৫. পঞ্চকনিপাতো

১. অঞ্ঞতৰাথেৰীগাথা

৬৭. ‘‘পণ্ণৱীসতিৱস্সানি, যতো পব্বজিতা অহং;

নাচ্ছৰাসঙ্ঘাতমত্তম্পি, চিত্তস্সূপসমজ্ঝগং.

৬৮. ‘‘অলদ্ধা চেতসো সন্তিং, কামৰাগেনৱস্সুতা;

বাহা পগ্গয্হ কন্দন্তী, ৱিহাৰং পাৱিসিং অহং.

৬৯. ‘‘সা ভিক্খুনিং উপাগচ্ছিং, যা মে সদ্ধাযিকা অহু;

সা মে ধম্মমদেসেসি, খন্ধাযতনধাতুযো.

৭০. ‘‘তস্সা ধম্মং সুণিত্ৱান, একমন্তে উপাৱিসিং;

পুব্বেনিৱাসং জানামি, দিব্বচক্খু ৱিসোধিতং.

৭১. ‘‘চেতোপৰিচ্চঞাণঞ্চ [চেতোপৰিযঞাণঞ্চ (ক.)], সোতধাতু ৱিসোধিতা;

ইদ্ধীপি মে সচ্ছিকতা, পত্তো মে আসৱক্খযো;

ছড়ভিঞ্ঞা [ছ মেভিঞ্ঞা (স্যা. ক.)] সচ্ছিকতা, কতং বুদ্ধস্স সাসন’’ন্তি.

… অঞ্ঞতৰা থেৰী ….

২. ৱিমলাথেৰীগাথা

৭২. ‘‘মত্তা ৱণ্ণেন ৰূপেন, সোভগ্গেন যসেন চ;

যোব্বনেন চুপত্থদ্ধা, অঞ্ঞাসমতিমঞ্ঞিহং.

৭৩. ‘‘ৱিভূসেত্ৱা ইমং কাযং, সুচিত্তং বাললাপনং;

অট্ঠাসিং ৱেসিদ্ৱাৰম্হি, লুদ্দো পাসমিৱোড্ডিয.

৭৪. ‘‘পিলন্ধনং ৱিদংসেন্তী, গুয্হং পকাসিকং বহুং;

অকাসিং ৱিৱিধং মাযং, উজ্জগ্ঘন্তী বহুং জনং.

৭৫. ‘‘সাজ্জ পিণ্ডং চৰিত্ৱান, মুণ্ডা সঙ্ঘাটিপাৰুতা;

নিসিন্না ৰুক্খমূলম্হি, অৱিতক্কস্স লাভিনী.

৭৬. ‘‘সব্বে যোগা সমুচ্ছিন্না, যে দিব্বা যে চ মানুসা;

খেপেত্ৱা আসৱে সব্বে, সীতিভূতাম্হি নিব্বুতা’’তি.

… ৱিমলা পুৰাণগণিকা থেৰী….

৩. সীহাথেৰীগাথা

৭৭. ‘‘অযোনিসো মনসিকাৰা, কামৰাগেন অট্টিতা;

অহোসিং উদ্ধতা পুব্বে, চিত্তে অৱসৱত্তিনী.

৭৮. ‘‘পৰিযুট্ঠিতা ক্লেসেহি, সুভসঞ্ঞানুৱত্তিনী;

সমং চিত্তস্স ন লভিং, ৰাগচিত্তৱসানুগা.

৭৯. ‘‘কিসা পণ্ডু ৱিৱণ্ণা চ, সত্ত ৱস্সানি চাৰিহং;

নাহং দিৱা ৱা ৰত্তিং ৱা, সুখং ৱিন্দিং সুদুক্খিতা.

৮০. ‘‘ততো ৰজ্জুং গহেত্ৱান, পাৱিসিং ৱনমন্তৰং;

ৱৰং মে ইধ উব্বন্ধং, যঞ্চ হীনং পুনাচৰে.

৮১. ‘‘দড়্হপাসং [দড়্হং পাসং (সী.)] কৰিত্ৱান, ৰুক্খসাখায বন্ধিয;

পক্খিপিং পাসং গীৱাযং, অথ চিত্তং ৱিমুচ্চি মে’’তি.

