৬. পাযাসিৱগ্গো

১. পঠমঅগাৰিযৱিমানৱত্থু

১০৪৮. ‘‘যথা ৱনং চিত্তলতং পভাসতি [পকাসতি (ক.)], উয্যানসেট্ঠং তিদসানমুত্তমং;

তথূপমং তুয্হমিদং ৱিমানং, ওভাসযং তিট্ঠতি অন্তলিক্খে.

১০৪৯. ‘‘দেৱিদ্ধিপত্তোসি মহানুভাৱো, মনুস্সভূতো কিমকাসি পুঞ্ঞং;

কেনাসি এৱং জলিতানুভাৱো, ৱণ্ণো চ তে সব্বদিসা পভাসতী’’তি.

১০৫০. সো দেৱপুত্তো অত্তমনো, মোগ্গল্লানেন পুচ্ছিতো;

পঞ্হং পুট্ঠো ৱিযাকাসি, যস্স কম্মস্সিদং ফলং.

১০৫১. ‘‘অহঞ্চ ভৰিযা চ মনুস্সলোকে, ওপানভূতা ঘৰমাৱসিম্হ;

অন্নঞ্চ পানঞ্চ পসন্নচিত্তা, সক্কচ্চ দানং ৱিপুলং অদম্হ.

১০৫২. ‘‘তেন মেতাদিসো ৱণ্ণো…পে…ৱণ্ণো চ মে সব্বদিসা পভাসতী’’তি.

পঠমঅগাৰিযৱিমানং পঠমং.

২. দুতিযঅগাৰিযৱিমানৱত্থু

১০৫৪. ‘‘যথা ৱনং চিত্তলতং পভাসতি, উয্যানসেট্ঠং তিদসানমুত্তমং;

তথূপমং তুয্হমিদং ৱিমানং, ওভাসযং তিট্ঠতি অন্তলিক্খে.

১০৫৫. ‘‘দেৱিদ্ধিপত্তোসি মহানুভাৱো, মনুস্সভূতো কিমকাসি পুঞ্ঞং;

কেনাসি এৱং জলিতানুভাৱো, ৱণ্ণো চ তে সব্বদিসা পভাসতী’’তি.

১০৫৬. সো দেৱপুত্তো অত্তমনো…পে… যস্স কম্মস্সিদং ফলং.

১০৫৭. ‘‘অহঞ্চ ভৰিযা চ মনুস্সলোকে, ওপানভূতা ঘৰমাৱসিম্হ;

অন্নঞ্চ পানঞ্চ পসন্নচিত্তা, সক্কচ্চ দানং ৱিপুলং অদম্হ.

১০৫৮. ‘‘তেন মেতাদিসো ৱণ্ণো…পে… ৱণ্ণো চ মে সব্বদিসা পভাসতী’’তি.

দুতিযঅগাৰিযৱিমানং দুতিযং.

৩. ফলদাযকৱিমানৱত্থু

১০৬০. ‘‘উচ্চমিদং মণিথূণং ৱিমানং, সমন্ততো সোড়স যোজনানি;

কূটাগাৰা সত্তসতা উড়াৰা, ৱেড়ুৰিযথম্ভা ৰুচকত্থতা সুভা.

১০৬১. ‘‘তত্থচ্ছসি পিৱসি খাদসি চ, দিব্বা চ ৱীণা পৱদন্তি ৱগ্গুং;

অট্ঠট্ঠকা সিক্খিতা সাধুৰূপা, দিব্বা চ কঞ্ঞা তিদসচৰা উড়াৰা;

নচ্চন্তি গাযন্তি পমোদযন্তি.

১০৬২. ‘‘দেৱিদ্ধিপত্তোসি মহানুভাৱো, মনুস্সভূতো কিমকাসি পুঞ্ঞং;

কেনাসি এৱং জলিতানুভাৱো, ৱণ্ণো চ তে সব্বদিসা পভাসতী’’তি.

১০৬৩. সো দেৱপুত্তো অত্তমনো…পে… যস্স কম্মস্সিদং ফলং.

১০৬৪. ‘‘ফলদাযী ফলং ৱিপুলং লভতি, দদমুজুগতেসু পসন্নমানসো;

সো হি পমোদতি [মোদতি (সী. স্যা. পী.)] সগ্গগতো তিদিৱে [তত্থ (ক.)], অনুভোতি চ পুঞ্ঞফলং ৱিপুলং.

১০৬৫. ‘‘তৱেৱাহং [তথেৱাহং (সী. স্যা. পী.)] মহামুনি, অদাসিং চতুৰো ফলে.

১০৬৬. ‘‘তস্মা হি ফলং অলমেৱ দাতুং, নিচ্চং মনুস্সেন সুখত্থিকেন;

দিব্বানি ৱা পত্থযতা সুখানি, মনুস্সসোভগ্গতমিচ্ছতা ৱা.

১০৬৭. ‘‘তেন মেতাদিসো ৱণ্ণো…পে…

ৱণ্ণো চ মে সব্বদিসা পভাসতী’’তি.

