২. উচ্ছুদাযিকাৱিমানৱত্থু

২৯৬. ‘‘ওভাসযিত্ৱা পথৱিং [পঠৱিং (সী. স্যা.)] সদেৱকং, অতিৰোচসি চন্দিমসূৰিযা ৱিয;

সিৰিযা চ ৱণ্ণেন যসেন তেজসা, ব্ৰহ্মাৱ দেৱে তিদসে সহিন্দকে [সইন্দকে (সী.)].

২৯৭. ‘‘পুচ্ছামি তং উপ্পলমালধাৰিনী, আৱেড়িনী কঞ্চনসন্নিভত্তচে;

অলঙ্কতে উত্তমৱত্থধাৰিনী, কা ত্ৱং সুভে দেৱতে ৱন্দসে মমং.

২৯৮. ‘‘কিং ত্ৱং পুৰে কম্মমকাসি অত্তনা, মনুস্সভূতা পুৰিমায জাতিযা;

দানং সুচিণ্ণং অথ সীলসংযমং [সঞ্ঞমং (সী.)], কেনূপপন্না সুগতিং যসস্সিনী;

দেৱতে পুচ্ছিতাচিক্খ, কিস্স কম্মস্সিদং ফল’’ন্তি.

২৯৯. ‘‘ইদানি ভন্তে ইমমেৱ গামং [গামে (স্যা. ক.)], পিণ্ডায অম্হাকং ঘৰং উপাগমি;

ততো তে উচ্ছুস্স অদাসি খণ্ডিকং, পসন্নচিত্তা অতুলায পীতিযা.

৩০০. ‘‘সস্সু চ পচ্ছা অনুযুঞ্জতে মমং, কহং [কহং মে (পী.)] নু উচ্ছুং ৱধুকে অৱাকিৰি [অৱাকৰি (স্যা. ক.)];

ন ছড্ডিতং নো পন খাদিতং মযা, সন্তস্স ভিক্খুস্স সযং অদাসহং.

৩০১. ‘‘তুয্হংন্ৱিদং [তুয্হং নু ইদং (স্যা.)] ইস্সৰিযং অথো মম, ইতিস্সা সস্সু পৰিভাসতে মমং;

পীঠং গহেত্ৱা পহাৰং অদাসি মে, ততো চুতা কালকতাম্হি দেৱতা.

৩০২. ‘‘তদেৱ কম্মং কুসলং কতং মযা, সুখঞ্চ কম্মং অনুভোমি অত্তনা;

দেৱেহি সদ্ধিং পৰিচাৰযামহং, মোদামহং কামগুণেহি পঞ্চহি.

৩০৩. ‘‘তদেৱ কম্মং কুসলং কতং মযা, সুখঞ্চ কম্মং অনুভোমি অত্তনা;

দেৱিন্দগুত্তা তিদসেহি ৰক্খিতা, সমপ্পিতা কামগুণেহি পঞ্চহি.

৩০৪. ‘‘এতাদিসং পুঞ্ঞফলং অনপ্পকং, মহাৱিপাকা মম উচ্ছুদক্খিণা;

দেৱেহি সদ্ধিং পৰিচাৰযামহং, মোদামহং কামগুণেহি পঞ্চহি.

৩০৫. ‘‘এতাদিসং পুঞ্ঞফলং অনপ্পকং, মহাজুতিকা মম উচ্ছুদক্খিণা;

দেৱিন্দগুত্তা তিদসেহি ৰক্খিতা, সহস্সনেত্তোৰিৱ নন্দনে ৱনে.

৩০৬. ‘‘তুৱঞ্চ ভন্তে অনুকম্পকং ৱিদুং, উপেচ্চ ৱন্দিং কুসলঞ্চ পুচ্ছিসং;

ততো তে উচ্ছুস্স অদাসি খণ্ডিকং, পসন্নচিতা অতুলায পীতিযা’’তি.

উচ্ছুদাযিকাৱিমানং দুতিযং.