৪. চূড়ৱেদল্লসুত্তং

৪৬০. এৱং মে সুতং – একং সমযং ভগৱা ৰাজগহে ৱিহৰতি ৱেড়ুৱনে কলন্দকনিৱাপে. অথ খো ৱিসাখো উপাসকো যেন ধম্মদিন্না ভিক্খুনী তেনুপসঙ্কমি; উপসঙ্কমিত্ৱা ধম্মদিন্নং ভিক্খুনিং অভিৱাদেত্ৱা একমন্তং নিসীদি. একমন্তং নিসিন্নো খো ৱিসাখো উপাসকো ধম্মদিন্নং ভিক্খুনিং এতদৱোচ – ‘‘‘সক্কাযো সক্কাযো’তি, অয্যে, ৱুচ্চতি. কতমো নু খো, অয্যে, সক্কাযো ৱুত্তো ভগৱতা’’তি? ‘‘পঞ্চ খো ইমে, আৱুসো ৱিসাখ, উপাদানক্খন্ধা সক্কাযো ৱুত্তো ভগৱতা, সেয্যথিদং – ৰূপুপাদানক্খন্ধো, ৱেদনুপাদানক্খন্ধো, সঞ্ঞুপাদানক্খন্ধো, সঙ্খাৰুপাদানক্খন্ধো, ৱিঞ্ঞাণুপাদানক্খন্ধো. ইমে খো, আৱুসো ৱিসাখ, পঞ্চুপাদানক্খন্ধা সক্কাযো ৱুত্তো ভগৱতা’’তি.

‘‘সাধয্যে’’তি খো ৱিসাখো উপাসকো ধম্মদিন্নায ভিক্খুনিযা ভাসিতং অভিনন্দিত্ৱা অনুমোদিত্ৱা ধম্মদিন্নং ভিক্খুনিং উত্তৰিং পঞ্হং অপুচ্ছি – ‘‘‘সক্কাযসমুদযো সক্কাযসমুদযো’তি, অয্যে, ৱুচ্চতি. কতমো নু খো, অয্যে, সক্কাযসমুদযো ৱুত্তো ভগৱতা’’তি? ‘‘যাযং, আৱুসো ৱিসাখ, তণ্হা পোনোব্ভৱিকা নন্দীৰাগসহগতা তত্ৰতত্ৰাভিনন্দিনী, সেয্যথিদং – কামতণ্হা ভৱতণ্হা ৱিভৱতণ্হা; অযং খো, আৱুসো ৱিসাখ, সক্কাযসমুদযো ৱুত্তো ভগৱতা’’তি.

‘‘‘সক্কাযনিৰোধো সক্কাযনিৰোধো’তি, অয্যে, ৱুচ্চতি. কতমো নু খো, অয্যে, সক্কাযনিৰোধো ৱুত্তো ভগৱতা’’তি?

‘‘যো খো, আৱুসো ৱিসাখ, তস্সাযেৱ তণ্হায অসেসৱিৰাগনিৰোধো চাগো পটিনিস্সগ্গো মুত্তি অনালযো; অযং খো, আৱুসো ৱিসাখ, সক্কাযনিৰোধো ৱুত্তো ভগৱতা’’তি.

‘‘‘সক্কাযনিৰোধগামিনী পটিপদা সক্কাযনিৰোধগামিনী পটিপদা’তি, অয্যে, ৱুচ্চতি. কতমা নু খো, অয্যে, সক্কাযনিৰোধগামিনী পটিপদা ৱুত্তা ভগৱতা’’তি?

‘‘অযমেৱ খো, আৱুসো ৱিসাখ, অৰিযো অট্ঠঙ্গিকো মগ্গো সক্কাযনিৰোধগামিনী পটিপদা ৱুত্তা ভগৱতা, সেয্যথিদং – সম্মাদিট্ঠি সম্মাসঙ্কপ্পো সম্মাৱাচা সম্মাকম্মন্তো সম্মাআজীৱো সম্মাৱাযামো সম্মাসতি সম্মাসমাধী’’তি.

‘‘তঞ্ঞেৱ নু খো, অয্যে, উপাদানং তে [তেৱ (সী.)] পঞ্চুপাদানক্খন্ধা উদাহু অঞ্ঞত্ৰ পঞ্চহুপাদানক্খন্ধেহি উপাদান’’ন্তি? ‘‘ন খো, আৱুসো ৱিসাখ, তঞ্ঞেৱ উপাদানং তে পঞ্চুপাদানক্খন্ধা, নাপি অঞ্ঞত্ৰ পঞ্চহুপাদানক্খন্ধেহি উপাদানং. যো খো, আৱুসো ৱিসাখ, পঞ্চসু উপাদানক্খন্ধেসু ছন্দৰাগো তং তত্থ উপাদান’’ন্তি.

