১০. চূড়অস্সপুৰসুত্তং

৪৩৫. এৱং মে সুতং – একং সমযং ভগৱা অঙ্গেসু ৱিহৰতি অস্সপুৰং নাম অঙ্গানং নিগমো. তত্ৰ খো ভগৱা ভিক্খূ আমন্তেসি – ‘‘ভিক্খৱো’’তি. ‘‘ভদন্তে’’তি তে ভিক্খূ ভগৱতো পচ্চস্সোসুং. ভগৱা এতদৱোচ – ‘‘সমণা সমণাতি ৱো, ভিক্খৱে, জনো সঞ্জানাতি. তুম্হে চ পন ‘কে তুম্হে’তি পুট্ঠা সমানা ‘সমণাম্হা’তি পটিজানাথ. তেসং ৱো, ভিক্খৱে, এৱংসমঞ্ঞানং সতং এৱংপটিঞ্ঞানং সতং – ‘যা সমণসামীচিপ্পটিপদা তং পটিপজ্জিস্সাম; এৱং নো অযং অম্হাকং সমঞ্ঞা চ সচ্চা ভৱিস্সতি পটিঞ্ঞা চ ভূতা; যেসঞ্চ মযং চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰং পৰিভুঞ্জাম, তেসং তে কাৰা অম্হেসু মহপ্ফলা ভৱিস্সন্তি মহানিসংসা, অম্হাকঞ্চেৱাযং পব্বজ্জা অৱঞ্ঝা ভৱিস্সতি সফলা সউদ্ৰযা’তি. এৱঞ্হি ৱো, ভিক্খৱে, সিক্খিতব্বং.

৪৩৬. ‘‘কথঞ্চ, ভিক্খৱে, ভিক্খু ন সমণসামীচিপ্পটিপদং পটিপন্নো হোতি? যস্স কস্সচি, ভিক্খৱে, ভিক্খুনো অভিজ্ঝালুস্স অভিজ্ঝা অপ্পহীনা হোতি, ব্যাপন্নচিত্তস্স ব্যাপাদো অপ্পহীনো হোতি, কোধনস্স কোধো অপ্পহীনো হোতি, উপনাহিস্স উপনাহো অপ্পহীনো হোতি, মক্খিস্স মক্খো অপ্পহীনো হোতি, পড়াসিস্স পড়াসো অপ্পহীনো হোতি, ইস্সুকিস্স ইস্সা অপ্পহীনা হোতি, মচ্ছৰিস্স মচ্ছৰিযং অপ্পহীনং হোতি, সঠস্স সাঠেয্যং অপ্পহীনং হোতি, মাযাৱিস্স মাযা অপ্পহীনা হোতি, পাপিচ্ছস্স পাপিকা ইচ্ছা অপ্পহীনা হোতি, মিচ্ছাদিট্ঠিকস্স মিচ্ছাদিট্ঠি অপ্পহীনা হোতি – ইমেসং খো অহং, ভিক্খৱে, সমণমলানং সমণদোসানং সমণকসটানং আপাযিকানং ঠানানং দুগ্গতিৱেদনিযানং অপ্পহানা ‘ন সমণসামীচিপ্পটিপদং পটিপন্নো’তি ৱদামি. সেয্যথাপি, ভিক্খৱে, মতজং নাম আৱুধজাতং উভতোধাৰং পীতনিসিতং. তদস্স সঙ্ঘাটিযা সম্পাৰুতং সম্পলিৱেঠিতং. তথূপমাহং, ভিক্খৱে, ইমস্স ভিক্খুনো পব্বজ্জং ৱদামি.

৪৩৭. ‘‘নাহং, ভিক্খৱে, সঙ্ঘাটিকস্স সঙ্ঘাটিধাৰণমত্তেন সামঞ্ঞং ৱদামি. নাহং, ভিক্খৱে, অচেলকস্স অচেলকমত্তেন সামঞ্ঞং ৱদামি. নাহং, ভিক্খৱে, ৰজোজল্লিকস্স ৰজোজল্লিকমত্তেন সামঞ্ঞং ৱদামি. নাহং, ভিক্খৱে, উদকোৰোহকস্স উদকোৰোহণমত্তেন [উদকোৰোহকমত্তেন (সী. পী.)] সামঞ্ঞং ৱদামি. নাহং, ভিক্খৱে, ৰুক্খমূলিকস্স ৰুক্খমূলিকমত্তেন সামঞ্ঞং ৱদামি. নাহং, ভিক্খৱে, অব্ভোকাসিকস্স অব্ভোকাসিকমত্তেন সামঞ্ঞং ৱদামি. নাহং, ভিক্খৱে, উব্ভট্ঠকস্স উব্ভট্ঠকমত্তেন সামঞ্ঞং ৱদামি. নাহং, ভিক্খৱে, পৰিযাযভত্তিকস্স পৰিযাযভত্তিকমত্তেন সামঞ্ঞং ৱদামি. নাহং, ভিক্খৱে, মন্তজ্ঝাযকস্স মন্তজ্ঝাযকমত্তেন সামঞ্ঞং ৱদামি. নাহং, ভিক্খৱে, জটিলকস্স জটাধাৰণমত্তেন সামঞ্ঞং ৱদামি.