… সীহা থেৰী….

৪. সুন্দৰীনন্দাথেৰীগাথা

৮২. ‘‘আতুৰং অসুচিং পূতিং, পস্স নন্দে সমুস্সযং;

অসুভায চিত্তং ভাৱেহি, একগ্গং সুসমাহিতং.

৮৩. ‘‘যথা ইদং তথা এতং, যথা এতং তথা ইদং;

দুগ্গন্ধং পূতিকং ৱাতি, বালানং অভিনন্দিতং.

৮৪. ‘‘এৱমেতং অৱেক্খন্তী, ৰত্তিন্দিৱমতন্দিতা;

ততো সকায পঞ্ঞায, অভিনিব্বিজ্ঝ [অভিনিব্বিজ্জ (সী. স্যা.)] দক্খিসং.

৮৫. ‘‘তস্সা মে অপ্পমত্তায, ৱিচিনন্তিযা যোনিসো;

যথাভূতং অযং কাযো, দিট্ঠো সন্তৰবাহিৰো.

৮৬. ‘‘অথ নিব্বিন্দহং কাযে, অজ্ঝত্তঞ্চ ৱিৰজ্জহং;

অপ্পমত্তা ৱিসংযুত্তা, উপসন্তাম্হি নিব্বুতা’’তি.

… সুন্দৰীনন্দা থেৰী….

৫. নন্দুত্তৰাথেৰীগাথা

৮৭. ‘‘অগ্গিং চন্দঞ্চ সূৰিযঞ্চ, দেৱতা চ নমস্সিহং;

নদীতিত্থানি গন্ত্ৱান, উদকং ওৰুহামিহং.

৮৮. ‘‘বহূৱতসমাদানা, অড্ঢং সীসস্স ওলিখিং;

ছমায সেয্যং কপ্পেমি, ৰত্তিং ভত্তং ন ভুঞ্জহং.

৮৯. ‘‘ৱিভূসামণ্ডনৰতা, ন্হাপনুচ্ছাদনেহি চ;

উপকাসিং ইমং কাযং, কামৰাগেন অট্টিতা.

৯০. ‘‘ততো সদ্ধং লভিত্ৱান, পব্বজিং অনগাৰিযং;

দিস্ৱা কাযং যথাভূতং, কামৰাগো সমূহতো.

৯১. ‘‘সব্বে ভৱা সমুচ্ছিন্না, ইচ্ছা চ পত্থনাপি চ;

সব্বযোগৱিসংযুত্তা, সন্তিং পাপুণি চেতসো’’তি.

… নন্দুত্তৰা থেৰী….

৬. মিত্তাকাড়ীথেৰীগাথা

৯২. ‘‘সদ্ধায পব্বজিত্ৱান, অগাৰস্মানগাৰিযং;

ৱিচৰিংহং তেন তেন, লাভসক্কাৰউস্সুকা.

৯৩. ‘‘ৰিঞ্চিত্ৱা পৰমং অত্থং, হীনমত্থং অসেৱিহং;

কিলেসানং ৱসং গন্ত্ৱা, সামঞ্ঞত্থং ন বুজ্ঝিহং.

৯৪. ‘‘তস্সা মে অহু সংৱেগো, নিসিন্নায ৱিহাৰকে;

উম্মগ্গপটিপন্নাম্হি, তণ্হায ৱসমাগতা.

৯৫. ‘‘অপ্পকং জীৱিতং ময্হং, জৰা ব্যাধি চ মদ্দতি;

পুৰাযং ভিজ্জতি [জৰায ভিজ্জতে (সী.)] কাযো, ন মে কালো পমজ্জিতুং.

৯৬. ‘‘যথাভূতমৱেক্খন্তী, খন্ধানং উদযব্বযং;

ৱিমুত্তচিত্তা উট্ঠাসিং, কতং বুদ্ধস্স সাসন’’ন্তি.

… মিত্তা কাড়ী থেৰী….

৭. সকুলাথেৰীগাথা

৯৭. ‘‘অগাৰস্মিং ৱসন্তীহং, ধম্মং সুত্ৱান ভিক্খুনো;

অদ্দসং ৱিৰজং ধম্মং, নিব্বানং পদমচ্চুতং.

