৫. নিৱাপসুত্তং

২৬১. এৱং মে সুতং – একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তত্ৰ খো ভগৱা ভিক্খূ আমন্তেসি – ‘‘ভিক্খৱো’’তি. ‘‘ভদন্তে’’তি তে ভিক্খূ ভগৱতো পচ্চস্সোসুং. ভগৱা এতদৱোচ –

‘‘ন, ভিক্খৱে, নেৱাপিকো নিৱাপং নিৱপতি মিগজাতানং – ‘ইমং মে নিৱাপং নিৱুত্তং মিগজাতা পৰিভুঞ্জন্তা দীঘাযুকা ৱণ্ণৱন্তো চিৰং দীঘমদ্ধানং যাপেন্তূ’তি. এৱঞ্চ খো, ভিক্খৱে, নেৱাপিকো নিৱাপং নিৱপতি মিগজাতানং – ‘ইমং মে নিৱাপং নিৱুত্তং মিগজাতা অনুপখজ্জ মুচ্ছিতা ভোজনানি ভুঞ্জিস্সন্তি, অনুপখজ্জ মুচ্ছিতা ভোজনানি ভুঞ্জমানা মদং আপজ্জিস্সন্তি, মত্তা সমানা পমাদং আপজ্জিস্সন্তি, পমত্তা সমানা যথাকামকৰণীযা ভৱিস্সন্তি ইমস্মিং নিৱাপে’তি.

২৬২. ‘‘তত্ৰ, ভিক্খৱে, পঠমা মিগজাতা অমুং নিৱাপং নিৱুত্তং নেৱাপিকস্স অনুপখজ্জ মুচ্ছিতা ভোজনানি ভুঞ্জিংসু, তে তত্থ অনুপখজ্জ মুচ্ছিতা ভোজনানি ভুঞ্জমানা মদং আপজ্জিংসু, মত্তা সমানা পমাদং আপজ্জিংসু, পমত্তা সমানা যথাকামকৰণীযা অহেসুং নেৱাপিকস্স অমুস্মিং নিৱাপে. এৱঞ্হি তে, ভিক্খৱে, পঠমা মিগজাতা ন পৰিমুচ্চিংসু নেৱাপিকস্স ইদ্ধানুভাৱা.

২৬৩. ‘‘তত্ৰ, ভিক্খৱে, দুতিযা মিগজাতা এৱং সমচিন্তেসুং – ‘যে খো তে পঠমা মিগজাতা অমুং নিৱাপং নিৱুত্তং নেৱাপিকস্স অনুপখজ্জ মুচ্ছিতা ভোজনানি ভুঞ্জিংসু. তে তত্থ অনুপখজ্জ মুচ্ছিতা ভোজনানি ভুঞ্জমানা মদং আপজ্জিংসু, মত্তা সমানা পমাদং আপজ্জিংসু, পমত্তা সমানা যথাকামকৰণীযা অহেসুং নেৱাপিকস্স অমুস্মিং নিৱাপে. এৱঞ্হি তে পঠমা মিগজাতা ন পৰিমুচ্চিংসু নেৱাপিকস্স ইদ্ধানুভাৱা. যংনূন মযং সব্বসো নিৱাপভোজনা পটিৱিৰমেয্যাম, ভযভোগা পটিৱিৰতা অৰঞ্ঞাযতনানি অজ্ঝোগাহেত্ৱা ৱিহৰেয্যামা’তি. তে সব্বসো নিৱাপভোজনা পটিৱিৰমিংসু, ভযভোগা পটিৱিৰতা অৰঞ্ঞাযতনানি অজ্ঝোগাহেত্ৱা ৱিহৰিংসু. তেসং গিম্হানং পচ্ছিমে মাসে, তিণোদকসঙ্খযে, অধিমত্তকসিমানং পত্তো কাযো হোতি. তেসং অধিমত্তকসিমানং পত্তকাযানং বলৱীৰিযং পৰিহাযি. বলৱীৰিযে পৰিহীনে তমেৱ নিৱাপং নিৱুত্তং নেৱাপিকস্স পচ্চাগমিংসু. তে তত্থ অনুপখজ্জ মুচ্ছিতা ভোজনানি ভুঞ্জিংসু. তে তত্থ অনুপখজ্জ মুচ্ছিতা ভোজনানি ভুঞ্জমানা মদং আপজ্জিংসু, মত্তা সমানা পমাদং আপজ্জিংসু, পমত্তা সমানা যথাকামকৰণীযা অহেসুং নেৱাপিকস্স অমুস্মিং নিৱাপে. এৱঞ্হি তে, ভিক্খৱে, দুতিযাপি মিগজাতা ন পৰিমুচ্চিংসু নেৱাপিকস্স ইদ্ধানুভাৱা.

