৩. সপ্পুৰিসসুত্তং

১০৫. এৱং মে সুতং – একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তত্ৰ খো ভগৱা ভিক্খূ আমন্তেসি – ‘‘ভিক্খৱো’’তি. ‘‘ভদন্তে’’তি তে ভিক্খূ ভগৱতো পচ্চস্সোসুং. ভগৱা এতদৱোচ – ‘‘সপ্পুৰিসধম্মঞ্চ ৱো, ভিক্খৱে, দেসেস্সামি অসপ্পুৰিসধম্মঞ্চ. তং সুণাথ, সাধুকং মনসি কৰোথ; ভাসিস্সামী’’তি. ‘‘এৱং, ভন্তে’’তি খো তে ভিক্খূ ভগৱতো পচ্চস্সোসুং. ভগৱা এতদৱোচ –

‘‘কতমো চ, ভিক্খৱে, অসপ্পুৰিসধম্মো? ইধ, ভিক্খৱে, অসপ্পুৰিসো উচ্চাকুলা পব্বজিতো হোতি. সো ইতি পটিসঞ্চিক্খতি – ‘অহং খোম্হি উচ্চাকুলা পব্বজিতো, ইমে পনঞ্ঞে ভিক্খূ ন উচ্চাকুলা পব্বজিতা’তি. সো তায উচ্চাকুলীনতায অত্তানুক্কংসেতি, পৰং ৱম্ভেতি. অযং [অযম্পি (সী. পী.)], ভিক্খৱে, অসপ্পুৰিসধম্মো. সপ্পুৰিসো চ খো, ভিক্খৱে, ইতি পটিসঞ্চিক্খতি – ‘ন খো উচ্চাকুলীনতায লোভধম্মা ৱা পৰিক্খযং গচ্ছন্তি, দোসধম্মা ৱা পৰিক্খযং গচ্ছন্তি, মোহধম্মা ৱা পৰিক্খযং গচ্ছন্তি. নো চেপি উচ্চাকুলা পব্বজিতো হোতি; সো চ হোতি ধম্মানুধম্মপ্পটিপন্নো সামীচিপ্পটিপন্নো অনুধম্মচাৰী, সো তত্থ পুজ্জো, সো তত্থ পাসংসো’তি. সো পটিপদংযেৱ অন্তৰং কৰিত্ৱা তায উচ্চাকুলীনতায নেৱত্তানুক্কংসেতি ন পৰং ৱম্ভেতি. অযং, ভিক্খৱে, সপ্পুৰিসধম্মো.

‘‘পুন চপৰং, ভিক্খৱে, অসপ্পুৰিসো মহাকুলা পব্বজিতো হোতি…পে… [যথা উচ্চাকুলৱাৰে তথা ৱিত্থাৰেতব্বং] মহাভোগকুলা পব্বজিতো হোতি…পে… উড়াৰভোগকুলা পব্বজিতো হোতি. সো ইতি পটিসঞ্চিক্খতি – ‘অহং খোম্হি উড়াৰভোগকুলা পব্বজিতো, ইমে পনঞ্ঞে ভিক্খূ ন উড়াৰভোগকুলা পব্বজিতা’তি. সো তায উড়াৰভোগতায অত্তানুক্কংসেতি, পৰং ৱম্ভেতি. অযম্পি, ভিক্খৱে, অসপ্পুৰিসধম্মো. সপ্পুৰিসো চ খো, ভিক্খৱে, ইতি পটিসঞ্চিক্খতি – ‘ন খো উড়াৰভোগতায লোভধম্মা ৱা পৰিক্খযং গচ্ছন্তি, দোসধম্মা ৱা পৰিক্খযং গচ্ছন্তি, মোহধম্মা ৱা পৰিক্খযং গচ্ছন্তি. নো চেপি উড়াৰভোগকুলা পব্বজিতো হোতি; সো চ হোতি ধম্মানুধম্মপ্পটিপন্নো সামীচিপ্পটিপন্নো অনুধম্মচাৰী, সো তত্থ পুজ্জো, সো তত্থ পাসংসো’তি. সো পটিপদংযেৱ অন্তৰং কৰিত্ৱা তায উড়াৰভোগতায নেৱত্তানুক্কংসেতি, ন পৰং ৱম্ভেতি. অযম্পি, ভিক্খৱে, সপ্পুৰিসধম্মো.

