১০. চূড়সাৰোপমসুত্তং

৩১২. এৱং মে সুতং – একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. অথ খো পিঙ্গলকোচ্ছো ব্ৰাহ্মণো যেন ভগৱা তেনুপসঙ্কমি; উপসঙ্কমিত্ৱা ভগৱতা সদ্ধিং সম্মোদি. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদি. একমন্তং নিসিন্নো খো পিঙ্গলকোচ্ছো ব্ৰাহ্মণো ভগৱন্তং এতদৱোচ – ‘‘যেমে, ভো গোতম, সমণব্ৰাহ্মণা সঙ্ঘিনো গণিনো গণাচৰিযা ঞাতা যসস্সিনো তিত্থকৰা সাধুসম্মতা, বহুজনস্স, সেয্যথিদং – পূৰণো কস্সপো, মক্খলি গোসালো, অজিতো কেসকম্বলো, পকুধো কচ্চাযনো, সঞ্চযো [সঞ্জযো (সী. স্যা. পী. ক.)] বেলট্ঠপুত্তো, নিগণ্ঠো নাটপুত্তো, সব্বেতে সকায পটিঞ্ঞায অব্ভঞ্ঞংসু সব্বেৱ নাব্ভঞ্ঞংসু, উদাহু একচ্চে অব্ভঞ্ঞংসু একচ্চে নাব্ভঞ্ঞংসূ’’তি? ‘‘অলং, ব্ৰাহ্মণ, তিট্ঠতেতং – সব্বেতে সকায পটিঞ্ঞায অব্ভঞ্ঞংসু সব্বেৱ নাব্ভঞ্ঞংসু, উদাহু একচ্চে অব্ভঞ্ঞংসু একচ্চে নাব্ভঞ্ঞংসূতি. ধম্মং তে, ব্ৰাহ্মণ, দেসেস্সামি, তং সুণাহি, সাধুকং মনসি কৰোহি, ভাসিস্সামী’’তি. ‘‘এৱং, ভো’’তি খো পিঙ্গলকোচ্ছো ব্ৰাহ্মণো ভগৱতো পচ্চস্সোসি. ভগৱা এতদৱোচ –

৩১৩. ‘‘সেয্যথাপি, ব্ৰাহ্মণ, পুৰিসো সাৰত্থিকো সাৰগৱেসী সাৰপৰিযেসনং চৰমানো মহতো ৰুক্খস্স তিট্ঠতো সাৰৱতো অতিক্কম্মেৱ সাৰং অতিক্কম্ম ফেগ্গুং অতিক্কম্ম তচং অতিক্কম্ম পপটিকং, সাখাপলাসং ছেত্ৱা আদায পক্কমেয্য ‘সাৰ’ন্তি মঞ্ঞমানো. তমেনং চক্খুমা পুৰিসো দিস্ৱা এৱং ৱদেয্য – ‘ন ৱতাযং ভৱং পুৰিসো অঞ্ঞাসি সাৰং, ন অঞ্ঞাসি ফেগ্গুং, ন অঞ্ঞাসি তচং, ন অঞ্ঞাসি পপটিকং, ন অঞ্ঞাসি সাখাপলাসং. তথা হযং ভৱং পুৰিসো সাৰত্থিকো সাৰগৱেসী সাৰপৰিযেসনং চৰমানো মহতো ৰুক্খস্স তিট্ঠতো সাৰৱতো অতিক্কম্মেৱ সাৰং অতিক্কম্ম ফেগ্গুং অতিক্কম্ম তচং অতিক্কম্ম পপটিকং, সাখাপলাসং ছেত্ৱা আদায পক্কন্তো ‘সাৰ’ন্তি মঞ্ঞমানো. যঞ্চস্স সাৰেন সাৰকৰণীযং তঞ্চস্স অত্থং নানুভৱিস্সতী’তি.