২৬৪. ‘‘তত্ৰ, ভিক্খৱে, ততিযা মিগজাতা এৱং সমচিন্তেসুং – ‘যে খো তে পঠমা মিগজাতা অমুং নিৱাপং নিৱুত্তং নেৱাপিকস্স…পে… এৱঞ্হি তে পঠমা মিগজাতা ন পৰিমুচ্চিংসু নেৱাপিকস্স ইদ্ধানুভাৱা. যেপি তে দুতিযা মিগজাতা এৱং সমচিন্তেসুং – যে খো তে পঠমা মিগজাতা অমুং নিৱাপং নিৱুত্তং নেৱাপিকস্স…পে… এৱঞ্হি তে পঠমা মিগজাতা ন পৰিমুচ্চিংসু নেৱাপিকস্স ইদ্ধানুভাৱা. যংনূন মযং সব্বসো নিৱাপভোজনা পটিৱিৰমেয্যাম, ভযভোগা পটিৱিৰতা অৰঞ্ঞাযতনানি অজ্ঝোগাহেত্ৱা ৱিহৰেয্যামাতি. তে সব্বসো নিৱাপভোজনা পটিৱিৰমিংসু, ভযভোগা পটিৱিৰতা অৰঞ্ঞাযতনানি অজ্ঝোগাহেত্ৱা ৱিহৰিংসু. তেসং গিম্হানং পচ্ছিমে মাসে তিণোদকসঙ্খযে অধিমত্তকসিমানং পত্তো কাযো হোতি. তেসং অধিমত্তকসিমানং পত্তকাযানং বলৱীৰিযং পৰিহাযি. বলৱীৰিযে পৰিহীনে তমেৱ নিৱাপং নিৱুত্তং নেৱাপিকস্স পচ্চাগমিংসু. তে তত্থ অনুপখজ্জ মুচ্ছিতা ভোজনানি ভুঞ্জিংসু. তে তত্থ অনুপখজ্জ মুচ্ছিতা ভোজনানি ভুঞ্জমানা মদং আপজ্জিংসু, মত্তা সমানা পমাদং আপজ্জিংসু, পমত্তা সমানা যথাকামকৰণীযা অহেসুং নেৱাপিকস্স অমুস্মিং নিৱাপে. এৱঞ্হি তে দুতিযাপি মিগজাতা ন পৰিমুচ্চিংসু নেৱাপিকস্স ইদ্ধানুভাৱা. যংনূন মযং অমুং নিৱাপং নিৱুত্তং নেৱাপিকস্স উপনিস্সায আসযং কপ্পেয্যাম. তত্ৰাসযং কপ্পেত্ৱা অমুং নিৱাপং নিৱুত্তং নেৱাপিকস্স অননুপখজ্জ অমুচ্ছিতা ভোজনানি ভুঞ্জিস্সাম, অননুপখজ্জ অমুচ্ছিতা ভোজনানি ভুঞ্জমানা ন মদং আপজ্জিস্সাম, অমত্তা সমানা ন পমাদং আপজ্জিস্সাম, অপ্পমত্তা সমানা ন যথাকামকৰণীযা ভৱিস্সাম নেৱাপিকস্স অমুস্মিং নিৱাপে’তি. তে অমুং নিৱাপং নিৱুত্তং নেৱাপিকস্স উপনিস্সায আসযং কপ্পযিংসু. তত্ৰাসযং কপ্পেত্ৱা অমুং নিৱাপং নিৱুত্তং নেৱাপিকস্স অননুপখজ্জ অমুচ্ছিতা ভোজনানি ভুঞ্জিংসু, তে তত্থ অননুপখজ্জ অমুচ্ছিতা ভোজনানি ভুঞ্জমানা ন মদং আপজ্জিংসু, অমত্তা সমানা ন পমাদং আপজ্জিংসু, অপ্পমত্তা সমানা ন যথাকামকৰণীযা অহেসুং নেৱাপিকস্স অমুস্মিং নিৱাপে.

‘‘তত্ৰ, ভিক্খৱে, নেৱাপিকস্স চ নেৱাপিকপৰিসায চ এতদহোসি – ‘সঠাস্সুনামিমে ততিযা মিগজাতা কেতবিনো, ইদ্ধিমন্তাস্সুনামিমে ততিযা মিগজাতা পৰজনা; ইমঞ্চ নাম নিৱাপং নিৱুত্তং পৰিভুঞ্জন্তি, ন চ নেসং জানাম আগতিং ৱা গতিং ৱা. যংনূন মযং ইমং নিৱাপং নিৱুত্তং মহতীহি দণ্ডৱাকৰাহি [দণ্ডৱাগুৰাহি (স্যা.)] সমন্তা সপ্পদেসং অনুপৰিৱাৰেয্যাম – অপ্পেৱ নাম ততিযানং মিগজাতানং আসযং পস্সেয্যাম, যত্থ তে গাহং গচ্ছেয্যু’ন্তি. তে অমুং নিৱাপং নিৱুত্তং মহতীহি দণ্ডৱাকৰাহি সমন্তা সপ্পদেসং অনুপৰিৱাৰেসুং. অদ্দসংসু খো, ভিক্খৱে, নেৱাপিকো চ নেৱাপিকপৰিসা চ ততিযানং মিগজাতানং আসযং, যত্থ তে গাহং অগমংসু. এৱঞ্হি তে, ভিক্খৱে, ততিযাপি মিগজাতা ন পৰিমুচ্চিংসু নেৱাপিকস্স ইদ্ধানুভাৱা.

