৫. অনুমানসুত্তং

১৮১. এৱং মে সুতং – একং সমযং আযস্মা মহামোগ্গল্লানো ভগ্গেসু ৱিহৰতি সুসুমাৰগিৰে [সুংসুমাৰগিৰে (সী. স্যা. পী.)] ভেসকড়াৱনে মিগদাযে. তত্ৰ খো আযস্মা মহামোগ্গল্লানো ভিক্খূ আমন্তেসি – ‘‘আৱুসো, ভিক্খৱো’’তি. ‘‘আৱুসো’’তি খো তে ভিক্খূ আযস্মতো মহামোগ্গল্লানস্স পচ্চস্সোসুং. আযস্মা মহামোগ্গল্লানো এতদৱোচ –

‘‘পৱাৰেতি চেপি, আৱুসো, ভিক্খু – ‘ৱদন্তু মং আযস্মন্তো, ৱচনীযোম্হি আযস্মন্তেহী’তি, সো চ হোতি দুব্বচো, দোৱচস্সকৰণেহি ধম্মেহি সমন্নাগতো, অক্খমো অপ্পদক্খিণগ্গাহী অনুসাসনিং, অথ খো নং সব্ৰহ্মচাৰী ন চেৱ ৱত্তব্বং মঞ্ঞন্তি, ন চ অনুসাসিতব্বং মঞ্ঞন্তি, ন চ তস্মিং পুগ্গলে ৱিস্সাসং আপজ্জিতব্বং মঞ্ঞন্তি.

‘‘কতমে চাৱুসো, দোৱচস্সকৰণা ধম্মা? ইধাৱুসো, ভিক্খু পাপিচ্ছো হোতি, পাপিকানং ইচ্ছানং ৱসং গতো. যম্পাৱুসো, ভিক্খু পাপিচ্ছো হোতি, পাপিকানং ইচ্ছানং ৱসং গতো – অযম্পি ধম্মো দোৱচস্সকৰণো.

‘‘পুন চপৰং, আৱুসো, ভিক্খু অত্তুক্কংসকো হোতি পৰৱম্ভী. যম্পাৱুসো, ভিক্খু অত্তুক্কংসকো হোতি পৰৱম্ভী – অযম্পি ধম্মো দোৱচস্সকৰণো.

‘‘পুন চপৰং, আৱুসো, ভিক্খু কোধনো হোতি কোধাভিভূতো. যম্পাৱুসো, ভিক্খু কোধনো হোতি কোধাভিভূতো – অযম্পি ধম্মো দোৱচস্সকৰণো.

‘‘পুন চপৰং, আৱুসো, ভিক্খু কোধনো হোতি কোধহেতু উপনাহী. যম্পাৱুসো, ভিক্খু কোধনো হোতি কোধহেতু উপনাহী – অযম্পি ধম্মো দোৱচস্সকৰণো.

‘‘পুন চপৰং, আৱুসো, ভিক্খু কোধনো হোতি কোধহেতু অভিসঙ্গী. যম্পাৱুসো, ভিক্খু কোধনো হোতি কোধহেতু অভিসঙ্গী – অযম্পি ধম্মো দোৱচস্সকৰণো.

‘‘পুন চপৰং, আৱুসো, ভিক্খু কোধনো হোতি কোধসামন্তা [কোধসামন্তং (স্যা. পী. ক.)] ৱাচং নিচ্ছাৰেতা. যম্পাৱুসো, ভিক্খু কোধনো হোতি কোধসামন্তা ৱাচং নিচ্ছাৰেতা – অযম্পি ধম্মো দোৱচস্সকৰণো.

‘‘পুন চপৰং, আৱুসো, ভিক্খু চোদিতো [চুদিতো (সী. স্যা. পী.)] চোদকেন চোদকং পটিপ্ফৰতি. যম্পাৱুসো, ভিক্খু চোদিতো চোদকেন চোদকং পটিপ্ফৰতি – অযম্পি ধম্মো দোৱচস্সকৰণো.

‘‘পুন চপৰং, আৱুসো, ভিক্খু চোদিতো চোদকেন চোদকং অপসাদেতি. যম্পাৱুসো, ভিক্খু চোদিতো চোদকেন চোদকং অপসাদেতি – অযম্পি ধম্মো দোৱচস্সকৰণো.

‘‘পুন চপৰং, আৱুসো, ভিক্খু চোদিতো চোদকেন চোদকস্স পচ্চাৰোপেতি. যম্পাৱুসো, ভিক্খু চোদিতো চোদকেন চোদকস্স পচ্চাৰোপেতি – অযম্পি ধম্মো দোৱচস্সকৰণো.

‘‘পুন চপৰং, আৱুসো, ভিক্খু চোদিতো চোদকেন অঞ্ঞেনঞ্ঞং পটিচৰতি, বহিদ্ধা কথং অপনামেতি, কোপঞ্চ দোসঞ্চ অপ্পচ্চযঞ্চ পাতুকৰোতি. যম্পাৱুসো, ভিক্খু চোদিতো চোদকেন অঞ্ঞেনঞ্ঞং পটিচৰতি, বহিদ্ধা কথং অপনামেতি, কোপঞ্চ দোসঞ্চ অপ্পচ্চযঞ্চ পাতুকৰোতি – অযম্পি ধম্মো দোৱচস্সকৰণো.

