১০. মাৰতজ্জনীযসুত্তং

৫০৬. এৱং মে সুতং – একং সমযং আযস্মা মহামোগ্গল্লানো ভগ্গেসু ৱিহৰতি সুসুমাৰগিৰে ভেসকড়াৱনে মিগদাযে. তেন খো পন সমযেন আযস্মা মহামোগ্গল্লানো অব্ভোকাসে চঙ্কমতি. তেন খো পন সমযেন মাৰো পাপিমা আযস্মতো মহামোগ্গল্লানস্স কুচ্ছিগতো হোতি কোট্ঠমনুপৱিট্ঠো. অথ খো আযস্মতো মহামোগ্গল্লানস্স এতদহোসি – ‘‘কিং নু খো মে কুচ্ছি গৰুগৰো ৱিয [গৰু গৰু ৱিয (সী. পী. টীকাযং পাঠন্তৰং)]? মাসাচিতং মঞ্ঞে’’তি. অথ খো আযস্মা মহামোগ্গল্লানো চঙ্কমা ওৰোহিত্ৱা ৱিহাৰং পৱিসিত্ৱা পঞ্ঞত্তে আসনে নিসীদি. নিসজ্জ খো আযস্মা মহামোগ্গল্লানো পচ্চত্তং যোনিসো মনসাকাসি. অদ্দসা খো আযস্মা মহামোগ্গল্লানো মাৰং পাপিমন্তং কুচ্ছিগতং কোট্ঠমনুপৱিট্ঠং. দিস্ৱান মাৰং পাপিমন্তং এতদৱোচ – ‘‘নিক্খম, পাপিম; নিক্খম, পাপিম! মা তথাগতং ৱিহেসেসি, মা তথাগতসাৱকং. মা তে অহোসি দীঘৰত্তং অহিতায দুক্খাযা’’তি. অথ খো মাৰস্স পাপিমতো এতদহোসি – ‘‘অজানমেৱ খো মং অযং সমণো অপস্সং এৱমাহ – ‘নিক্খম, পাপিম; নিক্খম, পাপিম! মা তথাগতং ৱিহেসেসি, মা তথাগতসাৱকং. মা তে অহোসি দীঘৰত্তং অহিতায দুক্খাযা’তি. যোপিস্স সো সত্থা সোপি মং নেৱ খিপ্পং জানেয্য, কুতো পন [কুতো চ পন (স্যা.)] মং অযং সাৱকো জানিস্সতী’’তি? অথ খো আযস্মা মহামোগ্গল্লানো মাৰং পাপিমন্তং এতদৱোচ – ‘‘এৱম্পি খো তাহং, পাপিম, জানামি, মা ত্ৱং মঞ্ঞিত্থো – ‘ন মং জানাতী’তি. মাৰো ত্ৱমসি, পাপিম; তুয্হঞ্হি, পাপিম, এৱং হোতি – ‘অজানমেৱ খো মং অযং সমণো অপস্সং এৱমাহ – নিক্খম, পাপিম; নিক্খম, পাপিম! মা তথাগতং ৱিহেসেসি, মা তথাগতসাৱকং. মা তে অহোসি দীঘৰত্তং অহিতায দুক্খাযাতি. যোপিস্স সো সত্থা সোপি মং নেৱ খিপ্পং জানেয্য, কুতো পন মং অযং সাৱকো জানিস্সতী’’’তি?

অথ খো মাৰস্স পাপিমতো এতদহোসি – ‘‘জানমে খো মং অযং সমণো পস্সং এৱমাহ – ‘নিক্খম, পাপিম; নিক্খম, পাপিম! মা তথাগতং ৱিহেসেসি, মা তথাগতসাৱকং. মা তে অহোসি দীঘৰত্তং অহিতায দুক্খাযা’’’তি. অথ খো মাৰো পাপিমা আযস্মতো মহামোগ্গল্লানস্স মুখতো উগ্গন্ত্ৱা পচ্চগ্গড়ে অট্ঠাসি.

