৯. পিণ্ডপাতপাৰিসুদ্ধিসুত্তং

৪৩৮. এৱং মে সুতং – একং সমযং ভগৱা ৰাজগহে ৱিহৰতি ৱেড়ুৱনে কলন্দকনিৱাপে. অথ খো আযস্মা সাৰিপুত্তো সাযন্হসমযং পটিসল্লানা ৱুট্ঠিতো যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নং খো আযস্মন্তং সাৰিপুত্তং ভগৱা এতদৱোচ –

‘‘ৱিপ্পসন্নানি খো তে, সাৰিপুত্ত, ইন্দ্ৰিযানি, পৰিসুদ্ধো ছৱিৱণ্ণো পৰিযোদাতো. কতমেন খো ত্ৱং, সাৰিপুত্ত, ৱিহাৰেন এতৰহি বহুলং ৱিহৰসী’’তি? ‘‘সুঞ্ঞতাৱিহাৰেন খো অহং, ভন্তে, এতৰহি বহুলং ৱিহৰামী’’তি. ‘‘সাধু, সাধু, সাৰিপুত্ত! মহাপুৰিসৱিহাৰেন কিৰ ত্ৱং, সাৰিপুত্ত, এতৰহি বহুলং ৱিহৰসি. মহাপুৰিসৱিহাৰো এসো [হেস (সী. স্যা. কং. পী.)], সাৰিপুত্ত, যদিদং – সুঞ্ঞতা. তস্মাতিহ, সাৰিপুত্ত, ভিক্খু সচে আকঙ্খেয্য – ‘সুঞ্ঞতাৱিহাৰেন বহুলং [এতৰহি বহুলং (সী. পী.)] ৱিহৰেয্য’ন্তি, তেন, সাৰিপুত্ত, ভিক্খুনা ইতি পটিসঞ্চিক্খিতব্বং – ‘যেন চাহং মগ্গেন গামং পিণ্ডায পাৱিসিং, যস্মিঞ্চ পদেসে পিণ্ডায অচৰিং, যেন চ মগ্গেন গামতো পিণ্ডায পটিক্কমিং, অত্থি নু খো মে তত্থ চক্খুৱিঞ্ঞেয্যেসু ৰূপেসু ছন্দো ৱা ৰাগো ৱা দোসো ৱা মোহো ৱা পটিঘং ৱাপি চেতসো’তি? সচে, সাৰিপুত্ত, ভিক্খু পচ্চৱেক্খমানো এৱং জানাতি – ‘যেন চাহং মগ্গেন গামং পিণ্ডায পাৱিসিং, যস্মিঞ্চ পদেসে পিণ্ডায অচৰিং, যেন চ মগ্গেন গামতো পিণ্ডায পটিক্কমিং, অত্থি মে তত্থ চক্খুৱিঞ্ঞেয্যেসু ৰূপেসু ছন্দো ৱা ৰাগো ৱা দোসো ৱা মোহো ৱা পটিঘং ৱাপি চেতসো’তি, তেন, সাৰিপুত্ত, ভিক্খুনা তেসংযেৱ পাপকানং অকুসলানং ধম্মানং পহানায ৱাযমিতব্বং. সচে পন, সাৰিপুত্ত, ভিক্খু পচ্চৱেক্খমানো এৱং জানাতি – ‘যেন চাহং মগ্গেন গামং পিণ্ডায পাৱিসিং, যস্মিঞ্চ পদেসে পিণ্ডায অচৰিং, যেন চ মগ্গেন গামতো পিণ্ডায পটিক্কমিং, নত্থি মে তত্থ চক্খুৱিঞ্ঞেয্যেসু ৰূপেসু ছন্দো ৱা ৰাগো ৱা দোসো ৱা মোহো ৱা পটিঘং ৱাপি চেতসো’তি, তেন, সাৰিপুত্ত, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

