৯. মট্ঠকুণ্ডলীৱিমানৱত্থু

১২০৭. [পে. ৱ. ১৮৬] ‘‘অলঙ্কতো মট্ঠকুণ্ডলী [মট্টকুণ্ডলী (সী.)], মালধাৰী হৰিচন্দনুস্সদো;

বাহা পগ্গয্হ কন্দসি, ৱনমজ্ঝে কিং দুক্খিতো তুৱ’’ন্তি.

১২০৮. ‘‘সোৱণ্ণমযো পভস্সৰো, উপ্পন্নো ৰথপঞ্জৰো মম;

তস্স চক্কযুগং ন ৱিন্দামি, তেন দুক্খেন জহামি [জহিস্সং (সী.), জহিস্সামি (স্যা. পী.)] জীৱিত’’ন্তি.

১২০৯. ‘‘সোৱণ্ণমযং মণিমযং, লোহিতকমযং [লোহিতঙ্গমযং (স্যা.), লোহিতঙ্কমযং (সী.), লোহমযং (কত্থচি)] অথ ৰূপিযমযং;

আচিক্খ [আচিক্খথ (ক.)] মে ভদ্দমাণৱ, চক্কযুগং পটিপাদযামি তে’’তি.

১২১০. সো মাণৱো তস্স পাৱদি, ‘‘চন্দিমসূৰিযা উভযেত্থ দিস্সৰে;

সোৱণ্ণমযো ৰথো মম, তেন চক্কযুগেন সোভতী’’তি.

১২১১. ‘‘বালো খো ত্ৱং অসি মাণৱ, যো ত্ৱং পত্থযসে অপত্থিযং;

মঞ্ঞামি তুৱং মৰিস্সসি, ন হি ত্ৱং লচ্ছসি চন্দিমসূৰিযে’’তি.

১২১২. ‘‘গমনাগমনম্পি দিস্সতি, ৱণ্ণধাতু উভযত্থ ৱীথিযা;

পেতো [পেতো পন (সী. স্যা.)] কালকতো ন দিস্সতি, কো নিধ কন্দতং বাল্যতৰো’’তি.

১২১৩. ‘‘সচ্চং খো ৱদেসি মাণৱ, অহমেৱ কন্দতং বাল্যতৰো;

চন্দং ৱিয দাৰকো ৰুদং, পেতং কালকতাভিপত্থযি’’ন্তি.

১২১৪. ‘‘আদিত্তং ৱত মং সন্তং, ঘতসিত্তংৱ পাৱকং;

ৱাৰিনা ৱিয ওসিঞ্চং, সব্বং নিব্বাপযে দৰং.

১২১৫. ‘‘অব্বহী [অব্বূড়্হ (পী.), অব্বূড়্হং (স্যা. ক.)] ৱত মে সল্লং, সোকং হদযনিস্সিতং;

যো মে সোকপৰেতস্স, পুত্তসোকং অপানুদি.

১২১৬. ‘‘স্ৱাহং অব্বূড়্হসল্লোস্মি, সীতিভূতোস্মি নিব্বুতো;

ন সোচামি ন ৰোদামি, ৱত সুত্ৱান মাণৱাতি.

১২১৭. ‘‘দেৱতা নুসি গন্ধব্বো, অদু [আদু (সী. স্যা.)] সক্কো পুৰিন্দদো;

কো ৱা ত্ৱং কস্স ৱা পুত্তো, কথং জানেমু তং ময’’ন্তি.

১২১৮. ‘‘যঞ্চ [যং (ক.)] কন্দসি যঞ্চ ৰোদসি, পুত্তং আড়াহনে সযং দহিত্ৱা;

স্ৱাহং কুসলং কৰিত্ৱা কম্মং, তিদসানং সহব্যতং গতো’’তি [পত্তোতি (সী. স্যা. পী.)].

১২১৯. ‘‘অপ্পং ৱা বহুং ৱা নাদ্দসাম, দানং দদন্তস্স সকে অগাৰে;

উপোসথকম্মং ৱা [উপোসথকম্মঞ্চ (ক.)] তাদিসং, কেন কম্মেন গতোসি দেৱলোক’’ন্তি.

১২২০. ‘‘আবাধিকোহং দুক্খিতো গিলানো, আতুৰৰূপোম্হি সকে নিৱেসনে;

বুদ্ধং ৱিগতৰজং ৱিতিণ্ণকঙ্খং, অদ্দক্খিং সুগতং অনোমপঞ্ঞং.

১২২১. ‘‘স্ৱাহং মুদিতমনো পসন্নচিত্তো, অঞ্জলিং অকৰিং তথাগতস্স;

তাহং কুসলং কৰিত্ৱান কম্মং, তিদসানং সহব্যতং গতো’’তি.

১২২২. ‘‘অচ্ছৰিযং ৱত অব্ভুতং ৱত, অঞ্জলিকম্মস্স অযমীদিসো ৱিপাকো;

অহম্পি মুদিতমনো পসন্নচিত্তো, অজ্জেৱ বুদ্ধং সৰণং ৱজামী’’তি.

১২২৩. ‘‘অজ্জেৱ বুদ্ধং সৰণং ৱজাহি, ধম্মঞ্চ সঙ্ঘঞ্চ পসন্নচিত্তো;

তথেৱ সিক্খায পদানি পঞ্চ, অখণ্ডফুল্লানি সমাদিযস্সু.

১২২৪. ‘‘পাণাতিপাতা ৱিৰমস্সু খিপ্পং, লোকে অদিন্নং পৰিৱজ্জযস্সু;

অমজ্জপো মা চ মুসা ভণাহি, সকেন দাৰেন চ হোহি তুট্ঠো’’তি.

১২২৫. ‘‘অত্থকামোসি মে যক্খ, হিতকামোসি দেৱতে;

কৰোমি তুয্হং ৱচনং, ত্ৱংসি আচৰিযো মমাতি.

১২২৬. ‘‘উপেমি সৰণং বুদ্ধং, ধম্মঞ্চাপি অনুত্তৰং;

সঙ্ঘঞ্চ নৰদেৱস্স, গচ্ছামি সৰণং অহং.

১২২৭. ‘‘পাণাতিপাতা ৱিৰমামি খিপ্পং, লোকে অদিন্নং পৰিৱজ্জযামি;

অমজ্জপো নো চ মুসা ভণামি, সকেন দাৰেন চ হোমি তুট্ঠো’’তি.

মট্ঠকুণ্ডলীৱিমানং নৱমং.