‘‘পুন চপৰং, আৱুসো, ভিক্খু চোদিতো চোদকেন অপদানে ন সম্পাযতি. যম্পাৱুসো, ভিক্খু চোদিতো চোদকেন অপদানে ন সম্পাযতি – অযম্পি ধম্মো দোৱচস্সকৰণো.

‘‘পুন চপৰং, আৱুসো, ভিক্খু মক্খী হোতি পড়াসী. যম্পাৱুসো, ভিক্খু মক্খী হোতি পড়াসী – অযম্পি ধম্মো দোৱচস্সকৰণো.

‘‘পুন চপৰং, আৱুসো, ভিক্খু ইস্সুকী হোতি মচ্ছৰী. যম্পাৱুসো, ভিক্খু ইস্সুকী হোতি মচ্ছৰী – অযম্পি ধম্মো দোৱচস্সকৰণো.

‘‘পুন চপৰং, আৱুসো, ভিক্খু সঠো হোতি মাযাৱী. যম্পাৱুসো, ভিক্খু সঠো হোতি মাযাৱী – অযম্পি ধম্মো দোৱচস্সকৰণো.

‘‘পুন চপৰং, আৱুসো, ভিক্খু থদ্ধো হোতি অতিমানী. যম্পাৱুসো, ভিক্খু থদ্ধো হোতি অতিমানী – অযম্পি ধম্মো দোৱচস্সকৰণো.

‘‘পুন চপৰং, আৱুসো, ভিক্খু সন্দিট্ঠিপৰামাসী হোতি আধানগ্গাহী দুপ্পটিনিস্সগ্গী. যম্পাৱুসো, ভিক্খু সন্দিট্ঠিপৰামাসী হোতি আধানগ্গাহী দুপ্পটিনিস্সগ্গী – অযম্পি ধম্মো দোৱচস্সকৰণো. ইমে ৱুচ্চন্তাৱুসো, দোৱচস্সকৰণা ধম্মা.

১৮২. ‘‘নো চেপি, আৱুসো, ভিক্খু পৱাৰেতি – ‘ৱদন্তু মং আযস্মন্তো, ৱচনীযোম্হি আযস্মন্তেহী’তি, সো চ হোতি সুৱচো, সোৱচস্সকৰণেহি ধম্মেহি সমন্নাগতো, খমো পদক্খিণগ্গাহী অনুসাসনিং, অথ খো নং সব্ৰহ্মচাৰী ৱত্তব্বঞ্চেৱ মঞ্ঞন্তি, অনুসাসিতব্বঞ্চ মঞ্ঞন্তি, তস্মিঞ্চ পুগ্গলে ৱিস্সাসং আপজ্জিতব্বং মঞ্ঞন্তি.

‘‘কতমে চাৱুসো, সোৱচস্সকৰণা ধম্মা? ইধাৱুসো, ভিক্খু ন পাপিচ্ছো হোতি, ন পাপিকানং ইচ্ছানং ৱসং গতো. যম্পাৱুসো, ভিক্খু ন পাপিচ্ছো হোতি ন পাপিকানং ইচ্ছানং ৱসং গতো – অযম্পি ধম্মো সোৱচস্সকৰণো.

‘‘পুন চপৰং, আৱুসো, ভিক্খু অনত্তুক্কংসকো হোতি অপৰৱম্ভী. যম্পাৱুসো, ভিক্খু অনত্তুক্কংসকো হোতি অপৰৱম্ভী – অযম্পি ধম্মো সোৱচস্সকৰণো.

‘‘পুন চপৰং, আৱুসো, ভিক্খু ন কোধনো হোতি ন কোধাভিভূতো. যম্পাৱুসো, ভিক্খু ন কোধনো হোতি ন কোধাভিভূতো – অযম্পি ধম্মো সোৱচস্সকৰণো.

‘‘পুন চপৰং, আৱুসো, ভিক্খু ন কোধনো হোতি ন কোধহেতু উপনাহী. যম্পাৱুসো, ভিক্খু ন কোধনো হোতি ন কোধহেতু উপনাহী – অযম্পি ধম্মো সোৱচস্সকৰণো.

‘‘পুন চপৰং, আৱুসো, ভিক্খু ন কোধনো হোতি ন কোধহেতু অভিসঙ্গী. যম্পাৱুসো, ভিক্খু ন কোধনো হোতি ন কোধহেতু অভিসঙ্গী – অযম্পি ধম্মো সোৱচস্সকৰণো.

‘‘পুন চপৰং, আৱুসো, ভিক্খু ন কোধনো হোতি ন কোধসামন্তা ৱাচং নিচ্ছাৰেতা. যম্পাৱুসো, ভিক্খু ন কোধনো হোতি ন কোধসামন্তা ৱাচং নিচ্ছাৰেতা – অযম্পি ধম্মো সোৱচস্সকৰণো.

‘‘পুন চপৰং, আৱুসো, ভিক্খু চোদিতো চোদকেন চোদকং নপ্পটিপ্ফৰতি. যম্পাৱুসো, ভিক্খু চোদিতো চোদকেন চোদকং নপ্পটিপ্ফৰতি – অযম্পি ধম্মো সোৱচস্সকৰণো.

