৮. সল্লেখসুত্তং

৮১. এৱং মে সুতং – একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. অথ খো আযস্মা মহাচুন্দো সাযন্হসমযং পটিসল্লানা ৱুট্ঠিতো যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো আযস্মা মহাচুন্দো ভগৱন্তং এতদৱোচ – ‘‘যা ইমা, ভন্তে, অনেকৱিহিতা দিট্ঠিযো লোকে উপ্পজ্জন্তি – অত্তৱাদপটিসংযুত্তা ৱা লোকৱাদপটিসংযুত্তা ৱা – আদিমেৱ নু খো, ভন্তে, ভিক্খুনো মনসিকৰোতো এৱমেতাসং দিট্ঠীনং পহানং হোতি, এৱমেতাসং দিট্ঠীনং পটিনিস্সগ্গো হোতী’’তি?

৮২. ‘‘যা ইমা, চুন্দ, অনেকৱিহিতা দিট্ঠিযো লোকে উপ্পজ্জন্তি – অত্তৱাদপটিসংযুত্তা ৱা লোকৱাদপটিসংযুত্তা ৱা – যত্থ চেতা দিট্ঠিযো উপ্পজ্জন্তি যত্থ চ অনুসেন্তি যত্থ চ সমুদাচৰন্তি তং ‘নেতং মম, নেসোহমস্মি, ন মে সো অত্তা’তি – এৱমেতং যথাভূতং সম্মপ্পঞ্ঞা পস্সতো এৱমেতাসং দিট্ঠীনং পহানং হোতি, এৱমেতাসং দিট্ঠীনং পটিনিস্সগ্গো হোতি.

‘‘ঠানং খো পনেতং, চুন্দ, ৱিজ্জতি যং ইধেকচ্চো ভিক্খু ৱিৱিচ্চেৱ কামেহি ৱিৱিচ্চ অকুসলেহি ধম্মেহি সৱিতক্কং সৱিচাৰং ৱিৱেকজং পীতিসুখং পঠমং ঝানং উপসম্পজ্জ ৱিহৰেয্য. তস্স এৱমস্স – ‘সল্লেখেন ৱিহৰামী’তি. ন খো পনেতে, চুন্দ, অৰিযস্স ৱিনযে সল্লেখা ৱুচ্চন্তি. দিট্ঠধম্মসুখৱিহাৰা এতে অৰিযস্স ৱিনযে ৱুচ্চন্তি.

‘‘ঠানং খো পনেতং, চুন্দ, ৱিজ্জতি যং ইধেকচ্চো ভিক্খু ৱিতক্কৱিচাৰানং ৱূপসমা অজ্ঝত্তং সম্পসাদনং চেতসো একোদিভাৱং অৱিতক্কং অৱিচাৰং সমাধিজং পীতিসুখং দুতিযং ঝানং উপসম্পজ্জ ৱিহৰেয্য. তস্স এৱমস্স – ‘সল্লেখেন ৱিহৰামী’তি. ন খো পনেতে, চুন্দ, অৰিযস্স ৱিনযে সল্লেখা ৱুচ্চন্তি. দিট্ঠধম্মসুখৱিহাৰা এতে অৰিযস্স ৱিনযে ৱুচ্চন্তি.

‘‘ঠানং খো পনেতং, চুন্দ, ৱিজ্জতি যং ইধেকচ্চো ভিক্খু পীতিযা চ ৱিৰাগা উপেক্খকো চ ৱিহৰেয্য, সতো চ সম্পজানো সুখঞ্চ কাযেন পটিসংৱেদেয্য, যং তং অৰিযা আচিক্খন্তি – ‘উপেক্খকো সতিমা সুখৱিহাৰী’তি ততিযং ঝানং উপসম্পজ্জ ৱিহৰেয্য. তস্স এৱমস্স – ‘সল্লেখেন ৱিহৰামী’তি. ন খো পনেতে, চুন্দ, অৰিযস্স ৱিনযে সল্লেখা ৱুচ্চন্তি. দিট্ঠধম্মসুখৱিহাৰা এতে অৰিযস্স ৱিনযে ৱুচ্চন্তি.