৫০৭. অদ্দসা খো আযস্মা মহামোগ্গল্লানো মাৰং পাপিমন্তং পচ্চগ্গড়ে ঠিতং; দিস্ৱান মাৰং পাপিমন্তং এতদৱোচ – ‘এত্থাপি খো তাহং, পাপিম, পস্সামি; মা ত্ৱং মঞ্ঞিত্থো ‘‘ন মং পস্সতী’’তি. এসো ত্ৱং, পাপিম, পচ্চগ্গড়ে ঠিতো. ভূতপুব্বাহং, পাপিম, দূসী নাম মাৰো অহোসিং, তস্স মে কাড়ী নাম ভগিনী. তস্সা ত্ৱং পুত্তো. সো মে ত্ৱং ভাগিনেয্যো অহোসি. তেন খো পন, পাপিম, সমযেন ককুসন্ধো ভগৱা অৰহং সম্মাসম্বুদ্ধো লোকে উপ্পন্নো হোতি. ককুসন্ধস্স খো পন, পাপিম, ভগৱতো অৰহতো সম্মাসম্বুদ্ধস্স ৱিধুৰসঞ্জীৱং নাম সাৱকযুগং অহোসি অগ্গং ভদ্দযুগং. যাৱতা খো পন, পাপিম, ককুসন্ধস্স ভগৱতো অৰহতো সম্মাসম্বুদ্ধস্স সাৱকা. তেসু ন চ কোচি আযস্মতা ৱিধুৰেন সমসমো হোতি যদিদং ধম্মদেসনায. ইমিনা খো এৱং [এতং (সী. স্যা. পী.)], পাপিম, পৰিযাযেন আযস্মতো ৱিধুৰস্স ৱিধুৰোতেৱ [ৱিধুৰস্স ৱিধুৰো ৱিধুৰোত্ৱেৱ (সী. স্যা. কং. পী.)] সমঞ্ঞা উদপাদি.

‘‘আযস্মা পন, পাপিম, সঞ্জীৱো অৰঞ্ঞগতোপি ৰুক্খমূলগতোপি সুঞ্ঞাগাৰগতোপি অপ্পকসিৰেনেৱ সঞ্ঞাৱেদযিতনিৰোধং সমাপজ্জতি. ভূতপুব্বং, পাপিম, আযস্মা সঞ্জীৱো অঞ্ঞতৰস্মিং ৰুক্খমূলে সঞ্ঞাৱেদযিতনিৰোধং সমাপন্নো নিসিন্নো হোতি. অদ্দসংসু খো, পাপিম, গোপালকা পসুপালকা কস্সকা পথাৱিনো আযস্মন্তং সঞ্জীৱং অঞ্ঞতৰস্মিং ৰুক্খমূলে সঞ্ঞাৱেদযিতনিৰোধং সমাপন্নং নিসিন্নং; দিস্ৱান তেসং এতদহোসি – ‘অচ্ছৰিযং ৱত, ভো, অব্ভুতং ৱত, ভো! অযং সমণো নিসিন্নকোৱ কালঙ্কতো! হন্দ নং দহামা’তি. অথ খো তে, পাপিম, গোপালকা পসুপালকা কস্সকা পথাৱিনো তিণঞ্চ কট্ঠঞ্চ গোমযঞ্চ সংকড্ঢিত্ৱা আযস্মতো সঞ্জীৱস্স কাযে উপচিনিত্ৱা অগ্গিং দত্ৱা পক্কমিংসু. অথ খো, পাপিম, আযস্মা সঞ্জীৱো তস্সা ৰত্তিযা অচ্চযেন তায সমাপত্তিযা ৱুট্ঠহিত্ৱা চীৱৰানি পপ্ফোটেত্ৱা পুব্বণ্হসমযং নিৱাসেত্ৱা পত্তচীৱৰমাদায গামং পিণ্ডায পাৱিসি. অদ্দসংসু খো তে, পাপিম, গোপালকা পসুপালকা কস্সকা পথাৱিনো আযস্মন্তং সঞ্জীৱং পিণ্ডায চৰন্তং; দিস্ৱান নেসং এতদহোসি – ‘অচ্ছৰিযং ৱত, ভো, অব্ভুতং ৱত, ভো! অযং সমণো নিসিন্নকোৱ কালঙ্কতো, স্ৱাযং পটিসঞ্জীৱিতো’তি. ইমিনা খো এৱং, পাপিম, পৰিযাযেন আযস্মতো সঞ্জীৱস্স সঞ্জীৱোতেৱ [সঞ্জীৱো সঞ্জীৱোত্ৱেৱ (সী. স্যা. কং. পী.)] সমঞ্ঞা উদপাদি.

