৯. মহাসাৰোপমসুত্তং

৩০৭. এৱং মে সুতং – একং সমযং ভগৱা ৰাজগহে ৱিহৰতি গিজ্ঝকূটে পব্বতে অচিৰপক্কন্তে দেৱদত্তে. তত্ৰ খো ভগৱা দেৱদত্তং আৰব্ভ ভিক্খূ আমন্তেসি –

‘‘ইধ, ভিক্খৱে, একচ্চো কুলপুত্তো সদ্ধা অগাৰস্মা অনগাৰিযং পব্বজিতো হোতি – ‘ওতিণ্ণোম্হি জাতিযা জৰায মৰণেন সোকেহি পৰিদেৱেহি দুক্খেহি দোমনস্সেহি উপাযাসেহি, দুক্খোতিণ্ণো দুক্খপৰেতো, অপ্পেৱ নাম ইমস্স কেৱলস্স দুক্খক্খন্ধস্স অন্তকিৰিযা পঞ্ঞাযেথা’তি. সো এৱং পব্বজিতো সমানো লাভসক্কাৰসিলোকং অভিনিব্বত্তেতি. সো তেন লাভসক্কাৰসিলোকেন অত্তমনো হোতি পৰিপুণ্ণসঙ্কপ্পো. সো তেন লাভসক্কাৰসিলোকেন অত্তানুক্কংসেতি পৰং ৱম্ভেতি – ‘অহমস্মি লাভসক্কাৰসিলোকৱা [লাভী সিলোকৱা (সী. পী.), লাভী সক্কাৰ সিলোকৱা (স্যা.)], ইমে পনঞ্ঞে ভিক্খূ অপ্পঞ্ঞাতা অপ্পেসক্খা’তি. সো তেন লাভসক্কাৰসিলোকেন মজ্জতি পমজ্জতি পমাদং আপজ্জতি, পমত্তো সমানো দুক্খং ৱিহৰতি.

‘‘সেয্যথাপি, ভিক্খৱে, পুৰিসো সাৰত্থিকো সাৰগৱেসী সাৰপৰিযেসনং চৰমানো মহতো ৰুক্খস্স তিট্ঠতো সাৰৱতো অতিক্কম্মেৱ সাৰং অতিক্কম্ম ফেগ্গুং অতিক্কম্ম তচং অতিক্কম্ম পপটিকং, সাখাপলাসং ছেত্ৱা আদায পক্কমেয্য ‘সাৰ’ন্তি মঞ্ঞমানো. তমেনং চক্খুমা পুৰিসো দিস্ৱা এৱং ৱদেয্য – ‘ন ৱতাযং ভৱং পুৰিসো অঞ্ঞাসি সাৰং, ন অঞ্ঞাসি ফেগ্গুং, ন অঞ্ঞাসি তচং, ন অঞ্ঞাসি পপটিকং, ন অঞ্ঞাসি সাখাপলাসং. তথা হযং [তথাপাযং (ক.)] ভৱং পুৰিসো সাৰত্থিকো সাৰগৱেসী সাৰপৰিযেসনং চৰমানো মহতো ৰুক্খস্স তিট্ঠতো সাৰৱতো অতিক্কম্মেৱ সাৰং অতিক্কম্ম ফেগ্গুং অতিক্কম্ম তচং অতিক্কম্ম পপটিকং, সাখাপলাসং ছেত্ৱা আদায পক্কন্তো ‘সাৰ’ন্তি মঞ্ঞমানো. যঞ্চস্স সাৰেন সাৰকৰণীযং তঞ্চস্স অত্থং নানুভৱিস্সতী’তি. এৱমেৱ খো, ভিক্খৱে, ইধেকচ্চো কুলপুত্তো সদ্ধা অগাৰস্মা অনগাৰিযং পব্বজিতো হোতি – ওতিণ্ণোম্হি জাতিযা জৰায মৰণেন সোকেহি পৰিদেৱেহি দুক্খেহি দোমনস্সেহি উপাযাসেহি, দুক্খোতিণ্ণো দুক্খপৰেতো, অপ্পেৱ নাম ইমস্স কেৱলস্স অন্তকিৰিযা পঞ্ঞাযেথা’তি. সো এৱং পব্বজিতো সমানো লাভসক্কাৰসিলোকং অভিনিব্বত্তেতি. সো তেন লাভসক্কাৰসিলোকেন অত্তমনো হোতি পৰিপুণ্ণসঙ্কপ্পো. সো তেন লাভসক্কাৰসিলোকেন অত্তানুক্কংসেতি, পৰং ৱম্ভেতি ‘অহমস্মি লাভসক্কাৰসিলোকৱা, ইমে পনঞ্ঞে ভিক্খূ অপ্পঞ্ঞাতা অপ্পেসক্খা’তি. সো তেন লাভসক্কাৰসিলোকেন মজ্জতি পমজ্জতি পমাদং আপজ্জতি, পমত্তো সমানো দুক্খং ৱিহৰতি. অযং ৱুচ্চতি, ভিক্খৱে, ভিক্খু সাখাপলাসং অগ্গহেসি ব্ৰহ্মচৰিযস্স; তেন চ ৱোসানং আপাদি.

