৫. ভিক্খুনীসংযুত্তং

১. আড়ৱিকাসুত্তং

১৬২. এৱং মে সুতং – একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. অথ খো আড়ৱিকা ভিক্খুনী পুব্বণ্হসমযং নিৱাসেত্ৱা পত্তচীৱৰমাদায সাৱত্থিং পিণ্ডায পাৱিসি. সাৱত্থিযং পিণ্ডায চৰিত্ৱা পচ্ছাভত্তং পিণ্ডপাতপটিক্কন্তা যেন অন্ধৱনং তেনুপসঙ্কমি ৱিৱেকত্থিনী. অথ খো মাৰো পাপিমা আড়ৱিকায ভিক্খুনিযা ভযং ছম্ভিতত্তং লোমহংসং উপ্পাদেতুকামো ৱিৱেকম্হা চাৱেতুকামো যেন আড়ৱিকা ভিক্খুনী তেনুপসঙ্কমি; উপসঙ্কমিত্ৱা আড়ৱিকং ভিক্খুনিং গাথায অজ্ঝভাসি –

‘‘নত্থি নিস্সৰণং লোকে, কিং ৱিৱেকেন কাহসি;

ভুঞ্জস্সু কামৰতিযো, মাহু পচ্ছানুতাপিনী’’তি.

অথ খো আড়ৱিকায ভিক্খুনিযা এতদহোসি – ‘‘কো নু খ্ৱাযং মনুস্সো ৱা অমনুস্সো ৱা গাথং ভাসতী’’তি? অথ খো আড়ৱিকায ভিক্খুনিযা এতদহোসি – ‘‘মাৰো খো অযং পাপিমা মম ভযং ছম্ভিতত্তং লোমহংসং উপ্পাদেতুকামো ৱিৱেকম্হা চাৱেতুকামো গাথং ভাসতী’’তি. অথ খো আড়ৱিকা ভিক্খুনী ‘‘মাৰো অযং পাপিমা’’ ইতি ৱিদিত্ৱা মাৰং পাপিমন্তং গাথাহি পচ্চভাসি –

‘‘অত্থি নিস্সৰণং লোকে, পঞ্ঞায মে সুফুস্সিতং [সুফস্সিতং (সী. পী.)];

পমত্তবন্ধু পাপিম, ন ত্ৱং জানাসি তং পদং.

‘‘সত্তিসূলূপমা কামা, খন্ধাসং অধিকুট্টনা;

যং ত্ৱং কামৰতিং ব্ৰূসি, অৰতি ময্হ সা অহূ’’তি.

অথ খো মাৰো পাপিমা ‘‘জানাতি মং আড়ৱিকা ভিক্খুনী’’তি দুক্খী দুম্মনো তত্থেৱন্তৰধাযীতি.

২. সোমাসুত্তং

১৬৩. সাৱত্থিনিদানং. অথ খো সোমা ভিক্খুনী পুব্বণ্হসমযং নিৱাসেত্ৱা পত্তচীৱৰমাদায সাৱত্থিং পিণ্ডায পাৱিসি. সাৱত্থিযং পিণ্ডায চৰিত্ৱা পচ্ছাভত্তং পিণ্ডপাতপটিক্কন্তা যেন অন্ধৱনং তেনুপসঙ্কমি দিৱাৱিহাৰায. অন্ধৱনং অজ্ঝোগাহেত্ৱা অঞ্ঞতৰস্মিং ৰুক্খমূলে দিৱাৱিহাৰং নিসীদি. অথ খো মাৰো পাপিমা সোমায ভিক্খুনিযা ভযং ছম্ভিতত্তং লোমহংসং উপ্পাদেতুকামো সমাধিম্হা চাৱেতুকামো যেন সোমা ভিক্খুনী তেনুপসঙ্কমি; উপসঙ্কমিত্ৱা সোমং ভিক্খুনিং গাথায অজ্ঝভাসি –

‘‘যং তং ইসীহি পত্তব্বং, ঠানং দুৰভিসম্ভৱং;

ন তং দ্ৱঙ্গুলপঞ্ঞায, সক্কা পপ্পোতুমিত্থিযা’’তি.

