৭. মহাচত্তাৰীসকসুত্তং

১৩৬. এৱং মে সুতং – একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তত্ৰ খো ভগৱা ভিক্খূ আমন্তেসি – ‘‘ভিক্খৱো’’তি. ‘‘ভদন্তে’’তি তে ভিক্খূ ভগৱতো পচ্চস্সোসুং. ভগৱা এতদৱোচ – ‘‘অৰিযং ৱো, ভিক্খৱে, সম্মাসমাধিং দেসেস্সামি সউপনিসং সপৰিক্খাৰং. তং সুণাথ, সাধুকং মনসি কৰোথ; ভাসিস্সামী’’তি. ‘‘এৱং, ভন্তে’’তি খো তে ভিক্খূ ভগৱতো পচ্চস্সোসুং. ভগৱা এতদৱোচ –

‘‘কতমো চ, ভিক্খৱে, অৰিযো সম্মাসমাধি সউপনিসো সপৰিক্খাৰো? সেয্যথিদং – সম্মাদিট্ঠি, সম্মাসঙ্কপ্পো, সম্মাৱাচা, সম্মাকম্মন্তো, সম্মাআজীৱো, সম্মাৱাযামো, সম্মাসতি; যা খো, ভিক্খৱে, ইমেহি সত্তহঙ্গেহি চিত্তস্স একগ্গতা পৰিক্খতা – অযং ৱুচ্চতি, ভিক্খৱে, অৰিযো সম্মাসমাধি সউপনিসো ইতিপি, সপৰিক্খাৰো ইতিপি. তত্ৰ, ভিক্খৱে, সম্মাদিট্ঠি পুব্বঙ্গমা হোতি. কথঞ্চ, ভিক্খৱে, সম্মাদিট্ঠি পুব্বঙ্গমা হোতি? মিচ্ছাদিট্ঠিং ‘মিচ্ছাদিট্ঠী’তি পজানাতি, সম্মাদিট্ঠিং ‘সম্মাদিট্ঠী’তি পজানাতি – সাস্স হোতি সম্মাদিট্ঠি.

‘‘কতমা চ, ভিক্খৱে, মিচ্ছাদিট্ঠি? ‘নত্থি দিন্নং, নত্থি যিট্ঠং, নত্থি হুতং, নত্থি সুকতদুক্কটানং কম্মানং ফলং ৱিপাকো, নত্থি অযং লোকো, নত্থি পৰো লোকো, নত্থি মাতা, নত্থি পিতা, নত্থি সত্তা ওপপাতিকা, নত্থি লোকে সমণব্ৰাহ্মণা সম্মগ্গতা সম্মাপটিপন্না যে ইমঞ্চ লোকং পৰঞ্চ লোকং সযং অভিঞ্ঞা সচ্ছিকত্ৱা পৱেদেন্তী’তি – অযং, ভিক্খৱে, মিচ্ছাদিট্ঠি.

‘‘কতমা চ, ভিক্খৱে, সম্মাদিট্ঠি? সম্মাদিট্ঠিংপহং [সম্মাদিট্ঠিমহং (ক.) এৱং সম্মাসঙ্কপ্পংপহংক্যাদীসুপি], ভিক্খৱে, দ্ৱাযং [দ্ৱযং (সী. স্যা. কং. পী.) টীকা ওলোকেতব্বা] ৱদামি – অত্থি, ভিক্খৱে, সম্মাদিট্ঠি সাসৱা পুঞ্ঞভাগিযা উপধিৱেপক্কা; অত্থি, ভিক্খৱে, সম্মাদিট্ঠি অৰিযা অনাসৱা লোকুত্তৰা মগ্গঙ্গা. কতমা চ, ভিক্খৱে, সম্মাদিট্ঠি সাসৱা পুঞ্ঞভাগিযা উপধিৱেপক্কা? ‘অত্থি দিন্নং, অত্থি যিট্ঠং, অত্থি হুতং, অত্থি সুকতদুক্কটানং কম্মানং ফলং ৱিপাকো, অত্থি অযং লোকো, অত্থি পৰো লোকো, অত্থি মাতা, অত্থি পিতা, অত্থি সত্তা ওপপাতিকা, অত্থি লোকে সমণব্ৰাহ্মণা সম্মগ্গতা সম্মাপটিপন্না যে ইমঞ্চ লোকং পৰঞ্চ লোকং সযং অভিঞ্ঞা সচ্ছিকত্ৱা পৱেদেন্তী’তি – অযং, ভিক্খৱে, সম্মাদিট্ঠি সাসৱা পুঞ্ঞভাগিযা উপধিৱেপক্কা.