‘‘পুন চপৰং, আৱুসো, ভিক্খু চোদিতো চোদকেন চোদকং ন অপসাদেতি. যম্পাৱুসো, ভিক্খু চোদিতো চোদকেন চোদকং ন অপসাদেতি – অযম্পি ধম্মো সোৱচস্সকৰণো.

‘‘পুন চপৰং, আৱুসো, ভিক্খু চোদিতো চোদকেন চোদকস্স ন পচ্চাৰোপেতি. যম্পাৱুসো, ভিক্খু চোদিতো চোদকেন চোদকস্স ন পচ্চাৰোপেতি – অযম্পি ধম্মো সোৱচস্সকৰণো.

‘‘পুন চপৰং, আৱুসো, ভিক্খু চোদিতো চোদকেন ন অঞ্ঞেনঞ্ঞং পটিচৰতি, ন বহিদ্ধা কথং অপনামেতি, ন কোপঞ্চ দোসঞ্চ অপ্পচ্চযঞ্চ পাতুকৰোতি. যম্পাৱুসো, ভিক্খু চোদিতো চোদকেন ন অঞ্ঞেনঞ্ঞং পটিচৰতি, ন বহিদ্ধা কথং অপনামেতি, ন কোপঞ্চ দোসঞ্চ অপ্পচ্চযঞ্চ পাতুকৰোতি – অযম্পি ধম্মো সোৱচস্সকৰণো.

‘‘পুন চপৰং, আৱুসো, ভিক্খু চোদিতো চোদকেন অপদানে সম্পাযতি. যম্পাৱুসো, ভিক্খু চোদিতো চোদকেন অপদানে সম্পাযতি – অযম্পি ধম্মো সোৱচস্সকৰণো.

‘‘পুন চপৰং, আৱুসো, ভিক্খু অমক্খী হোতি অপড়াসী. যম্পাৱুসো, ভিক্খু অমক্খী হোতি অপড়াসী – অযম্পি ধম্মো সোৱচস্সকৰণো.

‘‘পুন চপৰং, আৱুসো, ভিক্খু অনিস্সুকী হোতি অমচ্ছৰী. যম্পাৱুসো, ভিক্খু অনিস্সুকী হোতি অমচ্ছৰী – অযম্পি ধম্মো সোৱচস্সকৰণো.

‘‘পুন চপৰং, আৱুসো, ভিক্খু অসঠো হোতি অমাযাৱী. যম্পাৱুসো, ভিক্খু অসঠো হোতি অমাযাৱী – অযম্পি ধম্মো সোৱচস্সকৰণো.

‘‘পুন চপৰং, আৱুসো, ভিক্খু অত্থদ্ধো হোতি অনতিমানী. যম্পাৱুসো, ভিক্খু অত্থদ্ধো হোতি অনতিমানী – অযম্পি ধম্মো সোৱচস্সকৰণো.

‘‘পুন চপৰং, আৱুসো, ভিক্খু অসন্দিট্ঠিপৰামাসী হোতি অনাধানগ্গাহী সুপ্পটিনিস্সগ্গী. যম্পাৱুসো, ভিক্খু অসন্দিট্ঠিপৰামাসী হোতি, অনাধানগ্গাহী সুপ্পটিনিস্সগ্গী – অযম্পি ধম্মো সোৱচস্সকৰণো. ইমে ৱুচ্চন্তাৱুসো, সোৱচস্সকৰণা ধম্মা.

১৮৩. ‘‘তত্ৰাৱুসো, ভিক্খুনা অত্তনাৱ অত্তানং এৱং অনুমিনিতব্বং [অনুমানিতব্বং (সী.)] – ‘যো খ্ৱাযং পুগ্গলো পাপিচ্ছো, পাপিকানং ইচ্ছানং ৱসং গতো, অযং মে পুগ্গলো অপ্পিযো অমনাপো; অহঞ্চেৱ খো পনস্সং পাপিচ্ছো পাপিকানং ইচ্ছানং ৱসং গতো, অহংপাস্সং পৰেসং অপ্পিযো অমনাপো’তি. এৱং জানন্তেনাৱুসো, ভিক্খুনা ‘ন পাপিচ্ছো ভৱিস্সামি, ন পাপিকানং ইচ্ছানং ৱসং গতো’তি চিত্তং উপ্পাদেতব্বং.

‘‘‘যো খ্ৱাযং পুগ্গলো অত্তুক্কংসকো পৰৱম্ভী, অযং মে পুগ্গলো অপ্পিযো অমনাপো; অহঞ্চেৱ খো পনস্সং অত্তুক্কংসকো পৰৱম্ভী, অহংপাস্সং পৰেসং অপ্পিযো অমনাপো’তি. এৱং জানন্তেনাৱুসো, ভিক্খুনা ‘অনত্তুক্কংসকো ভৱিস্সামি অপৰৱম্ভী’তি চিত্তং উপ্পাদেতব্বং.

‘‘‘যো খ্ৱাযং পুগ্গলো কোধনো কোধাভিভূতো, অযং মে পুগ্গলো অপ্পিযো অমনাপো. অহঞ্চেৱ খো পনস্সং কোধনো কোধাভিভূতো, অহংপাস্সং পৰেসং অপ্পিযো অমনাপো’তি. এৱং জানন্তেনাৱুসো, ভিক্খুনা ‘ন কোধনো ভৱিস্সামি ন কোধাভিভূতো’তি চিত্তং উপ্পাদেতব্বং.