ফলদাযকৱিমানং ততিযং.

৪. পঠমউপস্সযদাযকৱিমানৱত্থু

১০৬৯. ‘‘চন্দো যথা ৱিগতৱলাহকে নভে, ওভাসযং গচ্ছতি অন্তলিক্খে;

তথূপমং তুয্হমিদং ৱিমানং, ওভাসযং তিট্ঠতি অন্তলিক্খে.

১০৭০. ‘‘দেৱিদ্ধিপত্তোসি মহানুভাৱা, মনুস্সভূতো কিমকাসি পুঞ্ঞং;

কেনাসি এৱং জলিতানুভাৱো, ৱণ্ণো চ তে সব্বদিসা পভাসতী’’তি.

১০৭১. সো দেৱপুত্তো অত্তমনো…পে… যস্স কম্মস্সিদং ফলং.

১০৭২. ‘‘অহঞ্চ ভৰিযা চ মনুস্সলোকে, উপস্সযং অৰহতো অদম্হ;

অন্নঞ্চ পানঞ্চ পসন্নচিত্তা, সক্কচ্চ দানং ৱিপুলং অদম্হ.

১০৭৩. ‘‘তেন মেতাদিসো ৱণ্ণো…পে… ৱণ্ণো চ মে সব্বদিসা পভাসতী’’তি.

পঠমউপস্সযদাযকৱিমানং চতুত্থং.

৫. দুতিযউপস্সযদাযকৱিমানৱত্থু

১০৭৫. সূৰিযো যথা ৱিগতৱলাহকে নভে…পে….

(যথা পুৰিমৱিমানং তথা ৱিত্থাৰেতব্বং).

১০৭৯. ‘‘তেন মেতাদিসো ৱণ্ণো…পে…ৱণ্ণো চ মে সব্বদিসা পভাসতী’’তি.

দুতিযউপস্সযদাযকৱিমানং পঞ্চমং.

৬. ভিক্খাদাযকৱিমানৱত্থু

১০৮১. ‘‘উচ্চমিদং মণিথূণং ৱিমানং, সমন্ততো দ্ৱাদস যোজনানি;

কূটাগাৰা সত্তসতা উড়াৰা, ৱেড়ুৰিযথম্ভা ৰুচকত্থতা সুভা.

১০৮২. ‘‘দেৱিদ্ধিপত্তোসি মহানুভাৱো, মনুস্সভূতো কিমকাসি পুঞ্ঞং;

কেনাসি এৱং জলিতানুভাৱো, ৱণ্ণো চ তে সব্বদিসা পভাসতী’’তি.

১০৮৩. সো দেৱপুত্তো অত্তমনো…পে… যস্স কম্মস্সিদং ফলং.

১০৮৪. ‘‘অহং মনুস্সেসু মনুস্সভূতো, দিস্ৱান ভিক্খুং তসিতং কিলন্তং;

একাহং ভিক্খং পটিপাদযিস্সং, সমঙ্গি ভত্তেন তদা অকাসিং.

১০৮৫. ‘‘তেন মেতাদিসো ৱণ্ণো…পে… ৱণ্ণো চ মে সব্বদিসা পভাসতী’’তি.

ভিক্খাদাযকৱিমানং ছট্ঠং.

৭. যৱপালকৱিমানৱত্থু

১০৮৭. ‘‘উচ্চমিদং মণিথূণং ৱিমানং…পে… ৱণ্ণো চ তে সব্বদিসা পভাসতী’’তি.

১০৮৯. সো দেৱপুত্তো অত্তমনো…পে… যস্স কম্মস্সিদং ফলং.

১০৯০. ‘‘অহং মনুস্সেসু মনুস্সভূতো, অহোসিং যৱপালকো;

অদ্দসং ৱিৰজং ভিক্খুং, ৱিপ্পসন্নমনাৱিলং.

১০৯১. ‘‘তস্স অদাসহং ভাগং, পসন্নো সেহি পাণিভি;

কুম্মাসপিণ্ডং দত্ৱান, মোদামি নন্দনে ৱনে.

১০৯২. ‘‘তেন মেতাদিসো ৱণ্ণো…পে… ৱণ্ণো চ মে সব্বদিসা পভাসতী’’তি.

যৱপালকৱিমানং সত্তমং.

৮. পঠমকুণ্ডলীৱিমানৱত্থু

১০৯৪. ‘‘অলঙ্কতো মল্যধৰো সুৱত্থো, সুকুণ্ডলী কপ্পিতকেসমস্সু;

আমুত্তহত্থাভৰণো যসস্সী, দিব্বে ৱিমানম্হি যথাপি চন্দিমা.

১০৯৫. ‘‘দিব্বা চ ৱীণা পৱদন্তি ৱগ্গুং, অট্ঠট্ঠকা সিক্খিতা সাধুৰূপা;

দিব্বা চ কঞ্ঞা তিদসচৰা উড়াৰা, নচ্চন্তি গাযন্তি পমোদযন্তি.