‘‘কতমা চ, ভিক্খৱে, সম্মাদিট্ঠি অৰিযা অনাসৱা লোকুত্তৰা মগ্গঙ্গা? যা খো, ভিক্খৱে, অৰিযচিত্তস্স অনাসৱচিত্তস্স অৰিযমগ্গসমঙ্গিনো অৰিযমগ্গং ভাৱযতো পঞ্ঞা পঞ্ঞিন্দ্ৰিযং পঞ্ঞাবলং ধম্মৱিচযসম্বোজ্ঝঙ্গো সম্মাদিট্ঠি মগ্গঙ্গং [মগ্গঙ্গা (সী. পী.)] – অযং ৱুচ্চতি, ভিক্খৱে, সম্মাদিট্ঠি অৰিযা অনাসৱা লোকুত্তৰা মগ্গঙ্গা. সো মিচ্ছাদিট্ঠিযা পহানায ৱাযমতি, সম্মাদিট্ঠিযা, উপসম্পদায, স্ৱাস্স [স্ৱাযং (ক.)] হোতি সম্মাৱাযামো. সো সতো মিচ্ছাদিট্ঠিং পজহতি, সতো সম্মাদিট্ঠিং উপসম্পজ্জ ৱিহৰতি, সাস্স [সাযং (ক.)] হোতি সম্মাসতি. ইতিযিমে [ইতিমে (সী.), ইতিস্সিমে (স্যা. কং. পী.)] তযো ধম্মা সম্মাদিট্ঠিং অনুপৰিধাৱন্তি অনুপৰিৱত্তন্তি, সেয্যথিদং – সম্মাদিট্ঠি, সম্মাৱাযামো, সম্মাসতি.

১৩৭. ‘‘তত্ৰ, ভিক্খৱে, সম্মাদিট্ঠি পুব্বঙ্গমা হোতি. কথঞ্চ, ভিক্খৱে, সম্মাদিট্ঠি পুব্বঙ্গমা হোতি? মিচ্ছাসঙ্কপ্পং ‘মিচ্ছাসঙ্কপ্পো’তি পজানাতি, সম্মাসঙ্কপ্পং ‘সম্মাসঙ্কপ্পো’তি পজানাতি, সাস্স হোতি সম্মাদিট্ঠি.

‘‘কতমো চ, ভিক্খৱে, মিচ্ছাসঙ্কপ্পো? কামসঙ্কপ্পো, ব্যাপাদসঙ্কপ্পো, ৱিহিংসাসঙ্কপ্পো – অযং, ভিক্খৱে, মিচ্ছাসঙ্কপ্পো.

‘‘কতমো চ, ভিক্খৱে, সম্মাসঙ্কপ্পো? সম্মাসঙ্কপ্পংপহং, ভিক্খৱে, দ্ৱাযং ৱদামি – অত্থি, ভিক্খৱে, সম্মাসঙ্কপ্পো সাসৱো পুঞ্ঞভাগিযো উপধিৱেপক্কো; অত্থি, ভিক্খৱে, সম্মাসঙ্কপ্পো অৰিযো অনাসৱো লোকুত্তৰো মগ্গঙ্গো. কতমো চ, ভিক্খৱে, সম্মাসঙ্কপ্পো সাসৱো পুঞ্ঞভাগিযো উপধিৱেপক্কো? নেক্খম্মসঙ্কপ্পো, অব্যাপাদসঙ্কপ্পো, অৱিহিংসাসঙ্কপ্পো – ‘অযং, ভিক্খৱে, সম্মাসঙ্কপ্পো সাসৱো পুঞ্ঞভাগিযো উপধিৱেপক্কো’’’.