অথ খো সোমায ভিক্খুনিযা এতদহোসি – ‘‘কো নু খ্ৱাযং মনুস্সো ৱা অমনুস্সো ৱা গাথং ভাসতী’’তি? অথ খো সোমায ভিক্খুনিযা এতদহোসি – ‘‘মাৰো খো অযং পাপিমা মম ভযং ছম্ভিতত্তং লোমহংসং উপ্পাদেতুকামো সমাধিম্হা চাৱেতুকামো গাথং ভাসতী’’তি. অথ খো সোমা ভিক্খুনী ‘‘মাৰো অযং পাপিমা’’ ইতি ৱিদিত্ৱা মাৰং পাপিমন্তং গাথাহি পচ্চভাসি –

‘‘ইত্থিভাৱো কিং কযিৰা, চিত্তম্হি সুসমাহিতে;

ঞাণম্হি ৱত্তমানম্হি, সম্মা ধম্মং ৱিপস্সতো.

‘‘যস্স নূন সিযা এৱং, ইত্থাহং পুৰিসোতি ৱা;

কিঞ্চি ৱা পন অঞ্ঞস্মি [অস্মীতি (স্যা. কং. পী.)], তং মাৰো ৱত্তুমৰহতী’’তি.

অথ খো মাৰো পাপিমা ‘‘জানাতি মং সোমা ভিক্খুনী’’তি দুক্খী দুম্মনো তত্থেৱন্তৰধাযীতি.

৩. কিসাগোতমীসুত্তং

১৬৪. সাৱত্থিনিদানং. অথ খো কিসাগোতমী ভিক্খুনী পুব্বণ্হসমযং নিৱাসেত্ৱা পত্তচীৱৰমাদায সাৱত্থিং পিণ্ডায পাৱিসি. সাৱত্থিযং পিণ্ডায চৰিত্ৱা পচ্ছাভত্তং পিণ্ডপাতপটিক্কন্তা যেন অন্ধৱনং তেনুপসঙ্কমি, দিৱাৱিহাৰায. অন্ধৱনং অজ্ঝোগাহেত্ৱা অঞ্ঞতৰস্মিং ৰুক্খমূলে দিৱাৱিহাৰং নিসীদি. অথ খো মাৰো পাপিমা কিসাগোতমিযা ভিক্খুনিযা ভযং ছম্ভিতত্তং লোমহংসং উপ্পাদেতুকামো সমাধিম্হা চাৱেতুকামো যেন কিসাগোতমী ভিক্খুনী তেনুপসঙ্কমি; উপসঙ্কমিত্ৱা কিসাগোতমিং ভিক্খুনিং গাথায অজ্ঝভাসি –

‘‘কিং নু ত্ৱং মতপুত্তাৱ, একমাসি ৰুদম্মুখী;

ৱনমজ্ঝগতা একা, পুৰিসং নু গৱেসসী’’তি.

অথ খো কিসাগোতমিযা ভিক্খুনিযা এতদহোসি – ‘‘কো নু খ্ৱাযং মনুস্সো ৱা অমনুস্সো ৱা গাথং ভাসতী’’তি? অথ খো কিসাগোতমিযা ভিক্খুনিযা এতদহোসি – ‘‘মাৰো খো অযং পাপিমা মম ভযং ছম্ভিতত্তং লোমহংসং উপ্পাদেতুকামো সমাধিম্হা চাৱেতুকামো গাথং ভাসতী’’তি.

অথ খো কিসাগোতমী ভিক্খুনী ‘‘মাৰো অযং পাপিমা’’ ইতি ৱিদিত্ৱা মাৰং পাপিমন্তং গাথাহি পচ্চভাসি –

‘‘অচ্চন্তং মতপুত্তাম্হি, পুৰিসা এতদন্তিকা;

ন সোচামি ন ৰোদামি, ন তং ভাযামি আৱুসো.

‘‘সব্বত্থ ৱিহতা নন্দী, তমোক্খন্ধো পদালিতো;

জেত্ৱান মচ্চুনো [জেত্ৱা নমুচিনো (সী.)] সেনং, ৱিহৰামি অনাসৱা’’তি.

অথ খো মাৰো পাপিমা ‘‘জানাতি মং কিসাগোতমী ভিক্খুনী’’তি দুক্খী দুম্মনো তত্থেৱন্তৰধাযীতি.

