১৪. মহাৰথৱিমানৱত্থু

১০১৫. ‘‘সহস্সযুত্তং হযৱাহনং সুভং, আৰুয্হিমং সন্দনং নেকচিত্তং;

উয্যানভূমিং অভিতো অনুক্কমং, পুৰিন্দদো ভূতপতীৱ ৱাসৱো.

১০১৬. ‘‘সোৱণ্ণমযা তে ৰথকুব্বৰা উভো, ফলেহি [থলেহি (সী.)] অংসেহি অতীৱ সঙ্গতা;

সুজাতগুম্বা নৰৱীৰনিট্ঠিতা, ৱিৰোচতী পন্নৰসেৱ চন্দো.

১০১৭. ‘‘সুৱণ্ণজালাৱততো ৰথো অযং, বহূহি নানাৰতনেহি চিত্তিতো;

সুনন্দিঘোসো চ সুভস্সৰো চ, ৱিৰোচতী চামৰহত্থবাহুভি.

১০১৮. ‘‘ইমা চ নাভ্যো মনসাভিনিম্মিতা, ৰথস্স পাদন্তৰমজ্ঝভূসিতা;

ইমা চ নাভ্যো সতৰাজিচিত্তিতা, সতেৰতা ৱিজ্জুৰিৱপ্পভাসৰে.

১০১৯. ‘‘অনেকচিত্তাৱততো ৰথো অযং, পুথূ চ নেমী চ সহস্সৰংসিকো;

তেসং সৰো সুয্যতি [সূযতি (সী.)] ৱগ্গুৰূপো, পঞ্চঙ্গিকং তুৰিযমিৱপ্পৱাদিতং.

১০২০. ‘‘সিৰস্মিং চিত্তং মণিচন্দকপ্পিতং, সদা ৱিসুদ্ধং ৰুচিৰং পভস্সৰং;

সুৱণ্ণৰাজীহি অতীৱ সঙ্গতং, ৱেড়ুৰিযৰাজীৱ অতীৱ সোভতি.

১০২১. ‘‘ইমে চ ৱাড়ী মণিচন্দকপ্পিতা, আৰোহকম্বূ সুজৱা ব্ৰহূপমা.

ব্ৰহা মহন্তা বলিনো মহাজৱা, মনো তৱঞ্ঞায তথেৱ সিংসৰে [সব্বৰে (ক.), সপ্পৰে (?)].

১০২২. ‘‘ইমে চ সব্বে সহিতা চতুক্কমা, মনো তৱঞ্ঞায তথেৱ সিংসৰে;

সমং ৱহন্তা মুদুকা অনুদ্ধতা, আমোদমানা তুৰগান [তুৰঙ্গান (ক.)] মুত্তমা.

১০২৩. ‘‘ধুনন্তি ৱগ্গন্তি পতন্তি [পৱত্তন্তি (পী. ক.)] চম্বৰে, অব্ভুদ্ধুনন্তা সুকতে পিড়ন্ধনে;

তেসং সৰো সুয্যতি ৱগ্গুৰূপো, পঞ্চঙ্গিকং তুৰিযমিৱপ্পৱাদিতং.

১০২৪. ‘‘ৰথস্স ঘোসো অপিড়ন্ধনান চ, খুৰস্স নাদো [নাদী (স্যা.), নাদি (পী. ক.)] অভিহিংসনায চ;

ঘোসো সুৱগ্গূ সমিতস্স সুয্যতি, গন্ধব্বতূৰিযানি ৱিচিত্ৰসংৱনে.

১০২৫. ‘‘ৰথে ঠিতা তা মিগমন্দলোচনা, আড়াৰপম্হা হসিতা পিযংৱদা;

ৱেড়ুৰিযজালাৱততা তনুচ্ছৱা, সদেৱ গন্ধব্বসূৰগ্গপূজিতা.

১০২৬. ‘‘তা ৰত্তৰত্তম্বৰপীতৱাসসা, ৱিসালনেত্তা অভিৰত্তলোচনা;

কুলে সুজাতা সুতনূ সুচিম্হিতা, ৰথে ঠিতা পঞ্জলিকা উপট্ঠিতা.