১০৬. ‘‘পুন চপৰং, ভিক্খৱে, অসপ্পুৰিসো ঞাতো হোতি যসস্সী. সো ইতি পটিসঞ্চিক্খতি – ‘অহং খোম্হি ঞাতো যসস্সী, ইমে পনঞ্ঞে ভিক্খূ অপ্পঞ্ঞাতা অপ্পেসক্খা’তি. সো তেন ঞত্তেন [ঞাতেন (সী. ক.), ঞাতত্তেন (স্যা. কং. পী.)] অত্তানুক্কংসেতি, পৰং ৱম্ভেতি. অযম্পি, ভিক্খৱে, অসপ্পুৰিসধম্মো. সপ্পুৰিসো চ খো, ভিক্খৱে, ইতি পটিসঞ্চিক্খতি – ‘ন খো ঞত্তেন লোভধম্মা ৱা পৰিক্খযং গচ্ছন্তি, দোসধম্মা ৱা পৰিক্খযং গচ্ছন্তি, মোহধম্মা ৱা পৰিক্খযং গচ্ছন্তি. নো চেপি ঞাতো হোতি যসস্সী; সো চ হোতি ধম্মানুধম্মপ্পটিপন্নো সামীচিপ্পটিপন্নো অনুধম্মচাৰী, সো তত্থ পুজ্জো, সো তত্থ পাসংসো’তি. সো পটিপদংযেৱ অন্তৰং কৰিত্ৱা তেন ঞত্তেন নেৱত্তানুক্কংসেতি, ন পৰং ৱম্ভেতি. অযম্পি, ভিক্খৱে, সপ্পুৰিসধম্মো.

‘‘পুন চপৰং, ভিক্খৱে, অসপ্পুৰিসো লাভী হোতি চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰানং. সো ইতি পটিসঞ্চিক্খতি – ‘অহং খোম্হি লাভী চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰানং, ইমে পনঞ্ঞে ভিক্খূ ন লাভিনো চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰান’ন্তি. সো তেন লাভেন অত্তানুক্কংসেতি, পৰং ৱম্ভেতি. অযম্পি, ভিক্খৱে, অসপ্পুৰিসধম্মো. সপ্পুৰিসো চ খো, ভিক্খৱে, ইতি পটিসঞ্চিক্খতি – ‘ন খো লাভেন লোভধম্মা ৱা পৰিক্খযং গচ্ছন্তি, দোসধম্মা ৱা পৰিক্খযং গচ্ছন্তি, মোহধম্মা ৱা পৰিক্খযং গচ্ছন্তি. নো চেপি লাভী হোতি চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰানং; সো চ হোতি ধম্মানুধম্মপ্পটিপন্নো সামীচিপ্পটিপন্নো অনুধম্মচাৰী, সো তত্থ পুজ্জো, সো তত্থ পাসংসো’তি. সো পটিপদংযেৱ অন্তৰং কৰিত্ৱা তেন লাভেন নেৱত্তানুক্কংসেতি, ন পৰং ৱম্ভেতি. অযম্পি, ভিক্খৱে, সপ্পুৰিসধম্মো.

‘‘পুন চপৰং, ভিক্খৱে, অসপ্পুৰিসো বহুস্সুতো হোতি. সো ইতি পটিসঞ্চিক্খতি – ‘অহং খোম্হি বহুস্সুতো, ইমে পনঞ্ঞে ভিক্খূ ন বহুস্সুতা’তি. সো তেন বাহুসচ্চেন অত্তানুক্কংসেতি, পৰং ৱম্ভেতি. অযম্পি, ভিক্খৱে, অসপ্পুৰিসধম্মো. সপ্পুৰিসো চ খো, ভিক্খৱে, ইতি পটিসঞ্চিক্খতি – ‘ন খো বাহুসচ্চেন লোভধম্মা ৱা পৰিক্খযং গচ্ছন্তি, দোসধম্মা ৱা পৰিক্খযং গচ্ছন্তি, মোহধম্মা ৱা পৰিক্খযং গচ্ছন্তি. নো চেপি বহুস্সুতো হোতি; সো চ হোতি ধম্মানুধম্মপ্পটিপন্নো সামীচিপ্পটিপন্নো অনুধম্মচাৰী, সো তত্থ পুজ্জো, সো তত্থ পাসংসো’তি. সো পটিপদংযেৱ অন্তৰং কৰিত্ৱা তেন বাহুসচ্চেন নেৱত্তানুক্কংসেতি, ন পৰং ৱম্ভেতি. অযম্পি, ভিক্খৱে, সপ্পুৰিসধম্মো.