৪৬১. ‘‘কথং পনায্যে, সক্কাযদিট্ঠি হোতী’’তি? ‘‘ইধাৱুসো ৱিসাখ, অস্সুতৱা পুথুজ্জনো, অৰিযানং অদস্সাৱী অৰিযধম্মস্স অকোৱিদো অৰিযধম্মে অৱিনীতো, সপ্পুৰিসানং অদস্সাৱী সপ্পুৰিসধম্মস্স অকোৱিদো সপ্পুৰিসধম্মে অৱিনীতো, ৰূপং অত্ততো সমনুপস্সতি, ৰূপৱন্তং ৱা অত্তানং, অত্তনি ৱা ৰূপং, ৰূপস্মিং ৱা অত্তানং. ৱেদনং…পে… সঞ্ঞং… সঙ্খাৰে… ৱিঞ্ঞাণং অত্ততো সমনুপস্সতি, ৱিঞ্ঞাণৱন্তং ৱা অত্তানং, অত্তনি ৱা ৱিঞ্ঞাণং, ৱিঞ্ঞাণস্মিং ৱা অত্তানং. এৱং খো, আৱুসো ৱিসাখ, সক্কাযদিট্ঠি হোতী’’তি.

‘‘কথং পনায্যে, সক্কাযদিট্ঠি ন হোতী’’তি?

‘‘ইধাৱুসো ৱিসাখ, সুতৱা অৰিযসাৱকো, অৰিযানং দস্সাৱী অৰিযধম্মস্স কোৱিদো অৰিযধম্মে সুৱিনীতো, সপ্পুৰিসানং দস্সাৱী সপ্পুৰিসধম্মস্স কোৱিদো সপ্পুৰিসধম্মে সুৱিনীতো, ন ৰূপং অত্ততো সমনুপস্সতি, ন ৰূপৱন্তং ৱা অত্তানং, ন অত্তনি ৱা ৰূপং, ন ৰূপস্মিং ৱা অত্তানং. ন ৱেদনং…পে… ন সঞ্ঞং… ন সঙ্খাৰে…পে… ন ৱিঞ্ঞাণং অত্ততো সমনুপস্সতি, ন ৱিঞ্ঞাণৱন্তং ৱা অত্তানং, ন অত্তনি ৱা ৱিঞ্ঞাণং, ন ৱিঞ্ঞাণস্মিং ৱা অত্তানং. এৱং খো, আৱুসো ৱিসাখ, সক্কাযদিট্ঠি ন হোতী’’তি.

৪৬২. ‘‘কতমো পনায্যে, অৰিযো অট্ঠঙ্গিকো মগ্গো’’তি?

‘‘অযমেৱ খো, আৱুসো ৱিসাখ, অৰিযো অট্ঠঙ্গিকো মগ্গো, সেয্যথিদং – সম্মাদিট্ঠি সম্মাসঙ্কপ্পো সম্মাৱাচা সম্মাকম্মন্তো সম্মাআজীৱো সম্মাৱাযামো সম্মাসতি সম্মাসমাধী’’তি. ‘‘অৰিযো পনায্যে, অট্ঠঙ্গিকো মগ্গো সঙ্খতো উদাহু অসঙ্খতো’’তি?

‘‘অৰিযো খো, আৱুসো ৱিসাখ, অট্ঠঙ্গিকো মগ্গো সঙ্খতো’’তি.

‘‘অৰিযেন নু খো, অয্যে, অট্ঠঙ্গিকেন মগ্গেন তযো খন্ধা সঙ্গহিতা উদাহু তীহি খন্ধেহি অৰিযো অট্ঠঙ্গিকো মগ্গো সঙ্গহিতো’’তি?