২৬৫. ‘‘তত্ৰ, ভিক্খৱে, চতুত্থা মিগজাতা এৱং সমচিন্তেসুং – ‘যে খো তে পঠমা মিগজাতা…পে… এৱঞ্হি তে পঠমা মিগজাতা ন পৰিমুচ্চিংসু নেৱাপিকস্স ইদ্ধানুভাৱা. যেপি তে দুতিযা মিগজাতা এৱং সমচিন্তেসুং ‘যে খো তে পঠমা মিগজাতা…পে… এৱঞ্হি তে পঠমা মিগজাতা ন পৰিমুচ্চিংসু নেৱাপিকস্স ইদ্ধানুভাৱা. যংনূন মযং সব্বসো নিৱাপভোজনা পটিৱিৰমেয্যাম, ভযভোগা পটিৱিৰতা অৰঞ্ঞাযতনানি অজ্ঝোগাহেত্ৱা ৱিহৰেয্যামা’তি. তে সব্বসো নিৱাপভোজনা পটিৱিৰমিংসু…পে… এৱঞ্হি তে দুতিযাপি মিগজাতা ন পৰিমুচ্চিংসু নেৱাপিকস্স ইদ্ধানুভাৱা. যেপি তে ততিযা মিগজাতা এৱং সমচিন্তেসুং ‘যে খো তে পঠমা মিগজাতা…পে… এৱঞ্হি তে পঠমা মিগজাতা ন পৰিমুচ্চিংসু নেৱাপিকস্স ইদ্ধানুভাৱা. যেপি তে দুতিযা মিগজাতা এৱং সমচিন্তেসুং ‘যে খো তে পঠমা মিগজাতা…পে… এৱঞ্হি তে পঠমা মিগজাতা ন পৰিমুচ্চিংসু নেৱাপিকস্স ইদ্ধানুভাৱা. যংনূন মযং সব্বসো নিৱাপভোজনা পটিৱিৰমেয্যাম, ভযভোগা পটিৱিৰতা অৰঞ্ঞাযতনানি অজ্ঝোগাহেত্ৱা ৱিহৰেয্যামা’তি. তে সব্বসো নিৱাপভোজনা পটিৱিৰমিংসু…পে… এৱঞ্হি তে দুতিযাপি মিগজাতা ন পৰিমুচ্চিংসু নেৱাপিকস্স ইদ্ধানুভাৱা. যংনূন মযং অমুং নিৱাপং নিৱুত্তং নেৱাপিকস্স উপনিস্সায আসযং কপ্পেয্যাম, তত্ৰাসযং কপ্পেত্ৱা অমুং নিৱাপং নিৱুত্তং নেৱাপিকস্স অননুপখজ্জ অমুচ্ছিতা ভোজনানি ভুঞ্জিস্সাম, অননুপখজ্জ অমুচ্ছিতা ভোজনানি ভুঞ্জমানা ন মদং আপজ্জিস্সাম, অমত্তা সমানা ন পমাদং আপজ্জিস্সাম, অপ্পমত্তা সমানা ন যথাকামকৰণীযা ভৱিস্সাম নেৱাপিকস্স অমুস্মিং নিৱাপে’তি. তে অমুং নিৱাপং নিৱুত্তং নেৱাপিকস্স উপনিস্সায আসযং কপ্পযিংসু, তত্ৰাসযং কপ্পেত্ৱা অমুং নিৱাপং নিৱুত্তং নেৱাপিকস্স অননুপখজ্জ অমুচ্ছিতা ভোজনানি ভুঞ্জিংসু, তে তত্থ অননুপখজ্জ অমুচ্ছিতা ভোজনানি ভুঞ্জমানা ন মদং আপজ্জিংসু, অমত্তা সমানা ন পমাদং আপজ্জিংসু, অপ্পমত্তা সমানা ন যথাকামকৰণীযা অহেসুং নেৱাপিকস্স অমুস্মিং নিৱাপে.

‘‘তত্ৰ নেৱাপিকস্স চ নেৱাপিকপৰিসায চ এতদহোসি – ‘সঠাস্সুনামিমে ততিযা মিগজাতা কেতবিনো, ইদ্ধিমন্তাস্সুনামিমে ততিযা মিগজাতা পৰজনা, ইমঞ্চ নাম নিৱাপং নিৱুত্তং পৰিভুঞ্জন্তি. ন চ নেসং জানাম আগতিং ৱা গতিং ৱা. যংনূন মযং ইমং নিৱাপং নিৱুত্তং মহতীতি দণ্ডৱাকৰাহি সমন্তা সপ্পদেসং অনুপৰিৱাৰেয্যাম, অপ্পেৱ নাম ততিযানং মিগজাতানং আসযং পস্সেয্যাম, যত্থ তে গাহং গচ্ছেয্যু’ন্তি. তে অমুং নিৱাপং নিৱুত্তং মহতীতি দণ্ডৱাকৰাহি সমন্তা সপ্পদেসং অনুপৰিৱাৰেসুং. অদ্দসংসু খো নেৱাপিকো চ নেৱাপিকপৰিসা চ ততিযানং মিগজাতানং আসযং, যত্থ তে গাহং অগমংসু. এৱঞ্হি তে ততিযাপি মিগজাতা ন পৰিমুচ্চিংসু নেৱাপিকস্স ইদ্ধানুভাৱা. যংনূন মযং যত্থ অগতি নেৱাপিকস্স চ নেৱাপিকপৰিসায চ তত্ৰাসযং কপ্পেয্যাম, তত্ৰাসযং কপ্পেত্ৱা অমুং নিৱাপং নিৱুত্তং নেৱাপিকস্স অননুপখজ্জ অমুচ্ছিতা ভোজনানি ভুঞ্জিস্সাম, অননুপখজ্জ অমুচ্ছিতা ভোজনানি ভুঞ্জমানা ন মদং আপজ্জিস্সাম, অমত্তা সমানা ন পমাদং আপজ্জিস্সাম, অপ্পমত্তা সমানা ন যথাকামকৰণীযা ভৱিস্সাম নেৱাপিকস্স অমুস্মিং নিৱাপে’তি. তে যত্থ অগতি নেৱাপিকস্স চ নেৱাপিকপৰিসায চ তত্ৰাসযং কপ্পযিংসু. তত্ৰাসযং কপ্পেত্ৱা অমুং নিৱাপং নিৱুত্তং নেৱাপিকস্স অননুপখজ্জ অমুচ্ছিতা ভোজনানি ভুঞ্জিংসু, তে তত্থ অননুপখজ্জ অমুচ্ছিতা ভোজনানি ভুঞ্জমানা ন মদং আপজ্জিংসু, অমত্তা সমানা ন পমাদং আপজ্জিংসু, অপ্পমত্তা সমানা ন যথাকামকৰণীযা অহেসুং নেৱাপিকস্স অমুস্মিং নিৱাপে.

