৭. ৱনপত্থসুত্তং

১৯০. এৱং মে সুতং – একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. তত্ৰ খো ভগৱা ভিক্খূ আমন্তেসি – ‘‘ভিক্খৱো’’তি. ‘‘ভদন্তে’’তি তে ভিক্খূ ভগৱতো পচ্চস্সোসুং. ভগৱা এতদৱোচ – ‘‘ৱনপত্থপৰিযাযং ৱো, ভিক্খৱে, দেসেস্সামি, তং সুণাথ, সাধুকং মনসিকৰোথ, ভাসিস্সামী’’তি. ‘‘এৱং, ভন্তে’’তি খো তে ভিক্খূ ভগৱতো পচ্চস্সোসুং. ভগৱা এতদৱোচ –

১৯১. ‘‘ইধ, ভিক্খৱে, ভিক্খু অঞ্ঞতৰং ৱনপত্থং উপনিস্সায ৱিহৰতি. তস্স তং ৱনপত্থং উপনিস্সায ৱিহৰতো অনুপট্ঠিতা চেৱ সতি ন উপট্ঠাতি, অসমাহিতঞ্চ চিত্তং ন সমাধিযতি, অপৰিক্খীণা চ আসৱা ন পৰিক্খযং গচ্ছন্তি, অননুপ্পত্তঞ্চ অনুত্তৰং যোগক্খেমং নানুপাপুণাতি. যে চ খো ইমে পব্বজিতেন জীৱিতপৰিক্খাৰা সমুদানেতব্বা – চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰা – তে কসিৰেন সমুদাগচ্ছন্তি. তেন, ভিক্খৱে, ভিক্খুনা ইতি পটিসঞ্চিক্খিতব্বং – ‘অহং খো ইমং ৱনপত্থং উপনিস্সায ৱিহৰামি, তস্স মে ইমং ৱনপত্থং উপনিস্সায ৱিহৰতো অনুপট্ঠিতা চেৱ সতি ন উপট্ঠাতি, অসমাহিতঞ্চ চিত্তং ন সমাধিযতি, অপৰিক্খীণা চ আসৱা ন পৰিক্খযং গচ্ছন্তি, অননুপ্পত্তঞ্চ অনুত্তৰং যোগক্খেমং নানুপাপুণামি. যে চ খো ইমে পব্বজিতেন জীৱিতপৰিক্খাৰা সমুদানেতব্বা – চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰা – তে কসিৰেন সমুদাগচ্ছন্তী’তি. তেন, ভিক্খৱে, ভিক্খুনা ৰত্তিভাগং ৱা দিৱসভাগং ৱা তম্হা ৱনপত্থা পক্কমিতব্বং, ন ৱত্থব্বং.

