৱিতক্কেহি খজ্জসি;

অযোনিসো [অযোনিং (পী. ক.)] পটিনিস্সজ্জ, যোনিসো অনুচিন্তয.

‘‘সত্থাৰং ধম্মমাৰব্ভ, সঙ্ঘং সীলানি অত্তনো;

অধিগচ্ছসি পামোজ্জং, পীতিসুখমসংসযং;

ততো পামোজ্জবহুলো, দুক্খস্সন্তং কৰিস্সসী’’তি.

অথ খো সো ভিক্খু তায দেৱতায সংৱেজিতো সংৱেগমাপাদীতি.

১২. মজ্ঝন্হিকসুত্তং

২৩২. একং সমযং অঞ্ঞতৰো ভিক্খু কোসলেসু ৱিহৰতি অঞ্ঞতৰস্মিং ৱনসণ্ডে. অথ খো তস্মিং ৱনসণ্ডে অধিৱত্থা দেৱতা যেন সো ভিক্খু তেনুপসঙ্কমি; উপসঙ্কমিত্ৱা তস্স ভিক্খুনো সন্তিকে ইমং গাথং অভাসি –

‘‘ঠিতে মজ্ঝন্হিকে কালে, সন্নিসীৱেসু [সন্নিসিন্নেসু (স্যা. কং. পী.)] পক্খিসু;

সণতেৱ ব্ৰহাৰঞ্ঞং, তং ভযং পটিভাতি মং.

‘‘ঠিতে মজ্ঝন্হিকে কালে, সন্নিসীৱেসু পক্খিসু;

সণতেৱ ব্ৰহাৰঞ্ঞং, সা ৰতি পটিভাতি ম’’ন্তি.

১৩. পাকতিন্দ্ৰিযসুত্তং

২৩৩. একং সমযং সম্বহুলা ভিক্খূ কোসলেসু ৱিহৰন্তি অঞ্ঞতৰস্মিং ৱনসণ্ডে উদ্ধতা উন্নড়া চপলা মুখৰা ৱিকিণ্ণৱাচা মুট্ঠস্সতিনো অসম্পজানা অসমাহিতা ৱিব্ভন্তচিত্তা পাকতিন্দ্ৰিযা. অথ খো যা তস্মিং ৱনসণ্ডে অধিৱত্থা দেৱতা তেসং ভিক্খূনং অনুকম্পিকা অত্থকামা তে ভিক্খূ সংৱেজেতুকামা যেন তে ভিক্খূ তেনুপসঙ্কমি; উপসঙ্কমিত্ৱা তে ভিক্খূ গাথাহি অজ্ঝভাসি –

‘‘সুখজীৱিনো পুৰে আসুং, ভিক্খূ গোতমসাৱকা;

অনিচ্ছা পিণ্ডমেসনা, অনিচ্ছা সযনাসনং;

লোকে অনিচ্চতং ঞত্ৱা, দুক্খস্সন্তং অকংসু তে.

‘‘দুপ্পোসং কত্ৱা অত্তানং, গামে গামণিকা ৱিয;

ভুত্ৱা ভুত্ৱা নিপজ্জন্তি, পৰাগাৰেসু মুচ্ছিতা.

‘‘সঙ্ঘস্স অঞ্জলিং কত্ৱা, ইধেকচ্চে ৱদামহং;

অপৱিদ্ধা [অপৱিট্ঠা (স্যা. কং.)] অনাথা তে, যথা পেতা তথেৱ তে.

‘‘যে খো পমত্তা ৱিহৰন্তি, তে মে সন্ধায ভাসিতং;

যে অপ্পমত্তা ৱিহৰন্তি, নমো তেসং কৰোমহ’’ন্তি.

অথ খো তে ভিক্খূ তায দেৱতায সংৱেজিতা সংৱেগমাপাদুন্তি.

১৪. গন্ধত্থেনসুত্তং

২৩৪. একং সমযং অঞ্ঞতৰো ভিক্খু কোসলেসু ৱিহৰতি অঞ্ঞতৰস্মিং ৱনসণ্ডে. তেন খো পন সমযেন সো ভিক্খু পচ্ছাভত্তং পিণ্ডপাতপটিক্কন্তো পোক্খৰণিং ওগাহেত্ৱা পদুমং উপসিঙ্ঘতি. অথ খো যা তস্মিং ৱনসণ্ডে অধিৱত্থা দেৱতা তস্স ভিক্খুনো অনুকম্পিকা অত্থকামা তং ভিক্খুং সংৱেজেতুকামা যেন সো ভিক্খু তেনুপসঙ্কমি; উপসঙ্কমিত্ৱা তং ভিক্খুং গাথায অজ্ঝভাসি –

‘‘যমেতং ৱাৰিজং পুপ্ফং, অদিন্নং উপসিঙ্ঘসি;

একঙ্গমেতং থেয্যানং, গন্ধত্থেনোসি মাৰিসা’’তি.

‘‘ন হৰামি ন ভঞ্জামি, আৰা সিঙ্ঘামি ৱাৰিজং;

অথ কেন নু ৱণ্ণেন, গন্ধত্থেনোতি ৱুচ্চতি.

‘‘য্ৱাযং ভিসানি খনতি, পুণ্ডৰীকানি ভঞ্জতি;

এৱং আকিণ্ণকম্মন্তো, কস্মা এসো ন ৱুচ্চতী’’তি.

‘‘আকিণ্ণলুদ্দো পুৰিসো, ধাতিচেলংৱ মক্খিতো;

তস্মিং মে ৱচনং নত্থি, ত্ৱঞ্চাৰহামি ৱত্তৱে.

‘‘অনঙ্গণস্স পোসস্স, নিচ্চং সুচিগৱেসিনো;

ৱালগ্গমত্তং পাপস্স, অব্ভামত্তংৱ খাযতী’’তি.

‘‘অদ্ধা মং যক্খ জানাসি, অথো মে অনুকম্পসি;

পুনপি যক্খ ৱজ্জাসি, যদা পস্সসি এদিস’’ন্তি.

‘‘নেৱ তং উপজীৱাম, নপি তে ভতকাম্হসে;

ত্ৱমেৱ ভিক্খু জানেয্য, যেন গচ্ছেয্য সুগ্গতি’’ন্তি.

অথ খো সো ভিক্খু তায দেৱতায সংৱেজিতো সংৱেগমাপাদীতি.

ৱনসংযুত্তং সমত্তং.