‘‘ঠানং খো পনেতং, চুন্দ, ৱিজ্জতি যং ইধেকচ্চো ভিক্খু সুখস্স চ পহানা দুক্খস্স চ পহানা পুব্বেৱ সোমনস্সদোমনস্সানং অত্থঙ্গমা অদুক্খমসুং উপেক্খাসতিপাৰিসুদ্ধিং চতুত্থং ঝানং উপসম্পজ্জ ৱিহৰেয্য. তস্স এৱমস্স – ‘সল্লেখেন ৱিহৰামী’তি. ন খো পনেতে, চুন্দ, অৰিযস্স ৱিনযে সল্লেখা ৱুচ্চন্তি. দিট্ঠধম্মসুখৱিহাৰা এতে অৰিযস্স ৱিনযে ৱুচ্চন্তি.

‘‘ঠানং খো পনেতং, চুন্দ, ৱিজ্জতি যং ইধেকচ্চো ভিক্খু সব্বসো ৰূপসঞ্ঞানং সমতিক্কমা, পটিঘসঞ্ঞানং অত্থঙ্গমা, নানত্তসঞ্ঞানং অমনসিকাৰা, ‘অনন্তো আকাসো’তি আকাসানঞ্চাযতনং উপসম্পজ্জ ৱিহৰেয্য. তস্স এৱমস্স – ‘সল্লেখেন ৱিহৰামী’তি. ন খো পনেতে, চুন্দ, অৰিযস্স ৱিনযে সল্লেখা ৱুচ্চন্তি. সন্তা এতে ৱিহাৰা অৰিযস্স ৱিনযে ৱুচ্চন্তি.

‘‘ঠানং খো পনেতং, চুন্দ, ৱিজ্জতি যং ইধেকচ্চো ভিক্খু সব্বসো আকাসানঞ্চাযতনং সমতিক্কম্ম ‘অনন্তং ৱিঞ্ঞাণ’ন্তি ৱিঞ্ঞাণঞ্চাযতনং উপসম্পজ্জ ৱিহৰেয্য. তস্স এৱমস্স – ‘সল্লেখেন ৱিহৰামী’তি. ন খো পনেতে, চুন্দ, অৰিযস্স ৱিনযে সল্লেখা ৱুচ্চন্তি. সন্তা এতে ৱিহাৰা অৰিযস্স ৱিনযে ৱুচ্চন্তি.

‘‘ঠানং খো পনেতং, চুন্দ, ৱিজ্জতি যং ইধেকচ্চো ভিক্খু সব্বসো ৱিঞ্ঞাণঞ্চাযতনং সমতিক্কম্ম ‘নত্থি কিঞ্চী’তি আকিঞ্চঞ্ঞাযতনং উপসম্পজ্জ ৱিহৰেয্য. তস্স এৱমস্স – ‘সল্লেখেন ৱিহৰামী’তি. ন খো পনেতে, চুন্দ, অৰিযস্স ৱিনযে সল্লেখা ৱুচ্চন্তি. সন্তা এতে ৱিহাৰা অৰিযস্স ৱিনযে ৱুচ্চন্তি.

‘‘ঠানং খো পনেতং, চুন্দ, ৱিজ্জতি যং ইধেকচ্চো ভিক্খু সব্বসো আকিঞ্চঞ্ঞাযতনং সমতিক্কম্ম নেৱসঞ্ঞানাসঞ্ঞাযতনং উপসম্পজ্জ ৱিহৰেয্য. তস্স এৱমস্স – ‘সল্লেখেন ৱিহৰামী’তি. ন খো পনেতে, চুন্দ, অৰিযস্স ৱিনযে সল্লেখা ৱুচ্চন্তি. সন্তা এতে ৱিহাৰা অৰিযস্স ৱিনযে ৱুচ্চন্তি.