৪. ৱিজযাসুত্তং

১৬৫. সাৱত্থিনিদানং. অথ খো ৱিজযা ভিক্খুনী পুব্বণ্হসমযং নিৱাসেত্ৱা…পে… অঞ্ঞতৰস্মিং ৰুক্খমূলে দিৱাৱিহাৰং নিসীদি. অথ খো মাৰো পাপিমা ৱিজযায ভিক্খুনিযা ভযং ছম্ভিতত্তং লোমহংসং উপ্পাদেতুকামো সমাধিম্হা চাৱেতুকামো যেন ৱিজযা ভিক্খুনী তেনুপসঙ্কমি; উপসঙ্কমিত্ৱা ৱিজযং ভিক্খুনিং গাথায অজ্ঝভাসি –

‘‘দহৰা ত্ৱং ৰূপৱতী, অহঞ্চ দহৰো সুসু;

পঞ্চঙ্গিকেন তুৰিযেন, এহয্যেভিৰমামসে’’তি [এহি অয্যে ৰমামসেতি (সী.)].

অথ খো ৱিজযায ভিক্খুনিযা এতদহোসি – ‘‘কো নু খ্ৱাযং মনুস্সো ৱা অমনুস্সো ৱা গাথং ভাসতী’’তি? অথ খো ৱিজযায ভিক্খুনিযা এতদহোসি – ‘‘মাৰো খো অযং পাপিমা মম ভযং ছম্ভিতত্তং লোমহংসং উপ্পাদেতুকামো সমাধিম্হা চাৱেতুকামো গাথং ভাসতী’’তি. অথ খো ৱিজযা ভিক্খুনী ‘‘মাৰো অযং পাপিমা’’ ইতি ৱিদিত্ৱা মাৰং পাপিমন্তং গাথাহি পচ্চভাসি –

‘‘ৰূপা সদ্দা ৰসা গন্ধা, ফোট্ঠব্বা চ মনোৰমা;

নিয্যাতযামি তুয্হেৱ, মাৰ নাহং তেনত্থিকা.

‘‘ইমিনা পূতিকাযেন, ভিন্দনেন পভঙ্গুনা;

অট্টীযামি হৰাযামি, কামতণ্হা সমূহতা.

‘‘যে চ ৰূপূপগা সত্তা, যে চ অৰূপট্ঠাযিনো [আৰুপ্পট্ঠাযিনো (সী. পী.)];

যা চ সন্তা সমাপত্তি, সব্বত্থ ৱিহতো তমো’’তি.

অথ খো মাৰো পাপিমা ‘‘জানাতি মং ৱিজযা ভিক্খুনী’’তি দুক্খী দুম্মনো তত্থেৱন্তৰধাযীতি.

৫. উপ্পলৱণ্ণাসুত্তং

১৬৬. সাৱত্থিনিদানং. অথ খো উপ্পলৱণ্ণা ভিক্খুনী পুব্বণ্হসমযং নিৱাসেত্ৱা…পে… অঞ্ঞতৰস্মিং সুপুপ্ফিতসালৰুক্খমূলে অট্ঠাসি. অথ খো মাৰো পাপিমা উপ্পলৱণ্ণায ভিক্খুনিযা ভযং ছম্ভিতত্তং লোমহংসং উপ্পাদেতুকামো সমাধিম্হা চাৱেতুকামো যেন উপ্পলৱণ্ণা ভিক্খুনী তেনুপসঙ্কমি; উপসঙ্কমিত্ৱা উপ্পলৱণ্ণং ভিক্খুনিং গাথায অজ্ঝভাসি –

‘‘সুপুপ্ফিতগ্গং উপগম্ম ভিক্খুনি,

একা তুৱং তিট্ঠসি সালমূলে;

ন চত্থি তে দুতিযা ৱণ্ণধাতু,

বালে ন ত্ৱং ভাযসি ধুত্তকান’’ন্তি.

অথ খো উপ্পলৱণ্ণায ভিক্খুনিযা এতদহোসি – ‘‘কো নু খ্ৱাযং মনুস্সো ৱা অমনুস্সো ৱা গাথং ভাসতী’’তি? অথ খো উপ্পলৱণ্ণায ভিক্খুনিযা এতদহোসি – ‘‘মাৰো খো অযং পাপিমা মম ভযং ছম্ভিতত্তং লোমহংসং উপ্পাদেতুকামো সমাধিম্হা চাৱেতুকামো গাথং ভাসতী’’তি. অথ খো উপ্পলৱণ্ণা ভিক্খুনী ‘‘মাৰো অযং পাপিমা’’ ইতি ৱিদিত্ৱা মাৰং পাপিমন্তং গাথাহি পচ্চভাসি –

‘‘সতং সহস্সানিপি ধুত্তকানং,

ইধাগতা তাদিসকা ভৱেয্যুং;

লোমং ন ইঞ্জামি ন সন্তসামি,

ন মাৰ ভাযামি তমেকিকাপি.