‘‘ন খো, আৱুসো ৱিসাখ, অৰিযেন অট্ঠঙ্গিকেন মগ্গেন তযো খন্ধা সঙ্গহিতা; তীহি চ খো, আৱুসো ৱিসাখ, খন্ধেহি অৰিযো অট্ঠঙ্গিকো মগ্গো সঙ্গহিতো. যা চাৱুসো ৱিসাখ, সম্মাৱাচা যো চ সম্মাকম্মন্তো যো চ সম্মাআজীৱো ইমে ধম্মা সীলক্খন্ধে সঙ্গহিতা. যো চ সম্মাৱাযামো যা চ সম্মাসতি যো চ সম্মাসমাধি ইমে ধম্মা সমাধিক্খন্ধে সঙ্গহিতা. যা চ সম্মাদিট্ঠি যো চ সম্মাসঙ্কপ্পো, ইমে ধম্মা পঞ্ঞাক্খন্ধে সঙ্গহিতা’’তি.

‘‘কতমো পনায্যে, সমাধি, কতমে ধম্মা সমাধিনিমিত্তা, কতমে ধম্মা সমাধিপৰিক্খাৰা, কতমা সমাধিভাৱনা’’তি?

‘‘যা খো, আৱুসো ৱিসাখ, চিত্তস্স একগ্গতা অযং সমাধি; চত্তাৰো সতিপট্ঠানা সমাধিনিমিত্তা; চত্তাৰো সম্মপ্পধানা সমাধিপৰিক্খাৰা. যা তেসংযেৱ ধম্মানং আসেৱনা ভাৱনা বহুলীকম্মং, অযং এত্থ সমাধিভাৱনা’’তি.

৪৬৩. ‘‘কতি পনায্যে, সঙ্খাৰা’’তি?

‘‘তযোমে, আৱুসো ৱিসাখ, সঙ্খাৰা – কাযসঙ্খাৰো, ৱচীসঙ্খাৰো, চিত্তসঙ্খাৰো’’তি.

‘‘কতমো পনায্যে, কাযসঙ্খাৰো, কতমো ৱচীসঙ্খাৰো, কতমো চিত্তসঙ্খাৰো’’তি?

‘‘অস্সাসপস্সাসা খো, আৱুসো ৱিসাখ, কাযসঙ্খাৰো, ৱিতক্কৱিচাৰা ৱচীসঙ্খাৰো, সঞ্ঞা চ ৱেদনা চ চিত্তসঙ্খাৰো’’তি.

‘‘কস্মা পনায্যে, অস্সাসপস্সাসা কাযসঙ্খাৰো, কস্মা ৱিতক্কৱিচাৰা ৱচীসঙ্খাৰো, কস্মা সঞ্ঞা চ ৱেদনা চ চিত্তসঙ্খাৰো’’তি?

‘‘অস্সাসপস্সাসা খো, আৱুসো ৱিসাখ, কাযিকা এতে ধম্মা কাযপ্পটিবদ্ধা, তস্মা অস্সাসপস্সাসা কাযসঙ্খাৰো. পুব্বে খো, আৱুসো ৱিসাখ, ৱিতক্কেত্ৱা ৱিচাৰেত্ৱা পচ্ছা ৱাচং ভিন্দতি, তস্মা ৱিতক্কৱিচাৰা ৱচীসঙ্খাৰো. সঞ্ঞা চ ৱেদনা চ চেতসিকা এতে ধম্মা চিত্তপ্পটিবদ্ধা, তস্মা সঞ্ঞা চ ৱেদনা চ চিত্তসঙ্খাৰো’’তি.

৪৬৪. ‘‘কথং পনায্যে, সঞ্ঞাৱেদযিতনিৰোধসমাপত্তি হোতী’’তি?

‘‘ন খো, আৱুসো ৱিসাখ, সঞ্ঞাৱেদযিতনিৰোধং সমাপজ্জন্তস্স ভিক্খুনো এৱং হোতি – ‘অহং সঞ্ঞাৱেদযিতনিৰোধং সমাপজ্জিস্স’ন্তি ৱা, ‘অহং সঞ্ঞাৱেদযিতনিৰোধং সমাপজ্জামী’তি ৱা, ‘অহং সঞ্ঞাৱেদযিতনিৰোধং সমাপন্নো’তি ৱা. অথ খ্ৱাস্স পুব্বেৱ তথা চিত্তং ভাৱিতং হোতি যং তং তথত্তায উপনেতী’’তি.

‘‘সঞ্ঞাৱেদযিতনিৰোধং সমাপজ্জন্তস্স পনায্যে, ভিক্খুনো কতমে ধম্মা পঠমং নিৰুজ্ঝন্তি – যদি ৱা কাযসঙ্খাৰো, যদি ৱা ৱচীসঙ্খাৰো, যদি ৱা চিত্তসঙ্খাৰো’’তি? ‘‘সঞ্ঞাৱেদযিতনিৰোধং সমাপজ্জন্তস্স খো, আৱুসো ৱিসাখ, ভিক্খুনো পঠমং নিৰুজ্ঝতি ৱচীসঙ্খাৰো, ততো কাযসঙ্খাৰো, ততো চিত্তসঙ্খাৰো’’তি.

