৬. দদ্দল্লৱিমানৱত্থু

৬১৯. ‘‘দদ্দল্লমানা [দদ্দড়্হমানা (ক.)] ৱণ্ণেন, যসসা চ যসস্সিনী;

সব্বে দেৱে তাৱতিংসে, ৱণ্ণেন অতিৰোচসি.

৬২০. ‘‘দস্সনং নাভিজানামি, ইদং পঠমদস্সনং;

কস্মা কাযা নু আগম্ম, নামেন ভাসসে মম’’ন্তি.

৬২১. ‘‘অহং ভদ্দে সুভদ্দাসিং, পুব্বে মানুসকে ভৱে;

সহভৰিযা চ তে আসিং, ভগিনী চ কনিট্ঠিকা.

৬২২. ‘‘সা অহং কাযস্স ভেদা, ৱিপ্পমুত্তা ততো চুতা;

নিম্মানৰতীনং দেৱানং, উপপন্না সহব্যত’’ন্তি.

৬২৩. ‘‘পহূতকতকল্যাণা, তে দেৱে যন্তি পাণিনো;

যেসং ত্ৱং কিত্তযিস্সসি, সুভদ্দে জাতিমত্তনো.

৬২৪. ‘‘অথ [কথং (সী. স্যা.)] ত্ৱং কেন ৱণ্ণেন, কেন ৱা অনুসাসিতা;

কীদিসেনেৱ দানেন, সুব্বতেন যসস্সিনী.

৬২৫. ‘‘যসং এতাদিসং পত্তা, ৱিসেসং ৱিপুলমজ্ঝগা;

দেৱতে পুচ্ছিতাচিক্খ, কিস্স কম্মস্সিদং ফল’’ন্তি.

৬২৬. ‘‘অট্ঠেৱ পিণ্ডপাতানি, যং দানং অদদং পুৰে;

দক্খিণেয্যস্স সঙ্ঘস্স, পসন্না সেহি পাণিভি.

৬২৭. ‘‘তেন মেতাদিসো ৱণ্ণো…পে…ৱণ্ণো চ মে সব্বদিসা পভাসতী’’তি.

৬২৯. ‘‘অহং তযা বহুতৰে ভিক্খূ, সঞ্ঞতে ব্ৰহ্মচাৰযো [ব্ৰহ্মচৰিনো (স্যা.), ব্ৰহ্মচাৰিযে (পী. ক.)];

তপ্পেসিং অন্নপানেন, পসন্না সেহি পাণিভি.

৬৩০. ‘‘তযা বহুতৰং দত্ৱা, হীনকাযূপগা অহং [অহুং (ক. সী.)];

কথং ত্ৱং অপ্পতৰং দত্ৱা, ৱিসেসং ৱিপুলমজ্ঝগা;

দেৱতে পুচ্ছিতাচিক্খ, কিস্স কম্মস্সিদং ফল’’ন্তি.

৬৩১. ‘‘মনোভাৱনীযো ভিক্খু, সন্দিট্ঠো মে পুৰে অহু;

তাহং ভত্তেন [ভদ্দে (ক.)] নিমন্তেসিং, ৰেৱতং অত্তনট্ঠমং.

৬৩২. ‘‘সো মে অত্থপুৰেক্খাৰো, অনুকম্পায ৰেৱতো;

সঙ্ঘে দেহীতি মংৱোচ, তস্সাহং ৱচনং কৰিং.

৬৩৩. ‘‘সা দক্খিণা সঙ্ঘগতা, অপ্পমেয্যে পতিট্ঠিতা;

পুগ্গলেসু তযা দিন্নং, ন তং তৱ মহপ্ফল’’ন্তি.

৬৩৪. ‘‘ইদানেৱাহং জানামি, সঙ্ঘে দিন্নং মহপ্ফলং;

সাহং গন্ত্ৱা মনুস্সত্তং, ৱদঞ্ঞূ ৱীতমচ্ছৰা;

সঙ্ঘে দানানি দস্সামি [সঙ্ঘে দানং দস্সামিহং (স্যা.)], অপ্পমত্তা পুনপ্পুন’’ন্তি.