৩০৮. ‘‘ইধ পন, ভিক্খৱে, একচ্চো কুলপুত্তো সদ্ধা অগাৰস্মা অনগাৰিযং পব্বজিতো হোতি – ‘ওতিণ্ণোম্হি জাতিযা জৰায মৰণেন সোকেহি পৰিদেৱেহি দুক্খেহি দোমনস্সেহি উপাযাসেহি, দুক্খোতিণ্ণো দুক্খপৰেতো, অপ্পেৱ নাম ইমস্স কেৱলস্স দুক্খক্খন্ধস্স অন্তকিৰিযা পঞ্ঞাযেথা’তি. সো এৱং পব্বজিতো সমানো লাভসক্কাৰসিলোকং অভিনিব্বত্তেতি. সো তেন লাভসক্কাৰসিলোকেন ন অত্তমনো হোতি ন পৰিপুণ্ণসঙ্কপ্পো. সো তেন লাভসক্কাৰসিলোকেন ন অত্তানুক্কংসেতি, ন পৰং ৱম্ভেতি. সো তেন লাভসক্কাৰসিলোকেন ন মজ্জতি নপ্পমজ্জতি ন পমাদং আপজ্জতি. অপ্পমত্তো সমানো সীলসম্পদং আৰাধেতি. সো তায সীলসম্পদায অত্তমনো হোতি পৰিপুণ্ণসঙ্কপ্পো. সো তায সীলসম্পদায অত্তানুক্কংসেতি, পৰং ৱম্ভেতি – ‘অহমস্মি সীলৱা কল্যাণধম্মো, ইমে পনঞ্ঞে ভিক্খূ দুস্সীলা পাপধম্মা’তি. সো তায সীলসম্পদায মজ্জতি পমজ্জতি পমাদং আপজ্জতি, পমত্তো সমানো দুক্খং ৱিহৰতি.

‘‘সেয্যথাপি, ভিক্খৱে, পুৰিসো সাৰত্থিকো সাৰগৱেসী সাৰপৰিযেসনং চৰমানো মহতো ৰুক্খস্স তিট্ঠতো সাৰৱতো অতিক্কম্মেৱ সাৰং অতিক্কম্ম ফেগ্গুং অতিক্কম্ম তচং, পপটিকং ছেত্ৱা আদায পক্কমেয্য ‘সাৰ’ন্তি মঞ্ঞমানো. তমেনং চক্খুমা পুৰিসো দিস্ৱা এৱং ৱদেয্য – ‘ন ৱতাযং ভৱং পুৰিসো অঞ্ঞাসি সাৰং, ন অঞ্ঞাসি ফেগ্গুং, ন অঞ্ঞাসি তচং, ন অঞ্ঞাসি পপটিকং, ন অঞ্ঞাসি সাখাপলাসং. তথা হযং ভৱং পুৰিসো সাৰত্থিকো সাৰগৱেসী সাৰপৰিযেসনং চৰমানো মহতো ৰুক্খস্স তিট্ঠতো সাৰৱতো অতিক্কম্মেৱ সাৰং অতিক্কম্ম ফেগ্গুং অতিক্কম্ম তচং, পপটিকং ছেত্ৱা আদায পক্কন্তো ‘সাৰ’ন্তি মঞ্ঞমানো; যঞ্চস্স সাৰেন সাৰকৰণীযং তঞ্চস্স অত্থং নানুভৱিস্সতী’তি.