৫০৮. ‘‘অথ খো, পাপিম, দূসিস্স মাৰস্স এতদহোসি – ‘ইমেসং খো অহং ভিক্খূনং সীলৱন্তানং কল্যাণধম্মানং নেৱ জানামি আগতিং ৱা গতিং ৱা. যংনূনাহং ব্ৰাহ্মণগহপতিকে অন্ৱাৱিসেয্যং – এথ, তুম্হে ভিক্খূ সীলৱন্তে কল্যাণধম্মে অক্কোসথ পৰিভাসথ ৰোসেথ ৱিহেসেথ. অপ্পেৱ নাম তুম্হেহি অক্কোসিযমানানং পৰিভাসিযমানানং ৰোসিযমানানং ৱিহেসিযমানানং সিযা চিত্তস্স অঞ্ঞথত্তং, যথা তং দূসী মাৰো লভেথ ওতাৰ’ন্তি. অথ খো তে, পাপিম, দূসী মাৰো ব্ৰাহ্মণগহপতিকে অন্ৱাৱিসি – ‘এথ, তুম্হে ভিক্খূ সীলৱন্তে কল্যাণধম্মে অক্কোসথ পৰিভাসথ ৰোসেথ ৱিহেসেথ. অপ্পেৱ নাম তুম্হেহি অক্কোসিযমানানং পৰিভাসিযমানানং ৰোসিযমানানং ৱিহেসিযমানানং সিযা চিত্তস্স অঞ্ঞথত্তং, যথা তং দূসী মাৰো লভেথ ওতাৰ’ন্তি.

‘‘অথ খো তে, পাপিম, ব্ৰাহ্মণগহপতিকা অন্ৱাৱিসিট্ঠা দূসিনা মাৰেন ভিক্খূ সীলৱন্তে কল্যাণধম্মে অক্কোসন্তি পৰিভাসন্তি ৰোসেন্তি ৱিহেসেন্তি – ‘ইমে পন মুণ্ডকা সমণকা ইব্ভা কিণ্হা [কণ্হা (স্যা. কং. ক.)] বন্ধুপাদাপচ্চা ‘‘ঝাযিনোস্মা ঝাযিনোস্মা’’তি পত্তক্খন্ধা অধোমুখা মধুৰকজাতা ঝাযন্তি পজ্ঝাযন্তি নিজ্ঝাযন্তি অপজ্ঝাযন্তি. সেয্যথাপি নাম উলূকো ৰুক্খসাখাযং মূসিকং মগ্গযমানো ঝাযতি পজ্ঝাযতি নিজ্ঝাযতি অপজ্ঝাযতি; এৱমেৱিমে মুণ্ডকা সমণকা ইব্ভা কিণ্হা বন্ধুপাদাপচ্চা ‘‘ঝাযিনোস্মা ঝাযিনোস্মা’’তি পত্তক্খন্ধা অধোমুখা মধুৰকজাতা ঝাযন্তি পজ্ঝাযন্তি নিজ্ঝাযন্তি অপজ্ঝাযন্তি. সেয্যথাপি নাম কোত্থু নদীতীৰে মচ্ছে মগ্গযমানো ঝাযতি পজ্ঝাযতি নিজ্ঝাযতি অপজ্ঝাযতি; এৱমেৱিমে মুণ্ডকা সমণকা ইব্ভা কিণ্হা বন্ধুপাদাপচ্চা ‘‘ঝাযিনোস্মা ঝাযিনোস্মা’’তি পত্তক্খন্ধা অধোমুখা মধুৰকজাতা ঝাযন্তি পজ্ঝাযন্তি নিজ্ঝাযন্তি অপজ্ঝাযন্তি. সেয্যথাপি নাম বিড়াৰো সন্ধিসমলসঙ্কটীৰে মূসিকং মগ্গযমানো ঝাযতি পজ্ঝাযতি নিজ্ঝাযতি অপজ্ঝাযতি; এৱমেৱিমে মুণ্ডকা সমণকা ইব্ভা কিণ্হা বন্ধুপাদাপচ্চা ‘‘ঝাযিনোস্মা ঝাযিনোস্মা’’তি পত্তক্খন্ধা অধোমুখা মধুৰকজাতা ঝাযন্তি পজ্ঝাযন্তি নিজ্ঝাযন্তি অপজ্ঝাযন্তি. সেয্যথাপি নাম গদ্ৰভো ৱহচ্ছিন্নো সন্ধিসমলসঙ্কটীৰে ঝাযতি পজ্ঝাযতি নিজ্ঝাযতি অপজ্ঝাযতি, এৱমেৱিমে মুণ্ডকা সমণকা ইব্ভা কিণ্হা বন্ধুপাদাপচ্চা ‘‘ঝাযিনোস্মা ঝাযিনোস্মা’’তি পত্তক্খন্ধা অধোমুখা মধুৰকজাতা ঝাযন্তি পজ্ঝাযন্তি নিজ্ঝাযন্তি অপজ্ঝাযন্তী’’তি.