‘‘এসা অন্তৰধাযামি, কুচ্ছিং ৱা পৱিসামি তে;

পখুমন্তৰিকাযম্পি, তিট্ঠন্তিং মং ন দক্খসি.

‘‘চিত্তস্মিং ৱসীভূতাম্হি, ইদ্ধিপাদা সুভাৱিতা;

সব্ববন্ধনমুত্তাম্হি, ন তং ভাযামি আৱুসো’’তি.

অথ খো মাৰো পাপিমা ‘‘জানাতি মং উপ্পলৱণ্ণা ভিক্খুনী’’তি দুক্খী দুম্মনো তত্থেৱন্তৰধাযীতি.

৬. চালাসুত্তং

১৬৭. সাৱত্থিনিদানং. অথ খো চালা ভিক্খুনী পুব্বণ্হসমযং নিৱাসেত্ৱা…পে… অঞ্ঞতৰস্মিং ৰুক্খমূলে দিৱাৱিহাৰং নিসীদি. অথ খো মাৰো পাপিমা যেন চালা ভিক্খুনী তেনুপসঙ্কমি; উপসঙ্কমিত্ৱা চালং ভিক্খুনিং এতদৱোচ – ‘‘কিং নু ত্ৱং, ভিক্খুনি, ন ৰোচেসী’’তি? ‘‘জাতিং খ্ৱাহং, আৱুসো, ন ৰোচেমী’’তি.

‘‘কিং নু জাতিং ন ৰোচেসি, জাতো কামানি ভুঞ্জতি;

কো নু তং ইদমাদপযি, জাতিং মা ৰোচ [মা ৰোচেসি (সী. পী.)] ভিক্খুনী’’তি.

‘‘জাতস্স মৰণং হোতি, জাতো দুক্খানি ফুস্সতি [পস্সতি (সী. পী.)];

বন্ধং ৱধং পৰিক্লেসং, তস্মা জাতিং ন ৰোচযে.

‘‘বুদ্ধো ধম্মমদেসেসি, জাতিযা সমতিক্কমং;

সব্বদুক্খপ্পহানায, সো মং সচ্চে নিৱেসযি.

‘‘যে চ ৰূপূপগা সত্তা, যে চ অৰূপট্ঠাযিনো;

নিৰোধং অপ্পজানন্তা, আগন্তাৰো পুনব্ভৱ’’ন্তি.

অথ খো মাৰো পাপিমা ‘‘জানাতি মং চালা ভিক্খুনী’’তি দুক্খী দুম্মনো তত্থেৱন্তৰধাযীতি.

৭. উপচালাসুত্তং

১৬৮. সাৱত্থিনিদানং. অথ খো উপচালা ভিক্খুনী পুব্বণ্হসমযং নিৱাসেত্ৱা…পে… অঞ্ঞতৰস্মিং ৰুক্খমূলে দিৱাৱিহাৰং নিসীদি. অথ খো মাৰো পাপিমা যেন উপচালা ভিক্খুনী তেনুপসঙ্কমি; উপসঙ্কমিত্ৱা উপচালং ভিক্খুনিং এতদৱোচ – ‘‘কত্থ নু ত্ৱং, ভিক্খুনি, উপ্পজ্জিতুকামা’’তি? ‘‘ন খ্ৱাহং, আৱুসো, কত্থচি উপ্পজ্জিতুকামা’’তি.

‘‘তাৱতিংসা চ যামা চ, তুসিতা চাপি দেৱতা;

নিম্মানৰতিনো দেৱা, যে দেৱা ৱসৱত্তিনো;

তত্থ চিত্তং পণিধেহি, ৰতিং পচ্চনুভোস্সসী’’তি.

‘‘তাৱতিংসা চ যামা চ, তুসিতা চাপি দেৱতা;

নিম্মানৰতিনো দেৱা, যে দেৱা ৱসৱত্তিনো;

কামবন্ধনবদ্ধা তে, এন্তি মাৰৱসং পুন.

