৯. ৱিসালক্খিৱিমানৱত্থু

৬৬৬. ‘‘কা নাম ত্ৱং ৱিসালক্খি [ৱিসালক্খী (স্যা.)], ৰম্মে চিত্তলতাৱনে;

সমন্তা অনুপৰিযাসি, নাৰীগণপুৰক্খতা [পুৰক্খিতা (স্যা. ক.)].

৬৬৭. ‘‘যদা দেৱা তাৱতিংসা, পৱিসন্তি ইমং ৱনং;

সযোগ্গা সৰথা সব্বে, চিত্ৰা হোন্তি ইধাগতা.

৬৬৮. ‘‘তুয্হঞ্চ ইধ পত্তায, উয্যানে ৱিচৰন্তিযা;

কাযে ন দিস্সতী চিত্তং, কেন ৰূপং তৱেদিসং;

দেৱতে পুচ্ছিতাচিক্খ, কিস্স কম্মস্সিদং ফল’’ন্তি.

৬৬৯. ‘‘যেন কম্মেন দেৱিন্দ, ৰূপং ময্হং গতী চ মে;

ইদ্ধি চ আনুভাৱো চ, তং সুণোহি পুৰিন্দদ.

৬৭০. ‘‘অহং ৰাজগহে ৰম্মে, সুনন্দা নামুপাসিকা;

সদ্ধা সীলেন সম্পন্না, সংৱিভাগৰতা সদা.

৬৭১. ‘‘অচ্ছাদনঞ্চ ভত্তঞ্চ, সেনাসনং পদীপিযং;

অদাসিং উজুভূতেসু, ৱিপ্পসন্নেন চেতসা.

৬৭২. ‘‘চাতুদ্দসিং [চতুদ্দসিং (পী. ক.)] পঞ্চদসিং, যা চ পক্খস্স অট্ঠমী;

পাটিহাৰিযপক্খঞ্চ, অট্ঠঙ্গসুসমাগতং.

৬৭৩. ‘‘উপোসথং উপৱসিস্সং, সদা সীলেসু সংৱুতা;

সঞ্ঞমা সংৱিভাগা চ, ৱিমানং আৱসামহং.

৬৭৪. ‘‘পাণাতিপাতা ৱিৰতা, মুসাৱাদা চ সঞ্ঞতা;

থেয্যা চ অতিচাৰা চ, মজ্জপানা চ আৰকা.

৬৭৫. ‘‘পঞ্চসিক্খাপদে ৰতা, অৰিযসচ্চান কোৱিদা;

উপাসিকা চক্খুমতো, গোতমস্স যসস্সিনো.

৬৭৬. ‘‘তস্সা মে ঞাতিকুলা দাসী [ঞাতিকুলং আসী (স্যা. ক.)], সদা মালাভিহাৰতি;

তাহং ভগৱতো থূপে, সব্বমেৱাভিৰোপযিং.

৬৭৭. ‘‘উপোসথে চহং গন্ত্ৱা, মালাগন্ধৱিলেপনং;

থূপস্মিং অভিৰোপেসিং, পসন্না সেহি পাণিভি.

৬৭৮. ‘‘তেন কম্মেন দেৱিন্দ, ৰূপং ময্হং গতী চ মে;

ইদ্ধী চ আনুভাৱো চ, যং মালং অভিৰোপযিং.

৬৭৯. ‘‘যঞ্চ সীলৱতী আসিং, ন তং তাৱ ৱিপচ্চতি;

আসা চ পন মে দেৱিন্দ, সকদাগামিনী সিয’’ন্তি.

ৱিসালক্খিৱিমানং নৱমং.