৮৩. ‘‘ইধ খো পন ৱো, চুন্দ, সল্লেখো কৰণীযো. ‘পৰে ৱিহিংসকা ভৱিস্সন্তি, মযমেত্থ অৱিহিংসকা ভৱিস্সামা’তি সল্লেখো কৰণীযো. ‘পৰে পাণাতিপাতী ভৱিস্সন্তি, মযমেত্থ পাণাতিপাতা পটিৱিৰতা ভৱিস্সামা’তি সল্লেখো কৰণীযো. ‘পৰে অদিন্নাদাযী ভৱিস্সন্তি, মযমেত্থ অদিন্নাদানা পটিৱিৰতা ভৱিস্সামা’তি সল্লেখো কৰণীযো. ‘পৰে অব্ৰহ্মচাৰী ভৱিস্সন্তি, মযমেত্থ ব্ৰহ্মচাৰী ভৱিস্সামা’তি সল্লেখো কৰণীযো. ‘পৰে মুসাৱাদী ভৱিস্সন্তি, মযমেত্থ মুসাৱাদা পটিৱিৰতা ভৱিস্সামা’তি সল্লেখো কৰণীযো. ‘পৰে পিসুণৱাচা [পিসুণা ৱাচা (সী. পী.)] ভৱিস্সন্তি, মযমেত্থ পিসুণায ৱাচায পটিৱিৰতা ভৱিস্সামা’তি সল্লেখো কৰণীযো. ‘পৰে ফৰুসৱাচা [ফৰুসা ৱাচা (সী. পী.)] ভৱিস্সন্তি, মযমেত্থ ফৰুসায ৱাচায পটিৱিৰতা ভৱিস্সামা’তি সল্লেখো কৰণীযো. ‘পৰে সম্ফপ্পলাপী ভৱিস্সন্তি, মযমেত্থ সম্ফপ্পলাপা পটিৱিৰতা ভৱিস্সামা’তি সল্লেখো কৰণীযো. ‘পৰে অভিজ্ঝালূ ভৱিস্সন্তি, মযমেত্থ অনভিজ্ঝালূ ভৱিস্সামা’তি সল্লেখো কৰণীযো. ‘পৰে ব্যাপন্নচিত্তা ভৱিস্সন্তি, মযমেত্থ অব্যাপন্নচিত্তা ভৱিস্সামা’তি সল্লেখো কৰণীযো. ‘পৰে মিচ্ছাদিট্ঠী ভৱিস্সন্তি, মযমেত্থ সম্মাদিট্ঠী ভৱিস্সামা’তি সল্লেখো কৰণীযো. ‘পৰে মিচ্ছাসঙ্কপ্পা ভৱিস্সন্তি, মযমেত্থ সম্মাসঙ্কপ্পা ভৱিস্সামা’তি সল্লেখো কৰণীযো. ‘পৰে মিচ্ছাৱাচা ভৱিস্সন্তি, মযমেত্থ সম্মাৱাচা ভৱিস্সামা’তি সল্লেখো কৰণীযো. ‘পৰে মিচ্ছাকম্মন্তা ভৱিস্সন্তি, মযমেত্থ সম্মাকম্মন্তা ভৱিস্সামা’তি সল্লেখো কৰণীযো. ‘পৰে মিচ্ছাআজীৱা ভৱিস্সন্তি, মযমেত্থ সম্মাআজীৱা ভৱিস্সামা’তি সল্লেখো কৰণীযো. ‘পৰে মিচ্ছাৱাযামা ভৱিস্সন্তি, মযমেত্থ সম্মাৱাযামা ভৱিস্সামা’তি সল্লেখো কৰণীযো. ‘পৰে মিচ্ছাসতী ভৱিস্সন্তি, মযমেত্থ সম্মাসতী ভৱিস্সামা’তি সল্লেখো কৰণীযো. ‘পৰে মিচ্ছাসমাধি ভৱিস্সন্তি, মযমেত্থ সম্মাসমাধী ভৱিস্সামা’তি সল্লেখো কৰণীযো. ‘পৰে মিচ্ছাঞাণী ভৱিস্সন্তি, মযমেত্থ সম্মাঞাণী ভৱিস্সামা’তি সল্লেখো কৰণীযো. ‘পৰে মিচ্ছাৱিমুত্তী ভৱিস্সন্তি, মযমেত্থ সম্মাৱিমুত্তী ভৱিস্সামা’তি সল্লেখো কৰণীযো.