৯৮. ‘‘সাহং পুত্তং ধীতৰঞ্চ, ধনধঞ্ঞঞ্চ ছড্ডিয;

কেসে ছেদাপযিত্ৱান, পব্বজিং অনগাৰিযং.

৯৯. ‘‘সিক্খমানা অহং সন্তী, ভাৱেন্তী মগ্গমঞ্জসং;

পহাসিং ৰাগদোসঞ্চ, তদেকট্ঠে চ আসৱে.

১০০. ‘‘ভিক্খুনী উপসম্পজ্জ, পুব্বজাতিমনুস্সৰিং;

দিব্বচক্খু ৱিসোধিতং [ৱিসোধিতং দিব্বচক্খু (সী.)], ৱিমলং সাধুভাৱিতং.

১০১. ‘‘সঙ্খাৰে পৰতো দিস্ৱা, হেতুজাতে পলোকিতে [পলোকিনে (ক.)];

পহাসিং আসৱে সব্বে, সীতিভূতাম্হি নিব্বুতা’’তি.

… সকুলা থেৰী….

৮. সোণাথেৰীগাথা

১০২. ‘‘দস পুত্তে ৱিজাযিত্ৱা, অস্মিং ৰূপসমুস্সযে;

ততোহং দুব্বলা জিণ্ণা, ভিক্খুনিং উপসঙ্কমিং.

১০৩. ‘‘সা মে ধম্মমদেসেসি, খন্ধাযতনধাতুযো;

তস্সা ধম্মং সুণিত্ৱান, কেসে ছেত্ৱান পব্বজিং.

১০৪. ‘‘তস্সা মে সিক্খমানায, দিব্বচক্খু ৱিসোধিতং;

পুব্বেনিৱাসং জানামি, যত্থ মে ৱুসিতং পুৰে.

১০৫. ‘‘অনিমিত্তঞ্চ ভাৱেমি, একগ্গা সুসমাহিতা;

অনন্তৰাৱিমোক্খাসিং, অনুপাদায নিব্বুতা.

১০৬. ‘‘পঞ্চক্খন্ধা পৰিঞ্ঞাতা, তিট্ঠন্তি ছিন্নমূলকা;

ধি তৱত্থু জৰে জম্মে, নত্থি দানি পুনব্ভৱো’’তি.

… সোণা থেৰী….

৯. ভদ্দাকুণ্ডলকেসাথেৰীগাথা

১০৭. ‘‘লূনকেসী পঙ্কধৰী, একসাটী পুৰে চৰিং;

অৱজ্জে ৱজ্জমতিনী, ৱজ্জে চাৱজ্জদস্সিনী.

১০৮. ‘‘দিৱাৱিহাৰা নিক্খম্ম, গিজ্ঝকূটম্হি পব্বতে;

অদ্দসং ৱিৰজং বুদ্ধং, ভিক্খুসঙ্ঘপুৰক্খতং.

১০৯. ‘‘নিহচ্চ জাণুং ৱন্দিত্ৱা, সম্মুখা অঞ্জলিং অকং;

‘এহি ভদ্দে’তি মং অৱচ, সা মে আসূপসম্পদা.

১১০. ‘‘চিণ্ণা অঙ্গা চ মগধা, ৱজ্জী কাসী চ কোসলা;

অনণা পণ্ণাসৱস্সানি, ৰট্ঠপিণ্ডং অভুঞ্জহং.

১১১. ‘‘পুঞ্ঞং ৱত পসৱি বহুং, সপ্পঞ্ঞো ৱতাযং উপাসকো;

যো ভদ্দায চীৱৰং অদাসি, ৱিপ্পমুত্তায সব্বগন্থেহী’’তি.

… ভদ্দা কুণ্ডলকেসা থেৰী….

১০. পটাচাৰাথেৰীগাথা

১১২. ‘‘নঙ্গলেহি কসং খেত্তং, বীজানি পৱপং ছমা;

পুত্তদাৰানি পোসেন্তা, ধনং ৱিন্দন্তি মাণৱা.