‘‘কথং পনায্যে, সঞ্ঞাৱেদযিতনিৰোধসমাপত্তিযা ৱুট্ঠানং হোতী’’তি?

‘‘ন খো, আৱুসো ৱিসাখ, সঞ্ঞাৱেদযিতনিৰোধসমাপত্তিযা ৱুট্ঠহন্তস্স ভিক্খুনো এৱং হোতি – ‘অহং সঞ্ঞাৱেদযিতনিৰোধসমাপত্তিযা ৱুট্ঠহিস্স’ন্তি ৱা, ‘অহং সঞ্ঞাৱেদযিতনিৰোধসমাপত্তিযা ৱুট্ঠহামী’তি ৱা, ‘অহং সঞ্ঞাৱেদযিতনিৰোধসমাপত্তিযা ৱুট্ঠিতো’তি ৱা. অথ খ্ৱাস্স পুব্বেৱ তথা চিত্তং ভাৱিতং হোতি যং তং তথত্তায উপনেতী’’তি.

‘‘সঞ্ঞাৱেদযিতনিৰোধসমাপত্তিযা ৱুট্ঠহন্তস্স পনায্যে, ভিক্খুনো কতমে ধম্মা পঠমং উপ্পজ্জন্তি – যদি ৱা কাযসঙ্খাৰো, যদি ৱা ৱচীসঙ্খাৰো, যদি ৱা চিত্তসঙ্খাৰো’’তি? ‘‘সঞ্ঞাৱেদযিতনিৰোধসমাপত্তিযা ৱুট্ঠহন্তস্স খো, আৱুসো ৱিসাখ, ভিক্খুনো পঠমং উপ্পজ্জতি চিত্তসঙ্খাৰো, ততো কাযসঙ্খাৰো, ততো ৱচীসঙ্খাৰো’’তি.

‘‘সঞ্ঞাৱেদযিতনিৰোধসমাপত্তিযা ৱুট্ঠিতং পনায্যে, ভিক্খুং কতি ফস্সা ফুসন্তী’’তি? ‘‘সঞ্ঞাৱেদযিতনিৰোধসমাপত্তিযা ৱুট্ঠিতং খো, আৱুসো ৱিসাখ, ভিক্খুং তযো ফস্সা ফুসন্তি – সুঞ্ঞতো ফস্সো, অনিমিত্তো ফস্সো, অপ্পণিহিতো ফস্সো’’তি.

‘‘সঞ্ঞাৱেদযিতনিৰোধসমাপত্তিযা ৱুট্ঠিতস্স পনায্যে, ভিক্খুনো কিংনিন্নং চিত্তং হোতি কিংপোণং কিংপব্ভাৰ’’ন্তি? ‘‘সঞ্ঞাৱেদযিতনিৰোধসমাপত্তিযা ৱুট্ঠিতস্স খো, আৱুসো ৱিসাখ, ভিক্খুনো ৱিৱেকনিন্নং চিত্তং হোতি, ৱিৱেকপোণং ৱিৱেকপব্ভাৰ’’ন্তি.

৪৬৫. ‘‘কতি পনায্যে, ৱেদনা’’তি?

‘‘তিস্সো খো ইমা, আৱুসো ৱিসাখ, ৱেদনা – সুখা ৱেদনা, দুক্খা ৱেদনা, অদুক্খমসুখা ৱেদনা’’তি.

‘‘কতমা পনায্যে, সুখা ৱেদনা, কতমা দুক্খা ৱেদনা, কতমা অদুক্খমসুখা ৱেদনা’’তি?

‘‘যং খো, আৱুসো ৱিসাখ, কাযিকং ৱা চেতসিকং ৱা সুখং সাতং ৱেদযিতং – অযং সুখা ৱেদনা. যং খো, আৱুসো ৱিসাখ, কাযিকং ৱা চেতসিকং ৱা দুক্খং অসাতং ৱেদযিতং – অযং দুক্খা ৱেদনা. যং খো, আৱুসো ৱিসাখ, কাযিকং ৱা চেতসিকং ৱা নেৱ সাতং নাসাতং ৱেদযিতং – অযং অদুক্খমসুখা ৱেদনা’’তি.