৩১৪. ‘‘সেয্যথাপি ৱা পন, ব্ৰাহ্মণ, পুৰিসো সাৰত্থিকো সাৰগৱেসী সাৰপৰিযেসনং চৰমানো মহতো ৰুক্খস্স তিট্ঠতো সাৰৱতো অতিক্কম্মেৱ সাৰং অতিক্কম্ম ফেগ্গুং অতিক্কম্ম তচং, পপটিকং ছেত্ৱা আদায পক্কমেয্য ‘সাৰ’ন্তি মঞ্ঞমানো. তমেনং চক্খুমা পুৰিসো দিস্ৱা এৱং ৱদেয্য – ‘ন ৱতাযং ভৱং পুৰিসো অঞ্ঞাসি সাৰং, ন অঞ্ঞাসি ফেগ্গুং, ন অঞ্ঞাসি তচং, ন অঞ্ঞাসি পপটিকং, ন অঞ্ঞাসি সাখাপলাসং. তথা হযং ভৱং পুৰিসো সাৰত্থিকো সাৰগৱেসী সাৰপৰিযেসনং চৰমানো মহতো ৰুক্খস্স তিট্ঠতো সাৰৱতো অতিক্কম্মেৱ সাৰং অতিক্কম্ম ফেগ্গুং অতিক্কম্ম তচং পপটিকং ছেত্ৱা আদায পক্কন্তো ‘সাৰ’ন্তি মঞ্ঞমানো. যঞ্চস্স সাৰেন সাৰকৰণীযং তঞ্চস্স অত্থং নানুভৱিস্সতী’তি.

৩১৫. ‘‘সেয্যথাপি ৱা পন, ব্ৰাহ্মণ, পুৰিসো সাৰত্থিকো সাৰগৱেসী সাৰপৰিযেসনং চৰমানো মহতো ৰুক্খস্স তিট্ঠতো সাৰৱতো অতিক্কম্মেৱ সাৰং অতিক্কম্ম ফেগ্গুং, তচং ছেত্ৱা আদায পক্কমেয্য ‘সাৰ’ন্তি মঞ্ঞমানো. তমেনং চক্খুমা পুৰিসো দিস্ৱা এৱং ৱদেয্য – ‘ন ৱতাযং ভৱং পুৰিসো অঞ্ঞাসি সাৰং, ন অঞ্ঞাসি ফেগ্গুং, ন অঞ্ঞাসি তচং, ন অঞ্ঞাসি পপটিকং, ন অঞ্ঞাসি সাখাপলাসং. তথা হযং ভৱং পুৰিসো সাৰত্থিকো সাৰগৱেসী সাৰপৰিযেসনং চৰমানো মহতো ৰুক্খস্স তিট্ঠতো সাৰৱতো অতিক্কম্মেৱ সাৰং অতিক্কম্ম ফেগ্গুং, তচং ছেত্ৱা আদায পক্কন্তো ‘সাৰ’ন্তি মঞ্ঞমানো. যঞ্চস্স সাৰেন সাৰকৰণীযং তঞ্চস্স অত্থং নানুভৱিস্সতী’তি.

৩১৬. ‘‘সেয্যথাপি ৱা পন, ব্ৰাহ্মণ, পুৰিসো সাৰত্থিকো সাৰগৱেসী সাৰপৰিযেসনং চৰমানো মহতো ৰুক্খস্স তিট্ঠতো সাৰৱতো অতিক্কম্মেৱ সাৰং, ফেগ্গুং ছেত্ৱা আদায পক্কমেয্য ‘সাৰ’ন্তি মঞ্ঞমানো. তমেনং চক্খুমা পুৰিসো দিস্ৱা এৱং ৱদেয্য – ‘ন ৱতাযং ভৱং পুৰিসো অঞ্ঞাসি সাৰং, ন অঞ্ঞাসি ফেগ্গুং, ন অঞ্ঞাসি তচং, ন অঞ্ঞাসি পপটিকং, ন অঞ্ঞাসি সাখাপলাসং. তথা হযং ভৱং পুৰিসো সাৰত্থিকো সাৰগৱেসী সাৰপৰিযেসনং চৰমানো মহতো ৰুক্খস্স তিট্ঠতো সাৰৱতো অতিক্কম্মেৱ সাৰং, ফেগ্গুং ছেত্ৱা আদায পক্কন্তো ‘সাৰ’ন্তি মঞ্ঞমানো. যঞ্চস্স সাৰেন সাৰকৰণীযং তঞ্চস্স অত্থং নানুভৱিস্সতী’তি.