‘‘তত্ৰ, ভিক্খৱে, নেৱাপিকস্স চ নেৱাপিকপৰিসায চ এতদহোসি – ‘সঠাস্সুনামিমে চতুত্থা মিগজাতা কেতবিনো, ইদ্ধিমন্তাস্সুনামিমে চতুত্থা মিগজাতা পৰজনা. ইমঞ্চ নাম নিৱাপং নিৱুত্তং পৰিভুঞ্জন্তি, ন চ নেসং জানাম আগতিং ৱা গতিং ৱা. যংনূন মযং ইমং নিৱাপং নিৱুত্তং মহতীহি দণ্ডৱাকৰাহি সমন্তা সপ্পদেসং অনুপৰিৱাৰেয্যাম, অপ্পেৱ নাম চতুত্থানং মিগজাতানং আসযং পস্সেয্যাম যত্থ তে গাহং গচ্ছেয্যু’ন্তি. তে অমুং নিৱাপং নিৱুত্তং মহতীহি দণ্ডৱাকৰাহি সমন্তা সপ্পদেসং অনুপৰিৱাৰেসুং. নেৱ খো, ভিক্খৱে, অদ্দসংসু নেৱাপিকো চ নেৱাপিকপৰিসা চ চতুত্থানং মিগজাতানং আসযং, যত্থ তে গাহং গচ্ছেয্যুং. তত্ৰ, ভিক্খৱে, নেৱাপিকস্স চ নেৱাপিকপৰিসায চ এতদহোসি – ‘সচে খো মযং চতুত্থে মিগজাতে ঘট্টেস্সাম, তে ঘট্টিতা অঞ্ঞে ঘট্টিস্সন্তি তে ঘট্টিতা অঞ্ঞে ঘট্টিস্সন্তি. এৱং ইমং নিৱাপং নিৱুত্তং সব্বসো মিগজাতা পৰিমুঞ্চিস্সন্তি. যংনূন মযং চতুত্থে মিগজাতে অজ্ঝুপেক্খেয্যামা’তি. অজ্ঝুপেক্খিংসু খো, ভিক্খৱে, নেৱাপিকো চ নেৱাপিকপৰিসা চ চতুত্থে মিগজাতে. এৱঞ্হি তে, ভিক্খৱে, চতুত্থা মিগজাতা পৰিমুচ্চিংসু নেৱাপিকস্স ইদ্ধানুভাৱা.

২৬৬. ‘‘উপমা খো মে অযং, ভিক্খৱে, কতা অত্থস্স ৱিঞ্ঞাপনায. অযং চেৱেত্থ অত্থো – নিৱাপোতি খো, ভিক্খৱে, পঞ্চন্নেতং কামগুণানং অধিৱচনং. নেৱাপিকোতি খো, ভিক্খৱে, মাৰস্সেতং পাপিমতো অধিৱচনং. নেৱাপিকপৰিসাতি খো, ভিক্খৱে, মাৰপৰিসাযেতং অধিৱচনং. মিগজাতাতি খো, ভিক্খৱে, সমণব্ৰাহ্মণানমেতং অধিৱচনং.

২৬৭. ‘‘তত্ৰ, ভিক্খৱে, পঠমা সমণব্ৰাহ্মণা অমুং নিৱাপং নিৱুত্তং মাৰস্স অমূনি চ লোকামিসানি অনুপখজ্জ মুচ্ছিতা ভোজনানি ভুঞ্জিংসু. তে তত্থ অনুপখজ্জ মুচ্ছিতা ভোজনানি ভুঞ্জমানা মদং আপজ্জিংসু, মত্তা সমানা পমাদং আপজ্জিংসু, পমত্তা সমানা যথাকামকৰণীযা অহেসুং মাৰস্স অমুস্মিং নিৱাপে অমুস্মিঞ্চ লোকামিসে. এৱঞ্হি তে, ভিক্খৱে, পঠমা সমণব্ৰাহ্মণা ন পৰিমুচ্চিংসু মাৰস্স ইদ্ধানুভাৱা. সেয্যথাপি তে, ভিক্খৱে, পঠমা মিগজাতা তথূপমে অহং ইমে পঠমে সমণব্ৰাহ্মণে ৱদামি.