‘‘সঙ্ঘাটিকস্স চে, ভিক্খৱে, সঙ্ঘাটিধাৰণমত্তেন অভিজ্ঝালুস্স অভিজ্ঝা পহীযেথ, ব্যাপন্নচিত্তস্স ব্যাপাদো পহীযেথ, কোধনস্স কোধো পহীযেথ, উপনাহিস্স উপনাহো পহীযেথ, মক্খিস্স মক্খো পহীযেথ, পড়াসিস্স পড়াসো পহীযেথ, ইস্সুকিস্স ইস্সা পহীযেথ, মচ্ছৰিস্স মচ্ছৰিযং পহীযেথ, সঠস্স সাঠেয্যং পহীযেথ, মাযাৱিস্স মাযা পহীযেথ, পাপিচ্ছস্স পাপিকা ইচ্ছা পহীযেথ, মিচ্ছাদিট্ঠিকস্স মিচ্ছাদিট্ঠি পহীযেথ, তমেনং মিত্তামচ্চা ঞাতিসালোহিতা জাতমেৱ নং সঙ্ঘাটিকং কৰেয্যুং, সঙ্ঘাটিকত্তমেৱ [সংঘাটীকত্তে চেৱ (ক.)] সমাদপেয্যুং – ‘এহি ত্ৱং, ভদ্ৰমুখ, সঙ্ঘাটিকো হোহি, সঙ্ঘাটিকস্স তে সতো সঙ্ঘাটিধাৰণমত্তেন অভিজ্ঝালুস্স অভিজ্ঝা পহীযিস্সতি, ব্যাপন্নচিত্তস্স ব্যাপাদো পহীযিস্সতি, কোধনস্স কোধো পহীযিস্সতি, উপনাহিস্স উপনাহো পহীযিস্সতি, মক্খিস্স মক্খো পহীযিস্সতি, পড়াসিস্স পড়াসো পহীযিস্সতি, ইস্সুকিস্স ইস্সা পহীযিস্সতি, মচ্ছৰিস্স মচ্ছৰিযং পহীযিস্সতি, সঠস্স সাঠেয্যং পহীযিস্সতি, মাযাৱিস্স মাযা পহীযিস্সতি, পাপিচ্ছস্স পাপিকা ইচ্ছা পহীযিস্সতি, মিচ্ছাদিট্ঠিকস্স মিচ্ছাদিট্ঠি পহীযিস্সতী’তি. যস্মা চ খো অহং, ভিক্খৱে, সঙ্ঘাটিকম্পি ইধেকচ্চং পস্সামি অভিজ্ঝালুং ব্যাপন্নচিত্তং কোধনং উপনাহিং মক্খিং পড়াসিং ইস্সুকিং মচ্ছৰিং সঠং মাযাৱিং পাপিচ্ছং মিচ্ছাদিট্ঠিকং, তস্মা ন সঙ্ঘাটিকস্স সঙ্ঘাটিধাৰণমত্তেন সামঞ্ঞং ৱদামি.