১৯২. ‘‘ইধ পন, ভিক্খৱে, ভিক্খু অঞ্ঞতৰং ৱনপত্থং উপনিস্সায ৱিহৰতি. তস্স তং ৱনপত্থং উপনিস্সায ৱিহৰতো অনুপট্ঠিতা চেৱ সতি ন উপট্ঠাতি, অসমাহিতঞ্চ চিত্তং ন সমাধিযতি, অপৰিক্খীণা চ আসৱা ন পৰিক্খযং গচ্ছন্তি, অননুপ্পত্তঞ্চ অনুত্তৰং যোগক্খেমং নানুপাপুণাতি. যে চ খো ইমে পব্বজিতেন জীৱিতপৰিক্খাৰা সমুদানেতব্বা – চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰা – তে অপ্পকসিৰেন সমুদাগচ্ছন্তি. তেন, ভিক্খৱে, ভিক্খুনা ইতি পটিসঞ্চিক্খিতব্বং – ‘অহং খো ইমং ৱনপত্থং উপনিস্সায ৱিহৰামি. তস্স মে ইমং ৱনপত্থং উপনিস্সায ৱিহৰতো অনুপট্ঠিতা চেৱ সতি ন উপট্ঠাতি অসমাহিতঞ্চ চিত্তং ন সমাধিযতি, অপৰিক্খীণা চ আসৱা ন পৰিক্খযং গচ্ছন্তি, অননুপ্পত্তঞ্চ অনুত্তৰং যোগক্খেমং নানুপাপুণামি. যে চ খো ইমে পব্বজিতেন জীৱিতপৰিক্খাৰা সমুদানেতব্বা – চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰা – তে অপ্পকসিৰেন সমুদাগচ্ছন্তি. ন খো পনাহং চীৱৰহেতু অগাৰস্মা অনগাৰিযং পব্বজিতো ন পিণ্ডপাতহেতু…পে… ন সেনাসনহেতু…পে… ন গিলানপ্পচ্চযভেসজ্জপৰিক্খাৰহেতু অগাৰস্মা অনগাৰিযং পব্বজিতো. অথ চ পন মে ইমং ৱনপত্থং উপনিস্সায ৱিহৰতো অনুপট্ঠিতা চেৱ সতি ন উপট্ঠাতি, অসমাহিতঞ্চ চিত্তং ন সমাধিযতি, অপৰিক্খীণা চ আসৱা ন পৰিক্খযং গচ্ছন্তি, অননুপ্পত্তঞ্চ অনুত্তৰং যোগক্খেমং নানুপাপুণামী’তি. তেন, ভিক্খৱে, ভিক্খুনা সঙ্খাপি তম্হা ৱনপত্থা পক্কমিতব্বং, ন ৱত্থব্বং.

১৯৩. ‘‘ইধ পন, ভিক্খৱে, ভিক্খু অঞ্ঞতৰং ৱনপত্থং উপনিস্সায ৱিহৰতি. তস্স তং ৱনপত্থং উপনিস্সায ৱিহৰতো অনুপট্ঠিতা চেৱ সতি উপট্ঠাতি, অসমাহিতঞ্চ চিত্তং সমাধিযতি, অপৰিক্খীণা চ আসৱা পৰিক্খযং গচ্ছন্তি, অননুপ্পত্তঞ্চ অনুত্তৰং যোগক্খেমং অনুপাপুণাতি. যে চ খো ইমে পব্বজিতেন জীৱিতপৰিক্খাৰা সমুদানেতব্বা – চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰা, তে কসিৰেন সমুদাগচ্ছন্তি. তেন, ভিক্খৱে, ভিক্খুনা ইতি পটিসঞ্চিক্খিতব্বং – ‘অহং খো ইমং ৱনপত্থং উপনিস্সায ৱিহৰামি. তস্স মে ইমং ৱনপত্থং উপনিস্সায ৱিহৰতো অনুপট্ঠিতা চেৱ সতি উপট্ঠাতি অসমাহিতঞ্চ চিত্তং সমাধিযতি, অপৰিক্খীণা চ আসৱা পৰিক্খযং গচ্ছন্তি, অননুপ্পত্তঞ্চ অনুত্তৰং যোগক্খেমং অনুপাপুণামি. যে চ খো ইমে পব্বজিতেন জীৱিতপৰিক্খাৰা সমুদানেতব্বা – চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰা – তে কসিৰেন সমুদাগচ্ছন্তি. ন খো পনাহং চীৱৰহেতু অগাৰস্মা অনগাৰিযং পব্বজিতো, ন পিণ্ডপাতহেতু…পে… ন সেনাসনহেতু…পে… ন গিলানপ্পচ্চযভেসজ্জপৰিক্খাৰহেতু অগাৰস্মা অনগাৰিযং পব্বজিতো. অথ চ পন মে ইমং ৱনপত্থং উপনিস্সায ৱিহৰতো অনুপট্ঠিতা চেৱ সতি উপট্ঠাতি, অসমাহিতঞ্চ চিত্তং সমাধিযতি, অপৰিক্খীণা চ আসৱা পৰিক্খযং গচ্ছন্তি, অননুপ্পত্তঞ্চ অনুত্তৰং যোগক্খেমং অনুপাপুণামী’তি. তেন, ভিক্খৱে, ভিক্খুনা সঙ্খাপি তস্মিং ৱনপত্থে ৱত্থব্বং, ন পক্কমিতব্বং.

