৭. সুনিক্খিত্তৱগ্গো

১. চিত্তলতাৱিমানৱত্থু

১১১৪. ‘‘যথা ৱনং চিত্তলতং পভাসতি, উয্যানসেট্ঠং তিদসানমুত্তমং;

তথূপমং তুয্হমিদং ৱিমানং, ওভাসযং তিট্ঠতি অন্তলিক্খে.

১১১৫. ‘‘দেৱিদ্ধিপত্তোসি মহানুভাৱো, মনুস্সভূতো কিমকাসি পুঞ্ঞং;

কেনাসি এৱং জলিতানুভাৱো, ৱণ্ণো চ তে সব্বদিসা পভাসতী’’তি.

১১১৬. সো দেৱপুত্তো অত্তমনো…পে… যস্স কম্মস্সিদং ফলং.

১১১৭. ‘‘অহং মনুস্সেসু মনুস্সভূতো, দলিদ্দো অতাণো কপণো কম্মকৰো অহোসিং;

জিণ্ণে চ মাতাপিতৰো অভাৰিং [অভৰিং (সী. স্যা.)], পিযা চ মে সীলৱন্তো অহেসুং;

অন্নঞ্চ পানঞ্চ পসন্নচিত্তো, সক্কচ্চ দানং ৱিপুলং অদাসি.

১১১৮. ‘‘তেন মেতাদিসো ৱণ্ণো…পে… ৱণ্ণো চ মে সব্বদিসা পভাসতী’’তি.

চিত্তলতাৱিমানং পঠমং.

২. নন্দনৱিমানৱত্থু

১১২০. ‘‘যথা ৱনং নন্দনং [নন্দনং চিত্তলতং (সী. স্যা. ক.), নন্দৱনং (ক.)] পভাসতি, উয্যানসেট্ঠং তিদসানমুত্তমং;

তথূপমং তুয্হমিদং ৱিমানং, ওভাসযং তিট্ঠতি অন্তলিক্খে.

১১২১. ‘‘দেৱিদ্ধিপত্তোসি মহানুভাৱো, মনুস্সভূতো কিমকাসি পুঞ্ঞং;

কেনাসি এৱং জলিতানুভাৱো, ৱণ্ণো চ তে সব্বদিসা পভাসতী’’তি.

১১২২. সো দেৱপুত্তো অত্তমনো…পে… যস্স কম্মস্সিদং ফলং.

১১২৩. ‘‘অহং মনুস্সেসু মনুস্সভূতো, দলিদ্দো অতাণো কপণো কম্মকৰো অহোসিং;

জিণ্ণে চ মাতাপিতৰো অভাৰিং, পিযা চ মে সীলৱন্তো অহেসুং;

অন্নঞ্চ পানঞ্চ পসন্নচিত্তো, সক্কচ্চ দানং ৱিপুলং অদাসিং.

১১২৪. ‘‘তেন মেতাদিসো ৱণ্ণো…পে… ৱণ্ণো চ মে সব্বদিসা পভাসতী’’তি.

নন্দনৱিমানং দুতিযং.

৩. মণিথূণৱিমানৱত্থু

১১২৬. ‘‘উচ্চমিদং মণিথূণং ৱিমানং, সমন্ততো দ্ৱাদস যোজনানি;

কূটাগাৰা সত্তসতা উড়াৰা, ৱেড়ুৰিযথম্ভা ৰুচকত্থতা সুভা.

১১২৭. ‘‘তত্থচ্ছসি পিৱসি খাদসি চ, দিব্বা চ ৱীণা পৱদন্তি ৱগ্গুং;

দিব্বা ৰসা কামগুণেত্থ পঞ্চ, নাৰিযো চ নচ্চন্তি সুৱণ্ণছন্না.

১১২৮. ‘‘কেন তেতাদিসো ৱণ্ণো…পে…ৱণ্ণো চ তে সব্বদিসা পভাসতী’’তি.

১১৩০. সো দেৱপুত্তো অত্তমনো…পে…যস্স কম্মস্সিদং ফলং.

