১. সুৱীৰসুত্তং

২৪৭. এৱং মে সুতং – একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তত্ৰ খো ভগৱা ভিক্খূ আমন্তেসি – ‘‘ভিক্খৱো’’তি. ‘‘ভদন্তে’’তি তে ভিক্খূ ভগৱতো পচ্চস্সোসুং. ভগৱা এতদৱোচ –

‘‘ভূতপুব্বং, ভিক্খৱে, অসুৰা দেৱে অভিযংসু. অথ খো, ভিক্খৱে, সক্কো দেৱানমিন্দো সুৱীৰং দেৱপুত্তং আমন্তেসি – ‘এতে, তাত সুৱীৰ, অসুৰা দেৱে অভিযন্তি. গচ্ছ, তাত সুৱীৰ, অসুৰে পচ্চুয্যাহী’তি. ‘এৱং ভদ্দন্তৱা’তি খো, ভিক্খৱে, সুৱীৰো দেৱপুত্তো সক্কস্স দেৱানমিন্দস্স পটিস্সুত্ৱা পমাদং আপাদেসি [আহৰেসি (কত্থচি) নৱঙ্গুত্তৰে সীহনাদসুত্তেপি]. দুতিযম্পি খো, ভিক্খৱে, সক্কো দেৱানমিন্দো সুৱীৰং দেৱপুত্তং আমন্তেসি – ‘এতে, তাত সুৱীৰ, অসুৰা দেৱে অভিযন্তি. গচ্ছ, তাত সুৱীৰ, অসুৰে পচ্চুয্যাহী’তি. ‘এৱং ভদ্দন্তৱা’তি খো, ভিক্খৱে, সুৱীৰো দেৱপুত্তো সক্কস্স দেৱানমিন্দস্স পটিস্সুত্ৱা দুতিযম্পি পমাদং আপাদেসি. ততিযম্পি খো, ভিক্খৱে, সক্কো দেৱানমিন্দো সুৱীৰং দেৱপুত্তং আমন্তেসি – ‘এতে, তাত সুৱীৰ, অসুৰা দেৱে অভিযন্তি. গচ্ছ, তাত সুৱীৰ, অসুৰে পচ্চুয্যাহী’তি. ‘এৱং ভদ্দন্তৱা’তি খো, ভিক্খৱে, সুৱীৰো দেৱপুত্তো সক্কস্স দেৱানমিন্দস্স পটিস্সুত্ৱা ততিযম্পি পমাদং আপাদেসি. অথ খো, ভিক্খৱে, সক্কো দেৱানমিন্দো সুৱীৰং দেৱপুত্তং গাথায অজ্ঝভাসি –

‘‘অনুট্ঠহং অৱাযামং, সুখং যত্ৰাধিগচ্ছতি;

সুৱীৰ তত্থ গচ্ছাহি, মঞ্চ তত্থেৱ পাপযা’’তি.

‘‘অলস্ৱস্স [অলস’স্স (সী. পী.), অলস্ৱাযং (স্যা. কং.)] অনুট্ঠাতা, ন চ কিচ্চানি কাৰযে;

সব্বকামসমিদ্ধস্স, তং মে সক্ক ৱৰং দিসা’’তি.

‘‘যত্থালসো অনুট্ঠাতা, অচ্চন্তং সুখমেধতি;

সুৱীৰ তত্থ গচ্ছাহি, মঞ্চ তত্থেৱ পাপযা’’তি.

‘‘অকম্মুনা [অকম্মনা (সী. পী.)] দেৱসেট্ঠ, সক্ক ৱিন্দেমু যং সুখং;

অসোকং অনুপাযাসং, তং মে সক্ক ৱৰং দিসা’’তি.

‘‘সচে অত্থি অকম্মেন, কোচি ক্ৱচি ন জীৱতি;

নিব্বানস্স হি সো মগ্গো, সুৱীৰ তত্থ গচ্ছাহি;

মঞ্চ তত্থেৱ পাপযা’’তি.

‘‘সো হি নাম, ভিক্খৱে, সক্কো দেৱানমিন্দো সকং পুঞ্ঞফলং উপজীৱমানো দেৱানং তাৱতিংসানং ইস্সৰিযাধিপচ্চং ৰজ্জং কাৰেন্তো উট্ঠানৱীৰিযস্স ৱণ্ণৱাদী ভৱিস্সতি. ইধ খো তং, ভিক্খৱে, সোভেথ, যং তুম্হে এৱং স্ৱাক্খাতে ধম্মৱিনযে পব্বজিতা সমানা উট্ঠহেয্যাথ ঘটেয্যাথ ৱাযমেয্যাথ অপ্পত্তস্স পত্তিযা অনধিগতস্স অধিগমায, অসচ্ছিকতস্স সচ্ছিকিৰিযাযা’’তি.