‘‘এৱমেৱ খো, ভিক্খৱে, ইধেকচ্চো কুলপুত্তো সদ্ধা অগাৰস্মা অনগাৰিযং পব্বজিতো হোতি – ‘ওতিণ্ণোম্হি জাতিযা জৰায মৰণেন সোকেহি পৰিদেৱেহি দুক্খেহি দোমনস্সেহি উপাযাসেহি, দুক্খোতিণ্ণো দুক্খপৰেতো, অপ্পেৱ নাম ইমস্স কেৱলস্স দুক্খক্খন্ধস্স অন্তকিৰিযা পঞ্ঞাযেথা’’তি. সো এৱং পব্বজিতো সমানো লাভসক্কাৰসিলোকং অভিনিব্বত্তেতি. সো তেন লাভসক্কাৰসিলোকেন ন অত্তমনো হোতি ন পৰিপুণ্ণসঙ্কপ্পো. সো তেন লাভসক্কাৰসিলোকেন ন অত্তানুক্কংসেতি, ন পৰং ৱম্ভেতি. সো তেন লাভসক্কাৰসিলোকেন ন মজ্জতি নপ্পমজ্জতি ন পমাদং আপজ্জতি. অপ্পমত্তো সমানো সীলসম্পদং আৰাধেতি. সো তায সীলসম্পদায অত্তমনো হোতি পৰিপুণ্ণসঙ্কপ্পো. সো তায সীলসম্পদায অত্তানুক্কংসেতি, পৰং ৱম্ভেতি – ‘অহমস্মি সীলৱা কল্যাণধম্মো, ইমে পনঞ্ঞে ভিক্খূ দুস্সীলা পাপধম্মা’তি. সো তায সীলসম্পদায মজ্জতি পমজ্জতি পমাদং আপজ্জতি, পমত্তো সমানো দুক্খং ৱিহৰতি. অযং ৱুচ্চতি, ভিক্খৱে, ভিক্খু পপটিকং অগ্গহেসি ব্ৰহ্মচৰিযস্স; তেন চ ৱোসানং আপাদি.

৩০৯. ‘‘ইধ পন, ভিক্খৱে, একচ্চো কুলপুত্তো সদ্ধা অগাৰস্মা অনগাৰিযং পব্বজিতো হোতি – ‘ওতিণ্ণোম্হি জাতিযা জৰায মৰণেন সোকেহি পৰিদেৱেহি দুক্খেহি দোমনস্সেহি উপাযাসেহি, দুক্খোতিণ্ণো দুক্খপৰেতো, অপ্পেৱ নাম ইমস্স কেৱলস্স দুক্খক্খন্ধস্স অন্তকিৰিযা পঞ্ঞাযেথা’তি. সো এৱং পব্বজিতো সমানো লাভসক্কাৰসিলোকং অভিনিব্বত্তেতি. সো তেন লাভসক্কাৰসিলোকেন ন অত্তমনো হোতি ন পৰিপুণ্ণসঙ্কপ্পো. সো তেন লাভসক্কাৰসিলোকেন ন অত্তানুক্কংসেতি, ন পৰং ৱম্ভেতি. সো তেন লাভসক্কাৰসিলোকেন ন মজ্জতি নপ্পমজ্জতি ন পমাদং আপজ্জতি, অপ্পমত্তো সমানো সীলসম্পদং আৰাধেতি. সো তায সীলসম্পদায অত্তমনো হোতি নো চ খো পৰিপুণ্ণসঙ্কপ্পো. সো তায সীলসম্পদায ন অত্তানুক্কংসেতি, ন পৰং ৱম্ভেতি. সো তায সীলসম্পদায ন মজ্জতি নপ্পমজ্জতি ন পমাদং আপজ্জতি. অপ্পমত্তো সমানো সমাধিসম্পদং আৰাধেতি. সো তায সমাধিসম্পদায অত্তমনো হোতি পৰিপুণ্ণসঙ্কপ্পো. সো তায সমাধিসম্পদায অত্তানুক্কংসেতি, পৰং ৱম্ভেতি – ‘অহমস্মি সমাহিতো একগ্গচিত্তো, ইমে পনঞ্ঞে ভিক্খূ অসমাহিতা ৱিব্ভন্তচিত্তা’তি. সো তায সমাধিসম্পদায মজ্জতি পমজ্জতি পমাদং আপজ্জতি, পমত্তো সমানো দুক্খং ৱিহৰতি.