১০২৭. ‘‘তা কম্বুকেযূৰধৰা সুৱাসসা, সুমজ্ঝিমা ঊৰুথনূপপন্না;

ৱট্টঙ্গুলিযো সুমুখা সুদস্সনা, ৰথে ঠিতা পঞ্জলিকা উপট্ঠিতা.

১০২৮. ‘‘অঞ্ঞা সুৱেণী সুসু মিস্সকেসিযো, সমং ৱিভত্তাহি পভস্সৰাহি চ;

অনুব্বতা তা তৱ মানসে ৰতা, ৰথে ঠিতা পঞ্জলিকা উপট্ঠিতা.

১০২৯. ‘‘আৱেড়িনিযো পদুমুপ্পলচ্ছদা, অলঙ্কতা চন্দনসাৰৱাসিতা [ৱোসিতা (স্যা.), ভূসিতা (ক.)];

অনুব্বতা তা তৱ মানসে ৰতা, ৰথে ঠিতা পঞ্জলিকা উপট্ঠিতা.

১০৩০. ‘‘তা মালিনিযো পদুমুপ্পলচ্ছদা, অলঙ্কতা চন্দনসাৰৱাসিতা;

অনুব্বতা তা তৱ মানসে ৰতা, ৰথে ঠিতা পঞ্জলিকা উপট্ঠিতা.

১০৩১. ‘‘কণ্ঠেসু তে যানি পিড়ন্ধনানি, হত্থেসু পাদেসু তথেৱ সীসে;

ওভাসযন্তী দস সব্বসো দিসা, অব্ভুদ্দযং সাৰদিকোৱ ভাণুমা.

১০৩২. ‘‘ৱাতস্স ৱেগেন চ সম্পকম্পিতা, ভুজেসু মালা অপিড়ন্ধনানি চ;

মুঞ্চন্তি ঘোসং ৰূচিৰং সুচিং সুভং, সব্বেহি ৱিঞ্ঞূহি সুতব্বৰূপং.

১০৩৩. ‘‘উয্যানভূম্যা চ দুৱদ্ধতো ঠিতা, ৰথা চ নাগা তূৰিযানি চ সৰো;

তমেৱ দেৱিন্দ পমোদযন্তি, ৱীণা যথা পোক্খৰপত্তবাহুভি.

১০৩৪. ‘‘ইমাসু ৱীণাসু বহূসু ৱগ্গূসু, মনুঞ্ঞৰূপাসু হদযেৰিতং পীতিং [হদযেৰিতং পতি (সী.), হদযেৰিতম্পি তং (স্যা.)];

পৱজ্জমানাসু অতীৱ অচ্ছৰা, ভমন্তি কঞ্ঞা পদুমেসু সিক্খিতা.

১০৩৫. ‘‘যদা চ গীতানি চ ৱাদিতানি চ, নচ্চানি চিমানি [চেমানি (সী.)] সমেন্তি একতো;

অথেত্থ নচ্চন্তি অথেত্থ অচ্ছৰা, ওভাসযন্তী উভতো ৱৰিত্থিযো.

১০৩৬. ‘‘সো মোদসি তুৰিযগণপ্পবোধনো, মহীযমানো ৱজিৰাৱুধোৰিৱ;

ইমাসু ৱীণাসু বহূসু ৱগ্গূসু, মনুঞ্ঞৰূপাসু হদযেৰিতং পীতিং.

১০৩৭. ‘‘কিং ত্ৱং পুৰে কম্মমকাসি অত্তনা, মনুস্সভূতো পুৰিমায জাতিযা;

উপোসথং কং ৱা [উপোসথং কিং ৱ (স্যা.)] তুৱং উপাৱসি, কং [কিং (স্যা.)] ধম্মচৰিযং ৱতমাভিৰোচযি.