২৬৮. ‘‘তত্ৰ, ভিক্খৱে, দুতিযা সমণব্ৰাহ্মণা এৱং সমচিন্তেসুং – ‘যে খো তে পঠমা সমণব্ৰাহ্মণা অমুং নিৱাপং নিৱুত্তং মাৰস্স অমূনি চ লোকামিসানি অনুপখজ্জ মুচ্ছিতা ভোজনানি ভুঞ্জিংসু. তে তত্থ অনুপখজ্জ মুচ্ছিতা ভোজনানি ভুঞ্জমানা মদং আপজ্জিংসু, মত্তা সমানা পমাদং আপজ্জিংসু, পমত্তা সমানা যথাকামকৰণীযা অহেসুং মাৰস্স অমুস্মিং নিৱাপে অমুস্মিঞ্চ লোকামিসে. এৱঞ্হি তে পঠমা সমণব্ৰাহ্মণা ন পৰিমুচ্চিংসু মাৰস্স ইদ্ধানুভাৱা. যংনূন মযং সব্বসো নিৱাপভোজনা লোকামিসা পটিৱিৰমেয্যাম, ভযভোগা পটিৱিৰতা অৰঞ্ঞাযতনানি অজ্ঝোগাহেত্ৱা ৱিহৰেয্যামা’তি. তে সব্বসো নিৱাপভোজনা লোকামিসা পটিৱিৰমিংসু, ভযভোগা পটিৱিৰতা অৰঞ্ঞাযতনানি অজ্ঝোগাহেত্ৱা ৱিহৰেয্যামাতি. তে সব্বসো নিৱাপভোজনা লোকামিসা পটিৱিৰমিংসু, ভযভোগা পটিৱিৰতা অৰঞ্ঞাযতনানি অজ্ঝোগাহেত্ৱা ৱিহৰিংসু. তে তত্থ সাকভক্খাপি অহেসুং, সামাকভক্খাপি অহেসুং, নীৱাৰভক্খাপি অহেসুং, দদ্দুলভক্খাপি অহেসুং, হটভক্খাপি অহেসুং, কণভক্খাপি অহেসুং, আচামভক্খাপি অহেসুং, পিঞ্ঞাকভক্খাপি অহেসুং, তিণভক্খাপি অহেসুং, গোমযভক্খাপি অহেসুং, ৱনমূলফলাহাৰা যাপেসুং পৱত্তফলভোজী.

‘‘তেসং গিম্হানং পচ্ছিমে মাসে, তিণোদকসঙ্খযে, অধিমত্তকসিমানং পত্তো কাযো হোতি. তেসং অধিমত্তকসিমানং পত্তকাযানং বলৱীৰিযং পৰিহাযি. বলৱীৰিযে পৰিহীনে চেতোৱিমুত্তি পৰিহাযি. চেতোৱিমুত্তিযা পৰিহীনায তমেৱ নিৱাপং নিৱুত্তং মাৰস্স পচ্চাগমিংসু তানি চ লোকামিসানি. তে তত্থ অনুপখজ্জ মুচ্ছিতা ভোজনানি ভুঞ্জিংসু. তে তত্থ অনুপখজ্জ মুচ্ছিতা ভোজনানি ভুঞ্জমানা মদং আপজ্জিংসু, মত্তা সমানা পমাদং আপজ্জিংসু, পমত্তা সমানা যথাকামকৰণীযা অহেসুং মাৰস্স অমুস্মিং নিৱাপে অমুস্মিঞ্চ লোকামিসে. এৱঞ্হি তে, ভিক্খৱে, দুতিযাপি সমণব্ৰাহ্মণা ন পৰিমুচ্চিংসু মাৰস্স ইদ্ধানুভাৱা. সেয্যথাপি তে, ভিক্খৱে, দুতিযা মিগজাতা তথূপমে অহং ইমে দুতিযে সমণব্ৰাহ্মণে ৱদামি.

