১. উড়াৰৱিমানৱত্থু

২৮৬. ‘‘উড়াৰো তে যসো ৱণ্ণো, সব্বা ওভাসতে দিসা;

নাৰিযো নচ্চন্তি গাযন্তি, দেৱপুত্তা অলঙ্কতা.

২৮৭. ‘‘মোদেন্তি পৰিৱাৰেন্তি, তৱ পূজায দেৱতে;

সোৱণ্ণানি ৱিমানানি, তৱিমানি সুদস্সনে.

২৮৮. ‘‘তুৱংসি ইস্সৰা তেসং, সব্বকামসমিদ্ধিনী;

অভিজাতা মহন্তাসি, দেৱকাযে পমোদসি;

দেৱতে পুচ্ছিতাচিক্খ, কিস্স কম্মস্সিদং ফল’’ন্তি.

২৮৯. ‘‘অহং মনুস্সেসু মনুস্সভূতা, পুৰিমায জাতিযা মনুস্সলোকে;

দুস্সীলকুলে সুণিসা অহোসিং, অস্সদ্ধেসু কদৰিযেসু অহং.

২৯০. ‘‘সদ্ধা সীলেন সম্পন্না, সংৱিভাগৰতা সদা;

পিণ্ডায চৰমানস্স, অপূৱং তে অদাসহং.

২৯১. ‘‘তদাহং সস্সুযাচিক্খিং, সমণো আগতো ইধ;

তস্স অদাসহং পূৱং, পসন্না সেহি পাণিভি.

২৯২. ‘‘ইতিস্সা সস্সু পৰিভাসি, অৱিনীতাসি ত্ৱং [অৱিনীতা তুৱং (সী.)] ৱধু;

ন মং সম্পুচ্ছিতুং ইচ্ছি, সমণস্স দদামহং.

২৯৩. ‘‘ততো মে সস্সু কুপিতা, পহাসি মুসলেন মং;

কূটঙ্গচ্ছি অৱধি মং, নাসক্খিং জীৱিতুং চিৰং.

২৯৪. ‘‘সা অহং কাযস্স ভেদা, ৱিপ্পমুত্তা ততো চুতা;

দেৱানং তাৱতিংসানং, উপপন্না সহব্যতং.

২৯৫. ‘‘তেন মেতাদিসো ৱণ্ণো…পে…ৱণ্ণো চ মে সব্বদিসা পভাসতী’’তি.

উড়াৰৱিমানং পঠমং.