‘‘কতমো চ, ভিক্খৱে, সম্মাসঙ্কপ্পো অৰিযো অনাসৱো লোকুত্তৰো মগ্গঙ্গো? যো খো, ভিক্খৱে, অৰিযচিত্তস্স অনাসৱচিত্তস্স অৰিযমগ্গসমঙ্গিনো অৰিযমগ্গং ভাৱযতো তক্কো ৱিতক্কো সঙ্কপ্পো অপ্পনা ব্যপ্পনা চেতসো অভিনিৰোপনা ৱচীসঙ্খাৰো – অযং, ভিক্খৱে, সম্মাসঙ্কপ্পো অৰিযো অনাসৱো লোকুত্তৰো মগ্গঙ্গো. সো মিচ্ছাসঙ্কপ্পস্স পহানায ৱাযমতি, সম্মাসঙ্কপ্পস্স উপসম্পদায, স্ৱাস্স হোতি সম্মাৱাযামো. সো সতো মিচ্ছাসঙ্কপ্পং পজহতি, সতো সম্মাসঙ্কপ্পং উপসম্পজ্জ ৱিহৰতি; সাস্স হোতি সম্মাসতি. ইতিযিমে তযো ধম্মা সম্মাসঙ্কপ্পং অনুপৰিধাৱন্তি অনুপৰিৱত্তন্তি, সেয্যথিদং – সম্মাদিট্ঠি, সম্মাৱাযামো, সম্মাসতি.

১৩৮. ‘‘তত্ৰ, ভিক্খৱে, সম্মাদিট্ঠি পুব্বঙ্গমা হোতি. কথঞ্চ, ভিক্খৱে, সম্মাদিট্ঠি পুব্বঙ্গমা হোতি? মিচ্ছাৱাচং ‘মিচ্ছাৱাচা’তি পজানাতি, সম্মাৱাচং ‘সম্মাৱাচা’তি পজানাতি; সাস্স হোতি সম্মাদিট্ঠি. কতমা চ, ভিক্খৱে, মিচ্ছাৱাচা? মুসাৱাদো, পিসুণা ৱাচা, ফৰুসা ৱাচা, সম্ফপ্পলাপো – অযং, ভিক্খৱে, মিচ্ছাৱাচা. কতমা চ, ভিক্খৱে, সম্মাৱাচা? সম্মাৱাচংপহং, ভিক্খৱে, দ্ৱাযং ৱদামি – অত্থি, ভিক্খৱে, সম্মাৱাচা সাসৱা পুঞ্ঞভাগিযা উপধিৱেপক্কা; অত্থি, ভিক্খৱে, সম্মাৱাচা অৰিযা অনাসৱা লোকুত্তৰা মগ্গঙ্গা. কতমা চ, ভিক্খৱে, সম্মাৱাচা সাসৱা পুঞ্ঞভাগিযা উপধিৱেপক্কা? মুসাৱাদা ৱেৰমণী, পিসুণায ৱাচায ৱেৰমণী, ফৰুসায ৱাচায ৱেৰমণী, সম্ফপ্পলাপা ৱেৰমণী – অযং, ভিক্খৱে, সম্মাৱাচা সাসৱা পুঞ্ঞভাগিযা উপধিৱেপক্কা. কতমা চ, ভিক্খৱে, সম্মাৱাচা অৰিযা অনাসৱা লোকুত্তৰা মগ্গঙ্গা? যা খো, ভিক্খৱে, অৰিযচিত্তস্স অনাসৱচিত্তস্স অৰিযমগ্গসমঙ্গিনো অৰিযমগ্গং ভাৱযতো চতূহি ৱচীদুচ্চৰিতেহি আৰতি ৱিৰতি পটিৱিৰতি ৱেৰমণী – অযং, ভিক্খৱে, সম্মাৱাচা অৰিযা অনাসৱা লোকুত্তৰা মগ্গঙ্গা. সো মিচ্ছাৱাচায পহানায ৱাযমতি, সম্মাৱাচায উপসম্পদায; স্ৱাস্স হোতি সম্মাৱাযামো. সো সতো মিচ্ছাৱাচং পজহতি, সতো সম্মাৱাচং উপসম্পজ্জ ৱিহৰতি; সাস্স হোতি সম্মাসতি. ইতিযিমে তযো ধম্মা সম্মাৱাচং অনুপৰিধাৱন্তি অনুপৰিৱত্তন্তি, সেয্যথিদং – সম্মাদিট্ঠি, সম্মাৱাযামো, সম্মাসতি.