‘‘সব্বো আদীপিতো [সব্বোৱ আদিত্তো (স্যা. কং.)] লোকো, সব্বো লোকো পধূপিতো;

সব্বো পজ্জলিতো [পজ্জলিতো (সব্বত্থ)] লোকো, সব্বো লোকো পকম্পিতো.

‘‘অকম্পিতং অপজ্জলিতং [অচলিতং (সী. স্যা. কং. পী.)], অপুথুজ্জনসেৱিতং;

অগতি যত্থ মাৰস্স, তত্থ মে নিৰতো মনো’’তি.

অথ খো মাৰো পাপিমা ‘‘জানাতি মং উপচালা ভিক্খুনী’’তি দুক্খী দুম্মনো তত্থেৱন্তৰধাযীতি.

৮. সীসুপচালাসুত্তং

১৬৯. সাৱত্থিনিদানং. অথ খো সীসুপচালা [সীসূপচালা (সী.)] ভিক্খুনী পুব্বণ্হসমযং নিৱাসেত্ৱা …পে… অঞ্ঞতৰস্মিং ৰুক্খমূলে দিৱাৱিহাৰং নিসীদি. অথ খো মাৰো পাপিমা যেন সীসুপচালা ভিক্খুনী তেনুপসঙ্কমি; উপসঙ্কমিত্ৱা সীসুপচালং ভিক্খুনিং এতদৱোচ – ‘‘কস্স নু ত্ৱং, ভিক্খুনি, পাসণ্ডং ৰোচেসী’’তি? ‘‘ন খ্ৱাহং, আৱুসো, কস্সচি পাসণ্ডং ৰোচেমী’’তি.

‘‘কং নু উদ্দিস্স মুণ্ডাসি, সমণী ৱিয দিস্সসি;

ন চ ৰোচেসি পাসণ্ডং, কিমিৱ চৰসি মোমূহা’’তি.

‘‘ইতো বহিদ্ধা পাসণ্ডা, দিট্ঠীসু পসীদন্তি তে;

ন তেসং ধম্মং ৰোচেমি, তে ধম্মস্স অকোৱিদা.

‘‘অত্থি সক্যকুলে জাতো, বুদ্ধো অপ্পটিপুগ্গলো;

সব্বাভিভূ মাৰনুদো, সব্বত্থমপৰাজিতো.

‘‘সব্বত্থ মুত্তো অসিতো, সব্বং পস্সতি চক্খুমা;

সব্বকম্মক্খযং পত্তো, ৱিমুত্তো উপধিসঙ্খযে;

সো ময্হং ভগৱা সত্থা, তস্স ৰোচেমি সাসন’’ন্তি.

অথ খো মাৰো পাপিমা ‘‘জানাতি মং সীসুপচালা ভিক্খুনী’’তি দুক্খী দুম্মনো তত্থেৱন্তৰধাযীতি.

৯. সেলাসুত্তং

১৭০. সাৱত্থিনিদানং. অথ খো সেলা ভিক্খুনী পুব্বণ্হসমযং নিৱাসেত্ৱা…পে… অঞ্ঞতৰস্মিং ৰুক্খমূলে দিৱাৱিহাৰং নিসীদি. অথ খো মাৰো পাপিমা সেলায ভিক্খুনিযা ভযং ছম্ভিতত্তং লোমহংসং উপ্পাদেতুকামো…পে… সেলং ভিক্খুনিং গাথায অজ্ঝভাসি –

‘‘কেনিদং পকতং বিম্বং, ক্ৱনু [ক্ৱন্নু (সী. পী.), ক্ৱচি (স্যা. কং. ক.)] বিম্বস্স কাৰকো;

ক্ৱনু বিম্বং সমুপ্পন্নং, ক্ৱনু বিম্বং নিৰুজ্ঝতী’’তি.

অথ খো সেলায ভিক্খুনিযা এতদহোসি – ‘‘কো নু খ্ৱাযং মনুস্সো ৱা অমনুস্সো ৱা গাথং ভাসতী’’তি? অথ খো সেলায ভিক্খুনিযা এতদহোসি – ‘‘মাৰো খো অযং পাপিমা মম ভযং ছম্ভিতত্তং লোমহংসং উপ্পাদেতুকামো সমাধিম্হা চাৱেতুকামো গাথং ভাসতী’’তি. অথ খো সেলা ভিক্খুনী ‘‘মাৰো অযং পাপিমা’’ ইতি ৱিদিত্ৱা মাৰং পাপিমন্তং গাথাহি পচ্চভাসি –

‘‘নযিদং অত্তকতং [নযিদং পকতং (স্যা. কং.)] বিম্বং, নযিদং পৰকতং [নযিদং পকতং (স্যা. কং.)] অঘং;

হেতুং পটিচ্চ সম্ভূতং, হেতুভঙ্গা নিৰুজ্ঝতি.