১১৩১. ‘‘অহং মনুস্সেসু মনুস্সভূতো, ৱিৱনে পথে সঙ্কমনং [চঙ্কমনং (সী.), চঙ্কমং (স্যা.), সমকং (ক. সী.)] অকাসিং;

আৰামৰুক্খানি চ ৰোপযিস্সং, পিযা চ মে সীলৱন্তো অহেসুং;

অন্নঞ্চ পানঞ্চ পসন্নচিত্তো, সক্কচ্চ দানং ৱিপুলং অদাসিং.

১১৩২. ‘‘তেন মেতাদিসো ৱণ্ণো…পে… ৱণ্ণো চ মে সব্বদিসা পভাসতী’’তি.

মণিথূণৱিমানং ততিযং.

৪. সুৱণ্ণৱিমানৱত্থু

১১৩৪. ‘‘সোৱণ্ণমযে পব্বতস্মিং, ৱিমানং সব্বতোপভং;

হেমজালপটিচ্ছন্নং [হেমজালকপচ্ছন্নং (সী.)], কিঙ্কিণি [কিঙ্কণিক (স্যা. ক.), কিঙ্কিণিক (পী.)] জালকপ্পিতং.

১১৩৫. ‘‘অট্ঠংসা সুকতা থম্ভা, সব্বে ৱেড়ুৰিযামযা;

একমেকায অংসিযা, ৰতনা সত্ত নিম্মিতা.

১১৩৬. ‘‘ৱেড়ুৰিযসুৱণ্ণস্স, ফলিকা ৰূপিযস্স চ;

মসাৰগল্লমুত্তাহি, লোহিতঙ্গমণীহি চ.

১১৩৭. ‘‘চিত্ৰা মনোৰমা ভূমি, ন তত্থুদ্ধংসতী ৰজো;

গোপাণসীগণা পীতা, কূটং ধাৰেন্তি নিম্মিতা.

১১৩৮. ‘‘সোপাণানি চ চত্তাৰি, নিম্মিতা চতুৰো দিসা;

নানাৰতনগব্ভেহি, আদিচ্চোৱ ৱিৰোচতি.

১১৩৯. ‘‘ৱেদিযা চতস্সো তত্থ, ৱিভত্তা ভাগসো মিতা;

দদ্দল্লমানা আভন্তি, সমন্তা চতুৰো দিসা.

১১৪০. ‘‘তস্মিং ৱিমানে পৱৰে, দেৱপুত্তো মহপ্পভো;

অতিৰোচসি ৱণ্ণেন, উদযন্তোৱ ভাণুমা.

১১৪১. ‘‘দানস্স তে ইদং ফলং, অথো সীলস্স ৱা পন;

অথো অঞ্জলিকম্মস্স, তং মে অক্খাহি পুচ্ছিতো’’.

১১৪২. সো দেৱপুত্তো অত্তমনো…পে… যস্স কম্মস্সিদং ফলং.

১১৪৩. ‘‘অহং অন্ধকৱিন্দস্মিং, বুদ্ধস্সাদিচ্চবন্ধুনো;

ৱিহাৰং সত্থু কাৰেসিং, পসন্নো সেহি পাণিভি.

১১৪৪. ‘‘তত্থ গন্ধঞ্চ মালঞ্চ, পচ্চযঞ্চ [পচ্চগ্গঞ্চ (সী.), পচ্চগ্ঘঞ্চ (?)] ৱিলেপনং;

ৱিহাৰং সত্থু অদাসিং, ৱিপ্পসন্নেন চেতসা;

তেন ময্হং ইদং লদ্ধং, ৱসং ৱত্তেমি নন্দনে.

১১৪৫. ‘‘নন্দনে চ ৱনে [নন্দনে পৱনে (সী. স্যা.)] ৰম্মে, নানাদিজগণাযুতে;

ৰমামি নচ্চগীতেহি, অচ্ছৰাহি পুৰক্খতো’’তি.

