১. সম্বহুলসুত্তং

১৫৭. এৱং মে সুতং – একং সমযং ভগৱা সক্কেসু ৱিহৰতি সিলাৱতিযং. তেন খো পন সমযেন সম্বহুলা ভিক্খূ ভগৱতো অৱিদূৰে অপ্পমত্তা আতাপিনো পহিতত্তা ৱিহৰন্তি. অথ খো মাৰো পাপিমা ব্ৰাহ্মণৱণ্ণং অভিনিম্মিনিত্ৱা মহন্তেন জটণ্ডুৱেন অজিনক্খিপনিৱত্থো জিণ্ণো গোপানসিৱঙ্কো ঘুৰুঘুৰুপস্সাসী উদুম্বৰদণ্ডং গহেত্ৱা যেন তে ভিক্খূ তেনুপসঙ্কমি; উপসঙ্কমিত্ৱা তে ভিক্খূ এতদৱোচ – ‘‘দহৰা ভৱন্তো পব্বজিতা সুসূ কাড়কেসা ভদ্ৰেন যোব্বনেন সমন্নাগতা পঠমেন ৱযসা অনিক্কীড়িতাৱিনো কামেসু. ভুঞ্জন্তু ভৱন্তো মানুসকে কামে. মা সন্দিট্ঠিকং হিত্ৱা কালিকং অনুধাৱিত্থা’’তি. ‘‘ন খো মযং, ব্ৰাহ্মণ, সন্দিট্ঠিকং হিত্ৱা কালিকং অনুধাৱাম. কালিকঞ্চ খো মযং, ব্ৰাহ্মণ, হিত্ৱা সন্দিট্ঠিকং অনুধাৱাম. কালিকা হি, ব্ৰাহ্মণ, কামা ৱুত্তা ভগৱতা বহুদুক্খা বহুপাযাসা, আদীনৱো এত্থ ভিয্যো. সন্দিট্ঠিকো অযং ধম্মো অকালিকো এহিপস্সিকো ওপনেয্যিকো পচ্চত্তং ৱেদিতব্বো ৱিঞ্ঞূহী’’তি. এৱং ৱুত্তে, মাৰো পাপিমা সীসং ওকম্পেত্ৱা জিৱ্হং নিল্লালেত্ৱা তিৱিসাখং নলাটে নলাটিকং ৱুট্ঠাপেত্ৱা দণ্ডমোলুব্ভ পক্কামি.

অথ খো তে ভিক্খূ যেন ভগৱা তেনুপসঙ্কমিংসু; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদিংসু. একমন্তং নিসিন্না খো তে ভিক্খূ ভগৱন্তং এতদৱোচুং – ‘‘ইধ মযং, ভন্তে, ভগৱতো অৱিদূৰে অপ্পমত্তা আতাপিনো পহিতত্তা ৱিহৰাম. অথ খো, ভন্তে, অঞ্ঞতৰো ব্ৰাহ্মণো মহন্তেন জটণ্ডুৱেন অজিনক্খিপনিৱত্থো জিণ্ণো গোপানসিৱঙ্কো ঘুৰুঘুৰুপস্সাসী উদুম্বৰদণ্ডং গহেত্ৱা যেন মযং তেনুপসঙ্কমি; উপসঙ্কমিত্ৱা অম্হে এতদৱোচ – ‘দহৰা ভৱন্তো পব্বজিতা সুসূ কাড়কেসা ভদ্ৰেন যোব্বনেন সমন্নাগতা পঠমেন ৱযসা অনিক্কীড়িতাৱিনো কামেসু. ভুঞ্জন্তু ভৱন্তো মানুসকে কামে. মা সন্দিট্ঠিকং হিত্ৱা কালিকং অনুধাৱিত্থা’তি. এৱং ৱুত্তে, মযং, ভন্তে, তং ব্ৰাহ্মণং এতদৱোচুম্হ – ‘ন খো মযং, ব্ৰাহ্মণ, সন্দিট্ঠিকং হিত্ৱা কালিকং অনুধাৱাম. কালিকঞ্চ খো মযং, ব্ৰাহ্মণ, হিত্ৱা সন্দিট্ঠিকং অনুধাৱাম. কালিকা হি, ব্ৰাহ্মণ, কামা ৱুত্তা ভগৱতা বহুদুক্খা বহুপাযাসা, আদীনৱো এত্থ ভিয্যো. সন্দিট্ঠিকো অযং ধম্মো অকালিকো এহিপস্সিকো ওপনেয্যিকো পচ্চত্তং ৱেদিতব্বো ৱিঞ্ঞূহী’তি. এৱং ৱুত্তে, ভন্তে, সো ব্ৰাহ্মণো সীসং ওকম্পেত্ৱা জিৱ্হং নিল্লালেত্ৱা তিৱিসাখং নলাটে নলাটিকং ৱুট্ঠাপেত্ৱা দণ্ডমোলুব্ভ পক্কন্তো’’তি.

‘‘নেসো, ভিক্খৱে, ব্ৰাহ্মণো. মাৰো এসো পাপিমা তুম্হাকং ৱিচক্খুকম্মায আগতো’’তি. অথ খো ভগৱা এতমত্থং ৱিদিত্ৱা তাযং ৱেলাযং ইমং গাথং অভাসি –

‘‘যো দুক্খমদ্দক্খি যতোনিদানং,

কামেসু সো জন্তু কথং নমেয্য;

উপধিং ৱিদিত্ৱা সঙ্গোতি লোকে,

তস্সেৱ জন্তু ৱিনযায সিক্খে’’তি.