১৩৯. ‘‘তত্ৰ, ভিক্খৱে, সম্মাদিট্ঠি পুব্বঙ্গমা হোতি. কথঞ্চ, ভিক্খৱে, সম্মাদিট্ঠি পুব্বঙ্গমা হোতি? মিচ্ছাকম্মন্তং ‘মিচ্ছাকম্মন্তো’তি পজানাতি, সম্মাকম্মন্তং ‘সম্মাকম্মন্তো’তি পজানাতি; সাস্স হোতি সম্মাদিট্ঠি. কতমো চ, ভিক্খৱে, মিচ্ছাকম্মন্তো? পাণাতিপাতো, অদিন্নাদানং, কামেসুমিচ্ছাচাৰো – অযং, ভিক্খৱে, মিচ্ছাকম্মন্তো. কতমো চ, ভিক্খৱে, সম্মাকম্মন্তো? সম্মাকম্মন্তংপহং, ভিক্খৱে, দ্ৱাযং ৱদামি – অত্থি, ভিক্খৱে, সম্মাকম্মন্তো সাসৱো পুঞ্ঞভাগিযো উপধিৱেপক্কো; অত্থি, ভিক্খৱে, সম্মাকম্মন্তো অৰিযো অনাসৱো লোকুত্তৰো মগ্গঙ্গো. কতমো চ, ভিক্খৱে, সম্মাকম্মন্তো সাসৱো পুঞ্ঞভাগিযো উপধিৱেপক্কো? পাণাতিপাতা ৱেৰমণী, অদিন্নাদানা ৱেৰমণী, কামেসুমিচ্ছাচাৰা ৱেৰমণী – অযং, ভিক্খৱে, সম্মাকম্মন্তো সাসৱো পুঞ্ঞভাগিযো উপধিৱেপক্কো. কতমো চ, ভিক্খৱে, সম্মাকম্মন্তো অৰিযো অনাসৱো লোকুত্তৰো মগ্গঙ্গো? যা খো, ভিক্খৱে, অৰিযচিত্তস্স অনাসৱচিত্তস্স অৰিযমগ্গসমঙ্গিনো অৰিযমগ্গং ভাৱযতো তীহি কাযদুচ্চৰিতেহি আৰতি ৱিৰতি পটিৱিৰতি ৱেৰমণী – অযং, ভিক্খৱে, সম্মাকম্মন্তো অৰিযো অনাসৱো লোকুত্তৰো মগ্গঙ্গো. সো মিচ্ছাকম্মন্তস্স পহানায ৱাযমতি, সম্মাকম্মন্তস্স উপসম্পদায; স্ৱাস্স হোতি সম্মাৱাযামো. সো সতো মিচ্ছাকম্মন্তং পজহতি, সতো সম্মাকম্মন্তং উপসম্পজ্জ ৱিহৰতি; সাস্স হোতি সম্মাসতি. ইতিযিমে তযো ধম্মা সম্মাকম্মন্তং অনুপৰিধাৱন্তি অনুপৰিৱত্তন্তি, সেয্যথিদং – সম্মাদিট্ঠি, সম্মাৱাযামো, সম্মাসতি.

১৪০. ‘‘তত্ৰ, ভিক্খৱে, সম্মাদিট্ঠি পুব্বঙ্গমা হোতি. কথঞ্চ, ভিক্খৱে, সম্মাদিট্ঠি পুব্বঙ্গমা হোতি? মিচ্ছাআজীৱং ‘মিচ্ছাআজীৱো’তি পজানাতি, সম্মাআজীৱং ‘সম্মাআজীৱো’তি পজানাতি; সাস্স হোতি সম্মাদিট্ঠি. কতমো চ, ভিক্খৱে, মিচ্ছাআজীৱো? কুহনা, লপনা, নেমিত্তিকতা, নিপ্পেসিকতা, লাভেন লাভং নিজিগীসনতা [নিজিগিং সনতা (সী. স্যা. কং. পী.)] – অযং, ভিক্খৱে, মিচ্ছাআজীৱো. কতমো চ, ভিক্খৱে, সম্মাআজীৱো? সম্মাআজীৱংপহং, ভিক্খৱে, দ্ৱাযং ৱদামি – অত্থি, ভিক্খৱে, সম্মাআজীৱো সাসৱো পুঞ্ঞভাগিযো উপধিৱেপক্কো; অত্থি, ভিক্খৱে, সম্মাআজীৱো অৰিযো অনাসৱো লোকুত্তৰো মগ্গঙ্গো. কতমো চ, ভিক্খৱে, সম্মাআজীৱো সাসৱো পুঞ্ঞভাগিযো উপধিৱেপক্কো? ইধ, ভিক্খৱে, অৰিযসাৱকো মিচ্ছাআজীৱং পহায সম্মাআজীৱেন জীৱিকং কপ্পেতি – অযং, ভিক্খৱে, সম্মাআজীৱো সাসৱো পুঞ্ঞভাগিযো উপধিৱেপক্কো. কতমো চ, ভিক্খৱে, সম্মাআজীৱো অৰিযো অনাসৱো লোকুত্তৰো মগ্গঙ্গো? যা খো, ভিক্খৱে, অৰিযচিত্তস্স অনাসৱচিত্তস্স অৰিযমগ্গসমঙ্গিনো অৰিযমগ্গং ভাৱযতো মিচ্ছাআজীৱা আৰতি ৱিৰতি পটিৱিৰতি ৱেৰমণী – অযং, ভিক্খৱে, সম্মাআজীৱো অৰিযো অনাসৱো লোকুত্তৰো মগ্গঙ্গো. সো মিচ্ছাআজীৱস্স পহানায ৱাযমতি, সম্মাআজীৱস্স উপসম্পদায; স্ৱাস্স হোতি সম্মাৱাযামো. সো সতো মিচ্ছাআজীৱং পজহতি, সতো সম্মাআজীৱং উপসম্পজ্জ ৱিহৰতি; সাস্স হোতি সম্মাসতি. ইতিযিমে তযো ধম্মা সম্মাআজীৱং অনুপৰিধাৱন্তি অনুপৰিৱত্তন্তি, সেয্যথিদং – সম্মাদিট্ঠি, সম্মাৱাযামো, সম্মাসতি.