৩১৭. ‘‘সেয্যথাপি ৱা পন, ব্ৰাহ্মণ, পুৰিসো সাৰত্থিকো সাৰগৱেসী সাৰপৰিযেসনং চৰমানো মহতো ৰুক্খস্স তিট্ঠতো সাৰৱতো সাৰঞ্ঞেৱ ছেত্ৱা আদায পক্কমেয্য ‘সাৰ’ন্তি জানমানো. তমেনং চক্খুমা পুৰিসো দিস্ৱা এৱং ৱদেয্য – ‘অঞ্ঞাসি ৱতাযং ভৱং পুৰিসো সাৰং, অঞ্ঞাসি ফেগ্গুং, অঞ্ঞাসি তচং, অঞ্ঞাসি পপটিকং, অঞ্ঞাসি সাখাপলাসং. তথা হযং ভৱং পুৰিসো সাৰত্থিকো সাৰগৱেসী সাৰপৰিযেসনং চৰমানো মহতো ৰুক্খস্স তিট্ঠতো সাৰৱতো সাৰঞ্ঞেৱ ছেত্ৱা আদায পক্কন্তো ‘সাৰ’ন্তি জানমানো. যঞ্চস্স সাৰেন সাৰকৰণীযং তঞ্চস্স অত্থং অনুভৱিস্সতী’তি.

৩১৮. ‘‘এৱমেৱ খো, ব্ৰাহ্মণ, ইধেকচ্চো পুগ্গলো সদ্ধা অগাৰস্মা অনগাৰিযং পব্বজিতো হোতি – ‘ওতিণ্ণোম্হি জাতিযা জৰায মৰণেন সোকেহি পৰিদেৱেহি দুক্খেহি দোমনস্সেহি উপাযাসেহি, দুক্খোতিণ্ণো দুক্খপৰেতো, অপ্পেৱ নাম ইমস্স কেৱলস্স দুক্খক্খন্ধস্স অন্তকিৰিযা পঞ্ঞাযেথা’তি. সো এৱং পব্বজিতো সমানো লাভসক্কাৰসিলোকং অভিনিব্বত্তেতি. সো তেন লাভসক্কাৰসিলোকেন অত্তমনো হোতি পৰিপুণ্ণসঙ্কপ্পো. সো তেন লাভসক্কাৰসিলোকেন অত্তানুক্কংসেতি, পৰং ৱম্ভেতি – ‘অহমস্মি লাভসক্কাৰসিলোকৱা, ইমে পনঞ্ঞে ভিক্খূ অপ্পঞ্ঞাতা অপ্পেসক্খা’তি. লাভসক্কাৰসিলোকেন চ যে অঞ্ঞে ধম্মা উত্তৰিতৰা চ পণীততৰা চ তেসং ধম্মানং সচ্ছিকিৰিযায ন ছন্দং জনেতি, ন ৱাযমতি, ওলীনৱুত্তিকো চ হোতি সাথলিকো. সেয্যথাপি সো, ব্ৰাহ্মণ, পুৰিসো সাৰত্থিকো সাৰগৱেসী সাৰপৰিযেসনং চৰমানো মহতো ৰুক্খস্স তিট্ঠতো সাৰৱতো অতিক্কম্মেৱ সাৰং অতিক্কম্ম ফেগ্গুং অতিক্কম্ম তচং অতিক্কম্ম পপটিকং, সাখাপলাসং ছেত্ৱা আদায পক্কন্তো ‘সাৰ’ন্তি মঞ্ঞমানো. যঞ্চস্স সাৰেন সাৰকৰণীযং তঞ্চস্স অত্থং নানুভৱিস্সতি. তথূপমাহং, ব্ৰাহ্মণ, ইমং পুগ্গলং ৱদামি.