‘‘সুখা পনায্যে, ৱেদনা কিংসুখা কিংদুক্খা, দুক্খা ৱেদনা কিংসুখা কিংদুক্খা, অদুক্খমসুখা ৱেদনা কিংসুখা কিংদুক্খা’’তি?

‘‘সুখা খো, আৱুসো ৱিসাখ, ৱেদনা ঠিতিসুখা ৱিপৰিণামদুক্খা; দুক্খা ৱেদনা ঠিতিদুক্খা ৱিপৰিণামসুখা; অদুক্খমসুখা ৱেদনা ঞাণসুখা অঞ্ঞাণদুক্খা’’তি.

‘‘সুখায পনায্যে, ৱেদনায কিং অনুসযো অনুসেতি, দুক্খায ৱেদনায কিং অনুসযো অনুসেতি, অদুক্খমসুখায ৱেদনায কিং অনুসযো অনুসেতী’’তি?

‘‘সুখায খো, আৱুসো ৱিসাখ, ৱেদনায ৰাগানুসযো অনুসেতি, দুক্খায ৱেদনায পটিঘানুসযো অনুসেতি, অদুক্খমসুখায ৱেদনায অৱিজ্জানুসযো অনুসেতী’’তি.

‘‘সব্বায নু খো, অয্যে, সুখায ৱেদনায ৰাগানুসযো অনুসেতি, সব্বায দুক্খায ৱেদনায পটিঘানুসযো অনুসেতি, সব্বায অদুক্খমসুখায ৱেদনায অৱিজ্জানুসযো অনুসেতী’’তি?

‘‘ন খো, আৱুসো ৱিসাখ, সব্বায সুখায ৱেদনায ৰাগানুসযো অনুসেতি, ন সব্বায দুক্খায ৱেদনায পটিঘানুসযো অনুসেতি, ন সব্বায অদুক্খমসুখায ৱেদনায অৱিজ্জানুসযো অনুসেতী’’তি.

‘‘সুখায পনায্যে, ৱেদনায কিং পহাতব্বং, দুক্খায ৱেদনায কিং পহাতব্বং, অদুক্খমসুখায ৱেদনায কিং পহাতব্ব’’ন্তি?

‘‘সুখায খো, আৱুসো ৱিসাখ, ৱেদনায ৰাগানুসযো পহাতব্বো, দুক্খায ৱেদনায পটিঘানুসযো পহাতব্বো, অদুক্খমসুখায ৱেদনায অৱিজ্জানুসযো পহাতব্বো’’তি.

‘‘সব্বায নু খো, অয্যে, সুখায ৱেদনায ৰাগানুসযো পহাতব্বো, সব্বায দুক্খায ৱেদনায পটিঘানুসযো পহাতব্বো, সব্বায অদুক্খমসুখায ৱেদনায অৱিজ্জানুসযো পহাতব্বো’’তি?

‘‘ন খো, আৱুসো ৱিসাখ, সব্বায সুখায ৱেদনায ৰাগানুসযো পহাতব্বো, ন সব্বায দুক্খায ৱেদনায পটিঘানুসযো পহাতব্বো, ন সব্বায অদুক্খমসুখায ৱেদনায অৱিজ্জানুসযো পহাতব্বো. ইধাৱুসো ৱিসাখ, ভিক্খু ৱিৱিচ্চেৱ কামেহি ৱিৱিচ্চ অকুসলেহি ধম্মেহি সৱিতক্কং সৱিচাৰং ৱিৱেকজং পীতিসুখং পঠমং ঝানং উপসম্পজ্জ ৱিহৰতি. ৰাগং তেন পজহতি, ন তত্থ ৰাগানুসযো অনুসেতি. ইধাৱুসো ৱিসাখ, ভিক্খু ইতি পটিসঞ্চিক্খতি – ‘কুদাস্সু নামাহং তদাযতনং উপসম্পজ্জ ৱিহৰিস্সামি যদৰিযা এতৰহি আযতনং উপসম্পজ্জ ৱিহৰন্তী’তি? ইতি অনুত্তৰেসু ৱিমোক্খেসু পিহং উপট্ঠাপযতো উপ্পজ্জতি পিহাপ্পচ্চযা দোমনস্সং. পটিঘং তেন পজহতি, ন তত্থ পটিঘানুসযো অনুসেতি. ইধাৱুসো ৱিসাখ, ভিক্খু সুখস্স চ পহানা, দুক্খস্স চ পহানা, পুব্বেৱ সোমনস্সদোমনস্সানং অত্থঙ্গমা, অদুক্খমসুখং উপেক্খাসতিপাৰিসুদ্ধিং চতুত্থং ঝানং উপসম্পজ্জ ৱিহৰতি. অৱিজ্জং তেন পজহতি, ন তত্থ অৱিজ্জানুসযো অনুসেতী’’তি.

