৩. পুণ্ণোৱাদসুত্তং

৩৯৫. এৱং মে সুতং – একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. অথ খো আযস্মা পুণ্ণো সাযন্হসমযং পটিসল্লানা ৱুট্ঠিতো যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো আযস্মা পুণ্ণো ভগৱন্তং এতদৱোচ – ‘‘সাধু মং, ভন্তে, ভগৱা সংখিত্তেন ওৱাদেন ওৱদতু, যমহং ভগৱতো ধম্মং সুত্ৱা একো ৱূপকট্ঠো অপ্পমত্তো আতাপী পহিতত্তো ৱিহৰেয্য’’ন্তি. ‘‘তেন হি, পুণ্ণ, সুণাহি, সাধুকং মনসি কৰোহি; ভাসিস্সামী’’তি. ‘‘এৱং, ভন্তে’’তি খো আযস্মা পুণ্ণো ভগৱতো পচ্চস্সোসি. ভগৱা এতদৱোচ –

‘‘সন্তি খো, পুণ্ণ, চক্খুৱিঞ্ঞেয্যা ৰূপা ইট্ঠা কন্তা মনাপা পিযৰূপা কামূপসংহিতা ৰজনীযা. তং চে ভিক্খু অভিনন্দতি অভিৱদতি অজ্ঝোসায তিট্ঠতি. তস্স তং অভিনন্দতো অভিৱদতো অজ্ঝোসায তিট্ঠতো উপ্পজ্জতি নন্দী [নন্দি (স্যা. কং.)]. ‘নন্দীসমুদযা দুক্খসমুদযো, পুণ্ণা’তি ৱদামি.

‘‘সন্তি খো, পুণ্ণ, সোতৱিঞ্ঞেয্যা সদ্দা… ঘানৱিঞ্ঞেয্যা গন্ধা… জিৱ্হাৱিঞ্ঞেয্যা ৰসা… কাযৱিঞ্ঞেয্যা ফোট্ঠব্বা… মনোৱিঞ্ঞেয্যা ধম্মা ইট্ঠা কন্তা মনাপা পিযৰূপা কামূপসংহিতা ৰজনীযা. তং চে ভিক্খু অভিনন্দতি অভিৱদতি অজ্ঝোসায তিট্ঠতি. তস্স তং অভিনন্দতো অভিৱদতো অজ্ঝোসায তিট্ঠতো উপ্পজ্জতি নন্দী. ‘নন্দীসমুদযা দুক্খসমুদযো, পুণ্ণা’তি ৱদামি.

‘‘সন্তি চ খো, পুণ্ণ, চক্খুৱিঞ্ঞেয্যা ৰূপা ইট্ঠা কন্তা মনাপা পিযৰূপা কামূপসংহিতা ৰজনীযা. তং চে ভিক্খু নাভিনন্দতি নাভিৱদতি নাজ্ঝোসায তিট্ঠতি. তস্স তং অনভিনন্দতো অনভিৱদতো অনজ্ঝোসায তিট্ঠতো নন্দী নিৰুজ্ঝতি. ‘নন্দীনিৰোধা দুক্খনিৰোধো, পুণ্ণা’তি ৱদামি.

‘‘সন্তি চ খো, পুণ্ণ, সোতৱিঞ্ঞেয্যা সদ্দা… ঘানৱিঞ্ঞেয্যা গন্ধা… জিৱ্হাৱিঞ্ঞেয্যা ৰসা… কাযৱিঞ্ঞেয্যা ফোট্ঠব্বা… মনোৱিঞ্ঞেয্যা ধম্মা ইট্ঠা কন্তা মনাপা পিযৰূপা কামূপসংহিতা ৰজনীযা. তং চে ভিক্খু নাভিনন্দতি নাভিৱদতি নাজ্ঝোসায তিট্ঠতি. তস্স তং অনভিনন্দতো অনভিৱদতো অনজ্ঝোসায তিট্ঠতো নন্দী নিৰুজ্ঝতি. ‘নন্দীনিৰোধা দুক্খনিৰোধো, পুণ্ণা’তি ৱদামি.

‘‘ইমিনা চ ত্ৱং পুণ্ণ, মযা সংখিত্তেন ওৱাদেন ওৱদিতো কতৰস্মিং জনপদে ৱিহৰিস্সসী’’তি? ‘‘ইমিনাহং, ভন্তে, ভগৱতা সংখিত্তেন ওৱাদেন ওৱদিতো, অত্থি সুনাপৰন্তো নাম জনপদো, তত্থাহং ৱিহৰিস্সামী’’তি.

