১০. সেৰীসকৱিমানৱত্থু

১২২৮. [পে. ৱ. ৬০৪] সুণোথ যক্খস্স চ ৱাণিজান চ, সমাগমো যত্থ তদা অহোসি;

যথা কথং ইতৰিতৰেন চাপি, সুভাসিতং তঞ্চ সুণাথ সব্বে.

১২২৯. ‘‘যো সো অহু ৰাজা পাযাসি নাম [নামো (সী.)], ভুম্মানং সহব্যগতো যসস্সী;

সো মোদমানোৱ সকে ৱিমানে, অমানুসো মানুসে অজ্ঝভাসীতি.

১২৩০. ‘‘ৱঙ্কে অৰঞ্ঞে অমনুস্সট্ঠানে, কন্তাৰে অপ্পোদকে অপ্পভক্খে;

সুদুগ্গমে ৱণ্ণুপথস্স মজ্ঝে, ৱঙ্কং ভযা [ধঙ্কংভযা (ক.)] নট্ঠমনা মনুস্সা.

১২৩১. ‘‘নযিধ ফলা মূলমযা চ সন্তি, উপাদানং নত্থি কুতোধ ভক্খো;

অঞ্ঞত্ৰ পংসূহি চ ৱালুকাহি চ, ততাহি উণ্হাহি চ দাৰুণাহি চ.

১২৩২. ‘‘উজ্জঙ্গলং তত্তমিৱং কপালং, অনাযসং পৰলোকেন তুল্যং;

লুদ্দানমাৱাসমিদং পুৰাণং, ভূমিপ্পদেসো অভিসত্তৰূপো.

১২৩৩. ‘‘অথ তুম্হে কেন [কেন নু (স্যা. ক.)] ৱণ্ণেন, কিমাসমানা ইমং পদেসং হি;

অনুপৱিট্ঠা সহসা সমেচ্চ, লোভা ভযা অথ ৱা সম্পমূড়্হা’’তি.

১২৩৪. ‘‘মগধেসু অঙ্গেসু চ সত্থৱাহা, আৰোপযিত্ৱা পণিযং পুথুত্তং;

তে যামসে সিন্ধুসোৱীৰভূমিং, ধনত্থিকা উদ্দযং পত্থযানা.

১২৩৫. ‘‘দিৱা পিপাসং নধিৱাসযন্তা, যোগ্গানুকম্পঞ্চ সমেক্খমানা,

এতেন ৱেগেন আযাম সব্বে [সব্বে তে (ক.)], ৰত্তিং মগ্গং পটিপন্না ৱিকালে.

১২৩৬. ‘‘তে দুপ্পযাতা অপৰদ্ধমগ্গা, অন্ধাকুলা ৱিপ্পনট্ঠা অৰঞ্ঞে;

সুদুগ্গমে ৱণ্ণুপথস্স মজ্ঝে, দিসং ন জানাম পমূড়্হচিত্তা.

১২৩৭. ‘‘ইদঞ্চ দিস্ৱান অদিট্ঠপুব্বং, ৱিমানসেট্ঠঞ্চ তৱঞ্চ যক্খ;

ততুত্তৰিং জীৱিতমাসমানা, দিস্ৱা পতীতা সুমনা উদগ্গা’’তি.

১২৩৮. ‘‘পাৰং সমুদ্দস্স ইমঞ্চ ৱণ্ণুং [ৱনং (স্যা.), ৱণ্ণং (ক.)], ৱেত্তাচৰং [ৱেত্তং পৰং (স্যা.), ৱেত্তাচাৰং (ক.)] সঙ্কুপথঞ্চ মগ্গং;

নদিযো পন পব্বতানঞ্চ দুগ্গা, পুথুদ্দিসা গচ্ছথ ভোগহেতু.

১২৩৯. ‘‘পক্খন্দিযান ৱিজিতং পৰেসং, ৱেৰজ্জকে মানুসে পেক্খমানা;

যং ৱো সুতং ৱা অথ ৱাপি দিট্ঠং, অচ্ছেৰকং তং ৱো সুণোম তাতা’’তি.

১২৪০. ‘‘ইতোপি অচ্ছেৰতৰং কুমাৰ, ন তো সুতং ৱা অথ ৱাপি দিট্ঠং;

অতীতমানুস্সকমেৱ সব্বং, দিস্ৱান তপ্পাম অনোমৱণ্ণং.

১২৪১. ‘‘ৱেহাযসং পোক্খৰঞ্ঞো সৱন্তি, পহূতমল্যা [পহূতমাল্যা (স্যা.)] বহুপুণ্ডৰীকা;

দুমা চিমে [দুমা চ তে (স্যা. ক.)] নিচ্চফলূপপন্না, অতীৱ গন্ধা সুৰভিং পৱাযন্তি.