২৬৯. ‘‘তত্ৰ, ভিক্খৱে, ততিযা সমণব্ৰাহ্মণা এৱং সমচিন্তেসুং – ‘যে খো তে পঠমা সমণব্ৰাহ্মণা অমুং নিৱাপং নিৱুত্তং মাৰস্স অমূনি চ লোকামিসানি…পে…. এৱঞ্হি তে পঠমা সমণব্ৰাহ্মণা ন পৰিমুচ্চিংসু মাৰস্স ইদ্ধানুভাৱা. যেপি তে দুতিযা সমণব্ৰাহ্মণা এৱং সমচিন্তেসুং – ‘যে খো তে পঠমা সমণব্ৰাহ্মণা অমুং নিৱাপং নিৱুত্তং মাৰস্স অমূনি চ লোকামিসানি…পে…. এৱঞ্হি তে পঠমা সমণব্ৰাহ্মণা ন পৰিমুচ্চিংসু মাৰস্স ইদ্ধানুভাৱা. যংনূন মযং সব্বসো নিৱাপভোজনা লোকামিসা পটিৱিৰমেয্যাম, ভযভোগা পটিৱিৰতা অৰঞ্ঞাযতনানি অজ্ঝোগাহেত্ৱা ৱিহৰেয্যামা’তি. তে সব্বসো নিৱাপভোজনা লোকামিসা পটিৱিৰমিংসু. ভযভোগা পটিৱিৰতা অৰঞ্ঞাযতনানি অজ্ঝোগাহেত্ৱা ৱিহৰিংসু. তে তত্থ সাকভক্খাপি অহেসুং…পে… পৱত্তফলভোজী. তেসং গিম্হানং পচ্ছিমে মাসে তিণোদকসঙ্খযে অধিমত্তকসিমানং পত্তো কাযো হোতি. তেসং অধিমত্তকসিমানং পত্তকাযানং বলৱীৰিযং পৰিহাযি, বলৱীৰিযে পৰিহীনে চেতোৱিমুত্তি পৰিহাযি, চেতোৱিমুত্তিযা পৰিহীনায তমেৱ নিৱাপং নিৱুত্তং মাৰস্স পচ্চাগমিংসু তানি চ লোকামিসানি. তে তত্থ অনুপখজ্জ মুচ্ছিতা ভোজনানি ভুঞ্জিংসু. তে তত্থ অনুপখজ্জ মুচ্ছিতা ভোজনানি ভুঞ্জমানা মদং আপজ্জিংসু, মত্তা সমানা পমাদং আপজ্জিংসু, পমত্তা সমানা যথাকামকৰণীযা অহেসুং মাৰস্স অমুস্মিং নিৱাপে অমুস্মিঞ্চ লোকামিসে. এৱঞ্হি তে দুতিযাপি সমণব্ৰাহ্মণা ন পৰিমুচ্চিংসু মাৰস্স ইদ্ধানুভাৱা. যংনূন মযং অমুং নিৱাপং নিৱুত্তং মাৰস্স অমূনি চ লোকামিসানি উপনিস্সায আসযং কপ্পেয্যাম, তত্ৰাসযং কপ্পেত্ৱা অমুং নিৱাপং নিৱুত্তং মাৰস্স অমূনি চ লোকামিসানি অননুপখজ্জ অমুচ্ছিতা ভোজনানি ভুঞ্জিস্সাম, অননুপখজ্জ অমুচ্ছিতা ভোজনানি ভুঞ্জমানা ন মদং আপজ্জিস্সাম, অমত্তা সমানা ন পমাদং আপজ্জিস্সাম, অপ্পমত্তা সমানা ন যথাকামকৰণীযা ভৱিস্সাম মাৰস্স অমুস্মিং নিৱাপে অমুস্মিঞ্চ লোকামিসে’’তি.

‘‘তে অমুং নিৱাপং নিৱুত্তং মাৰস্স অমূনি চ লোকামিসানি উপনিস্সায আসযং কপ্পযিংসু. তত্ৰাসযং কপ্পেত্ৱা অমুং নিৱাপং নিৱুত্তং মাৰস্স অমূনি চ লোকামিসানি অননুপখজ্জ অমুচ্ছিতা ভোজনানি ভুঞ্জিংসু. তে তত্থ অননুপখজ্জ অমুচ্ছিতা ভোজনানি ভুঞ্জমানা ন মদং আপজ্জিংসু, অমত্তা সমানা ন পমাদং আপজ্জিংসু, অপ্পমত্তা সমানা ন যথাকামকৰণীযা অহেসুং মাৰস্স অমুস্মিং নিৱাপে অমুস্মিঞ্চ লোকামিসে. অপি চ খো এৱংদিট্ঠিকা অহেসুং – সস্সতো লোকো ইতিপি, অসস্সতো লোকো ইতিপি; অন্তৱা লোকো ইতিপি, অনন্তৱা লোকো ইতিপি; তং জীৱং তং সৰীৰং ইতিপি, অঞ্ঞং জীৱং অঞ্ঞং সৰীৰং ইতিপি; হোতি তথাগতো পৰং মৰণা ইতিপি, ন হোতি তথাগতো পৰং মৰণা ইতিপি, হোতি চ ন চ হোতি তথাগতো পৰং মৰণা ইতিপি, নেৱ হোতি ন ন হোতি তথাগতো পৰং মৰণা ইতিপি. এৱঞ্হি তে, ভিক্খৱে, ততিযাপি সমণব্ৰাহ্মণা ন পৰিমুচ্চিংসু মাৰস্স ইদ্ধানুভাৱা. সেয্যথাপি তে, ভিক্খৱে, ততিযা মিগজাতা তথূপমে অহং ইমে ততিযে সমণব্ৰাহ্মণে ৱদামি.

