৮. মল্লিকাৱিমানৱত্থু

৬৫৮. ‘‘পীতৱত্থে পীতধজে, পীতালঙ্কাৰভূসিতে;

পীতন্তৰাহি ৱগ্গূহি, অপিড়ন্ধাৱ সোভসি.

৬৫৯. ‘‘কা কম্বুকাযূৰধৰে [ককম্বুকাযুৰধৰে (স্যা.)], কঞ্চনাৱেড়ভূসিতে;

হেমজালকসঞ্ছন্নে [পচ্ছন্নে (সী.)], নানাৰতনমালিনী.

৬৬০. ‘‘সোৱণ্ণমযা লোহিতঙ্গমযা [লোহিতঙ্কমযা (সী. স্যা.)] চ, মুত্তামযা ৱেড়ুৰিযমযা চ;

মসাৰগল্লা সহলোহিতঙ্গা [সহলোহিতঙ্কা (সী.), সহলোহিতকা (স্যা.)], পাৰেৱতক্খীহি মণীহি চিত্ততা.

৬৬১. ‘‘কোচি কোচি এত্থ মযূৰসুস্সৰো, হংসস্স ৰঞ্ঞো কৰৱীকসুস্সৰো;

তেসং সৰো সুয্যতি ৱগ্গুৰূপো, পঞ্চঙ্গিকং তূৰিযমিৱপ্পৱাদিতং.

৬৬২. ‘‘ৰথো চ তে সুভো ৱগ্গু [ৱগ্গূ (স্যা.)], নানাৰতনচিত্তিতো [নানাৰতনচিত্তঙ্গো (স্যা.)];

নানাৱণ্ণাহি ধাতূহি, সুৱিভত্তোৱ সোভতি.

৬৬৩. ‘‘তস্মিং ৰথে কঞ্চনবিম্বৱণ্ণে, যা ত্ৱং [যত্থ (ক. সী. স্যা. ক.)] ঠিতা ভাসসি মং পদেসং;

দেৱতে পুচ্ছিতাচিক্খ, কিস্স কম্মস্সিদং ফল’’ন্তি.

৬৬৪. ‘‘সোৱণ্ণজালং মণিসোণ্ণচিত্তিতং [ৱিচিত্তং (ক.), চিত্তং (সী. স্যা.)], মুত্তাচিতং হেমজালেন ছন্নং [সঞ্ছন্নং (ক.)];

পৰিনিব্বুতে গোতমে অপ্পমেয্যে, পসন্নচিত্তা অহমাভিৰোপযিং.

৬৬৫. ‘‘তাহং কম্মং কৰিত্ৱান, কুসলং বুদ্ধৱণ্ণিতং;

অপেতসোকা সুখিতা, সম্পমোদামনামযা’’তি.

মল্লিকাৱিমানং অট্ঠমং.