‘‘পুন চপৰং, ভিক্খৱে, অসপ্পুৰিসো ৱিনযধৰো হোতি. সো ইতি পটিসঞ্চিক্খতি – ‘অহং খোম্হি ৱিনযধৰো, ইমে পনঞ্ঞে ভিক্খূ ন ৱিনযধৰা’তি. সো তেন ৱিনযধৰত্তেন অত্তানুক্কংসেতি, পৰং ৱম্ভেতি. অযম্পি, ভিক্খৱে, অসপ্পুৰিসধম্মো. সপ্পুৰিসো চ খো, ভিক্খৱে, ইতি পটিসঞ্চিক্খতি – ‘ন খো ৱিনযধৰত্তেন লোভধম্মা ৱা পৰিক্খযং গচ্ছন্তি, দোসধম্মা ৱা পৰিক্খযং গচ্ছন্তি, মোহধম্মা ৱা পৰিক্খযং গচ্ছন্তি. নো চেপি ৱিনযধৰো হোতি; সো চ হোতি ধম্মানুধম্মপ্পটিপন্নো সামীচিপ্পটিপন্নো অনুধম্মচাৰী, সো তত্থ পুজ্জো, সো তত্থ পাসংসো’তি. সো পটিপদংযেৱ অন্তৰং কৰিত্ৱা তেন ৱিনযধৰত্তেন নেৱত্তানুক্কংসেতি, ন পৰং ৱম্ভেতি. অযম্পি, ভিক্খৱে, সপ্পুৰিসধম্মো.

‘‘পুন চপৰং, ভিক্খৱে, অসপ্পুৰিসো ধম্মকথিকো হোতি. সো ইতি পটিসঞ্চিক্খতি – ‘অহং খোম্হি ধম্মকথিকো, ইমে পনঞ্ঞে ভিক্খূ ন ধম্মকথিকা’তি. সো তেন ধম্মকথিকত্তেন অত্তানুক্কংসেতি, পৰং ৱম্ভেতি. অযম্পি, ভিক্খৱে, অসপ্পুৰিসধম্মো. সপ্পুৰিসো চ খো, ভিক্খৱে, ইতি পটিসঞ্চিক্খতি – ‘ন খো ধম্মকথিকত্তেন লোভধম্মা ৱা পৰিক্খযং গচ্ছন্তি, দোসধম্মা ৱা পৰিক্খযং গচ্ছন্তি, মোহধম্মা ৱা পৰিক্খযং গচ্ছন্তি. নো চেপি ধম্মকথিকো হোতি; সো চ হোতি ধম্মানুধম্মপ্পটিপন্নো সামীচিপ্পটিপন্নো অনুধম্মচাৰী, সো তত্থ পুজ্জো, সো তত্থ পাসংসো’তি. সো পটিপদংযেৱ অন্তৰং কৰিত্ৱা তেন ধম্মকথিকত্তেন নেৱত্তানুক্কংসেতি, ন পৰং ৱম্ভেতি. অযম্পি, ভিক্খৱে, সপ্পুৰিসধম্মো.

১০৭. ‘‘পুন চপৰং, ভিক্খৱে, অসপ্পুৰিসো আৰঞ্ঞিকো হোতি. সো ইতি পটিসঞ্চিক্খতি – ‘অহং খোম্হি আৰঞ্ঞিকো ইমে পনঞ্ঞে ভিক্খূ ন আৰঞ্ঞিকা’তি. সো তেন আৰঞ্ঞিকত্তেন অত্তানুক্কংসেতি, পৰং ৱম্ভেতি. অযম্পি, ভিক্খৱে, অসপ্পুৰিসধম্মো. সপ্পুৰিসো চ খো, ভিক্খৱে, ইতি পটিসঞ্চিক্খতি – ‘ন খো আৰঞ্ঞিকত্তেন লোভধম্মা ৱা পৰিক্খযং গচ্ছন্তি, দোসধম্মা ৱা পৰিক্খযং গচ্ছন্তি, মোহধম্মা ৱা পৰিক্খযং গচ্ছন্তি. নো চেপি আৰঞ্ঞিকো হোতি; সো চ হোতি ধম্মানুধম্মপ্পটিপন্নো সামীচিপ্পটিপন্নো অনুধম্মচাৰী, সো তত্থ পুজ্জো, সো তত্থ পাসংসো’তি. সো পটিপদংযেৱ অন্তৰং কৰিত্ৱা তেন আৰঞ্ঞিকত্তেন নেৱত্তানুক্কংসেতি, ন পৰং ৱম্ভেতি. অযম্পি, ভিক্খৱে, সপ্পুৰিসধম্মো.