১৯৪. ‘‘ইধ পন, ভিক্খৱে, ভিক্খু অঞ্ঞতৰং ৱনপত্থং উপনিস্সায ৱিহৰতি. তস্স তং ৱনপত্থং উপনিস্সায ৱিহৰতো অনুপট্ঠিতা চেৱ সতি উপট্ঠাতি, অসমাহিতঞ্চ চিত্তং সমাধিযতি, অপৰিক্খীণা চ আসৱা পৰিক্খযং গচ্ছন্তি, অননুপ্পত্তঞ্চ অনুত্তৰং যোগক্খেমং অনুপাপুণাতি. যে চ খো ইমে পব্বজিতেন জীৱিতপৰিক্খাৰা সমুদানেতব্বা – চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰা – তে অপ্পকসিৰেন সমুদাগচ্ছন্তি. তেন, ভিক্খৱে, ভিক্খুনা ইতি পটিসঞ্চিক্খিতব্বং – ‘অহং খো ইমং ৱনপত্থং উপনিস্সায ৱিহৰামি. তস্স মে ইমং ৱনপত্থং উপনিস্সায ৱিহৰতো অনুপট্ঠিতা চেৱ সতি উপট্ঠাতি অসমাহিতঞ্চ চিত্তং সমাধিযতি, অপৰিক্খীণা চ আসৱা পৰিক্খযং গচ্ছন্তি, অননুপ্পত্তঞ্চ অনুত্তৰং যোগক্খেমং অনুপাপুণামি. যে চ খো ইমে পব্বজিতেন জীৱিতপৰিক্খাৰা সমুদানেতব্বা – চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰা – তে অপ্পকসিৰেন সমুদাগচ্ছন্তী’তি. তেন, ভিক্খৱে, ভিক্খুনা যাৱজীৱম্পি তস্মিং ৱনপত্থে ৱত্থব্বং, ন পক্কমিতব্বং.

১৯৫. ‘‘ইধ, ভিক্খৱে, ভিক্খু অঞ্ঞতৰং গামং উপনিস্সায ৱিহৰতি …পে… অঞ্ঞতৰং নিগমং উপনিস্সায ৱিহৰতি…পে… অঞ্ঞতৰং নগৰং উপনিস্সায ৱিহৰতি…পে… অঞ্ঞতৰং জনপদং উপনিস্সায ৱিহৰতি…পে… অঞ্ঞতৰং পুগ্গলং উপনিস্সায ৱিহৰতি. তস্স তং পুগ্গলং উপনিস্সায ৱিহৰতো অনুপট্ঠিতা চেৱ সতি ন উপট্ঠাতি, অসমাহিতঞ্চ চিত্তং ন সমাধিযতি, অপৰিক্খীণা চ আসৱা ন পৰিক্খযং গচ্ছন্তি, অননুপ্পত্তঞ্চ অনুত্তৰং যোগক্খেমং নানুপাপুণাতি. যে চ খো ইমে পব্বজিতেন জীৱিতপৰিক্খাৰা সমুদানেতব্বা – চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰা – তে কসিৰেন সমুদাগচ্ছন্তি. তেন, ভিক্খৱে, ভিক্খুনা ইতি পটিসঞ্চিক্খিতব্বং – ‘অহং খো ইমং পুগ্গলং উপনিস্সায ৱিহৰামি. তস্স মে ইমং পুগ্গলং উপনিস্সায ৱিহৰতো অনুপট্ঠিতা চেৱ সতি ন উপট্ঠাতি, অসমাহিতঞ্চ চিত্তং ন সমাধিযতি, অপৰিক্খীণা চ আসৱা ন পৰিক্খযং গচ্ছন্তি, অননুপ্পত্তঞ্চ অনুত্তৰং যোগক্খেমং নানুপাপুণামি. যে চ খো ইমে পব্বজিতেন জীৱিতপৰিক্খাৰা সমুদানেতব্বা – চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰা – তে কসিৰেন সমুদাগচ্ছন্তী’তি. তেন, ভিক্খৱে, ভিক্খুনা ৰত্তিভাগং ৱা দিৱসভাগং ৱা সো পুগ্গলো অনাপুচ্ছা পক্কমিতব্বং, নানুবন্ধিতব্বো.

