১০. পাৰিচ্ছত্তকৱিমানৱত্থু

৬৮০. ‘‘পাৰিচ্ছত্তকে কোৱিড়াৰে, ৰমণীযে মনোৰমে;

দিব্বমালং গন্থমানা, গাযন্তী সম্পমোদসি.

৬৮১. ‘‘তস্সা তে নচ্চমানায, অঙ্গমঙ্গেহি সব্বসো;

দিব্বা সদ্দা নিচ্ছৰন্তি, সৱনীযা মনোৰমা.

৬৮২. ‘‘তস্সা তে নচ্চমানায, অঙ্গমঙ্গেহি সব্বসো;

দিব্বা গন্ধা পৱাযন্তি, সুচিগন্ধা মনোৰমা.

৬৮৩. ‘‘ৱিৱত্তমানা কাযেন, যা ৱেণীসু পিড়ন্ধনা.

তেসং সুয্যতি নিগ্ঘোসো, তূৰিযে পঞ্চঙ্গিকে যথা.

৬৮৪. ‘‘ৱটংসকা ৱাতধুতা [ৱাতধূতা (সী. স্যা.)], ৱাতেন সম্পকম্পিতা;

তেসং সুয্যতি নিগ্ঘোসো, তূৰিযে পঞ্চঙ্গিকে যথা.

৬৮৫. ‘‘যাপি তে সিৰস্মিং মালা, সুচিগন্ধা মনোৰমা;

ৱাতি গন্ধো দিসা সব্বা, ৰুক্খো মঞ্জূসকো যথা.

৬৮৬. ‘‘ঘাযসে তং সুচিগন্ধং [সুচিং গন্ধং (সী.)], ৰূপং পস্সসি অমানুসং [মানুসং (পী.)];

দেৱতে পুচ্ছিতাচিক্খ, কিস্স কম্মস্সিদং ফল’’ন্তি.

৬৮৭. ‘‘পভস্সৰং অচ্চিমন্তং, ৱণ্ণগন্ধেন সংযুতং;

অসোকপুপ্ফমালাহং, বুদ্ধস্স উপনামযিং.

৬৮৮. ‘‘তাহং কম্মং কৰিত্ৱান, কুসলং বুদ্ধৱণ্ণিতং;

অপেতসোকা সুখিতা, সম্পমোদামনামযা’’তি.

পাৰিচ্ছত্তকৱিমানং দসমং.

পাৰিচ্ছত্তকৱগ্গো ততিযো নিট্ঠিতো.

তস্সুদ্দানং –

উড়াৰো উচ্ছু পল্লঙ্কো, লতা চ গুত্তিলেন চ;

দদ্দল্লপেসমল্লিকা, ৱিসালক্খি পাৰিচ্ছত্তকো;

ৱগ্গো তেন পৱুচ্চতীতি.