‘‘‘যো খ্ৱাযং পুগ্গলো কোধনো কোধহেতু উপনাহী, অযং মে পুগ্গলো অপ্পিযো অমনাপো; অহঞ্চেৱ খো পনস্সং কোধনো কোধহেতু উপনাহী, অহংপাস্সং পৰেসং অপ্পিযো অমনাপো’তি. এৱং জানন্তেনাৱুসো, ভিক্খুনা ‘ন কোধনো ভৱিস্সামি ন কোধহেতু উপনাহী’তি চিত্তং উপ্পাদেতব্বং.

‘‘‘যো খ্ৱাযং পুগ্গলো কোধনো কোধহেতু অভিসঙ্গী, অযং মে পুগ্গলো অপ্পিযো অমনাপো; অহঞ্চেৱ খো পনস্সং কোধনো কোধহেতু অভিসঙ্গী, অহংপাস্সং পৰেসং অপ্পিযো অমনাপো’তি. এৱং জানন্তেনাৱুসো, ভিক্খুনা ‘ন কোধনো ভৱিস্সামি ন কোধহেতু অভিসঙ্গী’তি চিত্তং উপ্পাদেতব্বং.

‘‘‘যো খ্ৱাযং পুগ্গলো কোধনো কোধসামন্তা ৱাচং নিচ্ছাৰেতা, অযং মে পুগ্গলো অপ্পিযো অমনাপো; অহঞ্চেৱ খো পনস্সং কোধনো কোধসামন্তা ৱাচং নিচ্ছাৰেতা, অহংপাস্সং পৰেসং অপ্পিযো অমনাপো’তি. এৱং জানন্তেনাৱুসো, ভিক্খুনা ‘ন কোধনো ভৱিস্সামি ন কোধসামন্তা ৱাচং নিচ্ছাৰেস্সামী’তি চিত্তং উপ্পাদেতব্বং.

‘‘‘যো খ্ৱাযং পুগ্গলো চোদিতো চোদকেন চোদকং পটিপ্ফৰতি, অযং মে পুগ্গলো অপ্পিযো অমনাপো; অহঞ্চেৱ খো পন চোদিতো চোদকেন চোদকং পটিপ্ফৰেয্যং, অহংপাস্সং পৰেসং অপ্পিযো অমনাপো’তি. এৱং জানন্তেনাৱুসো, ভিক্খুনা ‘চোদিতো চোদকেন চোদকং নপ্পটিপ্ফৰিস্সামী’তি চিত্তং উপ্পাদেতব্বং.

‘‘‘যো খ্ৱাযং পুগ্গলো চোদিতো চোদকেন চোদকং অপসাদেতি, অযং মে পুগ্গলো অপ্পিযো অমনাপো; অহঞ্চেৱ খো পন চোদিতো চোদকেন চোদকং অপসাদেয্যং, অহংপাস্সং পৰেসং অপ্পিযো অমনাপো’তি. এৱং জানন্তেনাৱুসো, ভিক্খুনা ‘চোদিতো চোদকেন চোদকং ন অপসাদেস্সামী’তি চিত্তং উপ্পাদেতব্বং.

‘‘‘যো খ্ৱাযং পুগ্গলো চোদিতো চোদকেন চোদকস্স পচ্চাৰোপেতি, অযং মে পুগ্গলো অপ্পিযো অমনাপো; অহঞ্চেৱ খো পন চোদিতো চোদকেন চোদকস্স পচ্চাৰোপেয্যং, অহংপাস্সং পৰেসং অপ্পিযো অমনাপো’তি. এৱং জানন্তেনাৱুসো, ভিক্খুনা ‘চোদিতো চোদকেন চোদকস্স ন পচ্চাৰোপেস্সামী’তি চিত্তং উপ্পাদেতব্বং.

‘‘‘যো খ্ৱাযং পুগ্গলো চোদিতো চোদকেন অঞ্ঞেনঞ্ঞং পটিচৰতি, বহিদ্ধা কথং অপনামেতি, কোপঞ্চ দোসঞ্চ অপ্পচ্চযঞ্চ পাতুকৰোতি, অযং মে পুগ্গলো অপ্পিযো অমনাপো; অহঞ্চেৱ খো পন চোদিতো চোদকেন অঞ্ঞেনঞ্ঞং পটিচৰেয্যং, বহিদ্ধা কথং অপনামেয্যং, কোপঞ্চ দোসঞ্চ অপ্পচ্চযঞ্চ পাতুকৰেয্যং, অহংপাস্সং পৰেসং অপ্পিযো অমনাপো’তি. এৱং জানন্তেনাৱুসো, ভিক্খুনা ‘চোদিতো চোদকেন ন অঞ্ঞেনঞ্ঞং পটিচৰিস্সামি, ন বহিদ্ধা কথং অপনামেস্সামি, ন কোপঞ্চ দোসঞ্চ অপ্পচ্চযঞ্চ পাতুকৰিস্সামী’তি চিত্তং উপ্পাদেতব্বং.