‘‘অচেলকস্স চে, ভিক্খৱে…পে… ৰজোজল্লিকস্স চে, ভিক্খৱে…পে… উদকোৰোহকস্স চে, ভিক্খৱে…পে… ৰুক্খমূলিকস্স চে, ভিক্খৱে…পে… অব্ভোকাসিকস্স চে, ভিক্খৱে…পে… উব্ভট্ঠকস্স চে, ভিক্খৱে…পে… পৰিযাযভত্তিকস্স চে, ভিক্খৱে…পে… মন্তজ্ঝাযকস্স চে, ভিক্খৱে…পে… জটিলকস্স চে, ভিক্খৱে, জটাধাৰণমত্তেন অভিজ্ঝালুস্স অভিজ্ঝা পহীযেথ, ব্যাপন্নচিত্তস্স ব্যাপাদো পহীযেথ, কোধনস্স কোধো পহীযেথ, উপনাহিস্স উপনাহো পহীযেথ, মক্খিস্স মক্খো পহীযেথ, পড়াসিস্স পড়াসো পহীযেথ, ইস্সুকিস্স ইস্সা পহীযেথ, মচ্ছৰিস্স মচ্ছৰিযং পহীযেথ, সঠস্স সাঠেয্যং পহীযেথ, মাযাৱিস্স মাযা পহীযেথ, পাপিচ্ছস্স পাপিকা ইচ্ছা পহীযেথ, মিচ্ছাদিট্ঠিকস্স মিচ্ছাদিট্ঠি পহীযেথ, তমেনং মিত্তামচ্চা ঞাতিসালোহিতা জাতমেৱ নং জটিলকং কৰেয্যুং, জটিলকত্তমেৱ [জটিলকত্তে চেৱ (ক.)] সমাদপেয্যুং – ‘এহি ত্ৱং, ভদ্ৰমুখ, জটিলকো হোহি, জটিলকস্স তে সতো জটাধাৰণমত্তেন অভিজ্ঝালুস্স অভিজ্ঝা পহীযিস্সতি ব্যাপন্নচিত্তস্স ব্যাপাদো পহীযিস্সতি, কোধনস্স কোধো পহীযিস্সতি…পে… পাপিচ্ছস্স পাপিকা ইচ্ছা পহীযিস্সতি মিচ্ছাদিট্ঠিকস্স মিচ্ছাদিট্ঠি পহীযিস্সতী’তি. যস্মা চ খো অহং, ভিক্খৱে, জটিলকম্পি ইধেকচ্চং পস্সামি অভিজ্ঝালুং ব্যাপন্নচিত্তং কোধনং উপনাহিং মক্খিং পলাসিং ইস্সুকিং মচ্ছৰিং সঠং মাযাৱিং পাপিচ্ছং মিচ্ছাদিট্ঠিং, তস্মা ন জটিলকস্স জটাধাৰণমত্তেন সামঞ্ঞং ৱদামি.

৪৩৮. ‘‘কথঞ্চ, ভিক্খৱে, ভিক্খু সমণসামীচিপ্পটিপদং পটিপন্নো হোতি? যস্স কস্সচি, ভিক্খৱে, ভিক্খুনো অভিজ্ঝালুস্স অভিজ্ঝা পহীনা হোতি, ব্যাপন্নচিত্তস্স ব্যাপাদো পহীনো হোতি, কোধনস্স কোধো পহীনো হোতি, উপনাহিস্স উপনাহো পহীনো হোতি, মক্খিস্স মক্খো পহীনো হোতি, পড়াসিস্স পড়াসো পহীনো হোতি, ইস্সুকিস্স ইস্সা পহীনা হোতি, মচ্ছৰিস্স মচ্ছৰিযং পহীনং হোতি, সঠস্স সাঠেয্যং পহীনং হোতি, মাযাৱিস্স মাযা পহীনা হোতি, পাপিচ্ছস্স পাপিকা ইচ্ছা পহীনা হোতি, মিচ্ছাদিট্ঠিকস্স মিচ্ছাদিট্ঠি পহীনা হোতি – ইমেসং খো অহং, ভিক্খৱে, সমণমলানং সমণদোসানং সমণকসটানং আপাযিকানং ঠানানং দুগ্গতিৱেদনিযানং পহানা ‘সমণসামীচিপ্পটিপদং পটিপন্নো’তি ৱদামি. সো সব্বেহি ইমেহি পাপকেহি অকুসলেহি ধম্মেহি ৱিসুদ্ধমত্তানং সমনুপস্সতি ( ) [(ৱিমুত্তমত্তানং সমনুপস্সতি) (সী. স্যা. কং. পী.)]. তস্স সব্বেহি ইমেহি পাপকেহি অকুসলেহি ধম্মেহি ৱিসুদ্ধমত্তানং সমনুপস্সতো ( ) [(ৱিমুত্তমত্তানং সমনুপস্সতো) (সী. স্যা. কং. পী.)] পামোজ্জং জাযতি, পমুদিতস্স পীতি জাযতি, পীতিমনস্স কাযো পস্সম্ভতি, পস্সদ্ধকাযো সুখং ৱেদেতি, সুখিনো চিত্তং সমাধিযতি.