‘‘যে খো পন, পাপিম, তেন সমযেন মনুস্সা কালঙ্কৰোন্তি যেভুয্যেন কাযস্স ভেদা পৰং মৰণা অপাযং দুগ্গতিং ৱিনিপাতং নিৰযং উপপজ্জন্তি.

৫০৯. ‘‘অথ খো, পাপিম, ককুসন্ধো ভগৱা অৰহং সম্মাসম্বুদ্ধো ভিক্খূ আমন্তেসি – ‘অন্ৱাৱিট্ঠা খো, ভিক্খৱে, ব্ৰাহ্মণগহপতিকা দূসিনা মাৰেন – এথ, তুম্হে ভিক্খূ সীলৱন্তে কল্যাণধম্মে অক্কোসথ পৰিভাসথ ৰোসেথ ৱিহেসেথ, অপ্পেৱ নাম তুম্হেহি অক্কোসিযমানানং পৰিভাসিযমানানং ৰোসিযমানানং ৱিহেসিযমানানং সিযা চিত্তস্স অঞ্ঞথত্তং, যথা তং দূসী মাৰো লভেথ ওতাৰ’ন্তি. এথ, তুম্হে, ভিক্খৱে, মেত্তাসহগতেন চেতসা একং দিসং ফৰিত্ৱা ৱিহৰথ, তথা দুতিযং, তথা ততিযং, তথা চতুত্থং. ইতি উদ্ধমধো তিৰিযং সব্বধি সব্বত্ততায সব্বাৱন্তং লোকং মেত্তাসহগতেন চেতসা ৱিপুলেন মহগ্গতেন অপ্পমাণেন অৱেৰেন অব্যাবজ্ঝেন ফৰিত্ৱা ৱিহৰথ. কৰুণাসহগতেন চেতসা…পে… মুদিতাসহগতেন চেতসা…পে… উপেক্খাসহগতেন চেতসা একং দিসং ফৰিত্ৱা ৱিহৰথ, তথা দুতিযং, তথা ততিযং, তথা চতুত্থং. ইতি উদ্ধমধো তিৰিযং সব্বধি সব্বত্ততায সব্বাৱন্তং লোকং উপেক্খাসহগতেন চেতসা ৱিপুলেন মহগ্গতেন অপ্পমাণেন অৱেৰেন অব্যাবজ্ঝেন ফৰিত্ৱা ৱিহৰথা’তি.

‘‘অথ খো তে, পাপিম, ভিক্খূ ককুসন্ধেন ভগৱতা অৰহতা সম্মাসম্বুদ্ধেন এৱং ওৱদিযমানা এৱং অনুসাসিযমানা অৰঞ্ঞগতাপি ৰুক্খমূলগতাপি সুঞ্ঞাগাৰগতাপি মেত্তাসহগতেন চেতসা একং দিসং ফৰিত্ৱা ৱিহৰিংসু, তথা দুতিযং, তথা ততিযং, তথা চতুত্থং. ইতি উদ্ধমধো তিৰিযং সব্বধি সব্বত্ততায সব্বাৱন্তং লোকং মেত্তাসহগতেন চেতসা ৱিপুলেন মহগ্গতেন অপ্পমাণেন অৱেৰেন অব্যাবজ্ঝেন ফৰিত্ৱা ৱিহৰিংসু. কৰুণাসহগতেন চেতসা…পে… মুদিতাসহগতেন চেতসা…পে… উপেক্খাসহগতেন চেতসা একং দিসং ফৰিত্ৱা ৱিহৰিংসু, তথা দুতিযং, তথা ততিযং, তথা চতুত্থং. ইতি উদ্ধমধো তিৰিযং সব্বধি সব্বত্ততায সব্বাৱন্তং লোকং উপেক্খাসহগতেন চেতসা ৱিপুলেন মহগ্গতেন অপ্পমাণেন অৱেৰেন অব্যাবজ্ঝেন ফৰিত্ৱা ৱিহৰিংসু.