‘‘‘যো খ্ৱাযং পুগ্গলো চোদিতো চোদকেন অপদানে ন সম্পাযতি, অযং মে পুগ্গলো অপ্পিযো অমনাপো; অহঞ্চেৱ খো পন চোদিতো চোদকেন অপদানে ন সম্পাযেয্যং, অহংপাস্সং পৰেসং অপ্পিযো অমনাপো’তি. এৱং জানন্তেনাৱুসো, ভিক্খুনা ‘চোদিতো চোদকেন অপদানে সম্পাযিস্সামী’তি চিত্তং উপ্পাদেতব্বং.

‘‘‘যো খ্ৱাযং পুগ্গলো মক্খী পড়াসী, অযং মে পুগ্গলো অপ্পিযো অমনাপো; অহঞ্চেৱ খো পনস্সং মক্খী পড়াসী, অহংপাস্সং পৰেসং অপ্পিযো অমনাপো’তি. এৱং জানন্তেনাৱুসো, ভিক্খুনা ‘অমক্খী ভৱিস্সামি অপড়াসী’তি চিত্তং উপ্পাদেতব্বং.

‘‘‘যো খ্ৱাযং পুগ্গলো ইস্সুকী মচ্ছৰী, অযং মে পুগ্গলো অপ্পিযো অমনাপো; অহঞ্চেৱ খো পনস্সং ইস্সুকী মচ্ছৰী, অহংপাস্সং পৰেসং অপ্পিযো অমনাপো’তি. এৱং জানন্তেনাৱুসো, ভিক্খুনা ‘অনিস্সুকী ভৱিস্সামি অমচ্ছৰী’তি চিত্তং উপ্পাদেতব্বং.

‘‘‘যো খ্ৱাযং পুগ্গলো সঠো মাযাৱী, অযং মে পুগ্গলো অপ্পিযো অমনাপো; অহঞ্চেৱ খো পনস্সং সঠো মাযাৱী, অহংপাস্সং পৰেসং অপ্পিযো অমনাপো’তি. এৱং জানন্তেনাৱুসো, ভিক্খুনা ‘অসঠো ভৱিস্সামি অমাযাৱী’তি চিত্তং উপ্পাদেতব্বং.

‘‘‘যো খ্ৱাযং পুগ্গলো থদ্ধো অতিমানী, অযং মে পুগ্গলো অপ্পিযো অমনাপো; অহঞ্চেৱ খো পনস্সং থদ্ধো অতিমানী, অহংপাস্সং পৰেসং অপ্পিযো অমনাপো’তি. এৱং জানন্তেনাৱুসো, ভিক্খুনা ‘অত্থদ্ধো ভৱিস্সামি অনতিমানী’তি চিত্তং উপ্পাদেতব্বং.

‘‘‘যো খ্ৱাযং পুগ্গলো সন্দিট্ঠিপৰামাসী আধানগ্গাহী দুপ্পটিনিস্সগ্গী, অযং মে পুগ্গলো অপ্পিযো অমনাপো; অহঞ্চেৱ খো পনস্সং সন্দিট্ঠিপৰামাসী আধানগ্গাহী দুপ্পটিনিস্সগ্গী, অহংপাস্সং পৰেসং অপ্পিযো অমনাপো’তি. এৱং জানন্তেনাৱুসো, ভিক্খুনা ‘অসন্দিট্ঠিপৰামাসী ভৱিস্সামি অনাধানগ্গাহী সুপ্পটিনিস্সগ্গী’তি চিত্তং উপ্পাদেতব্বং.

১৮৪. ‘‘তত্ৰাৱুসো, ভিক্খুনা অত্তনাৱ অত্তানং এৱং পচ্চৱেক্খিতব্বং – ‘কিং নু খোম্হি পাপিচ্ছো, পাপিকানং ইচ্ছানং ৱসং গতো’তি? সচে, আৱুসো, ভিক্খু পচ্চৱেক্খমানো এৱং জানাতি – ‘পাপিচ্ছো খোম্হি, পাপিকানং ইচ্ছানং ৱসং গতো’তি, তেনাৱুসো, ভিক্খুনা তেসংযেৱ পাপকানং অকুসলানং ধম্মানং পহানায ৱাযমিতব্বং. সচে পনাৱুসো, ভিক্খু পচ্চৱেক্খমানো এৱং জানাতি – ‘ন খোম্হি পাপিচ্ছো, ন পাপিকানং ইচ্ছানং ৱসং গতো’তি, তেনাৱুসো, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

‘‘পুন চপৰং, আৱুসো, ভিক্খুনা অত্তনাৱ অত্তানং এৱং পচ্চৱেক্খিতব্বং – ‘কিং নু খোম্হি অত্তুক্কংসকো পৰৱম্ভী’তি? সচে, আৱুসো, ভিক্খু পচ্চৱেক্খমানো এৱং জানাতি – ‘অত্তুক্কংসকো খোম্হি পৰৱম্ভী’তি, তেনাৱুসো, ভিক্খুনা তেসংযেৱ পাপকানং অকুসলানং ধম্মানং পহানায ৱাযমিতব্বং. সচে পনাৱুসো, ভিক্খু পচ্চৱেক্খমানো এৱং জানাতি – ‘অনত্তুক্কংসকো খোম্হি অপৰৱম্ভী’তি, তেনাৱুসো, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

