৯. ব্ৰহ্মনিমন্তনিকসুত্তং

৫০১. এৱং মে সুতং – একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তত্ৰ খো ভগৱা ভিক্খূ আমন্তেসি – ‘‘ভিক্খৱো’’তি. ‘‘ভদন্তে’’তি তে ভিক্খূ ভগৱতো পচ্চস্সোসুং. ভগৱা এতদৱোচ –

‘‘একমিদাহং, ভিক্খৱে, সমযং উক্কট্ঠাযং ৱিহৰামি সুভগৱনে সালৰাজমূলে. তেন খো পন, ভিক্খৱে, সমযেন বকস্স ব্ৰহ্মুনো এৱৰূপং পাপকং দিট্ঠিগতং উপ্পন্নং হোতি – ‘ইদং নিচ্চং, ইদং ধুৱং, ইদং সস্সতং, ইদং কেৱলং, ইদং অচৱনধম্মং, ইদঞ্হি ন জাযতি ন জীযতি ন মীযতি ন চৱতি ন উপপজ্জতি, ইতো চ পনঞ্ঞং উত্তৰি নিস্সৰণং নত্থী’তি. অথ খ্ৱাহং, ভিক্খৱে, বকস্স ব্ৰহ্মুনো চেতসা চেতোপৰিৱিতক্কমঞ্ঞায – সেয্যথাপি নাম বলৱা পুৰিসো সমিঞ্জিতং ৱা বাহং পসাৰেয্য, পসাৰিতং ৱা বাহং সমিঞ্জেয্য, এৱমেৱ – উক্কট্ঠাযং সুভগৱনে সালৰাজমূলে অন্তৰহিতো তস্মিং ব্ৰহ্মলোকে পাতুৰহোসিং. অদ্দসা খো মং, ভিক্খৱে, বকো ব্ৰহ্মা দূৰতোৱ আগচ্ছন্তং; দিস্ৱান মং এতদৱোচ – ‘এহি খো, মাৰিস, স্ৱাগতং, মাৰিস! চিৰস্সং খো, মাৰিস, ইমং পৰিযাযমকাসি যদিদং ইধাগমনায. ইদঞ্হি, মাৰিস, নিচ্চং, ইদং ধুৱং, ইদং সস্সতং, ইদং কেৱলং, ইদং অচৱনধম্মং, ইদঞ্হি ন জাযতি ন জীযতি ন মীযতি ন চৱতি ন উপপজ্জতি. ইতো চ পনঞ্ঞং উত্তৰি নিস্সৰণং নত্থী’’’তি.

এৱং ৱুত্তে, অহং, ভিক্খৱে, বকং ব্ৰহ্মানং এতদৱোচং – ‘‘অৱিজ্জাগতো ৱত, ভো, বকো ব্ৰহ্মা; অৱিজ্জাগতো ৱত, ভো, বকো ব্ৰহ্মা; যত্ৰ হি নাম অনিচ্চংযেৱ সমানং নিচ্চন্তি ৱক্খতি, অদ্ধুৱংযেৱ সমানং ধুৱন্তি ৱক্খতি, অসস্সতংযেৱ সমানং সস্সতন্তি ৱক্খতি, অকেৱলংযেৱ সমানং কেৱলন্তি ৱক্খতি, চৱনধম্মংযেৱ সমানং অচৱনধম্মন্তি ৱক্খতি; যত্থ চ পন জাযতি জীযতি মীযতি চৱতি উপপজ্জতি তঞ্চ ৱক্খতি – ‘ইদঞ্হি ন জাযতি ন জীযতি ন মীযতি ন চৱতি ন উপপজ্জতী’তি; সন্তঞ্চ পনঞ্ঞং উত্তৰি নিস্সৰণং ‘নত্থঞ্ঞং উত্তৰি নিস্সৰণ’ন্তি ৱক্খতী’’তি.