৩১৯. ‘‘ইধ পন, ব্ৰাহ্মণ, একচ্চো পুগ্গলো সদ্ধা অগাৰস্মা অনগাৰিযং পব্বজিতো হোতি – ‘ওতিণ্ণোম্হি জাতিযা জৰায মৰণেন সোকেহি পৰিদেৱেহি দুক্খেহি দোমনস্সেহি উপাযাসেহি, দুক্খোতিণ্ণো দুক্খপৰেতো, অপ্পেৱ নাম ইমস্স কেৱলস্স দুক্খক্খন্ধস্স অন্তকিৰিযা পঞ্ঞাযেথা’তি. সো এৱং পব্বজিতো সমানো লাভসক্কাৰসিলোকং অভিনিব্বত্তেতি. সো তেন লাভসক্কাৰসিলোকেন ন অত্তমনো হোতি ন পৰিপুণ্ণসঙ্কপ্পো. সো তেন লাভসক্কাৰসিলোকেন ন অত্তানুক্কংসেতি, ন পৰং ৱম্ভেতি. লাভসক্কাৰসিলোকেন চ যে অঞ্ঞে ধম্মা উত্তৰিতৰা চ পণীততৰা চ তেসং ধম্মানং সচ্ছিকিৰিযায ছন্দং জনেতি, ৱাযমতি, অনোলীনৱুত্তিকো চ হোতি অসাথলিকো. সো সীলসম্পদং আৰাধেতি. সো তায সীলসম্পদায অত্তমনো হোতি, পৰিপুণ্ণসঙ্কপ্পো. সো তায সীলসম্পদায অত্তানুক্কংসেতি, পৰং ৱম্ভেতি – ‘অহমস্মি সীলৱা কল্যাণধম্মো, ইমে পনঞ্ঞে ভিক্খূ দুস্সীলা পাপধম্মা’তি. সীলসম্পদায চ যে অঞ্ঞে ধম্মা উত্তৰিতৰা চ পণীততৰা চ তেসং ধম্মানং সচ্ছিকিৰিযায ন ছন্দং জনেতি, ন ৱাযমতি, ওলীনৱুত্তিকো চ হোতি সাথলিকো. সেয্যথাপি সো, ব্ৰাহ্মণ, পুৰিসো সাৰত্থিকো সাৰগৱেসী সাৰপৰিযেসনং চৰমানো মহতো ৰুক্খস্স তিট্ঠতো সাৰৱতো অতিক্কম্মেৱ সাৰং অতিক্কম্ম ফেগ্গুং অতিক্কম্ম তচং, পপটিকং ছেত্ৱা আদায পক্কন্তো ‘সাৰ’ন্তি মঞ্ঞমানো. যঞ্চস্স সাৰেন সাৰকৰণীযং, তঞ্চস্স অত্থং নানুভৱিস্সতি. তথূপমাহং, ব্ৰাহ্মণ, ইমং পুগ্গলং ৱদামি.

