৮. নগৰৱিন্দেয্যসুত্তং

৪৩৪. এৱং মে সুতং – একং সমযং ভগৱা কোসলেসু চাৰিকং চৰমানো মহতা ভিক্খুসঙ্ঘেন সদ্ধিং যেন নগৰৱিন্দং নাম কোসলানং ব্ৰাহ্মণানং গামো তদৱসৰি. অস্সোসুং খো নগৰৱিন্দেয্যকা [নগৰৱিন্দেয্যা (ক.)] ব্ৰাহ্মণগহপতিকা – ‘‘সমণো খলু, ভো, গোতমো সক্যপুত্তো সক্যকুলা পব্বজিতো কোসলেসু চাৰিকং চৰমানো মহতা ভিক্খুসঙ্ঘেন সদ্ধিং নগৰৱিন্দং অনুপ্পত্তো. তং খো পন ভৱন্তং গোতমং এৱং কল্যাণো কিত্তিসদ্দো অব্ভুগ্গতো – ‘ইতিপি সো ভগৱা অৰহং সম্মাসম্বুদ্ধো ৱিজ্জাচৰণসম্পন্নো সুগতো লোকৱিদূ অনুত্তৰো পুৰিসদম্মসাৰথি সত্থা দেৱমনুস্সানং বুদ্ধো ভগৱা’তি. সো ইমং লোকং সদেৱকং সমাৰকং সব্ৰহ্মকং সস্সমণব্ৰাহ্মণিং পজং সদেৱমনুস্সং সযং অভিঞ্ঞা সচ্ছিকত্ৱা পৱেদেতি. সো ধম্মং দেসেতি আদিকল্যাণং মজ্ঝেকল্যাণং পৰিযোসানকল্যাণং সাত্থং সব্যঞ্জনং, কেৱলপৰিপুণ্ণং পৰিসুদ্ধং ব্ৰহ্মচৰিযং পকাসেতি. সাধু খো পন তথাৰূপানং অৰহতং দস্সনং হোতী’’তি.

অথ খো নগৰৱিন্দেয্যকা ব্ৰাহ্মণগহপতিকা যেন ভগৱা তেনুপসঙ্কমিংসু; উপসঙ্কমিত্ৱা অপ্পেকচ্চে ভগৱন্তং অভিৱাদেত্ৱা একমন্তং নিসীদিংসু. অপ্পেকচ্চে ভগৱতা সদ্ধিং সম্মোদিংসু; সম্মোদনীযং কথং সাৰণীযং ৱীতিসাৰেত্ৱা একমন্তং নিসীদিংসু. অপ্পেকচ্চে যেন ভগৱা তেনঞ্জলিং পণামেত্ৱা একমন্তং নিসীদিংসু. অপ্পেকচ্চে ভগৱতো সন্তিকে নামগোত্তং সাৱেত্ৱা একমন্তং নিসীদিংসু. অপ্পেকচ্চে তুণ্হীভূতা একমন্তং নিসীদিংসু. একমন্তং নিসিন্নে খো নগৰৱিন্দেয্যকে ব্ৰাহ্মণগহপতিকে ভগৱা এতদৱোচ –