‘‘পুন চপৰং, ভিক্খৱে, অসপ্পুৰিসো পংসুকূলিকো হোতি. সো ইতি পটিসঞ্চিক্খতি – ‘অহং খোম্হি পংসুকূলিকো, ইমে পনঞ্ঞে ভিক্খূ ন পংসুকূলিকা’তি. সো তেন পংসুকূলিকত্তেন অত্তানুক্কংসেতি, পৰং ৱম্ভেতি. অযম্পি, ভিক্খৱে, অসপ্পুৰিসধম্মো. সপ্পুৰিসো চ খো, ভিক্খৱে, ইতি পটিসঞ্চিক্খতি – ‘ন খো পংসুকূলিকত্তেন লোভধম্মা ৱা পৰিক্খযং গচ্ছন্তি, দোসধম্মা ৱা পৰিক্খযং গচ্ছন্তি, মোহধম্মা ৱা পৰিক্খযং গচ্ছন্তি. নো চেপি পংসুকূলিকো হোতি; সো চ হোতি ধম্মানুধম্মপ্পটিপন্নো সামীচিপ্পটিপন্নো অনুধম্মচাৰী, সো তত্থ পুজ্জো, সো তত্থ পাসংসো’তি. সো পটিপদংযেৱ অন্তৰং কৰিত্ৱা তেন পংসুকূলিকত্তেন নেৱত্তানুক্কংসেতি, ন পৰং ৱম্ভেতি. অযম্পি, ভিক্খৱে, সপ্পুৰিসধম্মো.

‘‘পুন চপৰং, ভিক্খৱে, অসপ্পুৰিসো পিণ্ডপাতিকো হোতি. সো ইতি পটিসঞ্চিক্খতি – ‘অহং খোম্হি পিণ্ডপাতিকো, ইমে পনঞ্ঞে ভিক্খূ ন পিণ্ডপাতিকা’তি. সো তেন পিণ্ডপাতিকত্তেন অত্তানুক্কংসেতি, পৰং ৱম্ভেতি. অযম্পি, ভিক্খৱে, অসপ্পুৰিসধম্মো. সপ্পুৰিসো চ খো, ভিক্খৱে, ইতি পটিসঞ্চিক্খতি – ‘ন খো পিণ্ডপাতিকত্তেন লোভধম্মা ৱা পৰিক্খযং গচ্ছন্তি, দোসধম্মা ৱা পৰিক্খযং গচ্ছন্তি, মোহধম্মা ৱা পৰিক্খযং গচ্ছন্তি. নো চেপি পিণ্ডপাতিকো হোতি; সো চ হোতি ধম্মানুধম্মপ্পটিপন্নো সামীচিপ্পটিপন্নো অনুধম্মচাৰী, সো তত্থ পুজ্জো, সো তত্থ পাসংসো’তি. সো পটিপদংযেৱ অন্তৰং কৰিত্ৱা তেন পিণ্ডপাতিকত্তেন নেৱত্তানুক্কংসেতি, ন পৰং ৱম্ভেতি. অযম্পি, ভিক্খৱে, সপ্পুৰিসধম্মো.

‘‘পুন চপৰং, ভিক্খৱে, অসপ্পুৰিসো ৰুক্খমূলিকো হোতি. সো ইতি পটিসঞ্চিক্খতি – ‘অহং খোম্হি ৰুক্খমূলিকো, ইমে পনঞ্ঞে ভিক্খূ ন ৰুক্খমূলিকা’তি. সো তেন ৰুক্খমূলিকত্তেন অত্তানুক্কংসেতি, পৰং ৱম্ভেতি. অযম্পি, ভিক্খৱে, অসপ্পুৰিসধম্মো. সপ্পুৰিসো চ খো, ভিক্খৱে, ইতি পটিসঞ্চিক্খতি – ‘ন খো ৰুক্খমূলিকত্তেন লোভধম্মা ৱা পৰিক্খযং গচ্ছন্তি, দোসধম্মা ৱা পৰিক্খযং গচ্ছন্তি, মোহধম্মা ৱা পৰিক্খযং গচ্ছন্তি. নো চেপি ৰুক্খমূলিকো হোতি; সো চ হোতি ধম্মানুধম্মপ্পটিপন্নো সামীচিপ্পটিপন্নো অনুধম্মচাৰী, সো তত্থ পুজ্জো, সো তত্থ পাসংসো’তি. সো পটিপদংযেৱ অন্তৰং কৰিত্ৱা তেন ৰুক্খমূলিকত্তেন নেৱত্তানুক্কংসেতি, ন পৰং ৱম্ভেতি. অযম্পি, ভিক্খৱে, সপ্পুৰিসধম্মো.