‘‘সেয্যথাপি, ভিক্খৱে, পুৰিসো সাৰত্থিকো সাৰগৱেসী সাৰপৰিযেসনং চৰমানো মহতো ৰুক্খস্স তিট্ঠতো সাৰৱতো অতিক্কম্মেৱ সাৰং অতিক্কম্ম ফেগ্গুং তচং ছেত্ৱা আদায পক্কমেয্য ‘সাৰ’ন্তি মঞ্ঞমানো. তমেনং চক্খুমা পুৰিসো দিস্ৱা এৱং ৱদেয্য ‘ন ৱতাযং ভৱং পুৰিসো অঞ্ঞাসি সাৰং, ন অঞ্ঞাসি ফেগ্গুং, ন অঞ্ঞাসি তচং, ন অঞ্ঞাসি পপটিকং, ন অঞ্ঞাসি সাখাপলাসং. তথা হযং ভৱং পুৰিসো সাৰত্থিকো সাৰগৱেসী সাৰপৰিযেসনং চৰমানো মহতো ৰুক্খস্স তিট্ঠতো সাৰৱতো অতিক্কম্মেৱ সাৰং অতিক্কম্ম ফেগ্গুং তচং ছেত্ৱা আদায পক্কন্তো ‘সাৰ’ন্তি মঞ্ঞমানো. যঞ্চস্স সাৰেন সাৰকৰণীযং তঞ্চস্স অত্থং নানুভৱিস্সতী’তি.

‘‘এৱমেৱ খো, ভিক্খৱে, ইধেকচ্চো কুলপুত্তো সদ্ধা অগাৰস্মা অনগাৰিযং পব্বজিতো হোতি – ‘ওতিণ্ণোম্হি জাতিযা জৰায মৰণেন সোকেহি পৰিদেৱেহি দুক্খেহি দোমনস্সেহি উপাযাসেহি, দুক্খোতিণ্ণো দুক্খপৰেতো, অপ্পেৱ নাম ইমস্স কেৱলস্স দুক্খক্খন্ধস্স অন্তকিৰিযা পঞ্ঞাযেথা’’তি. সো এৱং পব্বজিতো সমানো লাভসক্কাৰসিলোকং অভিনিব্বত্তেতি. সো তেন লাভসক্কাৰসিলোকেন ন অত্তমনো হোতি ন পৰিপুণ্ণসঙ্কপ্পো. সো তেন লাভসক্কাৰসিলোকেন ন অত্তানুক্কংসেতি, ন পৰং ৱম্ভেতি. সো তেন লাভসক্কাৰসিলোকেন ন মজ্জতি নপ্পমজ্জতি ন পমাদং আপজ্জতি, অপ্পমত্তো সমানো সীলসম্পদং আৰাধেতি. সো তায সীলসম্পদায অত্তমনো হোতি নো চ খো পৰিপুণ্ণসঙ্কপ্পো. সো তায সীলসম্পদায ন অত্তানুক্কংসেতি, ন পৰং ৱম্ভেতি. সো তায সীলসম্পদায ন মজ্জতি নপ্পমজ্জতি ন পমাদং আপজ্জতি, অপ্পমত্তো সমানো সমাধিসম্পদং আৰাধেতি. সো তায সমাধিসম্পদায অত্তমনো হোতি পৰিপুণ্ণসঙ্কপ্পো. সো তায সমাধিসম্পদায অত্তানুক্কংসেতি, পৰং ৱম্ভেতি – ‘অহমস্মি সমাহিতো একগ্গচিত্তো, ইমে পনঞ্ঞে ভিক্খূ অসমাহিতা ৱিব্ভন্তচিত্তা’তি. সো তায সমাধিসম্পদায মজ্জতি পমজ্জতি পমাদং আপজ্জতি, পমত্তো সমানো দুক্খং ৱিহৰতি. অযং ৱুচ্চতি, ভিক্খৱে, ভিক্খু তচং অগ্গহেসি ব্ৰহ্মচৰিযস্স; তেন চ ৱোসানং আপাদি.