২৭০. ‘‘তত্ৰ, ভিক্খৱে, চতুত্থা সমণব্ৰাহ্মণা এৱং সমচিন্তেসুং – ‘যে খো তে পঠমা সমণব্ৰাহ্মণা অমুং নিৱাপং নিৱুত্তং মাৰস্স…পে…. এৱঞ্হি তে পঠমা সমণব্ৰাহ্মণা ন পৰিমুচ্চিংসু মাৰস্স ইদ্ধানুভাৱা. যেপি তে দুতিযা সমণব্ৰাহ্মণা এৱং সমচিন্তেসুং – ‘যে খো তে পঠমা সমণব্ৰাহ্মণা…পে…. এৱঞ্হি তে পঠমা সমণব্ৰাহ্মণা ন পৰিমুচ্চিংসু মাৰস্স ইদ্ধানুভাৱা. যংনূন মযং সব্বসো নিৱাপভোজনা লোকামিসা পটিৱিৰমেয্যাম ভযভোগা পটিৱিৰতা অৰঞ্ঞাযতনানি অজ্ঝোগাহেত্ৱা ৱিহৰেয্যামা’তি. তে সব্বসো নিৱাপভোজনা লোকামিসা পটিৱিৰমিংসু…পে…. এৱঞ্হি তে দুতিযাপি সমণব্ৰাহ্মণা ন পৰিমুচ্চিংসু মাৰস্স ইদ্ধানুভাৱা. যেপি তে ততিযা সমণব্ৰাহ্মণা এৱং সমচিন্তেসুং যে খো তে পঠমা সমণব্ৰাহ্মণা …পে…. এৱঞ্হি তে পঠমা সমণব্ৰাহ্মণা ন পৰিমুচ্চিংসু মাৰস্স ইদ্ধানুভাৱা. যেপি তে দুতিযা সমণব্ৰাহ্মণা এৱং সমচিন্তেসুং যে খো তে পঠমা সমণব্ৰাহ্মণা…পে…. এৱঞ্হি তে পঠমা সমণব্ৰাহ্মণা ন পৰিমুচ্চিংসু মাৰস্স ইদ্ধানুভাৱা. যংনূন মযং সব্বসো নিৱাপভোজনা লোকামিসা পটিৱিৰমেয্যাম, ভযভোগা পটিৱিৰতা অৰঞ্ঞাযতনানি অজ্ঝোগাহেত্ৱা ৱিহৰেয্যামা’তি. তে সব্বসো নিৱাপভোজনা লোকামিসা পটিৱিৰমিংসু…পে…. এৱঞ্হি তে দুতিযাপি সমণব্ৰাহ্মণা ন পৰিমুচ্চিংসু মাৰস্স ইদ্ধানুভাৱা. যংনূন মযং অমুং নিৱাপং নিৱুত্তং মাৰস্স অমূনি চ লোকামিসানি উপনিস্সায আসযং কপ্পেয্যাম. তত্ৰাসযং কপ্পেত্ৱা অমুং নিৱাপং নিৱুত্তং মাৰস্স অমূনি চ লোকামিসানি অননুপখজ্জ অমুচ্ছিতা ভোজনানি ভুঞ্জিস্সাম, অননুপখজ্জ অমুচ্ছিতা ভোজনানি ভুঞ্জমানা ন মদং আপজ্জিস্সাম, অমত্তা সমানা ন পমাদং আপজ্জিস্সাম, অপ্পমত্তা সমানা ন যথাকামকৰণীযা ভৱিস্সাম মাৰস্স অমুস্মিং নিৱাপে অমুস্মিঞ্চ লোকামিসেতি.

‘‘তে অমুং নিৱাপং নিৱুত্তং মাৰস্স অমূনি চ লোকামিসানি উপনিস্সায আসযং কপ্পযিংসু. তত্ৰাসযং কপ্পেত্ৱা অমুং নিৱাপং নিৱুত্তং মাৰস্স অমূনি চ লোকামিসানি অননুপখজ্জ অমুচ্ছিতা ভোজনানি ভুঞ্জিংসু. তে তত্থ অননুপখজ্জ অমুচ্ছিতা ভোজনানি ভুঞ্জমানা ন মদং আপজ্জিংসু. অমত্তা সমানা ন পমাদং আপজ্জিংসু. অপ্পমত্তা সমানা ন যথাকামকৰণীযা অহেসুং মাৰস্স অমুস্মিং নিৱাপে অমুস্মিঞ্চ লোকামিসে. অপি চ খো এৱংদিট্ঠিকা অহেসুং সস্সতো লোকো ইতিপি…পে… নেৱ হোতি ন ন হোতি তথাগতো পৰং মৰণা ইতিপি. এৱঞ্হি তে ততিযাপি সমণব্ৰাহ্মণা ন পৰিমুচ্চিংসু মাৰস্স ইদ্ধানুভাৱা. যংনূন মযং যত্থ অগতি মাৰস্স চ মাৰপৰিসায চ তত্ৰাসযং কপ্পেযাম. তত্ৰাসযং কপ্পেত্ৱা অমুং নিৱাপং নিৱুত্তং মাৰস্স অমূনি চ লোকামিসানি অননুপখজ্জ অমুচ্ছিতা ভোজনানি ভুঞ্জিস্সাম, অননুপখজ্জ অমুচ্ছিতা ভোজনানি ভুঞ্জমানা ন মদং আপজ্জিস্সাম, অমত্তা সমানা ন পমাদং আপজ্জিস্সাম, অপ্পমত্তা সমানা ন যথাকামকৰণীযা ভৱিস্সাম মাৰস্স অমুস্মিং নিৱাপে অমুস্মিঞ্চ লোকামিসেতি.

‘‘তে যত্থ অগতি মাৰস্স চ মাৰপৰিসায চ তত্ৰাসযং কপ্পযিংসু. তত্ৰাসযং কপ্পেত্ৱা অমুং নিৱাপং নিৱুত্তং মাৰস্স অমূনি চ লোকামিসানি অননুপখজ্জ অমুচ্ছিতা ভোজনানি ভুঞ্জিংসু, তে তত্থ অননুপখজ্জ অমুচ্ছিতা ভোজনানি ভুঞ্জমানা ন মদং আপজ্জিংসু, অমত্তা সমানা ন পমাদং আপজ্জিংসু, অপ্পমত্তা সমানা ন যথাকামকৰণীযা অহেসুং মাৰস্স অমুস্মিং নিৱাপে অমুস্মিঞ্চ লোকামিসে. এৱঞ্হি তে, ভিক্খৱে, চতুত্থা সমণব্ৰাহ্মণা পৰিমুচ্চিংসু মাৰস্স ইদ্ধানুভাৱা. সেয্যথাপি তে, ভিক্খৱে, চতুত্থা মিগজাতা তথূপমে অহং ইমে চতুত্থে সমণব্ৰাহ্মণে ৱদামি.