১০৯৬. ‘‘দেৱিদ্ধিপত্তোসি মহানুভাৱো, মনুস্সভূতো কিমকাসি পুঞ্ঞং;

কেনাসি এৱং জলিতানুভাৱো, ৱণ্ণো চ তে সব্বদিসা পভাসতী’’তি.

১০৯৭. সো দেৱপুত্তো অত্তমনো…পে… যস্স কম্মস্সিদং ফলং.

১০৯৮. ‘‘অহং মনুস্সেসু মনুস্সভূতো, দিস্ৱান সমণে সীলৱন্তে;

সম্পন্নৱিজ্জাচৰণে যসস্সী, বহুস্সুতে তণ্হক্খযূপপন্নে;

অন্নঞ্চ পানঞ্চ পসন্নচিত্তো, সক্কচ্চ দানং ৱিপুলং অদাসিং.

১০৯৯. ‘‘তেন মেতাদিসো ৱণ্ণো…পে…ৱণ্ণো চ মে সব্বদিসা পভাসতী’’তি.

পঠমকুণ্ডলীৱিমানং অট্ঠমং.

৯. দুতিযকুণ্ডলীৱিমানৱত্থু

১১০১. ‘‘অলঙ্কতো মল্যধৰো সুৱত্থো, সুকুণ্ডলী কপ্পিতকেসমস্সু;

আমুত্তহত্থাভৰণো যসস্সী, দিব্বে ৱিমানম্হি যথাপি চন্দিমা.

১১০২. ‘‘দিব্বা চ ৱীণা পৱদন্তি ৱগ্গুং, অট্ঠট্ঠকা সিক্খিতা সাধুৰূপা;

দিব্বা চ কঞ্ঞা তিদসচৰা উড়াৰা, নচ্চন্তি গাযন্তি পমোদযন্তি.

১১০৩. ‘‘দেৱিদ্ধিপত্তোসি মহানুভাৱো, মনুস্সভূতো কিমকাসি পুঞ্ঞং;

কেনাসি এৱং জলিতানুভাৱো, ৱণ্ণো চ তে সব্বদিসা পভাসতী’’তি.

১১০৪. সো দেৱপুত্তো অত্তমনো…পে… যস্স কম্মস্সিদং ফলং.

১১০৫. ‘‘অহং মনুস্সেসু মনুস্সভূতো, দিস্ৱান সমণে সাধুৰূপে [সীলৱন্তে (ক.)];

সম্পন্নৱিজ্জাচৰণে যসস্সী, বহুস্সুতে সীলৱন্তে পসন্নে [সীলৱতূপপন্নে (ক. সী. ক.)];

অন্নঞ্চ পানঞ্চ পসন্নচিত্তো, সক্কচ্চ দানং ৱিপুলং অদাসিং.

১১০৬. ‘‘তেন মেতাদিসো ৱণ্ণো…পে…ৱণ্ণো চ মে সব্বদিসা পভাসতী’’তি.

দুতিযকুণ্ডলীৱিমানং নৱমং.

১০. (উত্তৰ) পাযাসিৱিমানৱত্থু

১১০৮. ‘‘যা দেৱৰাজস্স সভা সুধম্মা, যত্থচ্ছতি দেৱসঙ্ঘো সমগ্গো;

তথূপমং তুয্হমিদং ৱিমানং, ওভাসযং তিট্ঠতি অন্তলিক্খে.

১১০৯. ‘‘দেৱিদ্ধিপত্তোসি মহানুভাৱো, মনুস্সভূতো কিমকাসি পুঞ্ঞং;

কেনাসি এৱং জলিতানুভাৱো, ৱণ্ণো চ তে সব্বদিসা পভাসতী’’তি.

১১১০. সো দেৱপুত্তো অত্তমনো…পে… যস্স কম্মস্সিদং ফলং.

১১১১. ‘‘অহং মনুস্সেসু মনুস্সভূতো, ৰঞ্ঞো পাযাসিস্স অহোসিং মাণৱো;

লদ্ধা ধনং সংৱিভাগং অকাসিং, পিযা চ মে সীলৱন্তো অহেসুং;

অন্নঞ্চ পানঞ্চ পসন্নচিত্তো, সক্কচ্চ দানং ৱিপুলং অদাসিং.

১১১২. ‘‘তেন মেতাদিসো ৱণ্ণো…পে. …ৱণ্ণো চ মে সব্বদিসা পভাসতী’’তি.

(উত্তৰ) পাযাসিৱিমানং [উত্তৰৱিমানং (সী. স্যা. অট্ঠ.)] দসমং.

পাযাসিৱগ্গো ছট্ঠো নিট্ঠিতো.

তস্সুদ্দানং –

দ্ৱে অগাৰিনো ফলদাযী, দ্ৱে উপস্সযদাযী ভিক্খায দাযী;

যৱপালকো চেৱ দ্ৱে, কুণ্ডলিনো পাযাসীতি [পাঠভেদো নত্থি];

পুৰিসানং দুতিযো ৱগ্গো পৱুচ্চতীতি.