সুৱণ্ণৱিমানং চতুত্থং.

৫. অম্বৱিমানৱত্থু

১১৪৬. ‘‘উচ্চমিদং মণিথূণং ৱিমানং, সমন্ততো দ্ৱাদস যোজনানি;

কূটাগাৰা সত্তসতা উড়াৰা, ৱেড়ুৰিযথম্ভা ৰুচকত্থতা সুভা.

১১৪৭. ‘‘তত্থচ্ছসি পিৱসি খাদসি চ, দিব্বা চ ৱীণা পৱদন্তি ৱগ্গুং;

দিব্বা ৰসা কামগুণেত্থ পঞ্চ, নাৰিযো চ নচ্চন্তি সুৱণ্ণছন্না.

১১৪৮. ‘‘কেন তেতাদিসো ৱণ্ণো…পে… ৱণ্ণো চ তে সব্বদিসা পভাসতী’’তি.

১১৫০. সো দেৱপুত্তো অত্তমনো…পে… যস্স কম্মস্সিদং ফলং.

১১৫১. ‘‘গিম্হানং পচ্ছিমে মাসে, পতপন্তে [পতাপন্তে (স্যা.), পতাপেন্তে (ক.)] দিৱঙ্কৰে;

পৰেসং ভতকো পোসো, অম্বাৰামমসিঞ্চতি.

১১৫২. ‘‘অথ তেনাগমা ভিক্খু, সাৰিপুত্তোতি ৱিস্সুতো;

কিলন্তৰূপো কাযেন, অকিলন্তোৱ চেতসা.

১১৫৩. ‘‘তঞ্চ দিস্ৱান আযন্তং, অৱোচং অম্বসিঞ্চকো;

সাধু তং [সাধুকং (ক.)] ভন্তে ন্হাপেয্যং, যং মমস্স সুখাৱহং.

১১৫৪. ‘‘তস্স মে অনুকম্পায, নিক্খিপি পত্তচীৱৰং;

নিসীদি ৰুক্খমূলস্মিং, ছাযায একচীৱৰো.

১১৫৫. ‘‘তঞ্চ অচ্ছেন ৱাৰিনা, পসন্নমানসো নৰো;

ন্হাপযী ৰুক্খমূলস্মিং, ছাযায একচীৱৰং.

১১৫৬. ‘‘অম্বো চ সিত্তো সমণো চ ন্হাপিতো, মযা চ পুঞ্ঞং পসুতং অনপ্পকং;

ইতি সো পীতিযা কাযং, সব্বং ফৰতি অত্তনো.

১১৫৭. ‘‘তদেৱ এত্তকং কম্মং, অকাসিং তায জাতিযা;

পহায মানুসং দেহং, উপপন্নোম্হি নন্দনং.

১১৫৮. ‘‘নন্দনে চ ৱনে ৰম্মে, নানাদিজগণাযুতে;

ৰমামি নচ্চগীতেহি, অচ্ছৰাহি পুৰক্খতো’’তি.

অম্বৱিমানং পঞ্চমং.

৬. গোপালৱিমানৱত্থু

১১৫৯. ‘‘দিস্ৱান দেৱং পটিপুচ্ছি ভিক্খু, উচ্চে ৱিমানম্হি চিৰট্ঠিতিকে;

আমুত্তহত্থাভৰণং যসস্সিং [আমুত্তহত্থাভৰণো যসস্সী (স্যা. পী. ক.)], দিব্বে ৱিমানম্হি যথাপি চন্দিমা.

১১৬০. ‘‘অলঙ্কতো মল্যধৰো [মালভাৰী (সী.), মালধৰী (ক.)] সুৱত্থো, সুকুণ্ডলী কপ্পিতকেসমস্সু;

আমুত্তহত্থাভৰণো যসস্সী, দিব্বে ৱিমানম্হি যথাপি চন্দিমা.