১২৪২. ‘‘ৱেড়ূৰিযথম্ভা সতমুস্সিতাসে, সিলাপৱাড়স্স চ আযতংসা;

মসাৰগল্লা সহলোহিতঙ্গা, থম্ভা ইমে জোতিৰসামযাসে.

১২৪৩. ‘‘সহস্সথম্ভং অতুলানুভাৱং, তেসূপৰি সাধুমিদং ৱিমানং;

ৰতনন্তৰং কঞ্চনৱেদিমিস্সং, তপনীযপট্টেহি চ সাধুছন্নং.

১২৪৪. ‘‘জম্বোনদুত্তত্তমিদং সুমট্ঠো, পাসাদসোপাণফলূপপন্নো;

দড়্হো চ ৱগ্গু চ সুসঙ্গতো চ [ৱগ্গু সুমুখো সুসঙ্গতো (সী.)], অতীৱ নিজ্ঝানখমো মনুঞ্ঞো.

১২৪৫. ‘‘ৰতনন্তৰস্মিং বহুঅন্নপানং, পৰিৱাৰিতো অচ্ছৰাসঙ্গণেন;

মুৰজআলম্বৰতূৰিযঘুট্ঠো, অভিৱন্দিতোসি থুতিৱন্দনায.

১২৪৬. ‘‘সো মোদসি নাৰিগণপ্পবোধনো, ৱিমানপাসাদৱৰে মনোৰমে;

অচিন্তিযো সব্বগুণূপপন্নো, ৰাজা যথা ৱেস্সৱণো নড়িন্যা [নড়িঞ্ঞং (ক.)].

১২৪৭. ‘‘দেৱো নু আসি উদৱাসি যক্খো, উদাহু দেৱিন্দো মনুস্সভূতো;

পুচ্ছন্তি তং ৱাণিজা সত্থৱাহা, আচিক্খ কো নাম তুৱংসি যক্খো’’তি.

১২৪৮. ‘‘সেৰীসকো [সেৰিস্সকো (সী. স্যা.)] নাম অহম্হি যক্খো, কন্তাৰিযো ৱণ্ণুপথম্হি গুত্তো;

ইমং পদেসং অভিপালযামি, ৱচনকৰো ৱেস্সৱণস্স ৰঞ্ঞো’’তি.

১২৪৯. ‘‘অধিচ্চলদ্ধং পৰিণামজং তে, সযং কতং উদাহু দেৱেহি দিন্নং;

পুচ্ছন্তি তং ৱাণিজা সত্থৱাহা, কথং তযা লদ্ধমিদং মনুঞ্ঞ’’ন্তি.

১২৫০. ‘‘নাধিচ্চলদ্ধং ন পৰিণামজং মে, ন সযং কতং ন হি দেৱেহি দিন্নং;

সকেহি কম্মেহি অপাপকেহি, পুঞ্ঞেহি মে লদ্ধমিদং মনুঞ্ঞ’’ন্তি.

১২৫১. ‘‘কিং তে ৱতং কিং পন ব্ৰহ্মচৰিযং, কিস্স সুচিণ্ণস্স অযং ৱিপাকো;

পুচ্ছন্তি তং ৱাণিজা সত্থৱাহা, কথং তযা লদ্ধমিদং ৱিমান’’ন্তি.

১২৫২. ‘‘মমং পাযাসীতি অহু সমঞ্ঞা, ৰজ্জং যদা কাৰযিং কোসলানং;

নত্থিকদিট্ঠি কদৰিযো পাপধম্মো, উচ্ছেদৱাদী চ তদা অহোসিং.

১২৫৩. ‘‘সমণো চ খো আসি কুমাৰকস্সপো, বহুস্সুতো চিত্তকথী উড়াৰো;

সো মে তদা ধম্মকথং অভাসি [অকাসি (সী.)], দিট্ঠিৱিসূকানি ৱিনোদযী মে.

১২৫৪. ‘‘তাহং তস্স [তাহং (ক.)] ধম্মকথং সুণিত্ৱা, উপাসকত্তং পটিৱেদযিস্সং;

পাণাতিপাতা ৱিৰতো অহোসিং, লোকে অদিন্নং পৰিৱজ্জযিস্সং;

অমজ্জপো নো চ মুসা অভাণিং, সকেন দাৰেন চ অহোসি তুট্ঠো.