‘‘‘পৰে থীনমিদ্ধপৰিযুট্ঠিতা ভৱিস্সন্তি, মযমেত্থ ৱিগতথীনমিদ্ধা ভৱিস্সামা’তি সল্লেখো কৰণীযো. ‘পৰে উদ্ধতা ভৱিস্সন্তি, মযমেত্থ অনুদ্ধতা ভৱিস্সামা’তি সল্লেখো কৰণীযো. ‘পৰে ৱিচিকিচ্ছী [ৱেচিকিচ্ছী (সী. পী. ক.)] ভৱিস্সন্তি, মযমেত্থ তিণ্ণৱিচিকিচ্ছা ভৱিস্সামা’তি সল্লেখো কৰণীযো. ‘পৰে কোধনা ভৱিস্সন্তি, মযমেত্থ অক্কোধনা ভৱিস্সামা’তি সল্লেখো কৰণীযো. ‘পৰে উপনাহী ভৱিস্সন্তি, মযমেত্থ অনুপনাহী ভৱিস্সামা’তি সল্লেখো কৰণীযো. ‘পৰে মক্খী ভৱিস্সন্তি, মযমেত্থ অমক্খী ভৱিস্সামা’তি সল্লেখো কৰণীযো. ‘পৰে পড়াসী ভৱিস্সন্তি, মযমেত্থ অপড়াসী ভৱিস্সামা’তি সল্লেখো কৰণীযো. ‘পৰে ইস্সুকী ভৱিস্সন্তি, মযমেত্থ অনিস্সুকী ভৱিস্সামা’তি সল্লেখো কৰণীযো. ‘পৰে মচ্ছৰী ভৱিস্সন্তি, মযমেত্থ অমচ্ছৰী ভৱিস্সামা’তি সল্লেখো কৰণীযো. ‘পৰে সঠা ভৱিস্সন্তি, মযমেত্থ অসঠা ভৱিস্সামা’তি সল্লেখো কৰণীযো. ‘পৰে মাযাৱী ভৱিস্সন্তি, মযমেত্থ অমাযাৱী ভৱিস্সামা’তি সল্লেখো কৰণীযো. ‘পৰে থদ্ধা ভৱিস্সন্তি, মযমেত্থ অত্থদ্ধা ভৱিস্সামা’তি সল্লেখো কৰণীযো. ‘পৰে অতিমানী ভৱিস্সন্তি, মযমেত্থ অনতিমানী ভৱিস্সামা’তি সল্লেখো কৰণীযো. ‘পৰে দুব্বচা ভৱিস্সন্তি, মযমেত্থ সুৱচা ভৱিস্সামা’তি সল্লেখো কৰণীযো. ‘পৰে পাপমিত্তা ভৱিস্সন্তি, মযমেত্থ কল্যাণমিত্তা ভৱিস্সামা’তি সল্লেখো কৰণীযো. ‘পৰে পমত্তা ভৱিস্সন্তি, মযমেত্থ অপ্পমত্তা ভৱিস্সামা’তি সল্লেখো কৰণীযো. ‘পৰে অস্সদ্ধা ভৱিস্সন্তি, মযমেত্থ সদ্ধা ভৱিস্সামা’তি সল্লেখো কৰণীযো. ‘পৰে অহিৰিকা ভৱিস্সন্তি, মযমেত্থ হিৰিমনা ভৱিস্সামা’তি সল্লেখো কৰণীযো. ‘পৰে অনোত্তাপী [অনোত্তপ্পী (ক.)] ভৱিস্সন্তি, মযমেত্থ ওত্তাপী ভৱিস্সামা’তি সল্লেখো কৰণীযো. ‘পৰে অপ্পস্সুতা ভৱিস্সন্তি, মযমেত্থ বহুস্সুতা ভৱিস্সামা’তি সল্লেখো কৰণীযো. ‘পৰে কুসীতা ভৱিস্সন্তি, মযমেত্থ আৰদ্ধৱীৰিযা ভৱিস্সামা’তি সল্লেখো কৰণীযো. ‘পৰে মুট্ঠস্সতী ভৱিস্সন্তি, মযমেত্থ উপট্ঠিতস্সতী ভৱিস্সামা’তি সল্লেখো কৰণীযো. ‘পৰে দুপ্পঞ্ঞা ভৱিস্সন্তি, মযমেত্থ পঞ্ঞাসম্পন্না ভৱিস্সামা’তি সল্লেখো কৰণীযো. ‘পৰে সন্দিট্ঠিপৰামাসী আধানগ্গাহী দুপ্পটিনিস্সগ্গী ভৱিস্সন্তি, মযমেত্থ অসন্দিট্ঠিপৰামাসী অনাধানগ্গাহী সুপ্পটিনিস্সগ্গী ভৱিস্সামা’তি সল্লেখো কৰণীযো.

৮৪. ‘‘চিত্তুপ্পাদম্পি খো অহং, চুন্দ, কুসলেসু ধম্মেসু বহুকাৰং [বহূপকাৰং (ক.)] ৱদামি, কো পন ৱাদো কাযেন ৱাচায অনুৱিধীযনাসু! তস্মাতিহ, চুন্দ, ‘পৰে ৱিহিংসকা ভৱিস্সন্তি, মযমেত্থ অৱিহিংসকা ভৱিস্সামা’তি চিত্তং উপ্পাদেতব্বং. ‘পৰে পাণাতিপাতী ভৱিস্সন্তি, মযমেত্থ পাণাতিপাতা পটিৱিৰতা ভৱিস্সামা’তি চিত্তং উপ্পাদেতব্বং…‘পৰে সন্দিট্ঠিপৰামাসী আধানগ্গাহী দুপ্পটিনিস্সগ্গী ভৱিস্সন্তি, মযমেত্থ অসন্দিট্ঠিপৰামাসী অনাধানগ্গাহী সুপ্পটিনিস্সগ্গী ভৱিস্সামা’তি চিত্তং উপ্পাদেতব্বং.