১৯৬. ‘‘ইধ পন, ভিক্খৱে, ভিক্খু অঞ্ঞতৰং পুগ্গলং উপনিস্সায ৱিহৰতি. তস্স তং পুগ্গলং উপনিস্সায ৱিহৰতো অনুপট্ঠিতা চেৱ সতি ন উপট্ঠাতি, অসমাহিতঞ্চ চিত্তং ন সমাধিযতি, অপৰিক্খীণা চ আসৱা ন পৰিক্খযং গচ্ছন্তি, অননুপ্পত্তঞ্চ অনুত্তৰং যোগক্খেমং নানুপাপুণাতি. যে চ খো ইমে পব্বজিতেন জীৱিতপৰিক্খাৰা সমুদানেতব্বা – চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰা, তে অপ্পকসিৰেন সমুদাগচ্ছন্তি. তেন, ভিক্খৱে, ভিক্খুনা ইতি পটিসঞ্চিক্খিতব্বং – ‘অহং খো ইমং পুগ্গলং উপনিস্সায ৱিহৰামি. তস্স মে ইমং পুগ্গলং উপনিস্সায ৱিহৰতো অনুপট্ঠিতা চেৱ সতি ন উপট্ঠাতি, অসমাহিতঞ্চ চিত্তং ন সমাধিযতি, অপৰিক্খীণা চ আসৱা ন পৰিক্খযং গচ্ছন্তি, অননুপ্পত্তঞ্চ অনুত্তৰং যোগক্খেমং নানুপাপুণামি. যে চ খো ইমে পব্বজিতেন জীৱিতপৰিক্খাৰা সমুদানেতব্বা – চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰা – তে অপ্পকসিৰেন সমুদাগচ্ছন্তি. ন খো পনাহং চীৱৰহেতু অগাৰস্মা অনগাৰিযং পব্বজিতো, ন পিণ্ডপাতহেতু…পে… ন সেনাসনহেতু…পে… ন গিলানপ্পচ্চযভেসজ্জপৰিক্খাৰহেতু অগাৰস্মা অনগাৰিযং পব্বজিতো. অথ চ পন মে ইমং পুগ্গলং উপনিস্সায ৱিহৰতো অনুপট্ঠিতা চেৱ সতি ন উপট্ঠাতি, অসমাহিতঞ্চ চিত্তং ন সমাধিযতি, অপৰিক্খীণা চ আসৱা ন পৰিক্খযং গচ্ছন্তি, অননুপ্পত্তঞ্চ অনুত্তৰং যোগক্খেমং নানুপাপুণামী’তি. তেন, ভিক্খৱে, ভিক্খুনা সঙ্খাপি সো পুগ্গলো আপুচ্ছা পক্কমিতব্বং, নানুবন্ধিতব্বো.