৩২০. ‘‘ইধ পন, ব্ৰাহ্মণ, একচ্চো পুগ্গলো সদ্ধা অগাৰস্মা অনগাৰিযং পব্বজিতো হোতি – ‘ওতিণ্ণোম্হি জাতিযা জৰায মৰণেন সোকেহি পৰিদেৱেহি দুক্খেহি দোমনস্সেহি উপাযাসেহি, দুক্খোতিণ্ণো দুক্খপৰেতো, অপ্পেৱ নাম ইমস্স কেৱলস্স দুক্খক্খন্ধস্স অন্তকিৰিযা পঞ্ঞাযেথা’তি. সো এৱং পব্বজিতো সমানো লাভসক্কাৰসিলোকং অভিনিব্বত্তেতি. সো তেন লাভসক্কাৰসিলোকেন ন অত্তমনো হোতি, ন পৰিপুণ্ণসঙ্কপ্পো. সো তেন লাভসক্কাৰসিলোকেন ন অত্তানুক্কংসেতি, ন পৰং ৱম্ভেতি. লাভসক্কাৰসিলোকেন চ যে অঞ্ঞে ধম্মা উত্তৰিতৰা চ পণীততৰা চ তেসং ধম্মানং সচ্ছিকিৰিযায ছন্দং জনেতি, ৱাযমতি, অনোলীনৱুত্তিকো চ হোতি অসাথলিকো. সো সীলসম্পদং আৰাধেতি. সো তায সীলসম্পদায অত্তমনো হোতি নো চ খো পৰিপুণ্ণসঙ্কপ্পো. সো তায সীলসম্পদায ন অত্তানুক্কংসেতি, ন পৰং ৱম্ভেতি. সীলসম্পদায চ যে অঞ্ঞে ধম্মা উত্তৰিতৰা চ পণীততৰা চ তেসং ধম্মানং সচ্ছিকিৰিযায ছন্দং জনেতি, ৱাযমতি, অনোলীনৱুত্তিকো চ হোতি অসাথলিকো. সো সমাধিসম্পদং আৰাধেতি. সো তায সমাধিসম্পদায অত্তমনো হোতি, পৰিপুণ্ণসঙ্কপ্পো. সো তায সমাধিসম্পদায অত্তানুক্কংসেতি, পৰং ৱম্ভেতি – ‘অহমস্মি সমাহিতো একগ্গচিত্তো, ইমে পনঞ্ঞে ভিক্খূ অসমাহিতা ৱিব্ভন্তচিত্তা’তি. সমাধিসম্পদায চ যে অঞ্ঞে ধম্মা উত্তৰিতৰা চ পণীততৰা চ, তেসং ধম্মানং সচ্ছিকিৰিযায ন ছন্দং জনেতি, ন ৱাযমতি, ওলীনৱুত্তিকো চ হোতি সাথলিকো. সেয্যথাপি সো, ব্ৰাহ্মণ, পুৰিসো সাৰত্থিকো সাৰগৱেসী সাৰপৰিযেসনং চৰমানো মহতো ৰুক্খস্স তিট্ঠতো সাৰৱতো অতিক্কম্মেৱ সাৰং অতিক্কম্ম ফেগ্গুং, তচং ছেত্ৱা আদায পক্কন্তো ‘সাৰ’ন্তি মঞ্ঞমানো. যঞ্চস্স সাৰেন সাৰকৰণীযং তঞ্চস্স অত্থং নানুভৱিস্সতি. তথূপমাহং, ব্ৰাহ্মণ, ইমং পুগ্গলং ৱদামি.