১৪১. ‘‘তত্ৰ, ভিক্খৱে, সম্মাদিট্ঠি পুব্বঙ্গমা হোতি. কথঞ্চ, ভিক্খৱে, সম্মাদিট্ঠি পুব্বঙ্গমা হোতি? সম্মাদিট্ঠিস্স, ভিক্খৱে, সম্মাসঙ্কপ্পো পহোতি, সম্মাসঙ্কপ্পস্স সম্মাৱাচা পহোতি, সম্মাৱাচস্স সম্মাকম্মন্তো পহোতি, সম্মাকম্মন্তস্স সম্মাআজীৱো পহোতি, সম্মাআজীৱস্স সম্মাৱাযামো পহোতি, সম্মাৱাযামস্স সম্মাসতি পহোতি, সম্মাসতিস্স সম্মাসমাধি পহোতি, সম্মাসমাধিস্স সম্মাঞাণং পহোতি, সম্মাঞাণস্স সম্মাৱিমুত্তি পহোতি. ইতি খো, ভিক্খৱে, অট্ঠঙ্গসমন্নাগতো সেক্খো [অট্ঠঙ্গসমন্নাগতা সেখা পটিপদা (সী.), অট্ঠঙ্গসমন্নাগতো সেখো পাটিপদো (পী. ক.) ( ) নত্থি সী. স্যা. কং. পী. পোত্থকেসু], দসঙ্গসমন্নাগতো অৰহা হোতি. (তত্ৰপি সম্মাঞাণেন অনেকে পাপকা অকুসলা ধম্মা ৱিগতা ভাৱনাপাৰিপূৰিং গচ্ছন্তি).

১৪২. ‘‘তত্ৰ, ভিক্খৱে, সম্মাদিট্ঠি পুব্বঙ্গমা হোতি. কথঞ্চ, ভিক্খৱে, সম্মাদিট্ঠি পুব্বঙ্গমা হোতি? সম্মাদিট্ঠিস্স, ভিক্খৱে, মিচ্ছাদিট্ঠি নিজ্জিণ্ণা হোতি. যে চ মিচ্ছাদিট্ঠিপচ্চযা অনেকে পাপকা অকুসলা ধম্মা সম্ভৱন্তি তে চস্স নিজ্জিণ্ণা হোন্তি. সম্মাদিট্ঠিপচ্চযা অনেকে কুসলা ধম্মা ভাৱনাপাৰিপূৰিং গচ্ছন্তি. সম্মাসঙ্কপ্পস্স, ভিক্খৱে, মিচ্ছাসঙ্কপ্পো নিজ্জিণ্ণো হোতি…পে… সম্মাৱাচস্স, ভিক্খৱে, মিচ্ছাৱাচা নিজ্জিণ্ণা হোতি… সম্মাকম্মন্তস্স, ভিক্খৱে, মিচ্ছাকম্মন্তো নিজ্জিণ্ণো হোতি… সম্মাআজীৱস্স, ভিক্খৱে, মিচ্ছাআজীৱো নিজ্জিণ্ণো হোতি… সম্মাৱাযামস্স, ভিক্খৱে, মিচ্ছাৱাযামো নিজ্জিণ্ণো হোতি… সম্মাসতিস্স, ভিক্খৱে, মিচ্ছাসতি নিজ্জিণ্ণা হোতি… সম্মাসমাধিস্স, ভিক্খৱে, মিচ্ছাসমাধি নিজ্জিণ্ণো হোতি… সম্মাঞাণস্স, ভিক্খৱে, মিচ্ছাঞাণং নিজ্জিণ্ণং হোতি… সম্মাৱিমুত্তস্স, ভিক্খৱে, মিচ্ছাৱিমুত্তি নিজ্জিণ্ণা হোতি. যে চ মিচ্ছাৱিমুত্তিপচ্চযা অনেকে পাপকা অকুসলা ধম্মা সম্ভৱন্তি তে চস্স নিজ্জিণ্ণা হোন্তি. সম্মাৱিমুত্তিপচ্চযা চ অনেকে কুসলা ধম্মা ভাৱনাপাৰিপূৰিং গচ্ছন্তি.