৫০২. ‘‘অথ খো, ভিক্খৱে, মাৰো পাপিমা অঞ্ঞতৰং ব্ৰহ্মপাৰিসজ্জং অন্ৱাৱিসিত্ৱা মং এতদৱোচ – ‘ভিক্খু, ভিক্খু, মেতমাসদো মেতমাসদো, এসো হি, ভিক্খু, ব্ৰহ্মা মহাব্ৰহ্মা অভিভূ অনভিভূতো অঞ্ঞদত্থুদসো ৱসৱত্তী ইস্সৰো কত্তা নিম্মাতা সেট্ঠো সজিতা [সজ্জিতা (স্যা. কং. ক.), সঞ্জিতা (সী. পী.)] ৱসী পিতা ভূতভব্যানং. অহেসুং খো যে, ভিক্খু, তযা পুব্বে সমণব্ৰাহ্মণা লোকস্মিং পথৱীগৰহকা পথৱীজিগুচ্ছকা, আপগৰহকা আপজিগুচ্ছকা, তেজগৰহকা তেজজিগুচ্ছকা, ৱাযগৰহকা ৱাযজিগুচ্ছকা, ভূতগৰহকা ভূতজিগুচ্ছকা, দেৱগৰহকা দেৱজিগুচ্ছকা, পজাপতিগৰহকা পজাপতিজিগুচ্ছকা, ব্ৰহ্মগৰহকা ব্ৰহ্মজিগুচ্ছকা – তে কাযস্স ভেদা পাণুপচ্ছেদা হীনে কাযে পতিট্ঠিতা অহেসুং. যে পন, ভিক্খু, তযা পুব্বে সমণব্ৰাহ্মণা লোকস্মিং পথৱীপসংসকা পথৱাভিনন্দিনো, আপপসংসকা আপাভিনন্দিনো, তেজপসংসকা তেজাভিনন্দিনো, ৱাযপসংসকা ৱাযাভিনন্দিনো, ভূতপসংসকা ভূতাভিনন্দিনো, দেৱপসংসকা দেৱাভিনন্দিনো, পজাপতিপসংসকা পজাপতাভিনন্দিনো, ব্ৰহ্মপসংসকা ব্ৰহ্মাভিনন্দিনো – তে কাযস্স ভেদা পাণুপচ্ছেদা পণীতে কাযে পতিট্ঠিতা. তং তাহং, ভিক্খু, এৱং ৱদামি – ‘ইঙ্ঘ ত্ৱং, মাৰিস, যদেৱ তে ব্ৰহ্মা আহ তদেৱ ত্ৱং কৰোহি, মা ত্ৱং ব্ৰহ্মুনো ৱচনং উপাতিৱত্তিত্থো’. সচে খো ত্ৱং, ভিক্খু, ব্ৰহ্মুনো ৱচনং উপাতিৱত্তিস্সসি, সেয্যথাপি নাম পুৰিসো সিৰিং আগচ্ছন্তিং দণ্ডেন পটিপ্পণামেয্য, সেয্যথাপি ৱা পন, ভিক্খু, পুৰিসো নৰকপ্পপাতে পপতন্তো হত্থেহি চ পাদেহি চ পথৱিং ৱিৰাধেয্য, এৱং সম্পদমিদং, ভিক্খু, তুয্হং ভৱিস্সতি. ‘ইঙ্ঘং ত্ৱং, মাৰিস, যদেৱ তে ব্ৰহ্মা আহ তদেৱ ত্ৱং কৰোহি, মা ত্ৱং ব্ৰহ্মুনো ৱচনং উপাতিৱত্তিত্থো. ননু ত্ৱং, ভিক্খু, পস্সসি ব্ৰহ্মপৰিসং সন্নিপতিত’ন্তি? ইতি খো মং, ভিক্খৱে, মাৰো পাপিমা ব্ৰহ্মপৰিসং উপনেসি.

‘‘এৱং ৱুত্তে, অহং, ভিক্খৱে, মাৰং পাপিমন্তং এতদৱোচং – ‘জানামি খো তাহং, পাপিম; মা ত্ৱং মঞ্ঞিত্থো – ন মং জানাতী’তি. মাৰো ত্ৱমসি, পাপিম. যো চেৱ, পাপিম, ব্ৰহ্মা, যা চ ব্ৰহ্মপৰিসা, যে চ ব্ৰহ্মপাৰিসজ্জা, সব্বেৱ তৱ হত্থগতা সব্বেৱ তৱ ৱসংগতা. তুয্হঞ্হি, পাপিম, এৱং হোতি – ‘এসোপি মে অস্স হত্থগতো, এসোপি মে অস্স ৱসংগতো’তি. অহং খো পন, পাপিম, নেৱ তৱ হত্থগতো নেৱ তৱ ৱসংগতো’’তি.