১১৩. ‘‘কিমহং সীলসম্পন্না, সত্থুসাসনকাৰিকা;

নিব্বানং নাধিগচ্ছামি, অকুসীতা অনুদ্ধতা.

১১৪. ‘‘পাদে পক্খালযিত্ৱান, উদকেসু কৰোমহং;

পাদোদকঞ্চ দিস্ৱান, থলতো নিন্নমাগতং.

১১৫. ‘‘ততো চিত্তং সমাধেসিং, অস্সং ভদ্ৰংৱজানিযং;

ততো দীপং গহেত্ৱান, ৱিহাৰং পাৱিসিং অহং;

সেয্যং ওলোকযিত্ৱান, মঞ্চকম্হি উপাৱিসিং.

১১৬. ‘‘ততো সূচিং গহেত্ৱান, ৱট্টিং ওকস্সযামহং;

পদীপস্সেৱ নিব্বানং, ৱিমোক্খো অহু চেতসো’’তি.

… পটাচাৰা থেৰী….

১১. তিংসমত্তাথেৰীগাথা

১১৭. ‘‘‘মুসলানি গহেত্ৱান, ধঞ্ঞং কোট্টেন্তি মাণৱা [মানৱা (সী.)];

পুত্তদাৰানি পোসেন্তা, ধনং ৱিন্দন্তি মাণৱা.

১১৮. ‘‘‘কৰোথ বুদ্ধসাসনং, যং কত্ৱা নানুতপ্পতি;

খিপ্পং পাদানি ধোৱিত্ৱা, একমন্তে নিসীদথ;

চেতোসমথমনুযুত্তা, কৰোথ বুদ্ধসাসনং’.

১১৯. ‘‘তস্সা তা [তং (সী.)] ৱচনং সুত্ৱা, পটাচাৰায সাসনং;

পাদে পক্খালযিত্ৱান, একমন্তং উপাৱিসুং;

চেতোসমথমনুযুত্তা, অকংসু বুদ্ধসাসনং.

১২০. ‘‘ৰত্তিযা পুৰিমে যামে, পুব্বজাতিমনুস্সৰুং;

ৰত্তিযা মজ্ঝিমে যামে, দিব্বচক্খুং ৱিসোধযুং;

ৰত্তিযা পচ্ছিমে যামে, তমোখন্ধং পদালযুং.

১২১. ‘‘উট্ঠায পাদে ৱন্দিংসু, ‘কতা তে অনুসাসনী;

ইন্দংৱ দেৱা তিদসা, সঙ্গামে অপৰাজিতং;

পুৰক্খত্ৱা ৱিহস্সাম [ৱিহৰাম (সী.), ৱিহৰিস্সাম (স্যা.)], তেৱিজ্জাম্হ অনাসৱা’’’তি.

ইত্থং সুদং তিংসমত্তা থেৰী ভিক্খুনিযো পটাচাৰায সন্তিকে অঞ্ঞং ব্যাকৰিংসূতি.

১২. চন্দাথেৰীগাথা

১২২. ‘‘দুগ্গতাহং পুৰে আসিং, ৱিধৱা চ অপুত্তিকা;

ৱিনা মিত্তেহি ঞাতীহি, ভত্তচোড়স্স নাধিগং.

১২৩. ‘‘পত্তং দণ্ডঞ্চ গণ্হিত্ৱা, ভিক্খমানা কুলা কুলং;

সীতুণ্হেন চ ডয্হন্তী, সত্ত ৱস্সানি চাৰিহং.

১২৪. ‘‘ভিক্খুনিং পুন দিস্ৱান, অন্নপানস্স লাভিনিং;

উপসঙ্কম্ম অৱোচং [অৱোচিং (ক.)], ‘পব্বজ্জং অনগাৰিযং’.

১২৫. ‘‘সা চ মং অনুকম্পায, পব্বাজেসি পটাচাৰা;

ততো মং ওৱদিত্ৱান, পৰমত্থে নিযোজযি.

১২৬. ‘‘তস্সাহং ৱচনং সুত্ৱা, অকাসিং অনুসাসনিং;

অমোঘো অয্যাযোৱাদো, তেৱিজ্জাম্হি অনাসৱা’’তি.