‘‘পুন চপৰং, আৱুসো, ভিক্খুনা অত্তনাৱ অত্তানং এৱং পচ্চৱেক্খিতব্বং – ‘কিং নু খোম্হি কোধনো কোধাভিভূতো’তি? সচে, আৱুসো, ভিক্খু পচ্চৱেক্খমানো এৱং জানাতি – ‘কোধনো খোম্হি কোধাভিভূতো’তি, তেনাৱুসো, ভিক্খুনা তেসংযেৱ পাপকানং অকুসলানং ধম্মানং পহানায ৱাযমিতব্বং. সচে পনাৱুসো, ভিক্খু পচ্চৱেক্খমানো এৱং জানাতি – ‘ন খোম্হি কোধনো কোধাভিভূতো’তি, তেনাৱুসো, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

‘‘পুন চপৰং, আৱুসো, ভিক্খুনা অত্তনাৱ অত্তানং এৱং পচ্চৱেক্খিতব্বং – ‘কিং নু খোম্হি কোধনো কোধহেতু উপনাহী’তি? সচে, আৱুসো, ভিক্খু পচ্চৱেক্খমানো এৱং জানাতি ‘কোধনো খোম্হি কোধহেতু উপনাহী’তি, তেনাৱুসো, ভিক্খুনা তেসংযেৱ পাপকানং অকুসলানং ধম্মানং পহানায ৱাযমিতব্বং. সচে পনাৱুসো, ভিক্খু পচ্চৱেক্খমানো এৱং জানাতি ‘ন খোম্হি কোধনো কোধহেতু উপনাহী’তি, তেনাৱুসো, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

‘‘পুন চপৰং, আৱুসো, ভিক্খুনা অত্তনাৱ অত্তানং এৱং পচ্চৱেক্খিতব্বং – ‘কিং নু খোম্হি কোধনো কোধহেতু অভিসঙ্গী’তি? সচে, আৱুসো, ভিক্খু পচ্চৱেক্খমানো এৱং জানাতি – ‘কোধনো খোম্হি কোধহেতু অভিসঙ্গী’তি, তেনাৱুসো, ভিক্খুনা তেসংযেৱ পাপকানং অকুসলানং ধম্মানং পহানায ৱাযমিতব্বং. সচে পনাৱুসো, ভিক্খু পচ্চৱেক্খমানো এৱং জানাতি – ‘ন খোম্হি কোধনো কোধহেতু অভিসঙ্গী’তি, তেনাৱুসো, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

‘‘পুন চপৰং, আৱুসো, ভিক্খুনা অত্তনাৱ অত্তানং এৱং পচ্চৱেক্খিতব্বং – ‘কিং নু খোম্হি কোধনো কোধসামন্তা ৱাচং নিচ্ছাৰেতা’তি? সচে, আৱুসো, ভিক্খু পচ্চৱেক্খমানো এৱং জানাতি – ‘কোধনো খোম্হি কোধসামন্তা ৱাচং নিচ্ছাৰেতা’তি, তেনাৱুসো, ভিক্খুনা তেসংযেৱ পাপকানং অকুসলানং ধম্মানং পহানায ৱাযমিতব্বং. সচে পনাৱুসো, ভিক্খু পচ্চৱেক্খমানো এৱং জানাতি – ‘ন খোম্হি কোধনো কোধসামন্তা ৱাচং নিচ্ছাৰেতা’তি, তেনাৱুসো, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

‘‘পুন চপৰং, আৱুসো, ভিক্খুনা অত্তনাৱ অত্তানং এৱং পচ্চৱেক্খিতব্বং – ‘কিং নু খোম্হি চোদিতো চোদকেন চোদকং পটিপ্ফৰামী’তি? সচে, আৱুসো, ভিক্খু পচ্চৱেক্খমানো এৱং জানাতি ‘চোদিতো খোম্হি চোদকেন চোদকং পটিপ্ফৰামী’তি, তেনাৱুসো, ভিক্খুনা তেসংযেৱ পাপকানং অকুসলানং ধম্মানং পহানায ৱাযমিতব্বং. সচে পনাৱুসো, ভিক্খু পচ্চৱেক্খমানো এৱং জানাতি – ‘চোদিতো খোম্হি চোদকেন চোদকং নপ্পটিপ্ফৰামী’তি, তেনাৱুসো, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

‘‘পুন চপৰং, আৱুসো, ভিক্খুনা অত্তনাৱ অত্তানং এৱং পচ্চৱেক্খিতব্বং – ‘কিং নু খোম্হি চোদিতো চোদকেন চোদকং অপসাদেমী’তি? সচে, আৱুসো, ভিক্খু পচ্চৱেক্খমানো এৱং জানাতি ‘চোদিতো খোম্হি চোদকেন চোদকং অপসাদেমী’তি, তেনাৱুসো, ভিক্খুনা তেসংযেৱ পাপকানং অকুসলানং ধম্মানং পহানায ৱাযমিতব্বং. সচে পনাৱুসো, ভিক্খু পচ্চৱেক্খমানো এৱং জানাতি – ‘চোদিতো খোম্হি চোদকেন চোদকং ন অপসাদেমী’তি, তেনাৱুসো, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