‘‘ইতি খো, ভিক্খৱে, ৱীসতি কুসলপক্খা, ৱীসতি অকুসলপক্খা – মহাচত্তাৰীসকো ধম্মপৰিযাযো পৱত্তিতো অপ্পটিৱত্তিযো সমণেন ৱা ব্ৰাহ্মণেন ৱা দেৱেন ৱা মাৰেন ৱা ব্ৰহ্মুনা ৱা কেনচি ৱা লোকস্মিং.

১৪৩. ‘‘যো হি কোচি, ভিক্খৱে, সমণো ৱা ব্ৰাহ্মণো ৱা ইমং মহাচত্তাৰীসকং ধম্মপৰিযাযং গৰহিতব্বং পটিক্কোসিতব্বং মঞ্ঞেয্য তস্স দিট্ঠেৱ ধম্মে দসসহধম্মিকা ৱাদানুৱাদা গাৰয্হং ঠানং আগচ্ছন্তি – সম্মাদিট্ঠিং চে ভৱং গৰহতি, যে চ মিচ্ছাদিট্ঠী সমণব্ৰাহ্মণা তে ভোতো পুজ্জা, তে ভোতো পাসংসা; সম্মাসঙ্কপ্পং চে ভৱং গৰহতি, যে চ মিচ্ছাসঙ্কপ্পা সমণব্ৰাহ্মণা তে ভোতো পুজ্জা, তে ভোতো পাসংসা; সম্মাৱাচং চে ভৱং গৰহতি…পে… সম্মাকম্মন্তং চে ভৱং গৰহতি… সম্মাআজীৱং চে ভৱং গৰহতি… সম্মাৱাযামং চে ভৱং গৰহতি… সম্মাসতিং চে ভৱং গৰহতি… সম্মাসমাধিং চে ভৱং গৰহতি… সম্মাঞাণং চে ভৱং গৰহতি … সম্মাৱিমুত্তিং চে ভৱং গৰহতি, যে চ মিচ্ছাৱিমুত্তী সমণব্ৰাহ্মণা তে ভোতো পুজ্জা, তে ভোতো পাসংসা. যো কোচি, ভিক্খৱে, সমণো ৱা ব্ৰাহ্মণো ৱা ইমং মহাচত্তাৰীসকং ধম্মপৰিযাযং গৰহিতব্বং পটিক্কোসিতব্বং মঞ্ঞেয্য তস্স দিট্ঠেৱ ধম্মে ইমে দসসহধম্মিকা ৱাদানুৱাদা গাৰয্হং ঠানং আগচ্ছন্তি. যেপি তে, ভিক্খৱে, অহেসুং ওক্কলা ৱস্সভঞ্ঞা [ৱযভিঞ্ঞা (ক.) সং. নি. ৩.৬২; অ. নি. ৪.৩০ পস্সিতব্বং] অহেতুৱাদা অকিৰিযৱাদা নত্থিকৱাদা তেপি মহাচত্তাৰীসকং ধম্মপৰিযাযং ন গৰহিতব্বং নপটিক্কোসিতব্বং অমঞ্ঞিংসু [মঞ্ঞেয্যুং (ক.)]. তং কিস্স হেতু? নিন্দাব্যাৰোসউপাৰম্ভভযা’’তি.

ইদমৱোচ ভগৱা. অত্তমনা তে ভিক্খূ ভগৱতো ভাসিতং অভিনন্দুন্তি.

মহাচত্তাৰীসকসুত্তং নিট্ঠিতং সত্তমং.