১০৩৮. ‘‘নযীদমপ্পস্স কতস্স [নযিদং অপ্পস্স কতস্স (সী. স্যা.), সাসেদং অপ্পকতস্স (ক.)] কম্মুনো, পুব্বে সুচিণ্ণস্স উপোসথস্স ৱা;

ইদ্ধানুভাৱো ৱিপুলো অযং তৱ, যং দেৱসঙ্ঘং অভিৰোচসে ভুসং.

১০৩৯. ‘‘দানস্স তে ইদং ফলং, অথো সীলস্স ৱা পন;

অথো অঞ্জলিকম্মস্স, তং মে অক্খাহি পুচ্ছিতো’’তি.

১০৪০. সো দেৱপুত্তো অত্তমনো, মোগ্গল্লানেন পুচ্ছিতো;

পঞ্হং পুট্ঠো ৱিযাকাসি, যস্স কম্মস্সিদং ফলন্তি.

১০৪১. ‘‘জিতিন্দ্ৰিযং বুদ্ধমনোমনিক্কমং, নৰুত্তমং কস্সপমগ্গপুগ্গলং;

অৱাপুৰন্তং অমতস্স দ্ৱাৰং, দেৱাতিদেৱং সতপুঞ্ঞলক্খণং.

১০৪২. ‘‘তমদ্দসং কুঞ্জৰমোঘতিণ্ণং, সুৱণ্ণসিঙ্গীনদবিম্বসাদিসং;

দিস্ৱান তং খিপ্পমহুং সুচীমনো, তমেৱ দিস্ৱান সুভাসিতদ্ধজং.

১০৪৩. ‘‘তমন্নপানং অথৱাপি চীৱৰং, সুচিং পণীতং ৰসসা উপেতং;

পুপ্ফাভিক্কিণম্হি সকে নিৱেসনে, পতিট্ঠপেসিং স অসঙ্গমানসো.

১০৪৪. ‘‘তমন্নপানেন চ চীৱৰেন চ, খজ্জেন ভোজ্জেন চ সাযনেন চ;

সন্তপ্পযিত্ৱা দ্ৱিপদানমুত্তমং, সো সগ্গসো দেৱপুৰে ৰমামহং.

১০৪৫.

‘‘এতেনুপাযেন ইমং নিৰগ্গড়ং, যঞ্ঞং যজিত্ৱা তিৱিধং ৱিসুদ্ধং.

পহাযহং মানুসকং সমুস্সযং, ইন্দূপমো [ইন্দস্সমো (স্যা. ক.)] দেৱপুৰে ৰমামহং.

১০৪৬. ‘‘আযুঞ্চ ৱণ্ণঞ্চ সুখং বলঞ্চ, পণীতৰূপং অভিকঙ্খতা মুনি;

অন্নঞ্চ পানঞ্চ বহুং সুসঙ্খতং, পতিট্ঠপেতব্বমসঙ্গমানসে.

১০৪৭. [কথা. ৭৯৯]‘‘নযিমস্মিং লোকে পৰস্মিং [নযিমস্মিং ৱা লোকে পৰস্মিং (কথাৱত্থু ৭৯৯), নযিমস্মি লোকে ৱ পৰস্মি (?)] ৱা পন, বুদ্ধেন সেট্ঠো ৱ সমো ৱ ৱিজ্জতি;

আহুনেয্যানং [যমাহুনেয্যানং (ক.)] পৰমাহুতিং গতো, পুঞ্ঞত্থিকানং ৱিপুলপ্ফলেসিন’’ন্তি.

মহাৰথৱিমানং চুদ্দসমং.

মহাৰথৱগ্গো পঞ্চমো নিট্ঠিতো.

তস্সুদ্দানং –

মণ্ডূকো ৰেৱতী ছত্তো, কক্কটো দ্ৱাৰপালকো;

দ্ৱে কৰণীযা দ্ৱে সূচি, তযো নাগা চ দ্ৱে ৰথা;

পুৰিসানং পঠমো ৱগ্গো পৱুচ্চতীতি.

ভাণৱাৰং ততিযং নিট্ঠিতং.