১৩. চূড়ৰথৱিমানৱত্থু

৯৮১. ‘‘দড়্হধম্মা নিসাৰস্স, ধনুং ওলুব্ভ তিট্ঠসি;

খত্তিযো নুসি ৰাজঞ্ঞো, অদু লুদ্দো ৱনেচৰো’’তি [ৱনাচৰোতি (স্যা. ক.)].

৯৮২. ‘‘অস্সকাধিপতিস্সাহং, ভন্তে পুত্তো ৱনেচৰো;

নামং মে ভিক্খু তে ব্ৰূমি, সুজাতো ইতি মং ৱিদূ [ৱিদুং (সী.)].

৯৮৩. ‘‘মিগে গৱেসমানোহং, ওগাহন্তো ব্ৰহাৱনং;

মিগং তঞ্চেৱ [মিগং গন্ত্ৱেৱ (স্যা.), মিগৱধঞ্চ (ক.)] নাদ্দক্খিং, তঞ্চ দিস্ৱা ঠিতো অহ’’ন্তি.

৯৮৪. ‘‘স্ৱাগতং তে মহাপুঞ্ঞ, অথো তে অদুৰাগতং;

এত্তো উদকমাদায, পাদে পক্খালযস্সু তে.

৯৮৫. ‘‘ইদম্পি পানীযং সীতং, আভতং গিৰিগব্ভৰা;

ৰাজপুত্ত ততো পিত্ৱা [পীত্ৱা (সী. স্যা.)], সন্থতস্মিং উপাৱিসা’’তি.

৯৮৬. ‘‘কল্যাণী ৱত তে ৱাচা, সৱনীযা মহামুনি;

নেলা অত্থৱতী [চত্থৱতী (সী.)] ৱগ্গু, মন্ত্ৱা [মন্তা (স্যা. পী. ক.)] অত্থঞ্চ ভাসসি [ভাসসে (সী.)].

৯৮৭. ‘‘কা তে ৰতি ৱনে ৱিহৰতো, ইসিনিসভ ৱদেহি পুট্ঠো;

তৱ ৱচনপথং নিসামযিত্ৱা, অত্থধম্মপদং সমাচৰেমসে’’তি.

৯৮৮. ‘‘অহিংসা সব্বপাণীনং, কুমাৰম্হাক ৰুচ্চতি;

থেয্যা চ অতিচাৰা চ, মজ্জপানা চ আৰতি.

৯৮৯. ‘‘আৰতি সমচৰিযা চ, বাহুসচ্চং কতঞ্ঞুতা;

দিট্ঠেৱ ধম্মে পাসংসা, ধম্মা এতে পসংসিযাতি.

৯৯০. ‘‘সন্তিকে মৰণং তুয্হং, ওৰং মাসেহি পঞ্চহি;

ৰাজপুত্ত ৱিজানাহি, অত্তানং পৰিমোচযা’’তি.

৯৯১. ‘‘কতমং স্ৱাহং জনপদং গন্ত্ৱা, কিং কম্মং কিঞ্চ পোৰিসং;

কায ৱা পন ৱিজ্জায, ভৱেয্যং অজৰামৰো’’তি.

৯৯২. ‘‘ন ৱিজ্জতে সো পদেসো, কম্মং ৱিজ্জা চ পোৰিসং;

যত্থ গন্ত্ৱা ভৱে মচ্চো, ৰাজপুত্তাজৰামৰো.

৯৯৩. ‘‘মহদ্ধনা মহাভোগা, ৰট্ঠৱন্তোপি খত্তিযা;

পহূতধনধঞ্ঞাসে, তেপি নো [তেপি ন (বহূসু)] অজৰামৰা.

৯৯৪. ‘‘যদি তে সুতা অন্ধকৱেণ্ডুপুত্তা [অন্ধকৱেণ্হুপুত্তা (সী.), অণ্ডকৱেণ্ডপুত্তা (স্যা. ক.)], সূৰা ৱীৰা ৱিক্কন্তপ্পহাৰিনো;

তেপি আযুক্খযং পত্তা, ৱিদ্ধস্তা সস্সতীসমা.

৯৯৫. ‘‘খত্তিযা ব্ৰাহ্মণা ৱেস্সা, সুদ্দা চণ্ডালপুক্কুসা;

এতে চঞ্ঞে চ জাতিযা, তেপি নো অজৰামৰা.

৯৯৬. ‘‘যে মন্তং পৰিৱত্তেন্তি, ছড়ঙ্গং ব্ৰহ্মচিন্তিতং;

এতে চঞ্ঞে চ ৱিজ্জায, তেপি নো অজৰামৰা.

৯৯৭. ‘‘ইসযো চাপি যে সন্তা, সঞ্ঞতত্তা তপস্সিনো;

সৰীৰং তেপি কালেন, ৱিজহন্তি তপস্সিনো.