২৭১. ‘‘কথঞ্চ, ভিক্খৱে, অগতি মাৰস্স চ মাৰপৰিসায চ? ইধ, ভিক্খৱে, ভিক্খু ৱিৱিচ্চেৱ কামেহি ৱিৱিচ্চ অকুসলেহি ধম্মেহি সৱিতক্কং সৱিচাৰং ৱিৱেকজং পীতিসুখং পঠমং ঝানং উপসম্পজ্জ ৱিহৰতি. অযং ৱুচ্চতি, ভিক্খৱে, ভিক্খু অন্ধমকাসি মাৰং, অপদং ৱধিত্ৱা মাৰচক্খুং অদস্সনং গতো পাপিমতো.

‘‘পুন চপৰং, ভিক্খৱে, ভিক্খু ৱিতক্কৱিচাৰানং ৱূপসমা অজ্ঝত্তং সম্পসাদনং চেতসো একোদিভাৱং অৱিতক্কং অৱিচাৰং সমাধিজং পীতিসুখং দুতিযং ঝানং উপসম্পজ্জ ৱিহৰতি. অযং ৱুচ্চতি, ভিক্খৱে…পে… পাপিমতো.

‘‘পুন চপৰং, ভিক্খৱে, ভিক্খু পীতিযা চ ৱিৰাগা উপেক্খকো চ ৱিহৰতি সতো চ সম্পজানো, সুখঞ্চ কাযেন পটিসংৱেদেতি যং তং অৰিযা আচিক্খন্তি ‘উপেক্খকো সতিমা সুখৱিহাৰী’তি ততিযং ঝানং উপসম্পজ্জ ৱিহৰতি. অযং ৱুচ্চতি, ভিক্খৱে…পে… পাপিমতো.

‘‘পুন চপৰং, ভিক্খৱে, ভিক্খু সুখস্স চ পহানা দুক্খস্স চ পহানা, পুব্বেৱ সোমনস্সদোমনস্সানং অত্থঙ্গমা, অদুক্খমসুখং উপেক্খাসতিপাৰিসুদ্ধিং চতুত্থং ঝানং উপসম্পজ্জ ৱিহৰতি. অযং ৱুচ্চতি, ভিক্খৱে…পে… পাপিমতো.

‘‘পুন চপৰং, ভিক্খৱে, ভিক্খু সব্বসো ৰূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকাৰা ‘অনন্তো আকাসো’তি আকাসানঞ্চাযতনং উপসম্পজ্জ ৱিহৰতি. অযং ৱুচ্চতি, ভিক্খৱে…পে… পাপিমতো.

‘‘পুন চপৰং, ভিক্খৱে, ভিক্খু সব্বসো আকাসানঞ্চাযতনং সমতিক্কম্ম ‘অনন্তং ৱিঞ্ঞাণ’ন্তি ৱিঞ্ঞাণঞ্চাযতনং উপসম্পজ্জ ৱিহৰতি. অযং ৱুচ্চতি, ভিক্খৱে…পে… পাপিমতো.

‘‘পুন চপৰং, ভিক্খৱে, ভিক্খু সব্বসো ৱিঞ্ঞাণঞ্চাযতনং সমতিক্কম্ম ‘নত্থি কিঞ্চী’তি আকিঞ্চঞ্ঞাযতনং উপসম্পজ্জ ৱিহৰতি. অযং ৱুচ্চতি, ভিক্খৱে…পে… পাপিমতো.

‘‘পুন চপৰং, ভিক্খৱে, ভিক্খু সব্বসো আকিঞ্চঞ্ঞাযতনং সমতিক্কম্ম নেৱসঞ্ঞানাসঞ্ঞাযতনং উপসম্পজ্জ ৱিহৰতি. অযং ৱুচ্চতি, ভিক্খৱে…পে… পাপিমতো.

‘‘পুন চপৰং, ভিক্খৱে, ভিক্খু সব্বসো নেৱসঞ্ঞানাসঞ্ঞাযতনং সমতিক্কম্ম সঞ্ঞাৱেদযিতনিৰোধং উপসম্পজ্জ ৱিহৰতি. পঞ্ঞায চস্স দিস্ৱা আসৱা পৰিক্খীণা হোন্তি. অযং ৱুচ্চতি, ভিক্খৱে, ভিক্খু অন্ধমকাসি মাৰং, অপদং ৱধিত্ৱা মাৰচক্খুং অদস্সনং গতো পাপিমতো তিণ্ণো লোকে ৱিসত্তিক’’ন্তি.

ইদমৱোচ ভগৱা. অত্তমনা তে ভিক্খূ ভগৱতো ভাসিতং অভিনন্দুন্তি.

নিৱাপসুত্তং নিট্ঠিতং পঞ্চমং.