৫০৩. ‘‘এৱং ৱুত্তে, ভিক্খৱে, বকো ব্ৰহ্মা মং এতদৱোচ – ‘অহঞ্হি, মাৰিস, নিচ্চংযেৱ সমানং নিচ্চন্তি ৱদামি, ধুৱংযেৱ সমানং ধুৱন্তি ৱদামি, সস্সতংযেৱ সমানং সস্সতন্তি ৱদামি, কেৱলংযেৱ সমানং কেৱলন্তি ৱদামি, অচৱনধম্মংযেৱ সমানং অচৱনধম্ম’ন্তি ৱদামি, যত্থ চ পন ন জাযতি ন জীযতি ন মীযতি ন চৱতি ন উপপজ্জতি তদেৱাহং ৱদামি – ‘ইদঞ্হি ন জাযতি ন জীযতি ন মীযতি ন চৱতি ন উপপজ্জতী’তি. অসন্তঞ্চ পনঞ্ঞং উত্তৰি নিস্সৰণং ‘নত্থঞ্ঞং উত্তৰি নিস্সৰণ’ন্তি ৱদামি. অহেসুং খো, ভিক্খু, তযা পুব্বে সমণব্ৰাহ্মণা লোকস্মিং যাৱতকং তুয্হং কসিণং আযু তাৱতকং তেসং তপোকম্মমেৱ অহোসি. তে খো এৱং জানেয্যুং – ‘সন্তঞ্চ পনঞ্ঞং উত্তৰি নিস্সৰণং অত্থঞ্ঞং উত্তৰি নিস্সৰণন্তি, অসন্তং ৱা অঞ্ঞং উত্তৰি নিস্সৰণং নত্থঞ্ঞং উত্তৰি নিস্সৰণ’ন্তি. তং তাহং, ভিক্খু, এৱং ৱদামি – ‘ন চেৱঞ্ঞং উত্তৰি নিস্সৰণং দক্খিস্সসি, যাৱদেৱ চ পন কিলমথস্স ৱিঘাতস্স ভাগী ভৱিস্সসি. সচে খো ত্ৱং, ভিক্খু, পথৱিং অজ্ঝোসিস্সসি, ওপসাযিকো মে ভৱিস্সসি ৱত্থুসাযিকো, যথাকামকৰণীযো বাহিতেয্যো. সচে আপং… তেজং… ৱাযং… ভূতে… দেৱে… পজাপতিং… ব্ৰহ্মং অজ্ঝোসিস্সসি, ওপসাযিকো মে ভৱিস্সসি ৱত্থুসাযিকো, যথাকামকৰণীযো বাহিতেয্যো’তি.

‘‘অহম্পি খো এৱং, ব্ৰহ্মে, জানামি – সচে পথৱিং অজ্ঝোসিস্সামি, ওপসাযিকো তে ভৱিস্সামি ৱত্থুসাযিকো, যথাকামকৰণীযো বাহিতেয্যো. ‘সচে আপং… তেজং… ৱাযং… ভূতে… দেৱে… পজাপতিং… ব্ৰহ্মং অজ্ঝোসিস্সামি, ওপসাযিকো তে ভৱিস্সামি ৱত্থুসাযিকো, যথাকামকৰণীযো বাহিতেয্যো’তি অপি চ তে অহং, ব্ৰহ্মে, গতিঞ্চ পজানামি, জুতিঞ্চ পজানামি – এৱং মহিদ্ধিকো বকো ব্ৰহ্মা, এৱং মহানুভাৱো বকো ব্ৰহ্মা, এৱং মহেসক্খো বকো ব্ৰহ্মা’’তি.

‘‘যথাকথং পন মে ত্ৱং, মাৰিস, গতিঞ্চ পজানাসি, জুতিঞ্চ পজানাসি – ‘এৱং মহিদ্ধিকো বকো ব্ৰহ্মা, এৱং মহানুভাৱো বকো ব্ৰহ্মা, এৱং মহেসক্খো বকো ব্ৰহ্মা’তি?

‘‘যাৱতা চন্দিমসূৰিযা, পৰিহৰন্তি দিসা ভন্তি ৱিৰোচনা;

তাৱ সহস্সধা লোকো, এত্থ তে ৱত্ততে [ৱত্ততী (সী. স্যা. কং. পী.)] ৱসো.

‘‘পৰোপৰঞ্চ [পৰোৱৰঞ্চ (সী. পী.)] জানাসি, অথো ৰাগৱিৰাগিনং;

ইত্থভাৱঞ্ঞথাভাৱং, সত্তানং আগতিং গতি’’ন্তি.

