৬. জৰাৱগ্গো

১. জৰাসুত্তং

৫১. ‘‘কিংসু যাৱ জৰা সাধু, কিংসু সাধু পতিট্ঠিতং;

কিংসু নৰানং ৰতনং, কিংসু চোৰেহি দূহৰ’’ন্তি.

‘‘সীলং যাৱ জৰা সাধু, সদ্ধা সাধু পতিট্ঠিতা;

পঞ্ঞা নৰানং ৰতনং, পুঞ্ঞং চোৰেহি দূহৰ’’ন্তি.

২. অজৰসাসুত্তং

৫২. ‘‘কিংসু অজৰসা সাধু, কিংসু সাধু অধিট্ঠিতং;

কিংসু নৰানং ৰতনং, কিংসু চোৰেহ্যহাৰিয’’ন্তি.

‘‘সীলং অজৰসা সাধু, সদ্ধা সাধু অধিট্ঠিতা;

পঞ্ঞা নৰানং ৰতনং, পুঞ্ঞং চোৰেহ্যহাৰিয’’ন্তি.

৩. মিত্তসুত্তং

৫৩. ‘‘কিংসু পৱসতো [পথৱতো (পী. ক.)] মিত্তং, কিংসু মিত্তং সকে ঘৰে;

কিং মিত্তং অত্থজাতস্স, কিং মিত্তং সম্পৰাযিক’’ন্তি.

‘‘সত্থো পৱসতো মিত্তং, মাতা মিত্তং সকে ঘৰে;

সহাযো অত্থজাতস্স, হোতি মিত্তং পুনপ্পুনং;

সযংকতানি পুঞ্ঞানি, তং মিত্তং সম্পৰাযিক’’ন্তি.

৪. ৱত্থুসুত্তং

৫৪. ‘‘কিংসু ৱত্থু মনুস্সানং, কিংসূধ পৰমো সখা;

কিংসু ভূতা উপজীৱন্তি, যে পাণা পথৱিস্সিতা’’তি [পথৱিং সিতাতি (সী. স্যা. কং. পী.)].

‘‘পুত্তা ৱত্থু মনুস্সানং, ভৰিযা চ [ভৰিযাৱ (সী.), ভৰিযা (স্যা. কং.)] পৰমো সখা;

ৱুট্ঠিং ভূতা উপজীৱন্তি, যে পাণা পথৱিস্সিতা’’তি.

৫. পঠমজনসুত্তং

৫৫. ‘‘কিংসু জনেতি পুৰিসং, কিংসু তস্স ৱিধাৱতি;

কিংসু সংসাৰমাপাদি, কিংসু তস্স মহব্ভয’’ন্তি.

‘‘তণ্হা জনেতি পুৰিসং, চিত্তমস্স ৱিধাৱতি;

সত্তো সংসাৰমাপাদি, দুক্খমস্স মহব্ভয’’ন্তি.

৬. দুতিযজনসুত্তং

৫৬. ‘‘কিংসু জনেতি পুৰিসং, কিংসু তস্স ৱিধাৱতি;

কিংসু সংসাৰমাপাদি, কিস্মা ন পৰিমুচ্চতী’’তি.

‘‘তণ্হা জনেতি পুৰিসং, চিত্তমস্স ৱিধাৱতি;

সত্তো সংসাৰমাপাদি, দুক্খা ন পৰিমুচ্চতী’’তি.

৭. ততিযজনসুত্তং

৫৭. ‘‘কিংসু জনেতি পুৰিসং, কিংসু তস্স ৱিধাৱতি;

কিংসু সংসাৰমাপাদি, কিংসু তস্স পৰাযন’’ন্তি.

‘‘তণ্হা জনেতি পুৰিসং, চিত্তমস্স ৱিধাৱতি;

সত্তো সংসাৰমাপাদি, কম্মং তস্স পৰাযন’’ন্তি.

৮. উপ্পথসুত্তং

৫৮. ‘‘কিংসু উপ্পথো অক্খাতো, কিংসু ৰত্তিন্দিৱক্খযো;

কিং মলং ব্ৰহ্মচৰিযস্স, কিং সিনানমনোদক’’ন্তি.

‘‘ৰাগো উপ্পথো অক্খাতো, ৱযো ৰত্তিন্দিৱক্খযো;

ইত্থী মলং ব্ৰহ্মচৰিযস্স, এত্থাযং সজ্জতে পজা;

তপো চ ব্ৰহ্মচৰিযঞ্চ, তং সিনানমনোদক’’ন্তি.

৯. দুতিযসুত্তং

৫৯. ‘‘কিংসু দুতিযা [দুতিযং (স্যা. কং. পী.)] পুৰিসস্স হোতি, কিংসু চেনং পসাসতি;

কিস্স চাভিৰতো মচ্চো, সব্বদুক্খা পমুচ্চতী’’তি.

‘‘সদ্ধা দুতিযা পুৰিসস্স হোতি, পঞ্ঞা চেনং পসাসতি;

নিব্বানাভিৰতো মচ্চো, সব্বদুক্খা পমুচ্চতী’’তি.

১০. কৱিসুত্তং

৬০. ‘‘কিংসু নিদানং গাথানং, কিংসু তাসং ৱিযঞ্জনং;

কিংসু সন্নিস্সিতা গাথা, কিংসু গাথানমাসযো’’তি.

‘‘ছন্দো নিদানং গাথানং, অক্খৰা তাসং ৱিযঞ্জনং;

নামসন্নিস্সিতা গাথা, কৱি গাথানমাসযো’’তি.

জৰাৱগ্গো ছট্ঠো.

তস্সুদ্দানং –

জৰা অজৰসা মিত্তং, ৱত্থু তীণি জনানি চ;

উপ্পথো চ দুতিযো চ, কৱিনা পূৰিতো ৱগ্গোতি.