৪৬৬. ‘‘সুখায পনায্যে, ৱেদনায কিং পটিভাগো’’তি?

‘‘সুখায খো, আৱুসো ৱিসাখ, ৱেদনায দুক্খা ৱেদনা পটিভাগো’’তি.

‘‘দুক্খায পন্নায্যে, ৱেদনায কিং পটিভাগো’’তি?

‘‘দুক্খায খো, আৱুসো ৱিসাখ, ৱেদনায সুখা ৱেদনা পটিভাগো’’তি.

‘‘অদুক্খমসুখায পনায্যে, ৱেদনায কিং পটিভাগো’’তি?

‘‘অদুক্খমসুখায খো, আৱুসো ৱিসাখ, ৱেদনায অৱিজ্জা পটিভাগো’’তি.

‘‘অৱিজ্জায পনায্যে, কিং পটিভাগো’’তি?

‘‘অৱিজ্জায খো, আৱুসো ৱিসাখ, ৱিজ্জা পটিভাগো’’তি.

‘‘ৱিজ্জায পনায্যে, কিং পটিভাগো’’তি?

‘‘ৱিজ্জায খো, আৱুসো ৱিসাখ, ৱিমুত্তি পটিভাগো’’তি.

‘‘ৱিমুত্তিযা পনায্যে, কিং পটিভাগো’’তি?

‘‘ৱিমুত্তিযা খো, আৱুসো ৱিসাখ, নিব্বানং পটিভাগো’’তি.

‘‘নিব্বানস্স পনায্যে, কিং পটিভাগো’’তি? ‘‘অচ্চযাসি, আৱুসো [অচ্চসৰাৱুসো (সী. পী.), অচ্চস্সৰাৱুসো (স্যা. কং.)] ৱিসাখ, পঞ্হং, নাসক্খি পঞ্হানং পৰিযন্তং গহেতুং. নিব্বানোগধঞ্হি, আৱুসো ৱিসাখ, ব্ৰহ্মচৰিযং, নিব্বানপৰাযনং নিব্বানপৰিযোসানং. আকঙ্খমানো চ ত্ৱং, আৱুসো ৱিসাখ, ভগৱন্তং উপসঙ্কমিত্ৱা এতমত্থং পুচ্ছেয্যাসি, যথা চ তে ভগৱা ব্যাকৰোতি তথা নং ধাৰেয্যাসী’’তি.

৪৬৭. অথ খো ৱিসাখো উপাসকো ধম্মদিন্নায ভিক্খুনিযা ভাসিতং অভিনন্দিত্ৱা অনুমোদিত্ৱা উট্ঠাযাসনা ধম্মদিন্নং ভিক্খুনিং অভিৱাদেত্ৱা পদক্খিণং কত্ৱা যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো ৱিসাখো উপাসকো যাৱতকো অহোসি ধম্মদিন্নায ভিক্খুনিযা সদ্ধিং কথাসল্লাপো তং সব্বং ভগৱতো আৰোচেসি. এৱং ৱুত্তে, ভগৱা ৱিসাখং উপাসকং এতদৱোচ – ‘‘পণ্ডিতা, ৱিসাখ, ধম্মদিন্না ভিক্খুনী, মহাপঞ্ঞা, ৱিসাখ, ধম্মদিন্না ভিক্খুনী. মং চেপি ত্ৱং, ৱিসাখ, এতমত্থং পুচ্ছেয্যাসি, অহম্পি তং এৱমেৱং ব্যাকৰেয্যং, যথা তং ধম্মদিন্নায ভিক্খুনিযা ব্যাকতং. এসো চেৱেতস্স [এসোৱেতস্স (স্যা. কং.)] অত্থো. এৱঞ্চ নং [এৱমেতং (সী. স্যা. কং.)] ধাৰেহী’’তি.

ইদমৱোচ ভগৱা. অত্তমনো ৱিসাখো উপাসকো ভগৱতো ভাসিতং অভিনন্দীতি.

চূড়ৱেদল্লসুত্তং নিট্ঠিতং চতুত্থং.