৩২১. ‘‘ইধ পন, ব্ৰাহ্মণ, একচ্চো পুগ্গলো সদ্ধা অগাৰস্মা অনগাৰিযং পব্বজিতো হোতি – ‘ওতিণ্ণোম্হি জাতিযা জৰায মৰণেন…পে… অন্তকিৰিযা পঞ্ঞাযেথা’তি. সো এৱং পব্বজিতো সমানো লাভসক্কাৰসিলোকং অভিনিব্বত্তেতি. সো তেন লাভসক্কাৰসিলোকেন ন অত্তমনো হোতি ন পৰিপুণ্ণসঙ্কপ্পো. সো তেন লাভসক্কাৰসিলোকেন ন অত্তানুক্কংসেতি, ন পৰং ৱম্ভেতি. লাভসক্কাৰসিলোকেন চ যে অঞ্ঞে ধম্মা উত্তৰিতৰা চ পণীততৰা চ তেসং ধম্মানং সচ্ছিকিৰিযায ছন্দং জনেতি, ৱাযমতি, অনোলীনৱুত্তিকো চ হোতি অসাথলিকো. সো সীলসম্পদং আৰাধেতি. সো তায সীলসম্পদায অত্তমনো হোতি, নো চ খো পৰিপুণ্ণসঙ্কপ্পো. সো তায সীলসম্পদায ন অত্তানুক্কংসেতি, ন পৰং ৱম্ভেতি. সীলসম্পদায চ যে অঞ্ঞে ধম্মা উত্তৰিতৰা চ পণীততৰা চ তেসং ধম্মানং সচ্ছিকিৰিযায ছন্দং জনেতি, ৱাযমতি, অনোলীনৱুত্তিকো চ হোতি অসাথলিকো. সো সমাধিসম্পদং আৰাধেতি. সো তায সমাধিসম্পদায অত্তমনো হোতি, নো চ খো পৰিপুণ্ণসঙ্কপ্পো. সো তায সমাধিসম্পদায ন অত্তানুক্কংসেতি, ন পৰং ৱম্ভেতি. সমাধিসম্পদায চ যে অঞ্ঞে ধম্মা উত্তৰিতৰা চ পণীততৰা চ তেসং ধম্মানং সচ্ছিকিৰিযায ছন্দং জনেতি, ৱাযমতি, অনোলীনৱুত্তিকো চ হোতি অসাথলিকো. সো ঞাণদস্সনং আৰাধেতি. সো তেন ঞাণদস্সনেন অত্তমনো হোতি, পৰিপুণ্ণসঙ্কপ্পো. সো তেন ঞাণদস্সনেন অত্তানুক্কংসেতি, পৰং ৱম্ভেতি – ‘অহমস্মি জানং পস্সং ৱিহৰামি, ইমে পনঞ্ঞে ভিক্খূ অজানং অপস্সং ৱিহৰন্তী’তি. ঞাণদস্সনেন চ যে অঞ্ঞে ধম্মা উত্তৰিতৰা চ পণীততৰা চ তেসং ধম্মানং সচ্ছিকিৰিযায ন ছন্দং জনেতি, ন ৱাযমতি, ওলীনৱুত্তিকো চ হোতি সাথলিকো. সেয্যথাপি সো, ব্ৰাহ্মণ, পুৰিসো সাৰত্থিকো সাৰগৱেসী সাৰপৰিযেসনং চৰমানো মহতো ৰুক্খস্স তিট্ঠতো সাৰৱতো অতিক্কম্মেৱ সাৰং, ফেগ্গুং ছেত্ৱা আদায পক্কন্তো ‘সাৰ’ন্তি মঞ্ঞমানো. যঞ্চস্স সাৰেন সাৰকৰণীযং তঞ্চস্স অত্থং নানুভৱিস্সতি. তথূপমাহং, ব্ৰাহ্মণ, ইমং পুগ্গলং ৱদামি.

৩২২. ‘‘ইধ পন, ব্ৰাহ্মণ, একচ্চো পুগ্গলো সদ্ধা অগাৰস্মা অনগাৰিযং পব্বজিতো হোতি – ‘ওতিণ্ণোম্হি জাতিযা জৰায মৰণেন সোকেহি পৰিদেৱেহি দুক্খেহি দোমনস্সেহি উপাযাসেহি, দুক্খোতিণ্ণো দুক্খপৰেতো, অপ্পেৱ নাম ইমস্স কেৱলস্স দুক্খক্খন্ধস্স অন্তকিৰিযা পঞ্ঞাযেথা’তি. সো এৱং পব্বজিতো সমানো লাভসক্কাৰসিলোকং অভিনিব্বত্তেতি. সো তেন লাভসক্কাৰসিলোকেন ন অত্তমনো হোতি, ন পৰিপুণ্ণসঙ্কপ্পো. সো তেন লাভসক্কাৰসিলোকেন ন অত্তানুক্কংসেতি, ন পৰং ৱম্ভেতি. লাভসক্কাৰসিলোকেন চ যে অঞ্ঞে ধম্মা উত্তৰিতৰা চ পণীততৰা চ তেসং ধম্মানং সচ্ছিকিৰিযায ছন্দং জনেতি, ৱাযমতি, অনোলীনৱুত্তিকো চ হোতি অসাথলিকো. সো সীলসম্পদং আৰাধেতি. সো তায সীলসম্পদায অত্তমনো হোতি, নো চ খো পৰিপুণ্ণসঙ্কপ্পো. সো তায সীলসম্পদায ন অত্তানুক্কংসেতি, ন পৰং ৱম্ভেতি. সীলসম্পদায চ যে অঞ্ঞে ধম্মা উত্তৰিতৰা চ পণীততৰা চ তেসং ধম্মানং সচ্ছিকিৰিযায ছন্দং জনেতি, ৱাযমতি, অনোলীনৱুত্তিকো চ হোতি অসাথলিকো. সো সমাধিসম্পদং আৰাধেতি. সো তায সমাধিসম্পদায অত্তমনো হোতি, নো চ খো পৰিপুণ্ণসঙ্কপ্পো. সো তায সমাধিসম্পদায ন অত্তানুক্কংসেতি, ন পৰং ৱম্ভেতি. সমাধিসম্পদায চ যে অঞ্ঞে ধম্মা উত্তৰিতৰা চ পণীততৰা চ তেসং ধম্মানং সচ্ছিকিৰিযায ছন্দং জনেতি, ৱাযমতি, অনোলীনৱুত্তিকো চ হোতি অসাথলিকো. সো ঞাণদস্সনং আৰাধেতি. সো তেন ঞাণদস্সনেন অত্তমনো হোতি, নো চ খো পৰিপুণ্ণসঙ্কপ্পো. সো তেন ঞাণদস্সনেন ন অত্তানুক্কংসেতি, ন পৰং ৱম্ভেতি. ঞাণদস্সনেন চ যে অঞ্ঞে ধম্মা উত্তৰিতৰা চ পণীততৰা চ তেসং ধম্মানং সচ্ছিকিৰিযায ছন্দং জনেতি, ৱাযমতি, অনোলীনৱুত্তিকো চ হোতি অসাথলিকো.