৮৫. ‘‘সেয্যথাপি, চুন্দ, ৱিসমো মগ্গো অস্স, তস্স [মগ্গো তস্সাস্স (সী. স্যা. পী.)] অঞ্ঞো সমো মগ্গো পৰিক্কমনায; সেয্যথা ৱা পন, চুন্দ, ৱিসমং তিত্থং অস্স, তস্স অঞ্ঞং সমং তিত্থং পৰিক্কমনায; এৱমেৱ খো, চুন্দ, ৱিহিংসকস্স পুৰিসপুগ্গলস্স অৱিহিংসা হোতি পৰিক্কমনায, পাণাতিপাতিস্স পুৰিসপুগ্গলস্স পাণাতিপাতা ৱেৰমণী হোতি পৰিক্কমনায, অদিন্নাদাযিস্স পুৰিসপুগ্গলস্স অদিন্নাদানা ৱেৰমণী হোতি পৰিক্কমনায, অব্ৰহ্মচাৰিস্স পুৰিসপুগ্গলস্স অব্ৰহ্মচৰিযা ৱেৰমণী হোতি পৰিক্কমনায, মুসাৱাদিস্স পুৰিসপুগ্গলস্স মুসাৱাদা ৱেৰমণী হোতি পৰিক্কমনায, পিসুণৱাচস্স পুৰিসপুগ্গলস্স পিসুণায ৱাচায ৱেৰমণী হোতি পৰিক্কমনায, ফৰুসৱাচস্স পুৰিসপুগ্গলস্স ফৰুসায ৱাচায ৱেৰমণী হোতি পৰিক্কমনায, সম্ফপ্পলাপিস্স পুৰিসপুগ্গলস্স সম্ফপ্পলাপা ৱেৰমণী হোতি পৰিক্কমনায, অভিজ্ঝালুস্স পুৰিসপুগ্গলস্স অনভিজ্ঝা হোতি পৰিক্কমনায, ব্যাপন্নচিত্তস্স পুৰিসপুগ্গলস্স অব্যাপাদো হোতি পৰিক্কমনায, মিচ্ছাদিট্ঠিস্স পুৰিসপুগ্গলস্স সম্মাদিট্ঠি হোতি পৰিক্কমনায, মিচ্ছাসঙ্কপ্পস্স পুৰিসপুগ্গলস্স সম্মাসঙ্কপ্পো হোতি পৰিক্কমনায, মিচ্ছাৱাচস্স পুৰিসপুগ্গলস্স সম্মাৱাচা হোতি পৰিক্কমনায, মিচ্ছাকম্মন্তস্স পুৰিসপুগ্গলস্স সম্মাকম্মন্তো হোতি পৰিক্কমনায, মিচ্ছাআজীৱস্স পুৰিসপুগ্গলস্স সম্মাআজীৱো হোতি পৰিক্কমনায, মিচ্ছাৱাযামস্স পুৰিসপুগ্গলস্স সম্মাৱাযামো হোতি পৰিক্কমনায, মিচ্ছাসতিস্স পুৰিসপুগ্গলস্স সম্মাসতি হোতি পৰিক্কমনায, মিচ্ছাসমাধিস্স পুৰিসপুগ্গলস্স সম্মাসমাধি হোতি পৰিক্কমনায, মিচ্ছাঞাণিস্স পুৰিসপুগ্গলস্স সম্মাঞাণং হোতি পৰিক্কমনায, মিচ্ছাৱিমুত্তিস্স পুৰিসপুগ্গলস্স সম্মাৱিমুত্তি হোতি পৰিক্কমনায.