‘‘পুন চপৰং, ভিক্খৱে, অসপ্পুৰিসো সোসানিকো হোতি…পে… অব্ভোকাসিকো হোতি… নেসজ্জিকো হোতি… যথাসন্থতিকো হোতি… একাসনিকো হোতি. সো ইতি পটিসঞ্চিক্খতি – ‘অহং খোম্হি একাসনিকো, ইমে পনঞ্ঞে ভিক্খূ ন একাসনিকা’তি. সো তেন একাসনিকত্তেন অত্তানুক্কংসেতি, পৰং ৱম্ভেতি. অযম্পি, ভিক্খৱে, অসপ্পুৰিসধম্মো. সপ্পুৰিসো চ খো, ভিক্খৱে, ইতি পটিসঞ্চিক্খতি – ‘ন খো একাসনিকত্তেন লোভধম্মা ৱা পৰিক্খযং গচ্ছন্তি, দোসধম্মা ৱা পৰিক্খযং গচ্ছন্তি, মোহধম্মা ৱা পৰিক্খযং গচ্ছন্তি. নো চেপি একাসনিকো হোতি; সো চ হোতি ধম্মানুধম্মপ্পটিপন্নো সামীচিপ্পটিপন্নো অনুধম্মচাৰী, সো তত্থ পুজ্জো, সো তত্থ পাসংসো’তি. সো পটিপদংযেৱ অন্তৰং কৰিত্ৱা তেন একাসনিকত্তেন নেৱত্তানুক্কংসেতি, ন পৰং ৱম্ভেতি. অযম্পি, ভিক্খৱে, সপ্পুৰিসধম্মো.

১০৮. ‘‘পুন চপৰং, ভিক্খৱে, অসপ্পুৰিসো ৱিৱিচ্চেৱ কামেহি ৱিৱিচ্চ অকুসলেহি ধম্মেহি সৱিতক্কং সৱিচাৰং ৱিৱেকজং পীতিসুখং পঠমং ঝানং উপসম্পজ্জ ৱিহৰতি. সো ইতি পটিসঞ্চিক্খতি – ‘অহং খোম্হি পঠমজ্ঝানসমাপত্তিযা লাভী, ইমে পনঞ্ঞে ভিক্খূ পঠমজ্ঝানসমাপত্তিযা ন লাভিনো’তি. সো তায পঠমজ্ঝানসমাপত্তিযা অত্তানুক্কংসেতি, পৰং ৱম্ভেতি. অযম্পি, ভিক্খৱে, অসপ্পুৰিসধম্মো. সপ্পুৰিসো চ খো, ভিক্খৱে, ইতি পটিসঞ্চিক্খতি – ‘পঠমজ্ঝানসমাপত্তিযাপি খো অতম্মযতা ৱুত্তা ভগৱতা. যেন যেন হি মঞ্ঞন্তি ততো তং হোতি অঞ্ঞথা’তি. সো অতম্মযতঞ্ঞেৱ অন্তৰং কৰিত্ৱা তায পঠমজ্ঝানসমাপত্তিযা নেৱত্তানুক্কংসেতি, ন পৰং ৱম্ভেতি. অযম্পি, ভিক্খৱে, সপ্পুৰিসধম্মো.