১৯৭. ‘‘ইধ পন, ভিক্খৱে, ভিক্খু অঞ্ঞতৰং পুগ্গলং উপনিস্সায ৱিহৰতি. তস্স তং পুগ্গলং উপনিস্সায ৱিহৰতো অনুপট্ঠিতা চেৱ সতি উপট্ঠাতি, অসমাহিতঞ্চ চিত্তং সমাধিযতি, অপৰিক্খীণা চ আসৱা পৰিক্খযং গচ্ছন্তি, অননুপ্পত্তঞ্চ অনুত্তৰং যোগক্খেমং অনুপাপুণাতি. যে চ খো ইমে পব্বজিতেন জীৱিতপৰিক্খাৰা সমুদানেতব্বা – চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰা – তে কসিৰেন সমুদাগচ্ছন্তি. তেন, ভিক্খৱে, ভিক্খুনা ইতি পটিসঞ্চিক্খিতব্বং – ‘অহং খো ইমং পুগ্গলং উপনিস্সায ৱিহৰামি. তস্স মে ইমং পুগ্গলং উপনিস্সায ৱিহৰতো অনুপট্ঠিতা চেৱ সতি উপট্ঠাতি, অসমাহিতঞ্চ চিত্তং সমাধিযতি, অপৰিক্খীণা চ আসৱা পৰিক্খযং গচ্ছন্তি, অননুপ্পত্তঞ্চ অনুত্তৰং যোগক্খেমং অনুপাপুণামি. যে চ খো ইমে পব্বজিতেন জীৱিতপৰিক্খাৰা সমুদানেতব্বা – চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰা – তে কসিৰেন সমুদাগচ্ছন্তি. ন খো পনাহং চীৱৰহেতু অগাৰস্মা অনগাৰিযং পব্বজিতো, ন পিণ্ডপাতহেতু…পে… ন সেনাসনহেতু…পে… ন গিলানপ্পচ্চযভেসজ্জপৰিক্খাৰহেতু অগাৰস্মা অনগাৰিযং পব্বজিতো. অথ চ পন মে ইমং পুগ্গলং উপনিস্সায ৱিহৰতো অনুপট্ঠিতা চেৱ সতি উপট্ঠাতি, অসমাহিতঞ্চ চিত্তং সমাধিযতি, অপৰিক্খীণা চ আসৱা পৰিক্খযং গচ্ছন্তি, অননুপ্পত্তঞ্চ অনুত্তৰং যোগক্খেমং অনুপাপুণামী’তি. তেন, ভিক্খৱে, ভিক্খুনা সঙ্খাপি সো পুগ্গলো অনুবন্ধিতব্বো, ন পক্কমিতব্বং.

১৯৮. ‘‘ইধ পন, ভিক্খৱে, ভিক্খু অঞ্ঞতৰং পুগ্গলং উপনিস্সায ৱিহৰতি. তস্স তং পুগ্গলং উপনিস্সায ৱিহৰতো অনুপট্ঠিতা চেৱ সতি উপট্ঠাতি, অসমাহিতঞ্চ চিত্তং সমাধিযতি, অপৰিক্খীণা চ আসৱা পৰিক্খযং গচ্ছন্তি, অননুপ্পত্তঞ্চ অনুত্তৰং যোগক্খেমং অনুপাপুণাতি. যে চ খো ইমে পব্বজিতেন জীৱিতপৰিক্খাৰা সমুদানেতব্বা – চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰা – তে অপ্পকসিৰেন সমুদাগচ্ছন্তি. তেন, ভিক্খৱে, ভিক্খুনা ইতি পটিসঞ্চিক্খিতব্বং – ‘অহং খো ইমং পুগ্গলং উপনিস্সায ৱিহৰামি. তস্স মে ইমং পুগ্গলং উপনিস্সায ৱিহৰতো অনুপট্ঠিতা চেৱ সতি উপট্ঠাতি, অসমাহিতঞ্চ চিত্তং সমাধিযতি, অপৰিক্খীণা চ আসৱা পৰিক্খযং গচ্ছন্তি, অননুপ্পত্তঞ্চ অনুত্তৰং যোগক্খেমং অনুপাপুণামি. যে চ খো ইমে পব্বজিতেন জীৱিতপৰিক্খাৰা সমুদানেতব্বা – চীৱৰপিণ্ডপাতসেনাসনগিলানপ্পচ্চযভেসজ্জপৰিক্খাৰা – তে অপ্পকসিৰেন সমুদাগচ্ছন্তী’তি. তেন, ভিক্খৱে, ভিক্খুনা যাৱজীৱম্পি সো পুগ্গলো অনুবন্ধিতব্বো, ন পক্কমিতব্বং, অপি পনুজ্জমানেনপী’’তি [অপি পণুজ্জমানেনাতি (?)].

ইদমৱোচ ভগৱা. অত্তমনা তে ভিক্খূ ভগৱতো ভাসিতং অভিনন্দুন্তি.

ৱনপত্থসুত্তং নিট্ঠিতং সত্তমং.