৪৩৯. ‘‘পুন চপৰং, সাৰিপুত্ত, ভিক্খুনা ইতি পটিসঞ্চিক্খিতব্বং – ‘যেন চাহং মগ্গেন গামং পিণ্ডায পাৱিসিং, যস্মিঞ্চ পদেসে পিণ্ডায অচৰিং, যেন চ মগ্গেন গামতো পিণ্ডায পটিক্কমিং, অত্থি নু খো মে তত্থ সোতৱিঞ্ঞেয্যেসু সদ্দেসু…পে… ঘানৱিঞ্ঞেয্যেসু গন্ধেসু… জিৱ্হাৱিঞ্ঞেয্যেসু ৰসেসু … কাযৱিঞ্ঞেয্যেসু ফোট্ঠব্বেসু… মনোৱিঞ্ঞেয্যেসু ধম্মেসু ছন্দো ৱা ৰাগো ৱা দোসো ৱা মোহো ৱা পটিঘং ৱাপি চেতসো’তি? সচে, সাৰিপুত্ত, ভিক্খু পচ্চৱেক্খমানো এৱং জানাতি – ‘যেন চাহং মগ্গেন গামং পিণ্ডায পাৱিসিং, যস্মিঞ্চ পদেসে পিণ্ডায অচৰিং, যেন চ মগ্গেন গামতো পিণ্ডায পটিক্কমিং, অত্থি মে তত্থ মনোৱিঞ্ঞেয্যেসু ধম্মেসু ছন্দো ৱা ৰাগো ৱা দোসো ৱা মোহো ৱা পটিঘং ৱাপি চেতসো’তি, তেন, সাৰিপুত্ত, ভিক্খুনা তেসংযেৱ পাপকানং অকুসলানং ধম্মানং পহানায ৱাযমিতব্বং. সচে পন, সাৰিপুত্ত, ভিক্খু পচ্চৱেক্খমানো এৱং জানাতি – ‘যেন চাহং মগ্গেন গামং পিণ্ডায পাৱিসিং, যস্মিঞ্চ পদেসে পিণ্ডায অচৰিং, যেন চ মগ্গেন গামতো পিণ্ডায পটিক্কমিং, নত্থি মে তত্থ মনোৱিঞ্ঞেয্যেসু ধম্মেসু ছন্দো ৱা ৰাগো ৱা দোসো ৱা মোহো ৱা পটিঘং ৱাপি চেতসো’তি, তেন, সাৰিপুত্ত, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

৪৪০. ‘‘পুন চপৰং, সাৰিপুত্ত, ভিক্খুনা ইতি পটিসঞ্চিক্খিতব্বং – ‘পহীনা নু খো মে পঞ্চ কামগুণা’তি? সচে, সাৰিপুত্ত, ভিক্খু পচ্চৱেক্খমানো এৱং জানাতি – ‘অপ্পহীনা খো মে পঞ্চ কামগুণা’তি, তেন, সাৰিপুত্ত, ভিক্খুনা পঞ্চন্নং কামগুণানং পহানায ৱাযমিতব্বং. সচে পন, সাৰিপুত্ত, ভিক্খু পচ্চৱেক্খমানো এৱং জানাতি – ‘পহীনা খো মে পঞ্চ কামগুণা’তি, তেন, সাৰিপুত্ত, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

৪৪১. ‘‘পুন চপৰং, সাৰিপুত্ত, ভিক্খুনা ইতি পটিসঞ্চিক্খিতব্বং – ‘পহীনা নু খো মে পঞ্চ নীৱৰণা’তি? সচে, সাৰিপুত্ত, ভিক্খু পচ্চৱেক্খমানো এৱং জানাতি – ‘অপ্পহীনা খো মে পঞ্চ নীৱৰণা’তি, তেন, সাৰিপুত্ত, ভিক্খুনা পঞ্চন্নং নীৱৰণানং পহানায ৱাযমিতব্বং. সচে পন, সাৰিপুত্ত, ভিক্খু পচ্চৱেক্খমানো এৱং জানাতি – ‘পহীনা খো মে পঞ্চ নীৱৰণা’তি, তেন, সাৰিপুত্ত, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

৪৪২. ‘‘পুন চপৰং, সাৰিপুত্ত, ভিক্খুনা ইতি পটিসঞ্চিক্খিতব্বং – ‘পৰিঞ্ঞাতা নু খো মে পঞ্চুপাদানক্খন্ধা’তি? সচে, সাৰিপুত্ত, ভিক্খু পচ্চৱেক্খমানো এৱং জানাতি – ‘অপৰিঞ্ঞাতা খো মে পঞ্চুপাদানক্খন্ধা’তি, তেন, সাৰিপুত্ত, ভিক্খুনা পঞ্চন্নং উপাদানক্খন্ধানং পৰিঞ্ঞায ৱাযমিতব্বং. সচে পন, সাৰিপুত্ত, ভিক্খু পচ্চৱেক্খমানো এৱং জানাতি – ‘পৰিঞ্ঞাতা খো মে পঞ্চুপাদানক্খন্ধা’তি, তেন, সাৰিপুত্ত, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

৪৪৩. ‘‘পুন চপৰং, সাৰিপুত্ত, ভিক্খুনা ইতি পটিসঞ্চিক্খিতব্বং – ‘ভাৱিতা নু খো মে চত্তাৰো সতিপট্ঠানা’তি? সচে, সাৰিপুত্ত, ভিক্খু পচ্চৱেক্খমানো এৱং জানাতি – ‘অভাৱিতা খো মে চত্তাৰো সতিপট্ঠানা’তি, তেন, সাৰিপুত্ত, ভিক্খুনা চতুন্নং সতিপট্ঠানানং ভাৱনায ৱাযমিতব্বং. সচে পন, সাৰিপুত্ত, ভিক্খু পচ্চৱেক্খমানো এৱং জানাতি – ‘ভাৱিতা খো মে চত্তাৰো সতিপট্ঠানা’তি, তেন, সাৰিপুত্ত, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