৩১০. ‘‘ইধ পন, ভিক্খৱে, একচ্চো কুলপুত্তো সদ্ধা অগাৰস্মা অনগাৰিযং পব্বজিতো হোতি – ‘ওতিণ্ণোম্হি জাতিযা জৰায মৰণেন সোকেহি পৰিদেৱেহি দুক্খেহি দোমনস্সেহি উপাযাসেহি, দুক্খোতিণ্ণো দুক্খপৰেতো, অপ্পেৱ নাম ইমস্স কেৱলস্স দুক্খক্খন্ধস্স অন্তকিৰিযা পঞ্ঞাযেথা’তি. সো এৱং পব্বজিতো সমানো লাভসক্কাৰসিলোকং অভিনিব্বত্তেতি. সো তেন লাভসক্কাৰসিলোকেন ন অত্তমনো হোতি ন পৰিপুণ্ণসঙ্কপ্পো. সো তেন লাভসক্কাৰসিলোকেন ন অত্তানুক্কংসেতি, ন পৰং ৱম্ভেতি. সো তেন লাভসক্কাৰসিলোকেন ন মজ্জতি নপ্পমজ্জতি ন পমাদং আপজ্জতি. অপ্পমত্তো সমানো সীলসম্পদং আৰাধেতি. সো তায সীলসম্পদায অত্তমনো হোতি, নো চ খো পৰিপুণ্ণসঙ্কপ্পো. সো তায সীলসম্পদায ন অত্তানুক্কংসেতি, ন পৰং ৱম্ভেতি. সো তায সীলসম্পদায ন মজ্জতি নপ্পমজ্জতি ন পমাদং আপজ্জতি, অপ্পমত্তো সমানো সমাধিসম্পদং আৰাধেতি. সো তায সমাধিসম্পদায অত্তমনো হোতি, নো চ খো পৰিপুণ্ণসঙ্কপ্পো. সো তায সমাধিসম্পদায ন অত্তানুক্কংসেতি, ন পৰং ৱম্ভেতি. সো তায সমাধিসম্পদায ন মজ্জতি নপ্পমজ্জতি ন পমাদং আপজ্জতি অপ্পমত্তো সমানো ঞাণদস্সনং আৰাধেতি. সো তেন ঞাণদস্সনেন অত্তমনো হোতি পৰিপুণ্ণসঙ্কপ্পো. সো তেন ঞাণদস্সনেন অত্তানুক্কংসেতি, পৰং ৱম্ভেতি – ‘অহমস্মি জানং পস্সং ৱিহৰামি. ইমে পনঞ্ঞে ভিক্খূ অজানং অপস্সং ৱিহৰন্তী’তি. সো তেন ঞাণদস্সনেন মজ্জতি পমজ্জতি পমাদং আপজ্জতি, পমত্তো সমানো দুক্খং ৱিহৰতি.