১২৫৫. ‘‘তং মে ৱতং তং পন ব্ৰহ্মচৰিযং, তস্স সুচিণ্ণস্স অযং ৱিপাকো;

তেহেৱ কম্মেহি অপাপকেহি, পুঞ্ঞেহি মে লদ্ধমিদং ৱিমান’’ন্তি.

১২৫৬. ‘‘সচ্চং কিৰাহংসু নৰা সপঞ্ঞা, অনঞ্ঞথা ৱচনং পণ্ডিতানং;

যহিং যহিং গচ্ছতি পুঞ্ঞকম্মো, তহিং তহিং মোদতি কামকামী.

১২৫৭. ‘‘যহিং যহিং সোকপৰিদ্দৱো চ, ৱধো চ বন্ধো চ পৰিক্কিলেসো;

তহিং তহিং গচ্ছতি পাপকম্মো, ন মুচ্চতি দুগ্গতিযা কদাচী’’তি.

১২৫৮. ‘‘সম্মূড়্হৰূপোৱ জনো অহোসি, অস্মিং মুহুত্তে কললীকতোৱ;

জনস্সিমস্স তুয্হঞ্চ কুমাৰ, অপ্পচ্চযো কেন নু খো অহোসী’’তি.

১২৫৯. ‘‘ইমে চ সিৰীসৱনা [ইমে সিৰীসূপৱনা চ (সী.), ইমেপি সিৰীসৱনা চ (পী. ক.)] তাতা, দিব্বা [দিব্বা চ (পী. ক.)] গন্ধা সুৰভী [সুৰভিং (সী. ক.)] সম্পৱন্তি [সম্পৱাযন্তি (ক.)];

তে সম্পৱাযন্তি ইমং ৱিমানং, দিৱা চ ৰত্তো চ তমং নিহন্ত্ৱা.

১২৬০. ‘‘ইমেসঞ্চ খো ৱস্সসতচ্চযেন, সিপাটিকা ফলতি একমেকা;

মানুস্সকং ৱস্সসতং অতীতং, যদগ্গে কাযম্হি ইধূপপন্নো.

১২৬১. ‘‘দিস্ৱানহং ৱস্সসতানি পঞ্চ, অস্মিং ৱিমানে ঠত্ৱান তাতা;

আযুক্খযা পুঞ্ঞক্খযা চৱিস্সং, তেনেৱ সোকেন পমুচ্ছিতোস্মী’’তি [সমুচ্ছিতোস্মীতি (পী. ক.)].

১২৬২. ‘‘কথং নু সোচেয্য তথাৱিধো সো, লদ্ধা ৱিমানং অতুলং চিৰায;

যে চাপি খো ইত্তৰমুপপন্না, তে নূন সোচেয্যুং পৰিত্তপুঞ্ঞা’’তি.

১২৬৩. ‘‘অনুচ্ছৱিং ওৱদিযঞ্চ মে তং, যং মং তুম্হে পেয্যৱাচং ৱদেথ;

তুম্হে চ খো তাতা মযানুগুত্তা, যেনিচ্ছকং তেন পলেথ সোত্থি’’ন্তি.

১২৬৪. ‘‘গন্ত্ৱা মযং সিন্ধুসোৱীৰভূমিং, ধনত্থিকা উদ্দযং পত্থযানা;

যথাপযোগা পৰিপুণ্ণচাগা, কাহাম সেৰীসমহং উড়াৰ’’ন্তি.

১২৬৫. ‘‘মা চেৱ সেৰীসমহং অকত্থ, সব্বঞ্চ ৱো ভৱিস্সতি যং ৱদেথ;

পাপানি কম্মানি ৱিৱজ্জযাথ, ধম্মানুযোগঞ্চ অধিট্ঠহাথ.

১২৬৬. ‘‘উপাসকো অত্থি ইমম্হি সঙ্ঘে, বহুস্সুতো সীলৱতূপপন্নো;

সদ্ধো চ চাগী চ সুপেসলো চ, ৱিচক্খণো সন্তুসিতো মুতীমা.

১২৬৭. ‘‘সঞ্জানমানো ন মুসা ভণেয্য, পৰূপঘাতায ন চেতযেয্য;

ৱেভূতিকং পেসুণং নো কৰেয্য, সণ্হঞ্চ ৱাচং সখিলং ভণেয্য.

১২৬৮. ‘‘সগাৰৱো সপ্পটিস্সো ৱিনীতো, অপাপকো অধিসীলে ৱিসুদ্ধো;

সো মাতৰং পিতৰঞ্চাপি জন্তু, ধম্মেন পোসেতি অৰিযৱুত্তি.