৫১০. ‘‘অথ খো, পাপিম, দূসিস্স মাৰস্স এতদহোসি – ‘এৱম্পি খো অহং কৰোন্তো ইমেসং ভিক্খূনং সীলৱন্তানং কল্যাণধম্মানং নেৱ জানামি আগতিং ৱা গতিং ৱা, যংনূনাহং ব্ৰাহ্মণগহপতিকে অন্ৱাৱিসেয্যং – এথ, তুম্হে ভিক্খূ সীলৱন্তে কল্যাণধম্মে সক্কৰোথ গৰুং কৰোথ মানেথ পূজেথ, অপ্পেৱ নাম তুম্হেহি সক্কৰিযমানানং গৰুকৰিযমানানং মানিযমানানং পূজিযমানানং সিযা চিত্তস্স অঞ্ঞথত্তং, যথা তং দূসী মাৰো লভেথ ওতাৰ’ন্তি. অথ খো তে, পাপিম, দূসী মাৰো ব্ৰাহ্মণগহপতিকে অন্ৱাৱিসি – ‘এথ, তুম্হে ভিক্খূ সীলৱন্তে কল্যাণধম্মে সক্কৰোথ গৰুং কৰোথ মানেথ পূজেথ, অপ্পেৱ নাম তুম্হেহি সক্কৰিযমানানং গৰুকৰিযমানানং মানিযমানানং পূজিযমানানং সিযা চিত্তস্স অঞ্ঞথত্তং, যথা তং দূসী মাৰো লভেথ ওতাৰ’ন্তি. অথ খো তে, পাপিম, ব্ৰাহ্মণগহপতিকা অন্ৱাৱিট্ঠা দূসিনা মাৰেন ভিক্খূ সীলৱন্তে কল্যাণধম্মে সক্কৰোন্তি গৰুং কৰোন্তি মানেন্তি পূজেন্তি.

‘‘যে খো পন, পাপিম, তেন সমযেন মনুস্সা কালঙ্কৰোন্তি যেভুয্যেন কাযস্স ভেদা পৰং মৰণা সুগতিং সগ্গং লোকং উপপজ্জন্তি.

৫১১. ‘‘অথ খো, পাপিম, ককুসন্ধো ভগৱা অৰহং সম্মাসম্বুদ্ধো ভিক্খূ আমন্তেসি – ‘অন্ৱাৱিট্ঠা খো, ভিক্খৱে, ব্ৰাহ্মণগহপতিকা দূসিনা মাৰেন – এথ, তুম্হে ভিক্খূ সীলৱন্তে কল্যাণধম্মে সক্কৰোথ গৰুং কৰোথ মানেথ পূজেথ, অপ্পেৱ নাম তুম্হেহি সক্কৰিযমানানং গৰুকৰিযমানানং মানিযমানানং পূজিযমানানং সিযা চিত্তস্স অঞ্ঞথত্তং, যথা তং দূসী মাৰো লভেথ ওতাৰন্তি. এথ, তুম্হে, ভিক্খৱে, অসুভানুপস্সিনো কাযে ৱিহৰথ, আহাৰে পটিকূলসঞ্ঞিনো, সব্বলোকে অনভিৰতিসঞ্ঞিনো [অনভিৰতসঞ্ঞীনো (সী. স্যা. কং. পী.)], সব্বসঙ্খাৰেসু অনিচ্চানুপস্সিনো’তি.

‘‘অথ খো তে, পাপিম, ভিক্খূ ককুসন্ধেন ভগৱতা অৰহতা সম্মাসম্বুদ্ধেন এৱং ওৱদিযমানা এৱং অনুসাসিযমানা অৰঞ্ঞগতাপি ৰুক্খমূলগতাপি সুঞ্ঞাগাৰগতাপি অসুভানুপস্সিনো কাযে ৱিহৰিংসু, আহাৰে পটিকূলসঞ্ঞিনো, সব্বলোকে অনভিৰতিসঞ্ঞিনো, সব্বসঙ্খাৰেসু অনিচ্চানুপস্সিনো.