১১৬১. ‘‘দিব্বা চ ৱীণা পৱদন্তি ৱগ্গুং, অট্ঠট্ঠকা সিক্খিতা সাধুৰূপা;

দিব্বা চ কঞ্ঞা তিদসচৰা উড়াৰা, নচ্চন্তি গাযন্তি পমোদযন্তি.

১১৬২. ‘‘দেৱিদ্ধিপত্তোসি মহানুভাৱো, মনুস্সভূতো কিমকাসি পুঞ্ঞং;

কেনাসি এৱং জলিতানুভাৱো, ৱণ্ণো চ তে সব্বদিসা পভাসতী’’তি.

১১৬৩. সো দেৱপুত্তো অত্তমনো…পে… যস্স কম্মস্সিদং ফলং.

১১৬৪. ‘‘অহং মনুস্সেসু মনুস্সভূতো, সঙ্গম্ম ৰক্খিস্সং পৰেসং ধেনুযো;

ততো চ আগা সমণো মমন্তিকে গাৱো চ মাসে অগমংসু খাদিতুং.

১১৬৫. ‘‘দ্ৱযজ্জ কিচ্চং উভযঞ্চ কাৰিযং, ইচ্চেৱহং [ইচ্চেৱং (ক.)] ভন্তে তদা ৱিচিন্তযিং;

ততো চ সঞ্ঞং পটিলদ্ধযোনিসো, দদামি ভন্তেতি খিপিং অনন্তকং.

১১৬৬. ‘‘সো মাসখেত্তং তুৰিতো অৱাসৰিং, পুৰা অযং ভঞ্জতি যস্সিদং ধনং;

ততো চ কণ্হো উৰগো মহাৱিসো, অডংসি পাদে তুৰিতস্স মে সতো.

১১৬৭. ‘‘স্ৱাহং অট্টোম্হি দুক্খেন পীড়িতো, ভিক্খু চ তং সামং মুঞ্চিত্ৱানন্তকং [মুঞ্চিত্ৱ নন্তকং (সী.), মুঞ্চিত্ৱা অনন্তকং (স্যা.)];

অহাসি কুম্মাসং মমানুকম্পযা [মমানুকম্পিযা (পী. ক.), মমানুকম্পায (স্যা.)], ততো চুতো কালকতোম্হি দেৱতা.

১১৬৮. ‘‘তদেৱ কম্মং কুসলং কতং মযা, সুখঞ্চ কম্মং অনুভোমি অত্তনা;

তযা হি ভন্তে অনুকম্পিতো ভুসং, কতঞ্ঞুতায অভিপাদযামি তং.

১১৬৯. ‘‘সদেৱকে লোকে সমাৰকে চ, অঞ্ঞো মুনি নত্থি তযানুকম্পকো;

তযা হি ভন্তে অনুকম্পিতো ভুসং, কতঞ্ঞুতায অভিৱাদযামি তং.

১১৭০. ‘‘ইমস্মিং লোকে পৰস্মিং ৱা পন, অঞ্ঞো মুনী নত্থি তযানুকম্পকো;

তযা হি ভন্তে অনুকম্পিতো ভুসং, কতঞ্ঞুতায অভিৱাদযামি ত’’ন্তি.

গোপালৱিমানং ছট্ঠং.

৭. কণ্ডকৱিমানৱত্থু

১১৭১. ‘‘পুণ্ণমাসে যথা চন্দো, নক্খত্তপৰিৱাৰিতো;

সমন্তা অনুপৰিযাতি, তাৰকাধিপতী সসী.

১১৭২. ‘‘তথূপমং ইদং ব্যম্হং, দিব্বং দেৱপুৰম্হি চ;

অতিৰোচতি ৱণ্ণেন, উদযন্তোৱ ৰংসিমা.

১১৭৩. ‘‘ৱেড়ুৰিযসুৱণ্ণস্স, ফলিকা ৰূপিযস্স চ;

মসাৰগল্লমুত্তাহি, লোহিতঙ্গমণীহি চ.

