৭. পেসৱতীৱিমানৱত্থু

৬৪৬. ‘‘ফলিকৰজতহেমজালছন্নং, ৱিৱিধচিত্ৰতলমদ্দসং সুৰম্মং;

ব্যম্হং সুনিম্মিতং তোৰণূপপন্নং, ৰুচকুপকিণ্ণমিদং সুভং ৱিমানং.

৬৪৭. ‘‘ভাতি চ দস দিসা নভেৱ সুৰিযো, সৰদে তমোনুদো সহস্সৰংসী;

তথা তপতিমিদং তৱ ৱিমানং, জলমিৱ ধূমসিখো নিসে নভগ্গে.

৬৪৮. ‘‘মুসতীৱ নযনং সতেৰতাৱ [সতেৰিতাৱ (স্যা. ক.)], আকাসে ঠপিতমিদং মনুঞ্ঞং;

ৱীণামুৰজসম্মতাড়ঘুট্ঠং, ইদ্ধং ইন্দপুৰং যথা তৱেদং.

৬৪৯. ‘‘পদুমকুমুদুপ্পলকুৱলযং, যোধিক [যূধিক (সী.)] বন্ধুকনোজকা [যোথিকা ভণ্ডিকা নোজকা (স্যা.)] চ সন্তি;

সালকুসুমিতপুপ্ফিতা অসোকা, ৱিৱিধদুমগ্গসুগন্ধসেৱিতমিদং.

৬৫০. ‘‘সড়ললবুজভুজক [সুজক (সী. স্যা.)] সংযুত্তা [সঞ্ঞতা (সী.)], কুসকসুফুল্লিতলতাৱলম্বিনীহি;

মণিজালসদিসা যসস্সিনী, ৰম্মা পোক্খৰণী উপট্ঠিতা তে.

৬৫১. ‘‘উদকৰুহা চ যেত্থি পুপ্ফজাতা, থলজা যে চ সন্তি ৰুক্খজাতা;

মানুসকামানুস্সকা চ দিব্বা, সব্বে তুয্হং নিৱেসনম্হি জাতা.

৬৫২. ‘‘কিস্স সংযমদমস্সযং ৱিপাকো, কেনাসি কম্মফলেনিধূপপন্না;

যথা চ তে অধিগতমিদং ৱিমানং, তদনুপদং অৱচাসিড়াৰপম্হে’’তি [পখুমেতি (সী.)].

৬৫৩. ‘‘যথা চ মে অধিগতমিদং ৱিমানং, কোঞ্চমযূৰচকোৰ [চঙ্কোৰ (ক.)] সঙ্ঘচৰিতং;

দিব্য [দিব্ব (সী. পী.)] পিলৱহংসৰাজচিণ্ণং, দিজকাৰণ্ডৱকোকিলাভিনদিতং.

৬৫৪. ‘‘নানাসন্তানকপুপ্ফৰুক্খৱিৱিধা, পাটলিজম্বুঅসোকৰুক্খৱন্তং;

যথা চ মে অধিগতমিদং ৱিমানং, তং তে পৱেদযামি [পৱদিস্সামি (সী.), পৱেদিস্সামি (পী.)] সুণোহি ভন্তে.

৬৫৫. ‘‘মগধৱৰপুৰত্থিমেন, নাড়কগামো নাম অত্থি ভন্তে;

তত্থ অহোসিং পুৰে সুণিসা, পেসৱতীতি [সেসৱতীতি (সী. স্যা.)] তত্থ জানিংসু মমং.

৬৫৬. ‘‘সাহমপচিতত্থধম্মকুসলং, দেৱমনুস্সপূজিতং মহন্তং;

উপতিস্সং নিব্বুতমপ্পমেয্যং, মুদিতমনা কুসুমেহি অব্ভুকিৰিং [অব্ভোকিৰিং (সী. স্যা. পী. ক.)].

৬৫৭. ‘‘পৰমগতিগতঞ্চ পূজযিত্ৱা, অন্তিমদেহধৰং ইসিং উড়াৰং;

পহায মানুসকং সমুস্সযং, তিদসগতা ইধ মাৱসামি ঠান’’ন্তি.

পেসৱতীৱিমানং সত্তমং.