৪৪৪. ‘‘পুন চপৰং, সাৰিপুত্ত, ভিক্খুনা ইতি পটিসঞ্চিক্খিতব্বং – ‘ভাৱিতা নু খো মে চত্তাৰো সম্মপ্পধানা’তি? সচে, সাৰিপুত্ত, ভিক্খু পচ্চৱেক্খমানো এৱং জানাতি – ‘অভাৱিতা খো মে চত্তাৰো সম্মপ্পধানা’তি, তেন, সাৰিপুত্ত, ভিক্খুনা চতুন্নং সম্মপ্পধানানং ভাৱনায ৱাযমিতব্বং. সচে পন, সাৰিপুত্ত, ভিক্খু পচ্চৱেক্খমানো এৱং জানাতি – ‘ভাৱিতা খো মে চত্তাৰো সম্মপ্পধানা’তি, তেন, সাৰিপুত্ত, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

৪৪৫. ‘‘পুন চপৰং, সাৰিপুত্ত, ভিক্খুনা ইতি পটিসঞ্চিক্খিতব্বং – ‘ভাৱিতা নু খো মে চত্তাৰো ইদ্ধিপাদা’তি? সচে, সাৰিপুত্ত, ভিক্খু পচ্চৱেক্খমানো এৱং জানাতি – ‘অভাৱিতা খো মে চত্তাৰো ইদ্ধিপাদা’তি, তেন, সাৰিপুত্ত, ভিক্খুনা চতুন্নং ইদ্ধিপাদানং ভাৱনায ৱাযমিতব্বং. সচে পন, সাৰিপুত্ত, ভিক্খু পচ্চৱেক্খমানো এৱং জানাতি – ‘ভাৱিতা খো মে চত্তাৰো ইদ্ধিপাদা’তি, তেন, সাৰিপুত্ত, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

৪৪৬. ‘‘পুন চপৰং, সাৰিপুত্ত, ভিক্খুনা ইতি পটিসঞ্চিক্খিতব্বং – ‘ভাৱিতানি নু খো মে পঞ্চিন্দ্ৰিযানী’তি? সচে, সাৰিপুত্ত, ভিক্খু পচ্চৱেক্খমানো এৱং জানাতি – ‘অভাৱিতানি খো মে পঞ্চিন্দ্ৰিযানী’তি, তেন, সাৰিপুত্ত, ভিক্খুনা পঞ্চন্নং ইন্দ্ৰিযানং ভাৱনায ৱাযমিতব্বং. সচে পন, সাৰিপুত্ত, ভিক্খু পচ্চৱেক্খমানো এৱং জানাতি – ‘ভাৱিতানি খো মে পঞ্চিন্দ্ৰিযানী’তি, তেন, সাৰিপুত্ত, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

৪৪৭. ‘‘পুন চপৰং, সাৰিপুত্ত, ভিক্খুনা ইতি পটিসঞ্চিক্খিতব্বং – ‘ভাৱিতানি নু খো মে পঞ্চ বলানী’তি? সচে, সাৰিপুত্ত, ভিক্খু পচ্চৱেক্খমানো এৱং জানাতি – ‘অভাৱিতানি খো মে পঞ্চ বলানী’তি, তেন, সাৰিপুত্ত, ভিক্খুনা পঞ্চন্নং বলানং ভাৱনায ৱাযমিতব্বং. সচে পন, সাৰিপুত্ত, ভিক্খু পচ্চৱেক্খমানো এৱং জানাতি – ‘ভাৱিতানি খো মে পঞ্চ বলানী’তি, তেন, সাৰিপুত্ত, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

৪৪৮. ‘‘পুন চপৰং, সাৰিপুত্ত, ভিক্খুনা ইতি পটিসঞ্চিক্খিতব্বং – ‘ভাৱিতা নু খো মে সত্ত বোজ্ঝঙ্গা’তি? সচে, সাৰিপুত্ত, ভিক্খু পচ্চৱেক্খমানো এৱং জানাতি – ‘অভাৱিতা খো মে সত্ত বোজ্ঝঙ্গা’তি, তেন, সাৰিপুত্ত, ভিক্খুনা সত্তন্নং বোজ্ঝঙ্গানং ভাৱনায ৱাযমিতব্বং. সচে পন, সাৰিপুত্ত, ভিক্খু পচ্চৱেক্খমানো এৱং জানাতি – ‘ভাৱিতা খো মে সত্ত বোজ্ঝঙ্গা’তি, তেন, সাৰিপুত্ত, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