‘‘এৱং খো তে অহং, ব্ৰহ্মে, গতিঞ্চ পজানামি জুতিঞ্চ পজানামি – ‘এৱং মহিদ্ধিকো বকো ব্ৰহ্মা, এৱং মহানুভাৱো বকো ব্ৰহ্মা, এৱং মহেসক্খো বকো ব্ৰহ্মা’তি.

৫০৪. ‘‘অত্থি খো, ব্ৰহ্মে, অঞ্ঞো কাযো, তং ত্ৱং ন জানাসি ন পস্সসি; তমহং জানামি পস্সামি. অত্থি খো, ব্ৰহ্মে, আভস্সৰা নাম কাযো যতো ত্ৱং চুতো ইধূপপন্নো. তস্স তে অতিচিৰনিৱাসেন সা সতি পমুট্ঠা, তেন তং ত্ৱং ন জানাসি ন পস্সসি; তমহং জানামি পস্সামি. এৱম্পি খো অহং, ব্ৰহ্মে, নেৱ তে সমসমো অভিঞ্ঞায, কুতো নীচেয্যং? অথ খো অহমেৱ তযা ভিয্যো. অত্থি খো, ব্ৰহ্মে, সুভকিণ্হো নাম কাযো, ৱেহপ্ফলো নাম কাযো, অভিভূ নাম কাযো, তং ত্ৱং ন জানাসি ন পস্সসি; তমহং জানামি পস্সামি. এৱম্পি খো অহং, ব্ৰহ্মে, নেৱ তে সমসমো অভিঞ্ঞায, কুতো নীচেয্যং? অথ খো অহমেৱ তযা ভিয্যো. পথৱিং খো অহং, ব্ৰহ্মে, পথৱিতো অভিঞ্ঞায যাৱতা পথৱিযা পথৱত্তেন অননুভূতং তদভিঞ্ঞায পথৱিং নাপহোসিং, পথৱিযা নাপহোসিং, পথৱিতো নাপহোসিং, পথৱিং মেতি নাপহোসিং, পথৱিং নাভিৱদিং. এৱম্পি খো অহং, ব্ৰহ্মে, নেৱ তে সমসমো অভিঞ্ঞায, কুতো নীচেয্যং? অথ খো অহমেৱ তযা ভিয্যো. আপং খো অহং, ব্ৰহ্মে…পে… তেজং খো অহং, ব্ৰহ্মে…পে… ৱাযং খো অহং, ব্ৰহ্মে…পে… ভূতে খো অহং, ব্ৰহ্মে…পে… দেৱে খো অহং, ব্ৰহ্মে…পে… পজাপতিং খো অহং, ব্ৰহ্মে…পে… ব্ৰহ্মং খো অহং, ব্ৰহ্মে…পে… আভস্সৰে খো অহং, ব্ৰহ্মে…পে… সুভকিণ্হে খো অহং, ব্ৰহ্মে… …পে… ৱেহপ্ফলে খো অহং, ব্ৰহ্মে…পে… অভিভুং খো অহং, ব্ৰহ্মে…পে… সব্বং খো অহং, ব্ৰহ্মে, সব্বতো অভিঞ্ঞায যাৱতা সব্বস্স সব্বত্তেন অননুভূতং তদভিঞ্ঞায সব্বং নাপহোসিং সব্বস্মিং নাপহোসিং সব্বতো নাপহোসিং সব্বং মেতি নাপহোসিং, সব্বং নাভিৱদিং. এৱম্পি খো অহং, ব্ৰহ্মে, নেৱ তে সমসমো অভিঞ্ঞায, কুতো নীচেয্যং? অথ খো অহমেৱ তযা ভিয্যো’’তি.

‘‘সচে খো, মাৰিস, সব্বস্স সব্বত্তেন অননুভূতং, তদভিঞ্ঞায মা হেৱ তে ৰিত্তকমেৱ অহোসি, তুচ্ছকমেৱ অহোসী’’তি.