৪৩৫. ‘‘সচে ৱো, গহপতযো, অঞ্ঞতিত্থিযা পৰিব্বাজকা এৱং পুচ্ছেয্যুং – ‘কথংভূতা, গহপতযো, সমণব্ৰাহ্মণা ন সক্কাতব্বা ন গৰুকাতব্বা ন মানেতব্বা ন পূজেতব্বা’তি? এৱং পুট্ঠা তুম্হে, গহপতযো, তেসং অঞ্ঞতিত্থিযানং পৰিব্বাজকানং এৱং ব্যাকৰেয্যাথ – ‘যে তে সমণব্ৰাহ্মণা চক্খুৱিঞ্ঞেয্যেসু ৰূপেসু অৱীতৰাগা অৱীতদোসা অৱীতমোহা, অজ্ঝত্তং অৱূপসন্তচিত্তা, সমৱিসমং চৰন্তি কাযেন ৱাচায মনসা, এৱৰূপা সমণব্ৰাহ্মণা ন সক্কাতব্বা ন গৰুকাতব্বা ন মানেতব্বা ন পূজেতব্বা. তং কিস্স হেতু? মযম্পি হি চক্খুৱিঞ্ঞেয্যেসু ৰূপেসু অৱীতৰাগা অৱীতদোসা অৱীতমোহা, অজ্ঝত্তং অৱূপসন্তচিত্তা, সমৱিসমং চৰাম কাযেন ৱাচায মনসা, তেসং নো সমচৰিযম্পি হেতং উত্তৰি অপস্সতং. তস্মা তে ভোন্তো সমণব্ৰাহ্মণা ন সক্কাতব্বা ন গৰুকাতব্বা ন মানেতব্বা ন পূজেতব্বা. যে তে সমণব্ৰাহ্মণা সোতৱিঞ্ঞেয্যেসু সদ্দেসু… ঘানৱিঞ্ঞেয্যেসু গন্ধেসু… জিৱ্হাৱিঞ্ঞেয্যেসু ৰসেসু… কাযৱিঞ্ঞেয্যেসু ফোট্ঠব্বেসু… মনোৱিঞ্ঞেয্যেসু ধম্মেসু অৱীতৰাগা অৱীতদোসা অৱীতমোহা, অজ্ঝত্তং অৱূপসন্তচিত্তা, সমৱিসমং চৰন্তি কাযেন ৱাচায মনসা, এৱৰূপা সমণব্ৰাহ্মণা ন সক্কাতব্বা ন গৰুকাতব্বা ন মানেতব্বা ন পূজেতব্বা. তং কিস্স হেতু? মযম্পি হি মনোৱিঞ্ঞেয্যেসু ধম্মেসু অৱীতৰাগা অৱীতদোসা অৱীতমোহা, অজ্ঝত্তং অৱূপসন্তচিত্তা, সমৱিসমং চৰাম কাযেন ৱাচায মনসা, তেসং নো সমচৰিযম্পি হেতং উত্তৰি অপস্সতং. তস্মা তে ভোন্তো সমণব্ৰাহ্মণা ন সক্কাতব্বা ন গৰুকাতব্বা ন মানেতব্বা ন পূজেতব্বা’তি. এৱং পুট্ঠা তুম্হে, গহপতযো, তেসং অঞ্ঞতিত্থিযানং পৰিব্বাজকানং এৱং ব্যাকৰেয্যাথ.

৪৩৬. ‘‘সচে পন ৱো, গহপতযো, অঞ্ঞতিত্থিযা পৰিব্বাজকা এৱং পুচ্ছেয্যুং – ‘কথংভূতা, গহপতযো, সমণব্ৰাহ্মণা সক্কাতব্বা গৰুকাতব্বা মানেতব্বা পূজেতব্বা’তি? এৱং পুট্ঠা তুম্হে, গহপতযো, তেসং অঞ্ঞতিত্থিযানং পৰিব্বাজকানং এৱং ব্যাকৰেয্যাথ – ‘যে তে সমণব্ৰাহ্মণা চক্খুৱিঞ্ঞেয্যেসু ৰূপেসু ৱীতৰাগা ৱীতদোসা ৱীতমোহা, অজ্ঝত্তং ৱূপসন্তচিত্তা, সমচৰিযং চৰন্তি কাযেন ৱাচায মনসা, এৱৰূপা সমণব্ৰাহ্মণা সক্কাতব্বা গৰুকাতব্বা মানেতব্বা পূজেতব্বা. তং কিস্স হেতু? মযম্পি হি [মযং হি (?)] চক্খুৱিঞ্ঞেয্যেসু ৰূপেসু অৱীতৰাগা অৱীতদোসা অৱীতমোহা, অজ্ঝত্তং অৱূপসন্তচিত্তা, সমৱিসমং চৰাম কাযেন ৱাচায মনসা, তেসং নো সমচৰিযম্পি হেতং উত্তৰি পস্সতং. তস্মা তে ভোন্তো সমণব্ৰাহ্মণা সক্কাতব্বা গৰুকাতব্বা মানেতব্বা পূজেতব্বা. যে তে সমণব্ৰাহ্মণা সোতৱিঞ্ঞেয্যেসু সদ্দেসু… ঘানৱিঞ্ঞেয্যেসু গন্ধেসু… জিৱ্হাৱিঞ্ঞেয্যেসু ৰসেসু… কাযৱিঞ্ঞেয্যেসু ফোট্ঠব্বেসু… মনোৱিঞ্ঞেয্যেসু ধম্মেসু ৱীতৰাগা ৱীতদোসা ৱীতমোহা, অজ্ঝত্তং ৱূপসন্তচিত্তা, সমচৰিযং চৰন্তি কাযেন ৱাচায মনসা, এৱৰূপা সমণব্ৰাহ্মণা সক্কাতব্বা গৰুকাতব্বা মানেতব্বা পূজেতব্বা. তং কিস্স হেতু? মযম্পি হি মনোৱিঞ্ঞেয্যেসু ধম্মেসু অৱীতৰাগা অৱীতদোসা অৱীতমোহা অজ্ঝত্তং অৱূপসন্তচিত্তা, সমৱিসমং চৰাম কাযেন ৱাচায মনসা, তেসং নো সমচৰিযম্পি হেতং উত্তৰি পস্সতং. তস্মা তে ভোন্তো সমণব্ৰাহ্মণা সক্কাতব্বা গৰুকাতব্বা মানেতব্বা পূজেতব্বা’তি. এৱং পুট্ঠা তুম্হে, গহপতযো, তেসং অঞ্ঞতিত্থিযানং পৰিব্বাজকানং এৱং ব্যাকৰেয্যাথ.