‘‘থীনমিদ্ধপৰিযুট্ঠিতস্স পুৰিসপুগ্গলস্স ৱিগতথিনমিদ্ধতা হোতি পৰিক্কমনায, উদ্ধতস্স পুৰিসপুগ্গলস্স অনুদ্ধচ্চং হোতি পৰিক্কমনায, ৱিচিকিচ্ছিস্স পুৰিসপুগ্গলস্স তিণ্ণৱিচিকিচ্ছতা হোতি পৰিক্কমনায, কোধনস্স পুৰিসপুগ্গলস্স অক্কোধো হোতি পৰিক্কমনায, উপনাহিস্স পুৰিসপুগ্গলস্স অনুপনাহো হোতি পৰিক্কমনায, মক্খিস্স পুৰিসপুগ্গলস্স অমক্খো হোতি পৰিক্কমনায, পড়াসিস্স পুৰিসপুগ্গলস্স অপড়াসো হোতি পৰিক্কমনায, ইস্সুকিস্স পুৰিসপুগ্গলস্স অনিস্সুকিতা হোতি পৰিক্কমনায, মচ্ছৰিস্স পুৰিসপুগ্গলস্স অমচ্ছৰিযং হোতি পৰিক্কমনায, সঠস্স পুৰিসপুগ্গলস্স অসাঠেয্যং হোতি পৰিক্কমনায, মাযাৱিস্স পুৰিসপুগ্গলস্স অমাযা [অমাযাৱিতা (ক.)] হোতি পৰিক্কমনায, থদ্ধস্স পুৰিসপুগ্গলস্স অত্থদ্ধিযং হোতি পৰিক্কমনায, অতিমানিস্স পুৰিসপুগ্গলস্স অনতিমানো হোতি পৰিক্কমনায, দুব্বচস্স পুৰিসপুগ্গলস্স সোৱচস্সতা হোতি পৰিক্কমনায, পাপমিত্তস্স পুৰিসপুগ্গলস্স কল্যাণমিত্ততা হোতি পৰিক্কমনায, পমত্তস্স পুৰিসপুগ্গলস্স অপ্পমাদো হোতি পৰিক্কমনায, অস্সদ্ধস্স পুৰিসপুগ্গলস্স সদ্ধা হোতি পৰিক্কমনায, অহিৰিকস্স পুৰিসপুগ্গলস্স হিৰী হোতি পৰিক্কমনায, অনোত্তাপিস্স পুৰিসপুগ্গলস্স ওত্তপ্পং হোতি পৰিক্কমনায, অপ্পস্সুতস্স পুৰিসপুগ্গলস্স বাহুসচ্চং হোতি পৰিক্কমনায, কুসীতস্স পুৰিসপুগ্গলস্স ৱীৰিযাৰম্ভো হোতি পৰিক্কমনায, মুট্ঠস্সতিস্স পুৰিসপুগ্গলস্স উপট্ঠিতস্সতিতা হোতি পৰিক্কমনায, দুপ্পঞ্ঞস্স পুৰিসপুগ্গলস্স পঞ্ঞাসম্পদা হোতি পৰিক্কমনায, সন্দিট্ঠিপৰামাসি-আধানগ্গাহি-দুপ্পটিনিস্সগ্গিস্স পুৰিসপুগ্গলস্স অসন্দিট্ঠিপৰামাসিঅনাধানগ্গাহি-সুপ্পটিনিস্সগ্গিতা হোতি পৰিক্কমনায.

৮৬. ‘‘সেয্যথাপি, চুন্দ, যে কেচি অকুসলা ধম্মা সব্বে তে অধোভাগঙ্গমনীযা [অধোভাৱঙ্গমনীযা (সী. স্যা. পী.)], যে কেচি কুসলা ধম্মা সব্বে তে উপৰিভাগঙ্গমনীযা [উপৰিভাৱঙ্গমনীযা (সী. স্যা. পী.)], এৱমেৱ খো, চুন্দ, ৱিহিংসকস্স পুৰিসপুগ্গলস্স অৱিহিংসা হোতি উপৰিভাগায [উপৰিভাৱায (সী. স্যা. ক.)], পাণাতিপাতিস্স পুৰিসপুগ্গলস্স পাণাতিপাতা ৱেৰমণী হোতি উপৰিভাগায…পে… সন্দিট্ঠিপৰামাসি-আধানগ্গাহি-দুপ্পটিনিস্সগ্গিস্স পুৰিসপুগ্গলস্স অসন্দিট্ঠিপৰামাসি-অনাধানগ্গাহি-সুপ্পটিনিস্সগ্গিতা হোতি উপৰিভাগায.