‘‘পুন চপৰং, আৱুসো, ভিক্খুনা অত্তনাৱ অত্তানং এৱং পচ্চৱেক্খিতব্বং – ‘কিং নু খোম্হি চোদিতো চোদকেন চোদকস্স পচ্চাৰোপেমী’তি? সচে, আৱুসো, ভিক্খু পচ্চৱেক্খমানো এৱং জানাতি – ‘চোদিতো খোম্হি চোদকেন চোদকস্স পচ্চাৰোপেমী’তি, তেনাৱুসো, ভিক্খুনা তেসংযেৱ পাপকানং অকুসলানং ধম্মানং পহানায ৱাযমিতব্বং. সচে পনাৱুসো, ভিক্খু পচ্চৱেক্খমানো এৱং জানাতি – ‘চোদিতো খোম্হি চোদকেন চোদকস্স ন পচ্চাৰোপেমী’তি, তেনাৱুসো, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

‘‘পুন চপৰং, আৱুসো, ভিক্খুনা অত্তনাৱ অত্তানং এৱং পচ্চৱেক্খিতব্বং – ‘কিং নু খোম্হি চোদিতো চোদকেন অঞ্ঞেনঞ্ঞং পটিচৰামি, বহিদ্ধা কথং অপনামেমি, কোপঞ্চ দোসঞ্চ অপ্পচ্চযঞ্চ পাতুকৰোমী’তি? সচে, আৱুসো, ভিক্খু পচ্চৱেক্খমানো এৱং জানাতি – ‘চোদিতো খোম্হি চোদকেন অঞ্ঞেনঞ্ঞং পটিচৰামি, বহিদ্ধা কথং অপনামেমি, কোপঞ্চ দোসঞ্চ অপ্পচ্চযঞ্চ পাতুকৰোমী’তি, তেনাৱুসো, ভিক্খুনা তেসংযেৱ পাপকানং অকুসলানং ধম্মানং পহানায ৱাযমিতব্বং. সচে পনাৱুসো, ভিক্খু পচ্চৱেক্খমানো এৱং জানাতি – ‘চোদিতো খোম্হি চোদকেন ন অঞ্ঞেনঞ্ঞং পটিচৰামি, ন বহিদ্ধা কথং অপনামেমি, ন কোপঞ্চ দোসঞ্চ অপ্পচ্চযঞ্চ পাতুকৰোমী’তি, তেনাৱুসো, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

‘‘পুন চপৰং, আৱুসো, ভিক্খুনা অত্তনাৱ অত্তানং এৱং পচ্চৱেক্খিতব্বং – ‘কিং নু খোম্হি চোদিতো চোদকেন অপদানে ন সম্পাযামী’তি? সচে, আৱুসো, ভিক্খু পচ্চৱেক্খমানো এৱং জানাতি – ‘চোদিতো খোম্হি চোদকেন অপদানে ন সম্পাযামী’তি, তেনাৱুসো, ভিক্খুনা তেসংযেৱ পাপকানং অকুসলানং ধম্মানং পহানায ৱাযমিতব্বং. সচে পনাৱুসো, ভিক্খু পচ্চৱেক্খমানো এৱং জানাতি – ‘চোদিতো খোম্হি চোদকেন অপদানে সম্পাযামী’তি, তেনাৱুসো, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

‘‘পুন চপৰং, আৱুসো, ভিক্খুনা অত্তনাৱ অত্তানং এৱং পচ্চৱেক্খিতব্বং – ‘কিং নু খোম্হি মক্খী পড়াসী’তি? সচে, আৱুসো, ভিক্খু পচ্চৱেক্খমানো এৱং জানাতি – ‘মক্খী খোম্হি পড়াসী’তি, তেনাৱুসো, ভিক্খুনা তেসংযেৱ পাপকানং অকুসলানং ধম্মানং পহানায ৱাযমিতব্বং. সচে পনাৱুসো, ভিক্খু পচ্চৱেক্খমানো এৱং জানাতি – ‘অমক্খী খোম্হি অপড়াসী’তি, তেনাৱুসো, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

‘‘পুন চপৰং, আৱুসো, ভিক্খুনা অত্তনাৱ অত্তানং এৱং পচ্চৱেক্খিতব্বং – ‘কিং নু খোম্হি ইস্সুকী মচ্ছৰী’তি? সচে, আৱুসো, ভিক্খু পচ্চৱেক্খমানো এৱং জানাতি – ‘ইস্সুকী খোম্হি মচ্ছৰী’তি, তেনাৱুসো, ভিক্খুনা তেসংযেৱ পাপকানং অকুসলানং ধম্মানং পহানায ৱাযমিতব্বং. সচে পনাৱুসো, ভিক্খু পচ্চৱেক্খমানো এৱং জানাতি – ‘অনিস্সুকী খোম্হি অমচ্ছৰী’তি, তেনাৱুসো, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