৪৩৭. ‘‘সচে পন ৱো [সচে তে (স্যা. কং. পী. ক.)], গহপতযো, অঞ্ঞতিত্থিযা পৰিব্বাজকা এৱং পুচ্ছেয্যুং – ‘কে পনাযস্মন্তানং আকাৰা, কে অন্ৱযা, যেন তুম্হে আযস্মন্তো এৱং ৱদেথ? অদ্ধা তে আযস্মন্তো ৱীতৰাগা ৱা ৰাগৱিনযায ৱা পটিপন্না, ৱীতদোসা ৱা দোসৱিনযায ৱা পটিপন্না, ৱীতমোহা ৱা মোহৱিনযায ৱা পটিপন্না’তি? এৱং পুট্ঠা তুম্হে, গহপতযো, তেসং অঞ্ঞতিত্থিযানং পৰিব্বাজকানং এৱং ব্যাকৰেয্যাথ – ‘তথা হি তে আযস্মন্তো অৰঞ্ঞৱনপত্থানি পন্তানি সেনাসনানি পটিসেৱন্তি. নত্থি খো পন তত্থ তথাৰূপা চক্খুৱিঞ্ঞেয্যা ৰূপা যে দিস্ৱা দিস্ৱা অভিৰমেয্যুং, নত্থি খো পন তত্থ তথাৰূপা সোতৱিঞ্ঞেয্যা সদ্দা যে সুত্ৱা সুত্ৱা অভিৰমেয্যুং, নত্থি খো পন তত্থ তথাৰূপা ঘানৱিঞ্ঞেয্যা গন্ধা যে ঘাযিত্ৱা ঘাযিত্ৱা অভিৰমেয্যুং, নত্থি খো পন তত্থ তথাৰূপা জিৱ্হাৱিঞ্ঞেয্যা ৰসা যে সাযিত্ৱা সাযিত্ৱা অভিৰমেয্যুং, নত্থি খো পন তত্থ তথাৰূপা কাযৱিঞ্ঞেয্যা ফোট্ঠব্বা যে ফুসিত্ৱা ফুসিত্ৱা অভিৰমেয্যুং. ইমে খো নো, আৱুসো, আকাৰা, ইমে অন্ৱযা, যেন মযং [যেন মযং আযস্মন্তো (সী. পী.), যেন মযং আযস্মন্তে (স্যা. কং.)] এৱং ৱদেম – অদ্ধা তে আযস্মন্তো ৱীতৰাগা ৱা ৰাগৱিনযায ৱা পটিপন্না, ৱীতদোসা ৱা দোসৱিনযায ৱা পটিপন্না, ৱীতমোহা ৱা মোহৱিনযায ৱা পটিপন্না’তি. এৱং পুট্ঠা তুম্হে, গহপতযো, তেসং অঞ্ঞতিত্থিযানং পৰিব্বাজকানং এৱং ব্যাকৰেয্যাথা’’তি.

এৱং ৱুত্তে, নগৰৱিন্দেয্যকা ব্ৰাহ্মণগহপতিকা ভগৱন্তং এতদৱোচুং – ‘‘অভিক্কন্তং, ভো গোতম, অভিক্কন্তং, ভো গোতম! সেয্যথাপি, ভো গোতম, নিক্কুজ্জিতং ৱা উক্কুজ্জেয্য, পটিচ্ছন্নং ৱা ৱিৱৰেয্য, মূড়্হস্স ৱা মগ্গং আচিক্খেয্য, অন্ধকাৰে ৱা তেলপজ্জোতং ধাৰেয্য – ‘চক্খুমন্তো ৰূপানি দক্খন্তী’তি; এৱমেৱং ভোতা গোতমেন অনেকপৰিযাযেন ধম্মো পকাসিতো. এতে মযং ভৱন্তং গোতমং সৰণং গচ্ছাম ধম্মঞ্চ ভিক্খুসঙ্ঘঞ্চ. উপাসকে নো ভৱং গোতমো ধাৰেতু অজ্জতগ্গে পাণুপেতে সৰণং গতে’’তি.

নগৰৱিন্দেয্যসুত্তং নিট্ঠিতং অট্ঠমং.