১০. উতেনসুত্তং

৭০. এৱং মে সুতং – একং সমযং ভগৱা কোসম্বিযং ৱিহৰতি ঘোসিতাৰামে. তেন খো পন সমযেন ৰঞ্ঞো উতেনস্স [উদেনস্স (সী. স্যা. পী.)] উয্যানগতস্স অন্তেপুৰং দড্ঢং হোতি, পঞ্চ চ ইত্থিসতানি [পঞ্চ ইত্থিসতানি (সী. স্যা. পী.)] কালঙ্কতানি হোন্তি সামাৱতীপমুখানি.

অথ খো সম্বহুলা ভিক্খূ পুব্বণ্হসমযং নিৱাসেত্ৱা পত্তচীৱৰমাদায কোসম্বিং পিণ্ডায পাৱিসিংসু. কোসম্বিযং পিণ্ডায চৰিত্ৱা পচ্ছাভত্তং পিণ্ডপাতপটিক্কন্তা যেন ভগৱা তেনুপসঙ্কমিংসু; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদিংসু. একমন্তং নিসিন্না খো তে ভিক্খূ ভগৱন্তং এতদৱোচুং – ‘‘ইধ, ভন্তে, ৰঞ্ঞো উতেনস্স উয্যানগতস্স অন্তেপুৰং দড্ঢং, পঞ্চ চ ইত্থিসতানি কালঙ্কতানি সামাৱতীপমুখানি. তাসং, ভন্তে, উপাসিকানং কা গতি কো অভিসম্পৰাযো’’তি?

‘‘সন্তেত্থ, ভিক্খৱে, উপাসিকাযো সোতাপন্না, সন্তি সকদাগামিনিযো, সন্তি অনাগামিনিযো. সব্বা তা, ভিক্খৱে, উপাসিকাযো অনিপ্ফলা কালঙ্কতা’’তি.

অথ খো ভগৱা এতমত্থং ৱিদিত্ৱা তাযং ৱেলাযং ইমং উদানং উদানেসি –

‘‘মোহসম্বন্ধনো লোকো, ভব্বৰূপোৱ দিস্সতি;

উপধিবন্ধনো [উপধিসম্বন্ধনো (ক. সী.)] বালো, তমসা পৰিৱাৰিতো;

সস্সতোৰিৱ [সস্সতি ৱিয (ক. সী.)] খাযতি, পস্সতো নত্থি কিঞ্চন’’ন্তি. দসমং;

তস্সুদ্দানং –

দ্ৱে ভদ্দিযা দ্ৱে চ সত্তা, লকুণ্ডকো তণ্হাখযো;

পপঞ্চখযো চ কচ্চানো, উদপানঞ্চ উতেনোতি.

চূড়ৱগ্গো [চুল্লৱগ্গো (সী.), চূলৱগ্গো (পী.)] সত্তমো নিট্ঠিতো.