৩২৩. ‘‘কতমে চ, ব্ৰাহ্মণ, ধম্মা ঞাণদস্সনেন উত্তৰিতৰা চ পণীততৰা চ? ইধ, ব্ৰাহ্মণ, ভিক্খু ৱিৱিচ্চেৱ কামেহি ৱিৱিচ্চ অকুসলেহি ধম্মেহি সৱিতক্কং সৱিচাৰং ৱিৱেকজং পীতিসুখং পঠমং ঝানং উপসম্পজ্জ ৱিহৰতি. অযম্পি খো, ব্ৰাহ্মণ, ধম্মো ঞাণদস্সনেন উত্তৰিতৰো চ পণীততৰো চ.

‘‘পুন চপৰং, ব্ৰাহ্মণ, ভিক্খু ৱিতক্কৱিচাৰানং ৱূপসমা অজ্ঝত্তং সম্পসাদনং চেতসো একোদিভাৱং অৱিতক্কং অৱিচাৰং সমাধিজং পীতিসুখং দুতিযং ঝানং উপসম্পজ্জ ৱিহৰতি. অযম্পি খো, ব্ৰাহ্মণ, ধম্মো ঞাণদস্সনেন উত্তৰিতৰো চ পণীততৰো চ.

‘‘পুন চপৰং, ব্ৰাহ্মণ, ভিক্খু পীতিযা চ ৱিৰাগা উপেক্খকো চ ৱিহৰতি, সতো চ সম্পজানো সুখঞ্চ কাযেন পটিসংৱেদেতি, যং তং অৰিযা আচিক্খন্তি – ‘উপেক্খকো সতিমা সুখৱিহাৰী’তি ততিযং ঝানং উপসম্পজ্জ ৱিহৰতি. অযম্পি খো, ব্ৰাহ্মণ, ধম্মো ঞাণদস্সনেন উত্তৰিতৰো চ পণীততৰো চ.

‘‘পুন চপৰং, ব্ৰাহ্মণ, ভিক্খু সুখস্স চ পহানা দুক্খস্স চ পহানা পুব্বেৱ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপাৰিসুদ্ধিং চতুত্থং ঝানং উপসম্পজ্জ ৱিহৰতি. অযম্পি খো, ব্ৰাহ্মণ, ধম্মো ঞাণদস্সনেন উত্তৰিতৰো চ পণীততৰো চ.

‘‘পুন চপৰং, ব্ৰাহ্মণ, ভিক্খু সব্বসো ৰূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকাৰা ‘অনন্তো আকাসো’তি আকাসানঞ্চাযতনং উপসম্পজ্জ ৱিহৰতি. অযম্পি খো, ব্ৰাহ্মণ, ধম্মো ঞাণদস্সনেন উত্তৰিতৰো চ পণীততৰো চ.