৫১২. ‘‘অথ খো, পাপিম, ককুসন্ধো ভগৱা অৰহং সম্মাসম্বুদ্ধো পুব্বণ্হসমযং নিৱাসেত্ৱা পত্তচীৱৰমাদায আযস্মতা ৱিধুৰেন পচ্ছাসমণেন গামং পিণ্ডায পাৱিসি. অথ খো, পাপিম, দূসী মাৰো অঞ্ঞতৰং কুমাৰকং [কুমাৰং (সী. পী.)] অন্ৱাৱিসিত্ৱা সক্খৰং গহেত্ৱা আযস্মতো ৱিধুৰস্স সীসে পহাৰমদাসি; সীসং ৱোভিন্দি [সীসং তে ভিন্দিস্সামীতি (ক.)]. অথ খো, পাপিম, আযস্মা ৱিধুৰো ভিন্নেন সীসেন লোহিতেন গড়ন্তেন ককুসন্ধংযেৱ ভগৱন্তং অৰহন্তং সম্মাসম্বুদ্ধং পিট্ঠিতো পিট্ঠিতো অনুবন্ধি. অথ খো, পাপিম, ককুসন্ধো ভগৱা অৰহং সম্মাসম্বুদ্ধো নাগাপলোকিতং অপলোকেসি – ‘ন ৱাযং দূসী মাৰো মত্তমঞ্ঞাসী’তি. সহাপলোকনায চ পন, পাপিম, দূসী মাৰো তম্হা চ ঠানা চৱি মহানিৰযঞ্চ উপপজ্জি.

‘‘তস্স খো পন, পাপিম, মহানিৰযস্স তযো নামধেয্যা হোন্তি – ছফস্সাযতনিকো ইতিপি, সঙ্কুসমাহতো ইতিপি, পচ্চত্তৱেদনিযো ইতিপি. অথ খো মং, পাপিম, নিৰযপালা উপসঙ্কমিত্ৱা এতদৱোচুং – যদা খো তে [যতো তে (ক.)], মাৰিস, সঙ্কুনা সঙ্কু হদযে সমাগচ্ছেয্য. অথ নং ত্ৱং জানেয্যাসি – ‘ৱস্সসহস্সং মে নিৰযে পচ্চমানস্সা’তি. সো খো অহং, পাপিম, বহূনি ৱস্সানি বহূনি ৱস্সসতানি বহূনি ৱস্সসহস্সানি তস্মিং মহানিৰযে অপচ্চিং. দসৱস্সসহস্সানি তস্সেৱ মহানিৰযস্স উস্সদে অপচ্চিং ৱুট্ঠানিমং নাম ৱেদনং ৱেদিযমানো. তস্স ময্হং, পাপিম, এৱৰূপো কাযো হোতি, সেয্যথাপি মনুস্সস্স. এৱৰূপং সীসং হোতি, সেয্যথাপি মচ্ছস্স.

৫১৩. ‘‘কীদিসো নিৰযো আসি, যত্থ দূসী অপচ্চথ;

ৱিধুৰং সাৱকমাসজ্জ, ককুসন্ধঞ্চ ব্ৰাহ্মণং.

‘‘সতং আসি অযোসঙ্কূ, সব্বে পচ্চত্তৱেদনা;

ঈদিসো নিৰযো আসি, যত্থ দূসী অপচ্চথ;

ৱিধুৰং সাৱকমাসজ্জ, ককুসন্ধঞ্চ ব্ৰাহ্মণং.

‘‘যো এতমভিজানাতি, ভিক্খু বুদ্ধস্স সাৱকো;

তাদিসং ভিক্খুমাসজ্জ, কণ্হ দুক্খং নিগচ্ছসি.

‘‘মজ্ঝে সৰস্স তিট্ঠন্তি, ৱিমানা কপ্পট্ঠাযিনো;

ৱেড়ুৰিযৱণ্ণা ৰুচিৰা, অচ্চিমন্তো পভস্সৰা;

অচ্ছৰা তত্থ নচ্চন্তি, পুথু নানত্তৱণ্ণিযো.

‘‘যো এতমভিজানাতি, ভিক্খু বুদ্ধস্স সাৱকো;

তাদিসং ভিক্খুমাসজ্জ, কণ্হ দুক্খং নিগচ্ছসি.

‘‘যো ৱে বুদ্ধেন চোদিতো, ভিক্খু সঙ্ঘস্স পেক্খতো;

মিগাৰমাতুপাসাদং, পাদঙ্গুট্ঠেন কম্পযি.