৯৯৮. ‘‘ভাৱিতত্তাপি অৰহন্তো, কতকিচ্চা অনাসৱা;

নিক্খিপন্তি ইমং দেহং, পুঞ্ঞপাপপৰিক্খযা’’তি.

৯৯৯. ‘‘সুভাসিতা অত্থৱতী, গাথাযো তে মহামুনি;

নিজ্ঝত্তোম্হি সুভট্ঠেন, ত্ৱঞ্চ মে সৰণং ভৱা’’তি.

১০০০. ‘‘মা মং ত্ৱং সৰণং গচ্ছ, তমেৱ সৰণং ৱজ [ভজ (ক.)];

সক্যপুত্তং মহাৱীৰং, যমহং সৰণং গতো’’তি.

১০০১. ‘‘কতৰস্মিং সো জনপদে, সত্থা তুম্হাক মাৰিস;

অহম্পি দট্ঠুং গচ্ছিস্সং, জিনং অপ্পটিপুগ্গল’’ন্তি.

১০০২. ‘‘পুৰত্থিমস্মিং জনপদে, ওক্কাককুলসম্ভৱো;

তত্থাসি পুৰিসাজঞ্ঞো, সো চ খো পৰিনিব্বুতো’’তি.

১০০৩. ‘‘সচে হি বুদ্ধো তিট্ঠেয্য, সত্থা তুম্হাক মাৰিস;

যোজনানি সহস্সানি, গচ্ছেয্যং [গচ্ছে (স্যা. পী. ক.)] পযিৰুপাসিতুং.

১০০৪. ‘‘যতো চ খো [যতা খো (পী. ক.)] পৰিনিব্বুতো, সত্থা তুম্হাক মাৰিস;

নিব্বুতম্পি [পৰিনিব্বুতং (স্যা. ক.)] মহাৱীৰং, গচ্ছামি সৰণং অহং.

১০০৫. ‘‘উপেমি সৰণং বুদ্ধং, ধম্মঞ্চাপি অনুত্তৰং;

সঙ্ঘঞ্চ নৰদেৱস্স, গচ্ছামি সৰণং অহং.

১০০৬. ‘‘পাণাতিপাতা ৱিৰমামি খিপ্পং, লোকে অদিন্নং পৰিৱজ্জযামি;

অমজ্জপো নো চ মুসা ভণামি, সকেন দাৰেন চ হোমি তুট্ঠো’’তি.

১০০৭. ‘‘সহস্সৰংসীৱ যথা মহপ্পভো, দিসং যথা ভাতি নভে অনুক্কমং;

তথাপকাৰো [তথপ্পকাৰো (সী. স্যা.)] তৱাযং [তৱযং (সী. পী.)] মহাৰথো, সমন্ততো যোজনসত্তমাযতো.

১০০৮. ‘‘সুৱণ্ণপট্টেহি সমন্তমোত্থটো, উৰস্স মুত্তাহি মণীহি চিত্তিতো;

লেখা সুৱণ্ণস্স চ ৰূপিযস্স চ, সোভেন্তি ৱেড়ুৰিযমযা সুনিম্মিতা.

১০০৯. ‘‘সীসঞ্চিদং ৱেড়ুৰিযস্স নিম্মিতং, যুগঞ্চিদং লোহিতকায চিত্তিতং;

যুত্তা সুৱণ্ণস্স চ ৰূপিযস্স চ, সোভন্তি অস্সা চ ইমে মনোজৱা.

১০১০. ‘‘সো তিট্ঠসি হেমৰথে অধিট্ঠিতো, দেৱানমিন্দোৱ সহস্সৱাহনো;

পুচ্ছামি তাহং যসৱন্ত কোৱিদং [কোৱিদ (ক.)], কথং তযা লদ্ধো অযং উড়াৰো’’তি.

১০১১. ‘‘সুজাতো নামহং ভন্তে, ৰাজপুত্তো পুৰে অহুং;

ত্ৱঞ্চ মং অনুকম্পায, সঞ্ঞমস্মিং নিৱেসযি.

১০১২. ‘‘খীণাযুকঞ্চ মং ঞত্ৱা, সৰীৰং পাদাসি সত্থুনো;

ইমং সুজাত পূজেহি, তং তে অত্থায হেহিতি.

১০১৩. ‘‘তাহং গন্ধেহি মালেহি, পূজযিত্ৱা সমুয্যুতো;

পহায মানুসং দেহং, উপপন্নোম্হি নন্দনং.

১০১৪. ‘‘নন্দনে চ ৱনে [নন্দনোপৱনে (সী.), নন্দনে পৱনে (স্যা. ক.)] ৰম্মে, নানাদিজগণাযুতে;

ৰমামি নচ্চগীতেহি, অচ্ছৰাহি পুৰক্খতো’’তি.

চূড়ৰথৱিমানং তেৰসমং.