১১৭৪. ‘‘চিত্ৰা মনোৰমা ভূমি, ৱেড়ূৰিযস্স সন্থতা;

কূটাগাৰা সুভা ৰম্মা, পাসাদো তে সুমাপিতো.

১১৭৫. ‘‘ৰম্মা চ তে পোক্খৰণী, পুথুলোমনিসেৱিতা;

অচ্ছোদকা ৱিপ্পসন্না, সোৱণ্ণৱালুকসন্থতা.

১১৭৬. ‘‘নানাপদুমসঞ্ছন্না, পুণ্ডৰীকসমোততা [সমোত্থতা (ক.), সমোগতা (স্যা.)];

সুৰভিং সম্পৱাযন্তি, মনুঞ্ঞা মালুতেৰিতা.

১১৭৭. ‘‘তস্সা তে উভতো পস্সে, ৱনগুম্বা সুমাপিতা;

উপেতা পুপ্ফৰুক্খেহি, ফলৰুক্খেহি চূভযং.

১১৭৮. ‘‘সোৱণ্ণপাদে পল্লঙ্কে, মুদুকে গোণকত্থতে [চোলসন্থতে (সী.)];

নিসিন্নং দেৱৰাজংৱ, উপতিট্ঠন্তি অচ্ছৰা.

১১৭৯. ‘‘সব্বাভৰণসঞ্ছন্না, নানামালাৱিভূসিতা;

ৰমেন্তি তং মহিদ্ধিকং, ৱসৱত্তীৱ মোদসি.

১১৮০. ‘‘ভেৰিসঙ্খমুদিঙ্গাহি, ৱীণাহি পণৱেহি চ;

ৰমসি ৰতিসম্পন্নো, নচ্চগীতে সুৱাদিতে.

১১৮১. ‘‘দিব্বা তে ৱিৱিধা ৰূপা, দিব্বা সদ্দা অথো ৰসা;

গন্ধা চ তে অধিপ্পেতা, ফোট্ঠব্বা চ মনোৰমা.

১১৮২. ‘‘তস্মিং ৱিমানে পৱৰে, দেৱপুত্ত মহপ্পভো;

অতিৰোচসি ৱণ্ণেন, উদযন্তোৱ ভাণুমা.

১১৮৩. ‘‘দানস্স তে ইদং ফলং, অথো সীলস্স ৱা পন;

অথো অঞ্জলিকম্মস্স, তং মে অক্খাহি পুচ্ছিতো’’.

১১৮৪. সো দেৱপুত্তো অত্তমনো…পে… যস্স কম্মস্সিদং ফলং.

১১৮৫. ‘‘অহং কপিলৱত্থুস্মিং, সাকিযানং পুৰুত্তমে;

সুদ্ধোদনস্স পুত্তস্স, কণ্ডকো সহজো অহং.

১১৮৬. ‘‘যদা সো অড্ঢৰত্তাযং, বোধায মভিনিক্খমি;

সো মং মুদূহি পাণীহি, জালি [জাল (সী.)] তম্বনখেহি চ.

১১৮৭. ‘‘সত্থিং আকোটযিত্ৱান, ৱহ সম্মাতি চব্ৰৱি;

অহং লোকং তাৰযিস্সং, পত্তো সম্বোধিমুত্তমং.

১১৮৮. ‘‘তং মে গিৰং সুণন্তস্স, হাসো মে ৱিপুলো অহু;

উদগ্গচিত্তো সুমনো, অভিসীসিং [অভিসিংসিং (সী.), অভিসীসি (পী.)] তদা অহং.

১১৮৯. ‘‘অভিৰূড়্হঞ্চ মং ঞত্ৱা, সক্যপুত্তং মহাযসং;

উদগ্গচিত্তো মুদিতো, ৱহিস্সং পুৰিসুত্তমং.

১১৯০. ‘‘পৰেসং ৱিজিতং গন্ত্ৱা, উগ্গতস্মিং দিৱাকৰে [দিৱঙ্কৰে (স্যা. ক.)];

মমং ছন্নঞ্চ ওহায, অনপেক্খো সো অপক্কমি.