‘‘‘ৱিঞ্ঞাণং অনিদস্সনং অনন্তং সব্বতো পভং’, তং পথৱিযা পথৱত্তেন অননুভূতং, আপস্স আপত্তেন অননুভূতং, তেজস্স তেজত্তেন অননুভূতং, ৱাযস্স ৱাযত্তেন অননুভূতং, ভূতানং ভূতত্তেন অননুভূতং, দেৱানং দেৱত্তেন অননুভূতং, পজাপতিস্স পজাপতিত্তেন অননুভূতং, ব্ৰহ্মানং ব্ৰহ্মত্তেন অননুভূতং, আভস্সৰানং আভস্সৰত্তেন অননুভূতং, সুভকিণ্হানং সুভকিণ্হত্তেন অননুভূতং, ৱেহপ্ফলানং ৱেহপ্ফলত্তে অননুভূতং, অভিভুস্স অভিভুত্তেন অননুভূতং, সব্বস্স সব্বত্তেন অননুভূতং’’.

‘‘হন্দ চৰহি [হন্দ চ হি (সী. পী.)] তে, মাৰিস, পস্স অন্তৰধাযামী’’তি. ‘হন্দ চৰহি মে ত্ৱং, ব্ৰহ্মে, অন্তৰধাযস্সু, সচে ৱিসহসী’তি. অথ খো, ভিক্খৱে, বকো ব্ৰহ্মা ‘অন্তৰধাযিস্সামি সমণস্স গোতমস্স, অন্তৰধাযিস্সামি সমণস্স গোতমস্সা’তি নেৱস্সু মে সক্কোতি অন্তৰধাযিতুং.

‘‘এৱং ৱুত্তে, অহং, ভিক্খৱে, বকং ব্ৰহ্মানং এতদৱোচং – ‘হন্দ চৰহি তে ব্ৰহ্মে অন্তৰধাযামী’তি. ‘হন্দ চৰহি মে ত্ৱং, মাৰিস, অন্তৰধাযস্সু সচে ৱিসহসী’তি. অথ খো অহং, ভিক্খৱে, তথাৰূপং ইদ্ধাভিসঙ্খাৰং অভিসঙ্খাসিং – ‘এত্তাৱতা ব্ৰহ্মা চ ব্ৰহ্মপৰিসা চ ব্ৰহ্মপাৰিসজ্জা চ সদ্দঞ্চ মে সোস্সন্তি [সদ্দমেৱ সুয্যন্তি (ক.)], ন চ মং দক্খন্তী’তি. অন্তৰহিতো ইমং গাথং অভাসিং –

‘‘ভৱেৱাহং ভযং দিস্ৱা, ভৱঞ্চ ৱিভৱেসিনং;

ভৱং নাভিৱদিং কিঞ্চি, নন্দিঞ্চ ন উপাদিযি’’ন্তি.

‘‘অথ খো, ভিক্খৱে, ব্ৰহ্মা চ ব্ৰহ্মপৰিসা চ ব্ৰহ্মপাৰিসজ্জা চ অচ্ছৰিযব্ভুতচিত্তজাতা অহেসুং – ‘অচ্ছৰিযং ৱত ভো, অব্ভুতং ৱত ভো! সমণস্স গোতমস্স মহিদ্ধিকতা মহানুভাৱতা, ন চ ৱত নো ইতো পুব্বে দিট্ঠো ৱা, সুতো ৱা, অঞ্ঞো সমণো ৱা ব্ৰাহ্মণো ৱা এৱং মহিদ্ধিকো এৱং মহানুভাৱো যথাযং সমণো গোতমো সক্যপুত্তো সক্যকুলা পব্বজিতো. ভৱৰামায ৱত, ভো, পজায ভৱৰতায ভৱসম্মুদিতায সমূলং ভৱং উদব্বহী’তি.