৩৯৬. ‘‘চণ্ডা খো, পুণ্ণ, সুনাপৰন্তকা মনুস্সা; ফৰুসা খো, পুণ্ণ, সুনাপৰন্তকা মনুস্সা. সচে তং, পুণ্ণ, সুনাপৰন্তকা মনুস্সা অক্কোসিস্সন্তি পৰিভাসিস্সন্তি, তত্থ তে, পুণ্ণ, কিন্তি ভৱিস্সতী’’তি? ‘‘সচে মং, ভন্তে, সুনাপৰন্তকা মনুস্সা অক্কোসিস্সন্তি পৰিভাসিস্সন্তি, তত্থ মে এৱং ভৱিস্সতি – ‘ভদ্দকা [ভদ্ৰকা (ক.)] ৱতিমে সুনাপৰন্তকা মনুস্সা, সুভদ্দকা ৱতিমে সুনাপৰন্তকা মনুস্সা, যং মে নযিমে পাণিনা পহাৰং দেন্তী’তি. এৱমেত্থ [এৱম্মেত্থ (?)], ভগৱা, ভৱিস্সতি; এৱমেত্থ, সুগত, ভৱিস্সতী’’তি.

‘‘সচে পন তে, পুণ্ণ, সুনাপৰন্তকা মনুস্সা পাণিনা পহাৰং দস্সন্তি, তত্থ পন তে, পুণ্ণ, কিন্তি ভৱিস্সতী’’তি? ‘‘সচে মে, ভন্তে, সুনাপৰন্তকা মনুস্সা পাণিনা পহাৰং দস্সন্তি, তত্থ মে এৱং ভৱিস্সতি – ‘ভদ্দকা ৱতিমে সুনাপৰন্তকা মনুস্সা, সুভদ্দকা ৱতিমে সুনাপৰন্তকা মনুস্সা, যং মে নযিমে লেড্ডুনা পহাৰং দেন্তী’তি. এৱমেত্থ, ভগৱা, ভৱিস্সতি; এৱমেত্থ, সুগত, ভৱিস্সতী’’তি.

‘‘সচে পন তে, পুণ্ণ, সুনাপৰন্তকা মনুস্সা লেড্ডুনা পহাৰং দস্সন্তি, তত্থ পন তে, পুণ্ণ, কিন্তি ভৱিস্সতী’’তি? ‘‘সচে মে, ভন্তে, সুনাপৰন্তকা মনুস্সা লেড্ডুনা পহাৰং দস্সন্তি, তত্থ মে এৱং ভৱিস্সতি – ‘ভদ্দকা ৱতিমে সুনাপৰন্তকা মনুস্সা, সুভদ্দকা ৱতিমে সুনাপৰন্তকা মনুস্সা, যং মে নযিমে দণ্ডেন পহাৰং দেন্তী’তি. এৱমেত্থ, ভগৱা, ভৱিস্সতি; এৱমেত্থ, সুগত, ভৱিস্সতী’’তি.

‘‘সচে পন তে, পুণ্ণ, সুনাপৰন্তকা মনুস্সা দণ্ডেন পহাৰং দস্সন্তি, তত্থ পন তে, পুণ্ণ, কিন্তি ভৱিস্সতী’’তি? ‘‘সচে মে, ভন্তে, সুনাপৰন্তকা মনুস্সা দণ্ডেন পহাৰং দস্সন্তি, তত্থ মে এৱং ভৱিস্সতি – ‘ভদ্দকা ৱতিমে সুনাপৰন্তকা মনুস্সা, সুভদ্দকা ৱতিমে সুনাপৰন্তকা মনুস্সা, যং মে নযিমে সত্থেন পহাৰং দেন্তী’তি. এৱমেত্থ, ভগৱা, ভৱিস্সতি; এৱমেত্থ, সুগত, ভৱিস্সতী’’তি.