‘‘পুন চপৰং, ভিক্খৱে, অসপ্পুৰিসো ৱিতক্কৱিচাৰানং ৱূপসমা অজ্ঝত্তং সম্পসাদনং চেতসো একোদিভাৱং অৱিতক্কং অৱিচাৰং সমাধিজং পীতিসুখং দুতিযং ঝানং…পে… ততিযং ঝানং… চতুত্থং ঝানং উপসম্পজ্জ ৱিহৰতি. সো ইতি পটিসঞ্চিক্খতি – ‘অহং খোম্হি চতুত্থজ্ঝানসমাপত্তিযা লাভী, ইমে পনঞ্ঞে ভিক্খূ চতুত্থজ্ঝানসমাপত্তিযা ন লাভিনো’তি. সো তায চতুত্থজ্ঝানসমাপত্তিযা অত্তানুক্কংসেতি, পৰং ৱম্ভেতি. অযম্পি, ভিক্খৱে, অসপ্পুৰিসধম্মো. সপ্পুৰিসো চ খো, ভিক্খৱে, ইতি পটিসঞ্চিক্খতি – ‘চতুত্থজ্ঝানসমাপত্তিযাপি খো অতম্মযতা ৱুত্তা ভগৱতা. যেন যেন হি মঞ্ঞন্তি ততো তং হোতি অঞ্ঞথা’তি. সো অতম্মযতঞ্ঞেৱ অন্তৰং কৰিত্ৱা তায চতুত্থজ্ঝানসমাপত্তিযা নেৱত্তানুক্কংসেতি, ন পৰং ৱম্ভেতি. অযম্পি, ভিক্খৱে, সপ্পুৰিসধম্মো.

‘‘পুন চপৰং, ভিক্খৱে, অসপ্পুৰিসো সব্বসো ৰূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকাৰা ‘অনন্তো আকাসো’তি আকাসানঞ্চাযতনং উপসম্পজ্জ ৱিহৰতি. সো ইতি পটিসঞ্চিক্খতি – ‘অহং খোম্হি আকাসানঞ্চাযতনসমাপত্তিযা লাভী, ইমে পনঞ্ঞে ভিক্খূ আকাসানঞ্চাযতনসমাপত্তিযা ন লাভিনো’তি. সো তায আকাসানঞ্চাযতনসমাপত্তিযা অত্তানুক্কংসেতি, পৰং ৱম্ভেতি. অযম্পি, ভিক্খৱে, অসপ্পুৰিসধম্মো. সপ্পুৰিসো চ খো, ভিক্খৱে, ইতি পটিসঞ্চিক্খতি – ‘আকাসানঞ্চাযতনসমাপত্তিযাপি খো অতম্মযতা ৱুত্তা ভগৱতা. যেন যেন হি মঞ্ঞন্তি ততো তং হোতি অঞ্ঞথা’তি. সো অতম্মযতঞ্ঞেৱ অন্তৰং কৰিত্ৱা তায আকাসানঞ্চাযতনসমাপত্তিযা নেৱত্তানুক্কংসেতি, ন পৰং ৱম্ভেতি. অযম্পি, ভিক্খৱে, সপ্পুৰিসধম্মো.

‘‘পুন চপৰং, ভিক্খৱে, অসপ্পুৰিসো সব্বসো আকাসানঞ্চাযতনং সমতিক্কম্ম ‘অনন্তং ৱিঞ্ঞাণ’ন্তি ৱিঞ্ঞাণঞ্চাযতনং উপসম্পজ্জ ৱিহৰতি. সো ইতি পটিসঞ্চিক্খতি – ‘অহং খোম্হি ৱিঞ্ঞাণঞ্চাযতনসমাপত্তিযা লাভী, ইমে পনঞ্ঞে ভিক্খূ ৱিঞ্ঞাণঞ্চাযতনসমাপত্তিযা ন লাভিনো’তি. সো তায ৱিঞ্ঞাণঞ্চাযতনসমাপত্তিযা অত্তানুক্কংসেতি, পৰং ৱম্ভেতি. অযম্পি, ভিক্খৱে, অসপ্পুৰিসধম্মো. সপ্পুৰিসো চ খো, ভিক্খৱে, ইতি পটিসঞ্চিক্খতি – ‘ৱিঞ্ঞাণঞ্চাযতনসমাপত্তিযাপি খো অতম্মযতা ৱুত্তা ভগৱতা. যেন যেন হি মঞ্ঞন্তি ততো তং হোতি অঞ্ঞথা’তি. সো অতম্মযতঞ্ঞেৱ অন্তৰং কৰিত্ৱা তায ৱিঞ্ঞাণঞ্চাযতনসমাপত্তিযা নেৱত্তানুক্কংসেতি, ন পৰং ৱম্ভেতি. অযম্পি, ভিক্খৱে, সপ্পুৰিসধম্মো.