‘‘সেয্যথাপি, ভিক্খৱে, পুৰিসো সাৰত্থিকো সাৰগৱেসী সাৰপৰিযেসনং চৰমানো মহতো ৰুক্খস্স তিট্ঠতো সাৰৱতো অতিক্কম্মেৱ সাৰং ফেগ্গুং ছেত্ৱা আদায পক্কমেয্য ‘সাৰ’ন্তি মঞ্ঞমানো. তমেনং চক্খুমা পুৰিসো দিস্ৱা এৱং ৱদেয্য – ‘ন ৱতাযং ভৱং পুৰিসো অঞ্ঞাসি সাৰং ন অঞ্ঞাসি ফেগ্গুং ন অঞ্ঞাসি তচং ন অঞ্ঞাসি পপটিকং ন অঞ্ঞাসি সাখাপলাসং. তথা হযং ভৱং পুৰিসো সাৰত্থিকো সাৰগৱেসী সাৰপৰিযেসনং চৰমানো মহতো ৰুক্খস্স তিট্ঠতো সাৰৱতো অতিক্কম্মেৱ সাৰং ফেগ্গুং ছেত্ৱা আদায পক্কন্তো ‘সাৰ’ন্তি মঞ্ঞমানো. যঞ্চস্স সাৰেন সাৰকৰণীযং তঞ্চস্স অত্থং নানুভৱিস্সতী’তি. এৱমেৱ খো, ভিক্খৱে, ইধেকচ্চো কুলপুত্তো সদ্ধা অগাৰস্মা অনগাৰিযং পব্বজিতো হোতি – ‘ওতিণ্ণোম্হি জাতিযা জৰায মৰণেন সোকেহি পৰিদেৱেহি দুক্খেহি দোমনস্সেহি উপাযাসেহি, দুক্খোতিণ্ণো দুক্খপৰেতো, অপ্পেৱ নাম ইমস্স কেৱলস্স দুক্খক্খন্ধস্স অন্তকিৰিযা পঞ্ঞাযেথা’তি. সো এৱং পব্বজিতো সমানো লাভসক্কাৰসিলোকং অভিনিব্বত্তেতি. সো তেন লাভসক্কাৰসিলোকেন ন অত্তমনো হোতি ন পৰিপুণ্ণসঙ্কপ্পো. সো তেন লাভসক্কাৰসিলোকেন ন অত্তানুক্কংসেতি, ন পৰং ৱম্ভেতি. সো তেন লাভসক্কাৰসিলোকেন ন মজ্জতি নপ্পমজ্জতি ন পমাদং আপজ্জতি, অপ্পমত্তো সমানো সীলসম্পদং আৰাধেতি. সো তায সীলসম্পদায অত্তমনো হোতি, নো চ খো পৰিপুণ্ণসঙ্কপ্পো. সো তায সীলসম্পদায ন অত্তানুক্কংসেতি, ন পৰং ৱম্ভেতি. সো তায সীলসম্পদায ন মজ্জতি নপ্পমজ্জতি ন পমাদং আপজ্জতি, অপ্পমত্তো সমানো সমাধিসম্পদং আৰাধেতি. সো তায সমাধিসম্পদায অত্তমনো হোতি, নো চ খো পৰিপুণ্ণসঙ্কপ্পো. সো তায সমাধিসম্পদায ন অত্তানুক্কংসেতি, ন পৰং ৱম্ভেতি. সো তায সমাধিসম্পদায ন মজ্জতি নপ্পমজ্জতি ন পমাদং আপজ্জতি, অপ্পমত্তো সমানো ঞাণদস্সনং আৰাধেতি. সো তেন ঞাণদস্সনেন অত্তমনো হোতি পৰিপুণ্ণসঙ্কপ্পো. সো তেন ঞাণদস্সনেন অত্তানুক্কংসেতি, পৰং ৱম্ভেতি – ‘অহমস্মি জানং পস্সং ৱিহৰামি, ইমে পনঞ্ঞে ভিক্খূ অজানং অপস্সং ৱিহৰন্তী’তি. সো তেন ঞাণদস্সনেন মজ্জতি পমজ্জতি পমাদং আপজ্জতি, পমত্তো সমানো দুক্খং ৱিহৰতি. অযং ৱুচ্চতি, ভিক্খৱে, ভিক্খু ফেগ্গুং অগ্গহেসি ব্ৰহ্মচৰিযস্স; তেন চ ৱোসানং আপাদি.

