১১. সুনিক্খিত্তৱিমানৱত্থু

১২৮২. ‘‘উচ্চমিদং মণিথূণং ৱিমানং, সমন্ততো দ্ৱাদস যোজনানি;

কূটাগাৰা সত্তসতা উড়াৰা, ৱেড়ুৰিযথম্ভা ৰুচকত্থতা সুভা.

১২৮৩. ‘‘তত্থচ্ছসি পিৱসি খাদসি চ, দিব্বা চ ৱীণা পৱদন্তি ৱগ্গুং;

দিব্বা ৰসা কামগুণেত্থ পঞ্চ, নাৰিযো চ নচ্চন্তি সুৱণ্ণছন্না.

১২৮৪. ‘‘কেন তেতাদিসো ৱণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

১২৮৫. ‘‘পুচ্ছামি ‘তং দেৱ মহানুভাৱ, মনুস্সভূতো কিমকাসি পুঞ্ঞং;

কেনাসি এৱং জলিতানুভাৱো, ৱণ্ণো চ তে সব্বদিসা পভাসতী’’তি.

১২৮৬. সো দেৱপুত্তো অত্তমনো, মোগ্গল্লানেন পুচ্ছিতো;

পঞ্হং পুট্ঠো ৱিযাকাসি, যস্স কম্মস্সিদং ফলং.

১২৮৭. ‘‘দুন্নিক্খিত্তং মালং সুনিক্খিপিত্ৱা, পতিট্ঠপেত্ৱা সুগতস্স থূপে;

মহিদ্ধিকো চম্হি মহানুভাৱো, দিব্বেহি কামেহি সমঙ্গিভূতো.

১২৮৮. ‘‘তেন মেতাদিসো ৱণ্ণো,

তেন মে ইধ মিজ্ঝতি;

উপ্পজ্জন্তি চ মে ভোগা,

যে কেচি মনসো পিযা.

১২৮৯. ‘‘অক্খামি তে ভিক্খু মহানুভাৱ,

মনুস্সভূতো যমহং অকাসিং;

তেনম্হি এৱং জলিতানুভাৱো,

ৱণ্ণো চ মে সব্বদিসা পভাসতী’’তি.

সুনিক্খিত্তৱিমানং একাদসমং.

সুনিক্খিত্তৱগ্গো সত্তমো নিট্ঠিতো.

তস্সুদ্দানং –

দ্ৱে দলিদ্দা ৱনৱিহাৰা, ভতকো গোপালকণ্ডকা;

অনেকৱণ্ণমট্ঠকুণ্ডলী, সেৰীসকো সুনিক্খিত্তং;

পুৰিসানং ততিযো ৱগ্গো পৱুচ্চতীতি.

ভাণৱাৰং চতুত্থং নিট্ঠিতং.