‘‘পুন চপৰং, ভিক্খৱে, অসপ্পুৰিসো সব্বসো ৱিঞ্ঞাণঞ্চাযতনং সমতিক্কম্ম ‘নত্থি কিঞ্চী’তি আকিঞ্চঞ্ঞাযতনং উপসম্পজ্জ ৱিহৰতি. সো ইতি পটিসঞ্চিক্খতি – ‘অহং খোম্হি আকিঞ্চঞ্ঞাযতনসমাপত্তিযা লাভী, ইমে পনঞ্ঞে ভিক্খূ আকিঞ্চঞ্ঞাযতনসমাপত্তিযা ন লাভিনো’তি. সো তায আকিঞ্চঞ্ঞাযতনসমাপত্তিযা অত্তানুক্কংসেতি, পৰং ৱম্ভেতি. অযম্পি, ভিক্খৱে, অসপ্পুৰিসধম্মো. সপ্পুৰিসো চ খো, ভিক্খৱে, ইতি পটিসঞ্চিক্খতি – ‘আকিঞ্চঞ্ঞাযতনসমাপত্তিযাপি খো অতম্মযতা ৱুত্তা ভগৱতা. যেন যেন হি মঞ্ঞন্তি ততো তং হোতি অঞ্ঞথা’তি. সো অতম্মযতঞ্ঞেৱ অন্তৰং কৰিত্ৱা তায আকিঞ্চঞ্ঞাযতনসমাপত্তিযা নেৱত্তানুক্কংসেতি, ন পৰং ৱম্ভেতি. অযম্পি, ভিক্খৱে, সপ্পুৰিসধম্মো.

‘‘পুন চপৰং, ভিক্খৱে, অসপ্পুৰিসো সব্বসো আকিঞ্চঞ্ঞাযতনং সমতিক্কম্ম নেৱসঞ্ঞানাসঞ্ঞাযতনং উপসম্পজ্জ ৱিহৰতি. সো ইতি পটিসঞ্চিক্খতি – ‘অহং খোম্হি নেৱসঞ্ঞানাসঞ্ঞাযতনসমাপত্তিযা লাভী, ইমে পনঞ্ঞে ভিক্খূ নেৱসঞ্ঞানাসঞ্ঞাযতনসমাপত্তিযা ন লাভিনো’তি. সো তায নেৱসঞ্ঞানাসঞ্ঞাযতনসমাপত্তিযা অত্তানুক্কংসেতি, পৰং ৱম্ভেতি. অযম্পি, ভিক্খৱে, অসপ্পুৰিসধম্মো. সপ্পুৰিসো চ খো, ভিক্খৱে, ইতি পটিসঞ্চিক্খতি – ‘নেৱসঞ্ঞানাসঞ্ঞাযতনসমাপত্তিযাপি খো অতম্মযতা ৱুত্তা ভগৱতা. যেন যেন হি মঞ্ঞন্তি ততো তং হোতি অঞ্ঞথা’তি. সো অতম্মযতঞ্ঞেৱ অন্তৰং কৰিত্ৱা তায নেৱসঞ্ঞানাসঞ্ঞাযতনসমাপত্তিযা নেৱত্তানুক্কংসেতি, ন পৰং ৱম্ভেতি. অযম্পি, ভিক্খৱে, সপ্পুৰিসধম্মো.

‘‘পুন চপৰং, ভিক্খৱে, সপ্পুৰিসো সব্বসো নেৱসঞ্ঞানাসঞ্ঞাযতনং সমতিক্কম্ম সঞ্ঞাৱেদযিতনিৰোধং উপসম্পজ্জ ৱিহৰতি. পঞ্ঞায চস্স দিস্ৱা আসৱা [একচ্চে আসৱা (ক.)] পৰিক্খীণা হোন্তি. অযং [অযং খো (স্যা. কং.)], ভিক্খৱে, ভিক্খু ন কিঞ্চি মঞ্ঞতি, ন কুহিঞ্চি মঞ্ঞতি, ন কেনচি মঞ্ঞতী’’তি.

ইদমৱোচ ভগৱা. অত্তমনা তে ভিক্খূ ভগৱতো ভাসিতং অভিনন্দুন্তি.

সপ্পুৰিসসুত্তং নিট্ঠিতং ততিযং.