১২৬৯. ‘‘মঞ্ঞে সো মাতাপিতূনং কাৰণা, ভোগানি পৰিযেসতি ন অত্তহেতু;

মাতাপিতূনঞ্চ যো [সো (?)] অচ্চযেন, নেক্খম্মপোণো চৰিস্সতি ব্ৰহ্মচৰিযং.

১২৭০. ‘‘উজূ অৱঙ্কো অসঠো অমাযো, ন লেসকপ্পেন চ ৱোহৰেয্য;

সো তাদিসো সুকতকম্মকাৰী, ধম্মে ঠিতো কিন্তি লভেথ দুক্খং.

১২৭১. ‘‘তং কাৰণা পাতুকতোম্হি অত্তনা, তস্মা ধম্মং পস্সথ ৱাণিজাসে;

অঞ্ঞত্ৰ তেনিহ ভস্মী [ভস্মি (স্যা.), ভস্ম (ক.)] ভৱেথ, অন্ধাকুলা ৱিপ্পনট্ঠা অৰঞ্ঞে;

তং খিপ্পমানেন লহুং পৰেন, সুখো হৱে সপ্পুৰিসেন সঙ্গমো’’তি.

১২৭২. ‘‘কিং নাম সো কিঞ্চ কৰোতি কম্মং,

কিং নামধেয্যং কিং পন তস্স গোত্তং;

মযম্পি নং দট্ঠুকামম্হ যক্খ, যস্সানুকম্পায ইধাগতোসি;

লাভা হি তস্স, যস্স তুৱং পিহেসী’’তি.

১২৭৩. ‘‘যো কপ্পকো সম্ভৱনামধেয্যো,

উপাসকো কোচ্ছফলূপজীৱী;

জানাথ নং তুম্হাকং পেসিযো সো,

মা খো নং হীড়িত্থ সুপেসলো সো’’তি.

১২৭৪. ‘‘জানামসে যং ত্ৱং পৱদেসি [ৱদেসি (সী.)] যক্খ,

ন খো নং জানাম স এদিসোতি;

মযম্পি নং পূজযিস্সাম যক্খ,

সুত্ৱান তুয্হং ৱচনং উড়াৰ’’ন্তি.

১২৭৫. ‘‘যে কেচি ইমস্মিং সত্থে মনুস্সা,

দহৰা মহন্তা অথৱাপি মজ্ঝিমা;

সব্বেৱ তে আলম্বন্তু ৱিমানং,

পস্সন্তু পুঞ্ঞানং ফলং কদৰিযা’’তি.

১২৭৬. তে তত্থ সব্বেৱ ‘অহং পুৰে’তি,

তং কপ্পকং তত্থ পুৰক্খত্ৱা [পুৰক্খিপিত্ৱা (সী.)];

সব্বেৱ তে আলম্বিংসু ৱিমানং,

মসক্কসাৰং ৱিয ৱাসৱস্স.

১২৭৭. তে তত্থ সব্বেৱ ‘অহং পুৰে’তি, উপাসকত্তং পটিৱেদযিংসু;

পাণাতিপাতা ৱিৰতা অহেসুং, লোকে অদিন্নং পৰিৱজ্জযিংসু;

অমজ্জপা নো চ মুসা ভণিংসু, সকেন দাৰেন চ অহেসুং তুট্ঠা.

১২৭৮. তে তত্থ সব্বেৱ ‘অহং পুৰে’তি, উপাসকত্তং পটিৱেদযিত্ৱা;

পক্কামি সত্থো অনুমোদমানো, যক্খিদ্ধিযা অনুমতো পুনপ্পুনং.

১২৭৯. ‘‘গন্ত্ৱান তে সিন্ধুসোৱীৰভূমিং, ধনত্থিকা উদ্দযং [উদয (পী. ক.)] পত্থযানা;

যথাপযোগা পৰিপুণ্ণলাভা, পচ্চাগমুং পাটলিপুত্তমক্খতং.

১২৮০. ‘‘গন্ত্ৱান তে সঙ্ঘৰং সোত্থিৱন্তো,

পুত্তেহি দাৰেহি সমঙ্গিভূতা;

আনন্দী ৱিত্তা [আনন্দচিত্তা (স্যা.), আনন্দীচিত্তা (ক.)] সুমনা পতীতা,

অকংসু সেৰীসমহং উড়াৰং;

সেৰীসকং তে পৰিৱেণং মাপযিংসু.

১২৮১. এতাদিসা সপ্পুৰিসান সেৱনা,

মহত্থিকা ধম্মগুণান সেৱনা;

একস্স অত্থায উপাসকস্স,

সব্বেৱ সত্তা সুখিতা [সুখিনো (পী. ক.)] অহেসুন্তি.

সেৰীসকৱিমানং দসমং.