‘‘সো মেত্তাসহগতেন চেতসা একং দিসং ফৰিত্ৱা ৱিহৰতি, তথা দুতিযং, তথা ততিযং, তথা চতুত্থং. ইতি উদ্ধমধো তিৰিযং সব্বধি সব্বত্ততায সব্বাৱন্তং লোকং মেত্তাসহগতেন চেতসা ৱিপুলেন মহগ্গতেন অপ্পমাণেন অৱেৰেন অব্যাবজ্ঝেন ফৰিত্ৱা ৱিহৰতি. কৰুণাসহগতেন চেতসা…পে… মুদিতাসহগতেন চেতসা…পে… উপেক্খাসহগতেন চেতসা একং দিসং ফৰিত্ৱা ৱিহৰতি, তথা দুতিযং, তথা ততিযং, তথা চতুত্থং. ইতি উদ্ধমধো তিৰিযং সব্বধি সব্বত্ততায সব্বাৱন্তং লোকং উপেক্খাসহগতেন চেতসা ৱিপুলেন মহগ্গতেন অপ্পমাণেন অৱেৰেন অব্যাবজ্ঝেন ফৰিত্ৱা ৱিহৰতি. সেয্যথাপি, ভিক্খৱে, পোক্খৰণী অচ্ছোদকা সাতোদকা সীতোদকা সেতকা সুপতিত্থা ৰমণীযা. পুৰত্থিমায চেপি দিসায পুৰিসো আগচ্ছেয্য ঘম্মাভিতত্তো ঘম্মপৰেতো কিলন্তো তসিতো পিপাসিতো. সো তং পোক্খৰণিং আগম্ম ৱিনেয্য উদকপিপাসং ৱিনেয্য ঘম্মপৰিড়াহং…পে… পচ্ছিমায চেপি দিসায পুৰিসো আগচ্ছেয্য…পে… উত্তৰায চেপি দিসায পুৰিসো আগচ্ছেয্য…পে… দক্খিণায চেপি দিসায পুৰিসো আগচ্ছেয্য. যতো কুতো চেপি নং পুৰিসো আগচ্ছেয্য ঘম্মাভিতত্তো ঘম্মপৰেতো, কিলন্তো তসিতো পিপাসিতো. সো তং পোক্খৰণিং আগম্ম ৱিনেয্য উদকপিপাসং, ৱিনেয্য ঘম্মপৰিড়াহং. এৱমেৱ খো, ভিক্খৱে, খত্তিযকুলা চেপি অগাৰস্মা অনগাৰিযং পব্বজিতো হোতি, সো চ তথাগতপ্পৱেদিতং ধম্মৱিনযং আগম্ম, এৱং মেত্তং কৰুণং মুদিতং উপেক্খং ভাৱেত্ৱা লভতি অজ্ঝত্তং [তমহং (ক.)] ৱূপসমং [তমহং (ক.)]. অজ্ঝত্তং ৱূপসমা ‘সমণসামীচিপ্পটিপদং পটিপন্নো’তি ৱদামি. ব্ৰাহ্মণকুলা চেপি…পে… ৱেস্সকুলা চেপি…পে… সুদ্দকুলা চেপি…পে… যস্মা কস্মা চেপি কুলা অগাৰস্মা অনগাৰিযং পব্বজিতো হোতি, সো চ তথাগতপ্পৱেদিতং ধম্মৱিনযং আগম্ম, এৱং মেত্তং কৰুণং মুদিতং উপেক্খং ভাৱেত্ৱা লভতি অজ্ঝত্তং ৱূপসমং. অজ্ঝত্তং ৱূপসমা ‘সমণসামীচিপ্পটিপদং পটিপন্নো’তি ৱদামি.

‘‘খত্তিযকুলা চেপি অগাৰস্মা অনগাৰিযং পব্বজিতো হোতি. সো চ আসৱানং খযা অনাসৱং চেতোৱিমুত্তিং পঞ্ঞাৱিমুত্তিং দিট্ঠেৱ ধম্মে সযং অভিঞ্ঞা সচ্ছিকত্ৱা উপসম্পজ্জ ৱিহৰতি. আসৱানং খযা সমণো হোতি. ব্ৰাহ্মণকুলা চেপি…পে… ৱেস্সকুলা চেপি… সুদ্দকুলা চেপি… যস্মা কস্মা চেপি কুলা অগাৰস্মা অনগাৰিযং পব্বজিতো হোতি, সো চ আসৱানং খযা অনাসৱং চেতোৱিমুত্তিং পঞ্ঞাৱিমুত্তিং দিট্ঠেৱ ধম্মে সযং অভিঞ্ঞা সচ্ছিকত্ৱা উপসম্পজ্জ ৱিহৰতি. আসৱানং খযা সমণো হোতী’’তি.

ইদমৱোচ ভগৱা. অত্তমনা তে ভিক্খূ ভগৱতো ভাসিতং অভিনন্দুন্তি.

চূড়অস্সপুৰসুত্তং নিট্ঠিতং দসমং.

মহাযমকৱগ্গো নিট্ঠিতো চতুত্থো.