৩১১. ‘‘ইধ পন, ভিক্খৱে, একচ্চো কুলপুত্তো সদ্ধা অগাৰস্মা অনগাৰিযং পব্বজিতো হোতি – ‘ওতিণ্ণোম্হি জাতিযা জৰায মৰণেন সোকেহি পৰিদেৱেহি দুক্খেহি দোমনস্সেহি উপাযাসেহি, দুক্খোতিণ্ণো দুক্খপৰেতো, অপ্পেৱ নাম ইমস্স কেৱলস্স দুক্খক্খন্ধস্স অন্তকিৰিযা পঞ্ঞাযেথা’তি. সো এৱং পব্বজিতো সমানো লাভসক্কাৰসিলোকং অভিনিব্বত্তেতি. সো তেন লাভসক্কাৰসিলোকেন ন অত্তমনো হোতি, ন পৰিপুণ্ণসঙ্কপ্পো. সো তেন লাভসক্কাৰসিলোকেন ন অত্তানুক্কংসেতি, ন পৰং ৱম্ভেতি. সো তেন লাভসক্কাৰসিলোকেন ন মজ্জতি নপ্পমজ্জতি ন পমাদং আপজ্জতি, অপ্পমত্তো সমানো সীলসম্পদং আৰাধেতি. সো তায সীলসম্পদায অত্তমনো হোতি, নো চ খো পৰিপুণ্ণসঙ্কপ্পো. সো তায সীলসম্পদায ন অত্তানুক্কংসেতি, ন পৰং ৱম্ভেতি. সো তায সীলসম্পদায ন মজ্জতি নপ্পমজ্জতি ন পমাদং আপজ্জতি, অপ্পমত্তো সমানো সমাধিসম্পদং আৰাধেতি. সো তায সমাধিসম্পদায অত্তমনো হোতি, নো চ খো পৰিপুণ্ণসঙ্কপ্পো. সো তায সমাধিসম্পদায ন অত্তানুক্কংসেতি, ন পৰং ৱম্ভেতি. সো তায সমাধিসম্পদায ন মজ্জতি নপ্পমজ্জতি ন পমাদং আপজ্জতি, অপ্পমত্তো সমানো ঞাণদস্সনং আৰাধেতি. সো তেন ঞাণদস্সনেন অত্তমনো হোতি, নো চ খো পৰিপুণ্ণসঙ্কপ্পো. সো তেন ঞাণদস্সনেন ন অত্তানুক্কংসেতি, ন পৰং ৱম্ভেতি. সো তেন ঞাণদস্সনেন ন মজ্জতি নপ্পমজ্জতি ন পমাদং আপজ্জতি, অপ্পমত্তো সমানো অসমযৱিমোক্খং আৰাধেতি. অট্ঠানমেতং [অট্ঠানং খো পনেতং (ক.)], ভিক্খৱে, অনৱকাসো যং সো ভিক্খু তায অসমযৱিমুত্তিযা পৰিহাযেথ.

‘‘সেয্যথাপি, ভিক্খৱে, পুৰিসো সাৰত্থিকো সাৰগৱেসী সাৰপৰিযেসনং চৰমানো মহতো ৰুক্খস্স তিট্ঠতো সাৰৱতো সাৰঞ্ঞেৱ ছেত্ৱা আদায পক্কমেয্য ‘সাৰ’ন্তি জানমানো. তমেনং চক্খুমা পুৰিসো দিস্ৱা এৱং ৱদেয্য – ‘অঞ্ঞাসি ৱতাযং ভৱং পুৰিসো সাৰং, অঞ্ঞাসি ফেগ্গুং, অঞ্ঞাসি তচং, অঞ্ঞাসি পপটিকং, অঞ্ঞাসি সাখাপলাসং. তথা হযং ভৱং পুৰিসো সাৰত্থিকো সাৰগৱেসী সাৰপৰিযেসনং চৰমানো মহতো ৰুক্খস্স তিট্ঠতো সাৰৱতো সাৰঞ্ঞেৱ ছেত্ৱা আদায পক্কন্তো ‘সাৰ’ন্তি জানমানো. যঞ্চস্স সাৰেন সাৰকৰণীযং তঞ্চস্স অত্থং অনুভৱিস্সতী’তি.