৮৭. ‘‘সো ৱত, চুন্দ, অত্তনা পলিপপলিপন্নো পৰং পলিপপলিপন্নং উদ্ধৰিস্সতীতি নেতং ঠানং ৱিজ্জতি. সো ৱত, চুন্দ, অত্তনা অপলিপপলিপন্নো পৰং পলিপপলিপন্নং উদ্ধৰিস্সতীতি ঠানমেতং ৱিজ্জতি. সো ৱত, চুন্দ, অত্তনা অদন্তো অৱিনীতো অপৰিনিব্বুতো পৰং দমেস্সতি ৱিনেস্সতি পৰিনিব্বাপেস্সতীতি নেতং ঠানং ৱিজ্জতি. সো ৱত, চুন্দ, অত্তনা দন্তো ৱিনীতো পৰিনিব্বুতো পৰং দমেস্সতি ৱিনেস্সতি পৰিনিব্বাপেস্সতীতি ঠানমেতং ৱিজ্জতি. এৱমেৱ খো, চুন্দ, ৱিহিংসকস্স পুৰিসপুগ্গলস্স অৱিহিংসা হোতি পৰিনিব্বানায, পাণাতিপাতিস্স পুৰিসপুগ্গলস্স পাণাতিপাতা ৱেৰমণী হোতি পৰিনিব্বানায. অদিন্নাদাযিস্স পুৰিসপুগ্গলস্স অদিন্নাদানা ৱেৰমণী হোতি পৰিনিব্বানায. অব্ৰহ্মচাৰিস্স পুৰিসপুগ্গলস্স অব্ৰহ্মচৰিযা ৱেৰমণী হোতি পৰিনিব্বানায. মুসাৱাদিস্স পুৰিসপুগ্গলস্স মুসাৱাদা ৱেৰমণী হোতি পৰিনিব্বানায. পিসুণৱাচস্স পুৰিসপুগ্গলস্স পিসুণায ৱাচায ৱেৰমণী হোতি পৰিনিব্বানায. ফৰুসৱাচস্স পুৰিসপুগ্গলস্স ফৰুসায ৱাচায ৱেৰমণী হোতি পৰিনিব্বানায. সম্ফপ্পলাপিস্স পুৰিসপুগ্গলস্স সম্ফপ্পলাপা ৱেৰমণী হোতি পৰিনিব্বানায. অভিজ্ঝালুস্স পুৰিসপুগ্গলস্স অনভিজ্ঝা হোতি পৰিনিব্বানায. ব্যাপন্নচিত্তস্স পুৰিসপুগ্গলস্স অব্যাপাদো হোতি পৰিনিব্বানায. মিচ্ছাদিট্ঠিস্স পুৰিসপুগ্গলস্স সম্মাদিট্ঠি হোতি পৰিনিব্বানায. মিচ্ছাসঙ্কপ্পস্স পুৰিসপুগ্গলস্স সম্মাসঙ্কপ্পো হোতি পৰিনিব্বানায. মিচ্ছাৱাচস্স পুৰিসপুগ্গলস্স সম্মাৱাচা হোতি পৰিনিব্বানায. মিচ্ছাকম্মন্তস্স পুৰিসপুগ্গলস্স সম্মাকম্মন্তো হোতি পৰিনিব্বানায. মিচ্ছাআজীৱস্স পুৰিসপুগ্গলস্স সম্মাআজীৱো হোতি পৰিনিব্বানায. মিচ্ছাৱাযামস্স পুৰিসপুগ্গলস্স সম্মাৱাযামো হোতি পৰিনিব্বানায. মিচ্ছাসতিস্স পুৰিসপুগ্গলস্স সম্মাসতি হোতি পৰিনিব্বানায. মিচ্ছাসমাধিস্স পুৰিসপুগ্গলস্স সম্মাসমাধি হোতি পৰিনিব্বানায. মিচ্ছাঞাণিস্স পুৰিসপুগ্গলস্স সম্মাঞাণং হোতি পৰিনিব্বানায. মিচ্ছাৱিমুত্তিস্স পুৰিসপুগ্গলস্স সম্মাৱিমুত্তি হোতি পৰিনিব্বানায.