‘‘পুন চপৰং, ব্ৰাহ্মণ, ভিক্খু সব্বসো আকাসানঞ্চাযতনং সমতিক্কম্ম ‘অনন্তং ৱিঞ্ঞাণ’ন্তি ৱিঞ্ঞাণঞ্চাযতনং উপসম্পজ্জ ৱিহৰতি. অযম্পি খো, ব্ৰাহ্মণ, ধম্মো ঞাণদস্সনেন উত্তৰিতৰো চ পণীততৰো চ.

‘‘পুন চপৰং, ব্ৰাহ্মণ, ভিক্খু সব্বসো ৱিঞ্ঞাণঞ্চাযতনং সমতিক্কম্ম ‘নত্থি কিঞ্চী’তি আকিঞ্চঞ্ঞাযতনং উপসম্পজ্জ ৱিহৰতি. অযম্পি খো, ব্ৰাহ্মণ, ধম্মো ঞাণদস্সনেন উত্তৰিতৰো চ পণীততৰো চ.

‘‘পুন চপৰং, ব্ৰাহ্মণ, ভিক্খু সব্বসো আকিঞ্চঞ্ঞাযতনং সমতিক্কম্ম নেৱসঞ্ঞানাসঞ্ঞাযতনং উপসম্পজ্জ ৱিহৰতি. অযম্পি খো, ব্ৰাহ্মণ, ধম্মো ঞাণদস্সনেন উত্তৰিতৰো চ পণীততৰো চ.

‘‘পুন চপৰং, ব্ৰাহ্মণ, ভিক্খু সব্বসো নেৱসঞ্ঞানাসঞ্ঞাযতনং সমতিক্কম্ম সঞ্ঞাৱেদযিতনিৰোধং উপসম্পজ্জ ৱিহৰতি, পঞ্ঞায চস্স দিস্ৱা আসৱা পৰিক্খীণা হোন্তি. অযম্পি খো, ব্ৰাহ্মণ, ধম্মো ঞাণদস্সনেন উত্তৰিতৰো চ পণীততৰো চ. ইমে খো, ব্ৰাহ্মণ, ধম্মা ঞাণদস্সনেন উত্তৰিতৰা চ পণীততৰা চ.

৩২৪. ‘‘সেয্যথাপি সো, ব্ৰাহ্মণ, পুৰিসো সাৰত্থিকো সাৰগৱেসী সাৰপৰিযেসনং চৰমানো মহতো ৰুক্খস্স তিট্ঠতো সাৰৱতো সাৰংযেৱ ছেত্ৱা আদায পক্কন্তো ‘সাৰ’ন্তি জানমানো. যঞ্চস্স সাৰেন সাৰকৰণীযং তঞ্চস্স অত্থং অনুভৱিস্সতি. তথূপমাহং, ব্ৰাহ্মণ, ইমং পুগ্গলং ৱদামি.

‘‘ইতি খো, ব্ৰাহ্মণ, নযিদং ব্ৰহ্মচৰিযং লাভসক্কাৰসিলোকানিসংসং, ন সীলসম্পদানিসংসং, ন সমাধিসম্পদানিসংসং, ন ঞাণদস্সনানিসংসং. যা চ খো অযং, ব্ৰাহ্মণ, অকুপ্পা চেতোৱিমুত্তি – এতদত্থমিদং, ব্ৰাহ্মণ, ব্ৰহ্মচৰিযং, এতং সাৰং এতং পৰিযোসান’’ন্তি.

এৱং ৱুত্তে, পিঙ্গলকোচ্ছো ব্ৰাহ্মণো ভগৱন্তং এতদৱোচ – ‘‘অভিক্কন্তং, ভো গোতম, অভিক্কন্তং, ভো গোতম…পে… উপাসকং মং ভৱং গোতমো ধাৰেতু অজ্জতগ্গে পাণুপেতং সৰণং গত’’ন্তি.

চূড়সাৰোপমসুত্তং নিট্ঠিতং দসমং.

ওপম্মৱগ্গো নিট্ঠিতো ততিযো.