‘‘এৱমেৱ খো, ভিক্খৱে, ইধেকচ্চো কুলপুত্তো সদ্ধা অগাৰস্মা অনগাৰিযং পব্বজিতো হোতি – ‘ওতিণ্ণোম্হি জাতিযা জৰায মৰণেন সোকেহি পৰিদেৱেহি দুক্খেহি দোমনস্সেহি উপাযাসেহি, দুক্খোতিণ্ণো দুক্খপৰেতো, অপ্পেৱ নাম ইমস্স কেৱলস্স দুক্খক্খন্ধস্স অন্তকিৰিযা পঞ্ঞাযেথা’তি. সো এৱং পব্বজিতো সমানো লাভসক্কাৰসিলোকং অভিনিব্বত্তেতি. সো তেন লাভসক্কাৰসিলোকেন ন অত্তমনো হোতি, ন পৰিপুণ্ণসঙ্কপ্পো. সো তেন লাভসক্কাৰসিলোকেন ন অত্তানুক্কংসেতি, ন পৰং ৱম্ভেতি. সো তেন লাভসক্কাৰসিলোকেন ন মজ্জতি নপ্পমজ্জতি ন পমাদং আপজ্জতি, অপ্পমত্তো সমানো সীলসম্পদং আৰাধেতি. সো তায সীলসম্পদায অত্তমনো হোতি, নো চ খো পৰিপুণ্ণসঙ্কপ্পো. সো তায সীলসম্পদায ন অত্তানুক্কংসেতি, ন পৰং ৱম্ভেতি. সো তায সীলসম্পদায ন মজ্জতি নপ্পমজ্জতি ন পমাদং আপজ্জতি, অপ্পমত্তো সমানো সমাধিসম্পদং আৰাধেতি. সো তায সমাধিসম্পদায অত্তমনো হোতি, নো চ খো পৰিপুণ্ণসঙ্কপ্পো. সো তায সমাধিসম্পদায ন অত্তানুক্কংসেতি, ন পৰং ৱম্ভেতি. সো তায সমাধিসম্পদায ন মজ্জতি নপ্পমজ্জতি ন পমাদং আপজ্জতি, অপ্পমত্তো সমানো ঞাণদস্সনং আৰাধেতি. সো তেন ঞাণদস্সনেন অত্তমনো হোতি, নো চ খো পৰিপুণ্ণসঙ্কপ্পো. সো তেন ঞাণদস্সনেন ন অত্তানুক্কংসেতি, ন পৰং ৱম্ভেতি. সো তেন ঞাণদস্সনেন ন মজ্জতি নপ্পমজ্জতি ন পমাদং আপজ্জতি, অপ্পমত্তো সমানো অসমযৱিমোক্খং আৰাধেতি. অট্ঠানমেতং, ভিক্খৱে, অনৱকাসো যং সো ভিক্খু তায অসমযৱিমুত্তিযা পৰিহাযেথ.

‘‘ইতি খো, ভিক্খৱে, নযিদং ব্ৰহ্মচৰিযং লাভসক্কাৰসিলোকানিসংসং, ন সীলসম্পদানিসংসং, ন সমাধিসম্পদানিসংসং, ন ঞাণদস্সনানিসংসং. যা চ খো অযং, ভিক্খৱে, অকুপ্পা চেতোৱিমুত্তি – এতদত্থমিদং, ভিক্খৱে, ব্ৰহ্মচৰিযং, এতং সাৰং এতং পৰিযোসান’’ন্তি.

ইদমৱোচ ভগৱা. অত্তমনা তে ভিক্খূ ভগৱতো ভাসিতং অভিনন্দুন্তি.

মহাসাৰোপমসুত্তং নিট্ঠিতং নৱমং.