৯. উদপানসুত্তং

৬৯. এৱং মে সুতং – একং সমযং ভগৱা মল্লেসু চাৰিকং চৰমানো মহতা ভিক্খুসঙ্ঘেন সদ্ধিং যেন থূণং [থূনং (সী. স্যা. পী.)] নাম মল্লানং ব্ৰাহ্মণগামো তদৱসৰি. অস্সোসুং খো থূণেয্যকা ব্ৰাহ্মণগহপতিকা – ‘‘সমণো খলু, ভো, গোতমো সক্যপুত্তো সক্যকুলা পব্বজিতো মল্লেসু চাৰিকং চৰমানো মহতা ভিক্খুসঙ্ঘেন সদ্ধিং থূণং অনুপ্পত্তো’’তি.( ) [(অথ খো তে থূণেয্যকা ব্ৰাহ্মণগহপতিকা) (?)] উদপানং তিণস্স চ ভুসস্স চ যাৱ মুখতো পূৰেসুং – ‘‘মা তে মুণ্ডকা সমণকা পানীযং অপংসূ’’তি.

অথ খো ভগৱা মগ্গা ওক্কম্ম যেন ৰুক্খমূলং তেনুপসঙ্কমি; উপসঙ্কমিত্ৱা পঞ্ঞত্তে আসনে নিসীদি. নিসজ্জ খো ভগৱা আযস্মন্তং আনন্দং আমন্তেসি – ‘‘ইঙ্ঘ মে ত্ৱং, আনন্দ, এতম্হা উদপানা পানীযং আহৰা’’তি.

এৱং ৱুত্তে, আযস্মা আনন্দো ভগৱন্তং এতদৱোচ – ‘‘ইদানি সো, ভন্তে, উদপানো থূণেয্যকেহি ব্ৰাহ্মণগহপতিকেহি তিণস্স চ ভুসস্স চ যাৱ মুখতো পূৰিতো – ‘মা তে মুণ্ডকা সমণকা পানীযং অপংসূ’’’তি.

দুতিযম্পি খো…পে… ততিযম্পি খো ভগৱা আযস্মন্তং আনন্দং আমন্তেসি – ‘‘ইঙ্ঘ মে ত্ৱং, আনন্দ, এতম্হা উদপানা পানীযং আহৰা’’তি. ‘‘এৱং, ভন্তে’’তি খো আযস্মা আনন্দো ভগৱতো পটিস্সুত্ৱা পত্তং গহেত্ৱা যেন সো উদপানো তেনুপসঙ্কমি. অথ খো সো উদপানো আযস্মন্তে আনন্দে উপসঙ্কমন্তে সব্বং তং তিণঞ্চ ভুসঞ্চ মুখতো ওৱমিত্ৱা অচ্ছস্স উদকস্স অনাৱিলস্স ৱিপ্পসন্নস্স যাৱ মুখতো পূৰিতো ৱিস্সন্দন্তো [ৱিস্সন্দো (ক.)] মঞ্ঞে অট্ঠাসি.

অথ খো আযস্মতো আনন্দস্স এতদহোসি – ‘‘অচ্ছৰিযং ৱত, ভো, অব্ভুতং ৱত, ভো, তথাগতস্স মহিদ্ধিকতা মহানুভাৱতা! অযঞ্হি সো উদপানো মযি উপসঙ্কমন্তে সব্বং তং তিণঞ্চ ভুসঞ্চ মুখতো ওৱমিত্ৱা অচ্ছস্স উদকস্স অনাৱিলস্স ৱিপ্পসন্নস্স যাৱ মুখতো পূৰিতো ৱিস্সন্দন্তো মঞ্ঞে ঠিতো’’তি!! পত্তেন পানীযং আদায যেন ভগৱা তেনুপসঙ্কমি; উপসঙ্কমিত্ৱা ভগৱন্তং এতদৱোচ – ‘‘অচ্ছৰিযং, ভন্তে, অব্ভুতং, ভন্তে, তথাগতস্স মহিদ্ধিকতা মহানুভাৱতা! অযঞ্হি সো, ভন্তে, উদপানো মযি উপসঙ্কমন্তে সব্বং তং তিণঞ্চ ভুসঞ্চ মুখতো ওৱমিত্ৱা অচ্ছস্স উদকস্স অনাৱিলস্স ৱিপ্পসন্নস্স যাৱ মুখতো পূৰিতো ৱিস্সন্দন্তো মঞ্ঞে অট্ঠাসি!! পিৱতু ভগৱা পানীযং, পিৱতু সুগতো পানীয’’ন্তি.

অথ খো ভগৱা এতমত্থং ৱিদিত্ৱা তাযং ৱেলাযং ইমং উদানং উদানেসি –

‘‘কিং কযিৰা উদপানেন,

আপা চে সব্বদা সিযুং;

তণ্হায মূলতো ছেত্ৱা,

কিস্স পৰিযেসনং চৰে’’তি. নৱমং;