৫০৫. ‘‘অথ খো, ভিক্খৱে, মাৰো পাপিমা অঞ্ঞতৰং ব্ৰহ্মপাৰিসজ্জং অন্ৱাৱিসিত্ৱা মং এতদৱোচ – ‘সচে খো ত্ৱং, মাৰিস, এৱং পজানাসি, সচে ত্ৱং এৱং অনুবুদ্ধো, মা সাৱকে উপনেসি, মা পব্বজিতে; মা সাৱকানং ধম্মং দেসেসি, মা পব্বজিতানং; মা সাৱকেসু গেধিমকাসি, মা পব্বজিতেসু. অহেসুং খো, ভিক্খু, তযা পুব্বে সমণব্ৰাহ্মণা লোকস্মিং অৰহন্তো সম্মাসম্বুদ্ধা পটিজানমানা. তে সাৱকে উপনেসুং পব্বজিতে, সাৱকানং ধম্মং দেসেসুং পব্বজিতানং, সাৱকেসু গেধিমকংসু পব্বজিতেসু, তে সাৱকে উপনেত্ৱা পব্বজিতে, সাৱকানং ধম্মং দেসেত্ৱা পব্বজিতানং, সাৱকেসু গেধিতচিত্তা পব্বজিতেসু, কাযস্স ভেদা পাণুপচ্ছেদা হীনে কাযে পতিট্ঠিতা. অহেসুং যে পন, ভিক্খু, তযা পুব্বে সমণব্ৰাহ্মণা লোকস্মিং অৰহন্তো সম্মাসম্বুদ্ধা পটিজানমানা. তে ন সাৱকে উপনেসুং ন পব্বজিতে, ন সাৱকানং ধম্মং দেসেসুং ন পব্বজিতানং, ন সাৱকেসু গেধিমকংসু ন পব্বজিতেসু, তে ন সাৱকে উপনেত্ৱা ন পব্বজিতে, ন সাৱকানং ধম্মং দেসেত্ৱা ন পব্বজিতানং, ন সাৱকেসু গেধিতচিত্তা ন পব্বজিতেসু, কাযস্স ভেদা পাণুপচ্ছেদা পণীতে কাযে পতিট্ঠিতা. তং তাহং, ভিক্খু, এৱং ৱদামি – ইঙ্ঘ ত্ৱং, মাৰিস, অপ্পোস্সুক্কো দিট্ঠধম্মসুখৱিহাৰমনুযুত্তো ৱিহৰস্সু, অনক্খাতং কুসলঞ্হি, মাৰিস, মা পৰং ওৱদাহী’তি.

‘‘এৱং ৱুত্তে, অহং, ভিক্খৱে, মাৰং পাপিমন্তং এতদৱোচং – ‘জানামি খো তাহং, পাপিম, মা ত্ৱং মঞ্ঞিত্থো – ন মং জানাতী’তি. মাৰো ত্ৱমসি, পাপিম. ন মং ত্ৱং, পাপিম, হিতানুকম্পী এৱং ৱদেসি; অহিতানুকম্পী মং ত্ৱং, পাপিম, এৱং ৱদেসি. তুয্হঞ্হি, পাপিম, এৱং হোতি – ‘যেসং সমণো গোতমো ধম্মং দেসেস্সতি, তে মে ৱিসযং উপাতিৱত্তিস্সন্তী’তি. অসম্মাসম্বুদ্ধাৱ পন তে, পাপিম, সমানা সম্মাসম্বুদ্ধাম্হাতি পটিজানিংসু. অহং খো পন, পাপিম, সম্মাসম্বুদ্ধোৱ সমানো সম্মাসম্বুদ্ধোম্হীতি পটিজানামি. দেসেন্তোপি হি, পাপিম, তথাগতো সাৱকানং ধম্মং তাদিসোৱ অদেসেন্তোপি হি, পাপিম, তথাগতো সাৱকানং ধম্মং তাদিসোৱ. উপনেন্তোপি হি, পাপিম, তথাগতো সাৱকে তাদিসোৱ, অনুপনেন্তোপি হি, পাপিম, তথাগতো সাৱকে তাদিসোৱ. তং কিস্স হেতু? তথাগতস্স, পাপিম, যে আসৱা সংকিলেসিকা পোনোব্ভৱিকা সদৰা দুক্খৱিপাকা আযতিং জাতিজৰামৰণিযা – তে পহীনা উচ্ছিন্নমূলা তালাৱত্থুকতা অনভাৱংকতা আযতিং অনুপ্পাদধম্মা. সেয্যথাপি, পাপিম, তালো মত্থকচ্ছিন্নো অভব্বো পুন ৱিৰূড়্হিযা; এৱমেৱ খো, পাপিম, তথাগতস্স যে আসৱা সংকিলেসিকা পোনোব্ভৱিকা সদৰা দুক্খৱিপাকা আযতিং জাতিজৰামৰণিযা – তে পহীনা উচ্ছিন্নমূলা তালাৱত্থুকতা অনভাৱংকতা আযতিং অনুপ্পাদধম্মাতি.

‘‘ইতি হিদং মাৰস্স চ অনালপনতায ব্ৰহ্মুনো চ অভিনিমন্তনতায, তস্মা ইমস্স ৱেয্যাকৰণস্স ব্ৰহ্মনিমন্তনিকংতেৱ অধিৱচন’’ন্তি.

ব্ৰহ্মনিমন্তনিকসুত্তং নিট্ঠিতং নৱমং.