‘‘সচে পন তে, পুণ্ণ, সুনাপৰন্তকা মনুস্সা সত্থেন পহাৰং দস্সন্তি, তত্থ পন তে, পুণ্ণ, কিন্তি ভৱিস্সতী’’তি? ‘‘সচে মে, ভন্তে, সুনাপৰন্তকা মনুস্সা সত্থেন পহাৰং দস্সন্তি, তত্থ মে এৱং ভৱিস্সতি – ‘ভদ্দকা ৱতিমে সুনাপৰন্তকা মনুস্সা, সুভদ্দকা ৱতিমে সুনাপৰন্তকা মনুস্সা, যং মং [যং মে (সী. পী. ক.)] নযিমে তিণ্হেন সত্থেন জীৱিতা ৱোৰোপেন্তী’তি. এৱমেত্থ, ভগৱা, ভৱিস্সতি; এৱমেত্থ, সুগত, ভৱিস্সতী’’তি.

‘‘সচে পন তং, পুণ্ণ, সুনাপৰন্তকা মনুস্সা তিণ্হেন সত্থেন জীৱিতা ৱোৰোপেস্সন্তি, তত্থ পন তে, পুণ্ণ, কিন্তি ভৱিস্সতী’’তি? ‘‘সচে মং, ভন্তে, সুনাপৰন্তকা মনুস্সা তিণ্হেন সত্থেন জীৱিতা ৱোৰোপেস্সন্তি, তত্থ মে এৱং ভৱিস্সতি – ‘সন্তি খো ভগৱতো সাৱকা কাযে চ জীৱিতে চ অট্টীযমানা হৰাযমানা জিগুচ্ছমানা সত্থহাৰকং পৰিযেসন্তি. তং মে ইদং অপৰিযিট্ঠংযেৱ সত্থহাৰকং লদ্ধ’ন্তি. এৱমেত্থ, ভগৱা, ভৱিস্সতি; এৱমেত্থ, সুগত, ভৱিস্সতী’’তি. ‘‘সাধু, সাধু, পুণ্ণ! সক্খিস্সসি খো ত্ৱং, পুণ্ণ, ইমিনা দমূপসমেন সমন্নাগতো সুনাপৰন্তস্মিং জনপদে ৱিহৰিতুং. যস্সদানি ত্ৱং, পুণ্ণ, কালং মঞ্ঞসী’’তি.

৩৯৭. অথ খো আযস্মা পুণ্ণো ভগৱতো ভাসিতং অভিনন্দিত্ৱা অনুমোদিত্ৱা উট্ঠাযাসনা ভগৱন্তং অভিৱাদেত্ৱা পদক্খিণং কত্ৱা সেনাসনং সংসামেত্ৱা পত্তচীৱৰমাদায যেন সুনাপৰন্তো জনপদো তেন চাৰিকং পক্কামি. অনুপুব্বেন চাৰিকং চৰমানো যেন সুনাপৰন্তো জনপদো তদৱসৰি. তত্ৰ সুদং আযস্মা পুণ্ণো সুনাপৰন্তস্মিং জনপদে ৱিহৰতি. অথ খো আযস্মা পুণ্ণো তেনেৱন্তৰৱস্সেন পঞ্চমত্তানি উপাসকসতানি পটিৱেদেসি [পটিপাদেসি (সী. পী.), পটিদেসেসি (স্যা. কং.)], তেনেৱন্তৰৱস্সেন পঞ্চমত্তানি উপাসিকসতানি পটিৱেদেসি, তেনেৱন্তৰৱস্সেন তিস্সো ৱিজ্জা সচ্ছাকাসি. অথ খো আযস্মা পুণ্ণো অপৰেন সমযেন পৰিনিব্বাযি.

অথ খো সম্বহুলা ভিক্খূ যেন ভগৱা তেনুপসঙ্কমিংসু; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদিংসু. একমন্তং নিসিন্না খো তে ভিক্খূ ভগৱন্তং এতদৱোচুং – ‘‘যো সো, ভন্তে, পুণ্ণো নাম কুলপুত্তো ভগৱতা সংখিত্তেন ওৱাদেন ওৱদিতো সো কালঙ্কতো. তস্স কা গতি, কো অভিসম্পৰাযো’’তি? ‘‘পণ্ডিতো, ভিক্খৱে, পুণ্ণো কুলপুত্তো পচ্চপাদি [সচ্চৱাদী ধম্মৱাদী (ক.)] ধম্মস্সানুধম্মং, ন চ মং ধম্মাধিকৰণং ৱিহেঠেসি. পৰিনিব্বুতো, ভিক্খৱে, পুণ্ণো কুলপুত্তো’’তি.

ইদমৱোচ ভগৱা. অত্তমনা তে ভিক্খূ ভগৱতো ভাসিতং অভিনন্দুন্তি.

পুণ্ণোৱাদসুত্তং নিট্ঠিতং ততিযং.