‘‘যথা অঞ্ঞতৰং বীজং, খেত্তে ৱুত্তং ৱিৰূহতি;

পথৱীৰসঞ্চাগম্ম, সিনেহঞ্চ তদূভযং.

‘‘এৱং খন্ধা চ ধাতুযো, ছ চ আযতনা ইমে;

হেতুং পটিচ্চ সম্ভূতা, হেতুভঙ্গা নিৰুজ্ঝৰে’’তি.

অথ খো মাৰো পাপিমা ‘‘জানাতি মং সেলা ভিক্খুনী’’তি দুক্খী দুম্মনো তত্থেৱন্তৰধাযীতি.

১০. ৱজিৰাসুত্তং

১৭১. সাৱত্থিনিদানং. অথ খো ৱজিৰা ভিক্খুনী পুব্বণ্হসমযং নিৱাসেত্ৱা পত্তচীৱৰমাদায সাৱত্থিং পিণ্ডায পাৱিসি. সাৱত্থিযং পিণ্ডায চৰিত্ৱা পচ্ছাভত্তং পিণ্ডপাতপটিক্কন্তা যেন অন্ধৱনং তেনুপসঙ্কমি দিৱাৱিহাৰায. অন্ধৱনং অজ্ঝোগাহেত্ৱা অঞ্ঞতৰস্মিং ৰুক্খমূলে দিৱাৱিহাৰং নিসীদি. অথ খো মাৰো পাপিমা ৱজিৰায ভিক্খুনিযা ভযং ছম্ভিতত্তং লোমহংসং উপ্পাদেতুকামো সমাধিম্হা চাৱেতুকামো যেন ৱজিৰা ভিক্খুনী তেনুপসঙ্কমি; উপসঙ্কমিত্ৱা ৱজিৰং ভিক্খুনিং গাথায অজ্ঝভাসি –

‘‘কেনাযং পকতো সত্তো, কুৱং সত্তস্স কাৰকো;

কুৱং সত্তো সমুপ্পন্নো, কুৱং সত্তো নিৰুজ্ঝতী’’তি.

অথ খো ৱজিৰায ভিক্খুনিযা এতদহোসি – ‘‘কো নু খ্ৱাযং মনুস্সো ৱা অমনুস্সো ৱা গাথং ভাসতী’’তি? অথ খো ৱজিৰায ভিক্খুনিযা এতদহোসি – ‘‘মাৰো খো অযং পাপিমা মম ভযং ছম্ভিতত্তং লোমহংসং উপ্পাদেতুকামো সমাধিম্হা চাৱেতুকামো গাথং ভাসতী’’তি. অথ খো ৱজিৰা ভিক্খুনী ‘‘মাৰো অযং পাপিমা’’ ইতি ৱিদিত্ৱা, মাৰং পাপিমন্তং গাথাহি পচ্চভাসি –

‘‘কিং নু সত্তোতি পচ্চেসি, মাৰ দিট্ঠিগতং নু তে;

সুদ্ধসঙ্খাৰপুঞ্জোযং, নযিধ সত্তুপলব্ভতি.

‘‘যথা হি অঙ্গসম্ভাৰা, হোতি সদ্দো ৰথো ইতি;

এৱং খন্ধেসু সন্তেসু, হোতি সত্তোতি সম্মুতি [সম্মতি (স্যা. কং.)].

‘‘দুক্খমেৱ হি সম্ভোতি, দুক্খং তিট্ঠতি ৱেতি চ;

নাঞ্ঞত্ৰ দুক্খা সম্ভোতি, নাঞ্ঞং দুক্খা নিৰুজ্ঝতী’’তি.

অথ খো মাৰো পাপিমা ‘‘জানাতি মং ৱজিৰা ভিক্খুনী’’তি দুক্খী দুম্মনো তত্থেৱন্তৰধাযীতি.

ভিক্খুনীসংযুত্তং সমত্তং.