৪৪৯. ‘‘পুন চপৰং, সাৰিপুত্ত, ভিক্খুনা ইতি পটিসঞ্চিক্খিতব্বং – ‘ভাৱিতো নু খো মে অৰিযো অট্ঠঙ্গিকো মগ্গো’তি? সচে, সাৰিপুত্ত, ভিক্খু পচ্চৱেক্খমানো এৱং জানাতি – ‘অভাৱিতো খো মে অৰিযো অট্ঠঙ্গিকো মগ্গো’তি, তেন, সাৰিপুত্ত, ভিক্খুনা অৰিযস্স অট্ঠঙ্গিকস্স মগ্গস্স ভাৱনায ৱাযমিতব্বং. সচে পন, সাৰিপুত্ত, ভিক্খু পচ্চৱেক্খমানো এৱং জানাতি – ‘ভাৱিতো খো মে অৰিযো অট্ঠঙ্গিকো মগ্গো’তি, তেন, সাৰিপুত্ত, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

৪৫০. ‘‘পুন চপৰং, সাৰিপুত্ত, ভিক্খুনা ইতি পটিসঞ্চিক্খিতব্বং – ‘ভাৱিতা নু খো মে সমথো চ ৱিপস্সনা চা’তি? সচে, সাৰিপুত্ত, ভিক্খু পচ্চৱেক্খমানো এৱং জানাতি – ‘অভাৱিতা খো মে সমথো চ ৱিপস্সনা চা’তি, তেন, সাৰিপুত্ত, ভিক্খুনা সমথৱিপস্সনানং ভাৱনায ৱাযমিতব্বং. সচে পন, সাৰিপুত্ত, ভিক্খু পচ্চৱেক্খমানো এৱং জানাতি – ‘ভাৱিতা খো মে সমথো চ ৱিপস্সনা চা’তি, তেন, সাৰিপুত্ত, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

৪৫১. ‘‘পুন চপৰং, সাৰিপুত্ত, ভিক্খুনা ইতি পটিসঞ্চিক্খিতব্বং – ‘সচ্ছিকতা নু খো মে ৱিজ্জা চ ৱিমুত্তি চা’তি? সচে, সাৰিপুত্ত, ভিক্খু পচ্চৱেক্খমানো এৱং জানাতি – ‘অসচ্ছিকতা খো মে ৱিজ্জা চ ৱিমুত্তি চা’তি, তেন, সাৰিপুত্ত, ভিক্খুনা ৱিজ্জায ৱিমুত্তিযা সচ্ছিকিৰিযায ৱাযমিতব্বং. সচে পন, সাৰিপুত্ত, ভিক্খু পচ্চৱেক্খমানো এৱং জানাতি – ‘সচ্ছিকতা খো মে ৱিজ্জা চ ৱিমুত্তি চা’তি, তেন, সাৰিপুত্ত, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

৪৫২. ‘‘যে হি কেচি, সাৰিপুত্ত, অতীতমদ্ধানং সমণা ৱা ব্ৰাহ্মণা ৱা পিণ্ডপাতং পৰিসোধেসুং, সব্বে তে এৱমেৱ পচ্চৱেক্খিত্ৱা পচ্চৱেক্খিত্ৱা পিণ্ডপাতং পৰিসোধেসুং. যেপি হি কেচি, সাৰিপুত্ত, অনাগতমদ্ধানং সমণা ৱা ব্ৰাহ্মণা ৱা পিণ্ডপাতং পৰিসোধেস্সন্তি, সব্বে তে এৱমেৱ পচ্চৱেক্খিত্ৱা পচ্চৱেক্খিত্ৱা পিণ্ডপাতং পৰিসোধেস্সন্তি. যেপি হি কেচি, সাৰিপুত্ত, এতৰহি সমণা ৱা ব্ৰাহ্মণা ৱা পিণ্ডপাতং পৰিসোধেন্তি, সব্বে তে এৱমেৱ পচ্চৱেক্খিত্ৱা পচ্চৱেক্খিত্ৱা পিণ্ডপাতং পৰিসোধেন্তি. তস্মাতিহ, সাৰিপুত্ত [ৱো সাৰিপুত্ত এৱং সিক্খিতব্বং (সী. পী.)], ‘পচ্চৱেক্খিত্ৱা পচ্চৱেক্খিত্ৱা পিণ্ডপাতং পৰিসোধেস্সামা’তি – এৱঞ্হি ৱো, সাৰিপুত্ত, সিক্খিতব্ব’’ন্তি.

ইদমৱোচ ভগৱা. অত্তমনো আযস্মা সাৰিপুত্তো ভগৱতো ভাসিতং অভিনন্দীতি.

পিণ্ডপাতপাৰিসুদ্ধিসুত্তং নিট্ঠিতং নৱমং.