৬৩৫. ‘‘কা এসা দেৱতা ভদ্দে, তযা মন্তযতে সহ;

সব্বে দেৱে তাৱতিংসে, ৱণ্ণেন অতিৰোচতী’’তি.

৬৩৬. ‘‘মনুস্সভূতা দেৱিন্দ, পুব্বে মানুসকে ভৱে;

সহভৰিযা চ মে আসি, ভগিনী চ কনিট্ঠিকা;

সঙ্ঘে দানানি দত্ৱান, কতপুঞ্ঞা ৱিৰোচতী’’তি.

৬৩৭. ‘‘ধম্মেন পুব্বে ভগিনী, তযা ভদ্দে ৱিৰোচতি;

যং সঙ্ঘম্হি অপ্পমেয্যে, পতিট্ঠাপেসি দক্খিণং.

৬৩৮. ‘‘পুচ্ছিতো হি মযা বুদ্ধো, গিজ্ঝকূটম্হি পব্বতে;

ৱিপাকং সংৱিভাগস্স, যত্থ দিন্নং মহপ্ফলং.

৬৩৯. ‘‘যজমানানং মনুস্সানং, পুঞ্ঞপেক্খান পাণিনং;

কৰোতং ওপধিকং পুঞ্ঞং, যত্থ দিন্নং মহপ্ফলং.

৬৪০. ‘‘তং মে বুদ্ধো ৱিযাকাসি, জানং কম্মফলং সকং;

ৱিপাকং সংৱিভাগস্স, যত্থ দিন্নং মহপ্ফলং.

৬৪১. [ৱি. ৱ. ৭৫০; কথা. ৭৯৮] ‘‘চত্তাৰো চ পটিপন্না, চত্তাৰো চ ফলে ঠিতা;

এস সঙ্ঘো উজুভূতো, পঞ্ঞাসীলসমাহিতো.

৬৪২. [ৱি. ৱ. ৭৫১; কথা. ৭৯৮] ‘‘যজমানানং মনুস্সানং, পুঞ্ঞপেক্খান পাণিনং;

কৰোতং ওপধিকং পুঞ্ঞং, সঙ্ঘে দিন্নং মহপ্ফলং.

৬৪৩. [ৱি. ৱ. ৭৫২; কথা. ৭৯৮] ‘‘এসো হি সঙ্ঘো ৱিপুলো মহগ্গতো, এসপ্পমেয্যো উদধীৱ সাগৰো;

এতে হি সেট্ঠা নৰৱীৰসাৱকা, পভঙ্কৰা ধম্মমুদীৰযন্তি [ধম্মকথং উদীৰযন্তি (স্যা.)].

৬৪৪. [ৱি. ৱ. ৭৫৩; কথা. ৭৯৮] ‘‘তেসং সুদিন্নং সুহুতং সুযিট্ঠং, যে সঙ্ঘমুদ্দিস্স দদন্তি দানং;

সা দক্খিণা সঙ্ঘগতা পতিট্ঠিতা, মহপ্ফলা লোকৱিদূন [লোকৱিদূহি (স্যা. ক.)] ৱণ্ণিতা.

৬৪৫. [ৱি. ৱ. ৭৫৪; কথা. ৭৯৮] ‘‘এতাদিসং যঞ্ঞমনুস্সৰন্তা [পুঞ্ঞমনুস্সৰন্তা (স্যা. ক.)], যে ৱেদজাতা ৱিচৰন্তি লোকে;

ৱিনেয্য মচ্ছেৰমলং সমূলং, অনিন্দিতা সগ্গমুপেন্তি ঠান’’ন্তি.

দদ্দল্লৱিমানং [দদ্দড়্হৱিমানং (ক.)] ছট্ঠং.