‘‘পুন চপৰং, আৱুসো, ভিক্খুনা অত্তনাৱ অত্তানং এৱং পচ্চৱেক্খিতব্বং – ‘কিং নু খোম্হি সঠো মাযাৱী’তি? সচে, আৱুসো, ভিক্খু পচ্চৱেক্খমানো এৱং জানাতি – ‘সঠো খোম্হি মাযাৱী’তি, তেনাৱুসো, ভিক্খুনা তেসংযেৱ পাপকানং অকুসলানং ধম্মানং পহানায ৱাযমিতব্বং. সচে পনাৱুসো, ভিক্খু পচ্চৱেক্খমানো এৱং জানাতি – ‘অসঠো খোম্হি অমাযাৱী’তি, তেনাৱুসো, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

‘‘পুন চপৰং, আৱুসো, ভিক্খুনা অত্তনাৱ অত্তানং এৱং পচ্চৱেক্খিতব্বং – ‘কিং নু খোম্হি থদ্ধো অতিমানী’তি? সচে, আৱুসো, ভিক্খু পচ্চৱেক্খমানো এৱং জানাতি – ‘থদ্ধো খোম্হি অতিমানী’তি, তেনাৱুসো, ভিক্খুনা তেসংযেৱ পাপকানং অকুসলানং ধম্মানং পহানায ৱাযমিতব্বং. সচে পনাৱুসো, ভিক্খু পচ্চৱেক্খমানো এৱং জানাতি – ‘অত্থদ্ধো খোম্হি অনতিমানী’তি, তেনাৱুসো, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

‘‘পুন চপৰং, আৱুসো, ভিক্খুনা অত্তনাৱ অত্তানং এৱং পচ্চৱেক্খিতব্বং – ‘কিং নু খোম্হি সন্দিট্ঠিপৰামাসী আধানগ্গাহী দুপ্পটিনিস্সগ্গী’তি? সচে, আৱুসো, ভিক্খু পচ্চৱেক্খমানো এৱং জানাতি – ‘সন্দিট্ঠিপৰামাসী খোম্হি আধানগ্গাহী দুপ্পটিনিস্সগ্গী’তি, তেনাৱুসো, ভিক্খুনা তেসংযেৱ পাপকানং অকুসলানং ধম্মানং পহানায ৱাযমিতব্বং. সচে পনাৱুসো, ভিক্খু পচ্চৱেক্খমানো এৱং জানাতি – ‘অসন্দিট্ঠিপৰামাসী খোম্হি অনাধানগ্গাহী সুপ্পটিনিস্সগ্গী’তি, তেনাৱুসো, ভিক্খুনা তেনেৱ পীতিপামোজ্জেন ৱিহাতব্বং অহোৰত্তানুসিক্খিনা কুসলেসু ধম্মেসু.

‘‘সচে, আৱুসো, ভিক্খু পচ্চৱেক্খমানো সব্বেপিমে পাপকে অকুসলে ধম্মে অপ্পহীনে অত্তনি সমনুপস্সতি, তেনাৱুসো, ভিক্খুনা সব্বেসংযেৱ ইমেসং পাপকানং অকুসলানং ধম্মানং পহানায ৱাযমিতব্বং. সচে পনাৱুসো, ভিক্খু পচ্চৱেক্খমানো সব্বেপিমে পাপকে অকুসলে ধম্মে পহীনে অত্তনি সমনুপস্সতি, তেনাৱুসো, ভিক্খুনা তেনেৱ পীতিপামোজ্জেন ৱিহাতব্বং, অহোৰত্তানুসিক্খিনা কুসলেসু ধম্মেসু.

‘‘সেয্যথাপি, আৱুসো, ইত্থী ৱা পুৰিসো ৱা, দহৰো যুৱা মণ্ডনজাতিকো, আদাসে ৱা পৰিসুদ্ধে পৰিযোদাতে, অচ্ছে ৱা উদকপত্তে, সকং মুখনিমিত্তং পচ্চৱেক্খমানো, সচে তত্থ পস্সতি ৰজং ৱা অঙ্গণং ৱা, তস্সেৱ ৰজস্স ৱা অঙ্গণস্স ৱা পহানায ৱাযমতি; নো চে তত্থ পস্সতি ৰজং ৱা অঙ্গণং ৱা, তেনেৱ অত্তমনো হোতি – ‘লাভা ৱত মে, পৰিসুদ্ধং ৱত মে’তি. এৱমেৱ খো, আৱুসো, সচে ভিক্খু পচ্চৱেক্খমানো সব্বেপিমে পাপকে অকুসলে ধম্মে অপ্পহীনে অত্তনি সমনুপস্সতি, তেনাৱুসো, ভিক্খুনা সব্বেসংযেৱ ইমেসং পাপকানং অকুসলানং ধম্মানং পহানায ৱাযমিতব্বং. সচে পনাৱুসো, ভিক্খু পচ্চৱেক্খমানো সব্বেপিমে পাপকে অকুসলে ধম্মে পহীনে অত্তনি সমনুপস্সতি, তেনাৱুসো, ভিক্খুনা তেনেৱ পীতিপামোজ্জেন ৱিহাতব্বং, অহোৰত্তানুসিক্খিনা কুসলেসু ধম্মেসূ’’তি.

ইদমৱোচাযস্মা মহামোগ্গল্লানো. অত্তমনা তে ভিক্খূ আযস্মতো মহামোগ্গল্লানস্স ভাসিতং অভিনন্দুন্তি.

অনুমানসুত্তং নিট্ঠিতং পঞ্চমং.