‘‘থীনমিদ্ধপৰিযুট্ঠিতস্স পুৰিসপুগ্গলস্স ৱিগতথিনমিদ্ধতা হোতি পৰিনিব্বানায. উদ্ধতস্স পুৰিসপুগ্গলস্স অনুদ্ধচ্চং হোতি পৰিনিব্বানায. ৱিচিকিচ্ছিস্স পুৰিসপুগ্গলস্স তিণ্ণৱিচিকিচ্ছতা হোতি পৰিনিব্বানায. কোধনস্স পুৰিসপুগ্গলস্স অক্কোধো হোতি পৰিনিব্বানায. উপনাহিস্স পুৰিসপুগ্গলস্স অনুপনাহো হোতি পৰিনিব্বানায. মক্খিস্স পুৰিসপুগ্গলস্স অমক্খো হোতি পৰিনিব্বানায. পড়াসিস্স পুৰিসপুগ্গলস্স অপড়াসো হোতি পৰিনিব্বানায. ইস্সুকিস্স পুৰিসপুগ্গলস্স অনিস্সুকিতা হোতি পৰিনিব্বানায. মচ্ছৰিস্স পুৰিসপুগ্গলস্স অমচ্ছৰিযং হোতি পৰিনিব্বানায. সঠস্স পুৰিসপুগ্গলস্স অসাঠেয্যং হোতি পৰিনিব্বানায. মাযাৱিস্স পুৰিসপুগ্গলস্স অমাযা হোতি পৰিনিব্বানায. থদ্ধস্স পুৰিসপুগ্গলস্স অত্থদ্ধিযং হোতি পৰিনিব্বানায. অতিমানিস্স পুৰিসপুগ্গলস্স অনতিমানো হোতি পৰিনিব্বানায. দুব্বচস্স পুৰিসপুগ্গলস্স সোৱচস্সতা হোতি পৰিনিব্বানায. পাপমিত্তস্স পুৰিসপুগ্গলস্স কল্যাণমিত্ততা হোতি পৰিনিব্বানায. পমত্তস্স পুৰিসপুগ্গলস্স অপ্পমাদো হোতি পৰিনিব্বানায. অস্সদ্ধস্স পুৰিসপুগ্গলস্স সদ্ধা হোতি পৰিনিব্বানায. অহিৰিকস্স পুৰিসপুগ্গলস্স হিৰী হোতি পৰিনিব্বানায. অনোত্তাপিস্স পুৰিসপুগ্গলস্স ওত্তপ্পং হোতি পৰিনিব্বানায. অপ্পস্সুতস্স পুৰিসপুগ্গলস্স বাহুসচ্চং হোতি পৰিনিব্বানায. কুসীতস্স পুৰিসপুগ্গলস্স ৱীৰিযাৰম্ভো হোতি পৰিনিব্বানায. মুট্ঠস্সতিস্স পুৰিসপুগ্গলস্স উপট্ঠিতস্সতিতা হোতি পৰিনিব্বানায. দুপ্পঞ্ঞস্স পুৰিসপুগ্গলস্স পঞ্ঞাসম্পদা হোতি পৰিনিব্বানায. সন্দিট্ঠিপৰামাসি-আধানগ্গাহি-দুপ্পটিনিস্সগ্গিস্স পুৰিসপুগ্গলস্স অসন্দিট্ঠিপৰামাসি-অনাধানগ্গাহি-সুপ্পটিনিস্সগ্গিতা হোতি পৰিনিব্বানায.

৮৮. ‘‘ইতি খো, চুন্দ, দেসিতো মযা সল্লেখপৰিযাযো, দেসিতো চিত্তুপ্পাদপৰিযাযো, দেসিতো পৰিক্কমনপৰিযাযো, দেসিতো উপৰিভাগপৰিযাযো, দেসিতো পৰিনিব্বানপৰিযাযো. যং খো, চুন্দ, সত্থাৰা কৰণীযং সাৱকানং হিতেসিনা অনুকম্পকেন অনুকম্পং উপাদায, কতং ৱো তং মযা. ‘এতানি, চুন্দ, ৰুক্খমূলানি, এতানি সুঞ্ঞাগাৰানি, ঝাযথ, চুন্দ, মা পমাদত্থ, মা পচ্ছাৱিপ্পটিসাৰিনো অহুৱত্থ’ – অযং খো অম্হাকং অনুসাসনী’’তি.

ইদমৱোচ ভগৱা. অত্তমনো আযস্মা মহাচুন্দো ভগৱতো ভাসিতং অভিনন্দীতি.

চতুত্তালীসপদা ৱুত্তা, সন্ধযো পঞ্চ দেসিতা;

সল্লেখো নাম সুত্তন্তো, গম্ভীৰো সাগৰূপমোতি.

সল্লেখসুত্তং নিট্ঠিতং অট্ঠমং.