‘‘যো এতমভিজানাতি, ভিক্খু বুদ্ধস্স সাৱকো;

তাদিসং ভিক্খুমাসজ্জ, কণ্হ দুক্খং নিগচ্ছসি.

‘‘যো ৱেজযন্তং পাসাদং, পাদঙ্গুট্ঠেন কম্পযি;

ইদ্ধিবলেনুপত্থদ্ধো, সংৱেজেসি চ দেৱতা.

‘‘যো এতমভিজানাতি, ভিক্খু বুদ্ধস্স সাৱকো;

তাদিসং ভিক্খুমাসজ্জ, কণ্হ দুক্খং নিগচ্ছসি.

‘‘যো ৱেজযন্তপাসাদে, সক্কং সো পৰিপুচ্ছতি;

অপি ৱাসৱ জানাসি, তণ্হাক্খযৱিমুত্তিযো;

তস্স সক্কো ৱিযাকাসি, পঞ্হং পুট্ঠো যথাতথং.

‘‘যো এতমভিজানাতি, ভিক্খু বুদ্ধস্স সাৱকো;

তাদিসং ভিক্খুমাসজ্জ, কণ্হ দুক্খং নিগচ্ছসি.

‘‘যো ব্ৰহ্মং পৰিপুচ্ছতি, সুধম্মাযাভিতো সভং;

অজ্জাপি ত্যাৱুসো দিট্ঠি, যা তে দিট্ঠি পুৰে অহু;

পস্সসি ৱীতিৱত্তন্তং, ব্ৰহ্মলোকে পভস্সৰং.

‘‘তস্স ব্ৰহ্মা ৱিযাকাসি, অনুপুব্বং যথাতথং;

ন মে মাৰিস সা দিট্ঠি, যা মে দিট্ঠি পুৰে অহু.

‘‘পস্সামি ৱীতিৱত্তন্তং, ব্ৰহ্মলোকে পভস্সৰং;

সোহং অজ্জ কথং ৱজ্জং, অহং নিচ্চোম্হি সস্সতো.

‘‘যো এতমভিজানাতি, ভিক্খু বুদ্ধস্স সাৱকো;

তাদিসং ভিক্খুমাসজ্জ, কণ্হ দুক্খং নিগচ্ছসি.

‘‘যো মহামেৰুনো কূটং, ৱিমোক্খেন অফস্সযি;

ৱনং পুব্বৱিদেহানং, যে চ ভূমিসযা নৰা.

‘‘যো এতমভিজানাতি, ভিক্খু বুদ্ধস্স সাৱকো;

তাদিসং ভিক্খুমাসজ্জ, কণ্হ দুক্খং নিগচ্ছসি.

‘‘ন ৱে অগ্গি চেতযতি [ৱেঠযতি (সী.)], ‘অহং বালং ডহামী’তি;

বালো চ জলিতং অগ্গিং, আসজ্জ নং স ডয্হতি.

‘‘এৱমেৱ তুৱং মাৰ, আসজ্জ নং তথাগতং;

সযং ডহিস্সসি অত্তানং, বালো অগ্গিংৱ সংফুসং.

‘‘অপুঞ্ঞং পসৱী মাৰো, আসজ্জ নং তথাগতং;

কিন্নু মঞ্ঞসি পাপিম, ন মে পাপং ৱিপচ্চতি.

‘‘কৰোতো চীযতি পাপং, চিৰৰত্তায অন্তক;

মাৰ নিব্বিন্দ বুদ্ধম্হা, আসং মাকাসি ভিক্খুসু.

‘‘ইতি মাৰং অতজ্জেসি, ভিক্খু ভেসকড়াৱনে;

ততো সো দুম্মনো যক্খো, নতত্থেৱন্তৰধাযথা’’তি.

মাৰতজ্জনীযসুত্তং নিট্ঠিতং দসমং.

চূড়যমকৱগ্গো নিট্ঠিতো পঞ্চমো.

তস্সুদ্দানং –

সালেয্য ৱেৰঞ্জদুৱে চ তুট্ঠি, চূড়মহাধম্মসমাদানঞ্চ;

ৱীমংসকা কোসম্বি চ ব্ৰাহ্মণো, দূসী চ মাৰো দসমো চ ৱগ্গো.

সালেয্যৱগ্গো নিট্ঠিতো পঞ্চমো.